1 Ma ou te toe fai atu, o a’u, o Alema, ina ua poloaiina a’u e le Atua ia ou ave Amoleka ma alu atu ma toe tala’i atu i lenei nuu, po o tagata o e sa i le aai o Amonaea, sa oo ina a’o amata ona ’ou tala’i atu ia te i latou, sa amata ona latou finau mai ia te a’u, fai mai:

2 O ai oe? E te manatu ea o le a matou talitonu i le molimau a se tagata e toatasi, e ui ina faapea e tala’i mai ia te i matou e faapea o le a mavae atu le lalolagi?

3 O lenei sa latou lē malamalama i upu na latou tautatala mai ai; ona sa latou lē iloa o le a mavae atu le lalolagi.

4 Ma sa latou fai mai foi: Matou te lē talitonu i au upu pe afai e te vavalo mai o le a faaumatia lenei aai tele i se aso e tasi.

5 O lenei sa latou lē iloa e mafai e le Atua ona fai o galuega ofoofogia faapena, ona o i latou o ni tagata loto-maaa ma ua maaa.

6 Ma sa latou fai mai: O ai le Atua, ua ia lē auina mai ai i totonu o lenei nuu se pule tele atu nai lo se tagata e toatasi, e alaga mai ia te i latou le moni o ia mea tetele ma ofoofogia faapea?

7 Ma sa latou tutula’i mai e pa’i mai o latou lima ia te a’u; ae faauta, sa latou lē mafai ona fai. Ma sa ou tula’i atu ma le lotoa e tautino atu ia te i latou, ioe, sa ou molimau atu ma le mautinoa ia te i latou, e faapea:

8 Faauta, E, outou e le tupulaga amioleaga ma faapi’opi’o, ua vave lava ona galo ia te outou le uputuu a o outou tamā; ioe, ua vave lava ona galo ia te outou poloaiga a le Atua.

9 Tou te lē manatua ea o lo tatou tamā, o Liae, na aumai mai Ierusalema e le aao o le Atua? Tou te lē manatua ea na ia ta’ita’iina i latou uma i le vao?

10 Ma pe ua vave ea ona galo ia te outou le tele o taimi na ia laveai ai o tatou tamā mai lima o o latou fili, ma faasaoina i latou mai le faaumatiaina, i lima o o latou lava uso?

11 Ioe, ma a na leai lona mana lē mafaatusalia, ma lona alofa mutimutivale, ma lona tali-tigā mai ia i tatou, po ua lē maalofia le leva ona vavae ese o i tatou mai luga o le lalolagi ae le’i taitai ona oo mai i le vaitaimi nei, ma atonu ua tuu i tatou i se tulaga o le pagatia ma le malaia e lē gata.

12 Faauta, ou te fai atu nei ia te outou ua ia poloai mai ia te outou ia outou salamo; ma vaganā ai ua outou salamo, e lē mafai lava i soo se auala ona outou mautofi i le malo o le Atua. Ae faauta, ua lē ona pau lea—ua ia poloaiina outou ia outou salamo, a leai o le a ia matuā faaumatia lava outou mai luga o le fogaeleele; ioe, o le a ia asiasi mai ia te outou i lona toasa, ma o le a ia lē liliu ese mai lona toasa tele.

13 Faauta, tou te lē manatua ea afioga na ia fetalai mai ia Liae, e faapea: E tusa ai ma lo outou tausia o a’u poloaiga, o le a outou manuia i le laueleele? Ma sa toe fetalai mai e faapea: E tusa ai ma lo outou lē tausia o a’u poloaiga o le a vavae ese outou mai luma o le Alii.

14 O lenei ou te manao ia outou manatua, e tusa ai ma le lē tausia e sa Lamanā o poloaiga a le Atua, ua vavae ese i latou mai luma o le Alii. O lenei ua tatou vaai ua faamaonia le afioga a le Alii i lenei mea, ma ua vavae ese sa Lamanā mai i ona luma, mai le amataga o a latou soligatulafono i le laueleele.

15 Ae ui i lea ou te fai atu ia te outou, o le a sili atu ona latou gafatiaina nai lo outou i le aso faamasino, pe afai tou te tutumau ia outou agasala, ioe, ma sili atili atu ona latou gafatiaina i le olaga nei nai lo outou, vaganā ai ua outou salamo.

16 Ona e i ai folafolaga e tele ua tuuina atu ia sa Lamanā; ona o uputuu a o latou tamā ua ala ai ona latou tutumau i lo latou tulaga o le lē malamalama; o lea o le a alofa mutimutivale ai le Alii ia te i latou ma faalevaleva lo latou ola ai i le laueleele.

17 Ma e i ai se vaitaimi o le a aumai ai i latou ia talitonu i lana afioga, ma latou iloa le sesē o uputuu a o latou tamā; ma e toatele i latou o le a faaolaina, ona o le a alofa mutimutivale le Alii ia te i latou uma o e e valaau atu i lona suafa.

18 Ae faauta, ou te fai atu ia te outou afai tou te tausiusi pea i lo outou amioleaga o le a lē faalevalevaina o outou aso i le laueleele, ona o le a auina mai sa Lamanā i o outou luga; ma afai tou te lē salamo o le a latou o mai i se taimi tou te lē iloa, ma o le a asia outou i le faafanoga tele; ma o le a faia e tusa ai ma le toasa tele o le Alii.

19 Ona o le a ia lē tuu outou ia outou ola ia outou amioletonu, e faaumatia ai ona tagata. Ou te fai atu ia te outou, E leai; e sili ia te ia le tuu o sa Lamanā ia mafai ona latou faaumatiaina ona tagata uma o e ua ta’ua o le nuu o Nifae, pe afai e mafai ona latou pa’u’ū atu i agasala ma soligatulafono, ina ua mavae lea ona tuuina mai ia te i latou le malamalama tele na’uā ma le poto tele na’uā e le Alii lo latou Atua;

20 Ioe, ina ua mavae ona avea ma tagata sili ona alofagia e le Alii; ioe, ina ua mavae ona alofagia sili atu i isi atunuu uma, ituaiga, gagana, po o nuu; ina ua mavae ona faaali mai o mea uma ia te i latou, e tusa ai ma o latou manao, ma lo latou faatuatua, ma tatalo, e uiga i mea sa i ai, ma mea o i ai, ma mea o le a oo mai;

21 Ina ua mavae lea ona asia o i latou e le Agaga o le Atua; ma fetautalatalaai ma agelu, ma fetalai mai i ai le siufofoga o le Alii; ma ina ua latou maua le agaga o valoaga, ma le agaga o faaaliga, ma meaalofa foi e tele, o le meaalofa o le tautatala i gagana, ma le meaalofa o le talai atu, ma le meaalofa a le Agaga Paia, ma le meaalofa o le faaliliuina o gagana;

22 Ioe, ma ina ua mavae ona laveaiina o i latou e le Atua mai le laueleele o Ierusalema, i le aao o le Alii; ina ua faaolaina i latou mai le oge, ma mai i ma’i, ma ituaiga uma o faama’i eseese; ma ina ua latou faasolo malolosi i taua, ina ia lē mafai ona faaumatiaina o i latou; ma ina ua aveeseina mai le pologa i lea taimi ma lea taimi, ma tausia ma faasaoina seia oo mai i le taimi nei; ma ua faamanuiaina i latou seia oo ina latou mauoa i ituaiga o mea eseese uma—

23 Ma o lenei faauta ou te fai atu ia te outou, afai e solitulafono lenei nuu, o e ua latou maua faamanuiaga e tele mai le aao o le Alii, e lē tusa ai ma le malamalama ma le poto ua latou maua, ou te fai atu ia te outou afai o le tulaga lea e oo i ai, pe afai o le a latou pa’u’ū atu i le solitulafono, o le a sili atu ona gafatiaina mo sa Lamanā, nai lo mo i latou.

24 Auā faauta, ua tuuina atu ia sa Lamanā folafolaga a le Alii, ae ua lē tuuina atu ia folafolaga ia te outou pe afai tou te solitulafono; ona e le’i folafola manino mai ea ma pulea faamauina e le Alii, e faapea afai tou te fouvale faasaga atu ia te ia o le a matuā faaumatia lava outou mai luga o le fogaeleele?

25 Ma o lenei ina ia lē faaumatiaina outou, o le pogai lea na auina mai ai e le Alii lana agelu e asiasi mai i le toatele o ona tagata, e alaga mai ia te i latou e ao ina latou o atu ma alalaga malosi atu i lenei nuu, e faapea: Ia outou salamo, ona ua latalata ona oo mai le malo o le lagi;

26 Ma ua lē tele ni aso mai le taimi nei ae o le a afio mai le Alo o le Atua i lona mamalu; ma o lona mamalu o le mamalu lea o le Toatasi na Fanaua e le Tamā, ua tumu i le alofa tunoa, fai mea tutusa, ma le upumoni, ua tumu i le onosai, alofa mutimutivale, ma le tali-tigā, e vave ona faafofoga mai i tagi a ona tagata ma tali mai ia latou tatalo.

27 Ma faauta, e afio mai o ia e togiola i latou o e e papatiso i le salamo, e ala i le faatuatua i lona suafa.

28 O lea, ia outou teuteu le ala o le Alii, ona ua lata mai le taimi e selesele ai e tagata uma se taui o a latou galuega, e tusa ma tulaga sa latou i ai—afai sa latou amiotonu o le a latou selesele le faaolataga mo o latou agaga, e tusa ma le mana ma le laveaiina a Iesu Keriso; ae afai sa latou amioleaga o le a latou selesele le malaia mo o latou agaga, e tusa ma le mana ma le faatagataotauaina a le tiapolo.

29 O lenei faauta, o le siufofoga lea o le agelu, ua alaga atu i tagata.

30 Ma o lenei, o’u uso pele e, ona o outou o o’u uso, ma e ao ina pele o outou, ma e ao ina outou aumai galuega ua tatau ai mo le salamo, ona ua vaaia ua matuā faamaaa o outou loto e faasaga i le afioga a le Atua, ma ona ua vaai ua avea outou ma ni tagata ua sē ma pa’u’ū.

31 O lenei sa oo ina ua uma ona tautala atu e a’u, o Alema, nei upu, faauta, sa feitai tagata ia te a’u ona sa ’ou fai atu ia te i latou o i latou o ni tagata loto-maaa ma ua maaa.

32 Ma ona sa ’ou fai atu foi ia te i latou o i latou o ni tagata ua sē ma pa’u’ū, sa latou feitai mai ia te a’u, ma taumafai e faaoo mai o latou lima ia te a’u, ina ia mafai ona latou lafo o a’u i le falepuipui.

33 Peitai sa oo ina sa le’i tuuina atu e le Alii ia i latou ia latou ave a’u i le taimi lena ma lafo a’u i le falepuipui.

34 Ma sa oo ina alu atu Amoleka ma tula’i atu, ma amata ona tala’i atu foi ia te i latou. Ma o lenei ua lē tusia upu uma a Amoleka, ae ui i lea ua tusia se vaega o ana upu i lenei tusi.