1 Ug nahitabo nga gisugo niya ang pundok sa katawhan nga mohunong sila sa pag-ampo, ug usab ang iyang mga disipulo. Ug misugo siya kanila nga dili sila mohunong sa pag-ampo pinaagi sa ilang mga kasingkasing.

2 Ug misugo siya kanila nga sila mobangon ug motindog sa ilang mga tiil. Ug mibangon sila ug mitindog sa ilang mga tiil.

3 Ug nahitabo nga gipikaspikas niya ang pan pag-usab ug mipanalangin, ug mihatag niini ngadto sa iyang mga disipulo aron kan-on.

4 Ug sa diha nga nakakaon na sila misugo siya kanila nga sila mopikaspikas sa pan, ug ihatag ngadto sa pundok sa katawhan.

5 Ug sa dihang nakahatag na sila ngadto sa pundok sa katawhan mihatag usab siya kanila og bino nga imnon, ug misugo kanila nga sila mohatag ngadto sa pundok sa katawhan.

6 Karon, nahitabo nga walay dala nga pan, ni bino, ang pundok sa katawhan;

7 Apan sa pagkatinuod siya mihatag ngadto kanila og pan nga kaonon, ug usab bino nga imnon.

8 Ug miingon siya kanila: Siya nga mokaon niini nga pan mokaon sa akong lawas ngadto sa iyang kalag; ug siya nga moinom niini nga bino moinom sa akong dugo ngadto sa iyang kalag; ug ang iyang kalag dili gayod gutomon ni uhawon, apan pagatagbawon.

9 Karon, sa dihang ang tanang pundok sa katawhan nakakaon na ug nakainom, tan-awa, napuno sila sa Espiritu; ug misinggit sila sa usa ka tingog, ug mihimaya kang Jesus, kinsa ilang nakita ug nadungog.

10 Ug nahitabo nga sa dihang silang tanan nakahimaya na kang Jesus, miingon siya kanila: Tan-awa karon akong taposon ang sugo nga gisugo sa Amahan kanako kabahin niining katawhan, nga salin sa balay ni Israel.

11 Kamo nahinumdom nga ako namulong kaninyo, ug miingon nga sa higayon nga ang mga pulong ni Isaias matuman—tan-awa, nahisulat kini, kamo aduna niini diha kaninyo, busa pangitaa kini—

12 Ug sa pagkatinuod, sa pagkatinuod, sultihan ko kamo, nga sa higayon nga kini matuman mao na kana ang katumanan sa pakigsaad nga gihimo sa Amahan ngadto sa iyang katawhan, O balay ni Israel.

13 Ug unya ang mga salin, nga nagkatibulaag sa ibabaw sa tibuok yuta, pagapundokon gikan sa silangan ug gikan sa kasadpan, ug gikan sa habagatan ug gikan sa amihanan; ug sila pagadad-on ngadto sa kahibalo bahin sa Ginoo nga ilang Dios, nga mitubos kanila.

14 Ug ang Amahan misugo kanako nga ako kinahanglang mohatag kaninyo niini nga yuta, nga inyong kabilin.

15 Ug sultihan ko kamo, nga kon ang mga Hentil dili maghinulsol human sa panalangin nga ilang madawat, human nga ilang matibulaag ang akong katawhan—

16 Nianang higayona kamo, nga salin sa balay ni Jacob, moadto taliwala kanila; ug maanaa kamo sa taliwala kanila nga daghan; ug makig-uban kamo kanila sama sa usa ka liyon taliwala sa mga mananap sa kalasangan, ug sama sa usa ka batan-on nga liyon taliwala sa mga gagmayng pundok sa karnero, nga, kon siya moagi pagayatak-yatakan ug kunis-kunison, ug walay makaluwas.

17 Ang inyong kamot ibakyaw nganha sa inyong mga kaaway, ug ang tanan ninyong mga kaaway mamatay.

18 Ug ako mopundok sa akong katawhan ingon sa usa ka tawo nga mipundok sa iyang mga dbinangan ngadto sa salog.

19 Kay ako mohimo sa akong katawhan kang kinsa ang Amahan nakigsaad, oo, akong himoong puthaw ang inyong sungay, ug akong himoong tumbaga ang inyong mga kuko. Ug dugmokon ninyo ang daghang katawhan; ug akong ipahinungod ang ilang kaayohan ngadto sa Ginoo, ug ang ilang kabtangan ngadto sa Ginoo sa tibuok yuta. Ug tan-awa, ako ang mohimo niini.

20 Ug mahitabo, miingon ang Amahan, nga ang espada sa akong kaangayan andam na alang kanila nianang adlawa; ug gawas kon maghinulsol sila matagak kini diha kanila, miingon ang Amahan, oo, gani sa tanang nasod sa mga Hentil.

21 Ug mahitabo nga ako motukod sa akong katawhan, O balay ni Israel.

22 Ug tan-awa, kini nga katawhan akong itukod niini nga yuta, ngadto sa katumanan sa pakigsaad nga akong gihimo ngadto sa inyong amahan nga si Jacob; ug mao kini ang Bag-o nga Jerusalem. Ug ang mga gahom sa langit mopataliwala niini nga katawhan; oo, gani ako mopataliwala kaninyo.

23 Tan-awa, ako mao ang gipamulong ni Moises, nga nag-ingon: Usa ka propeta ang ituboy sa Ginoo nga inyong Dios nganha kaninyo sa inyong mga kaigsuonan, sama kanako; kaniya kamo mamati sa tanang butang bisan unsa nga iyang isulti kaninyo. Ug mahitabo nga ang matag kalag nga dili mamati niana nga propeta ipahimulag gikan sa taliwala sa katawhan.

24 Sa pagkatinuod sultihan ko kamo, oo, ug ang tanan nga propeta gikan ni Samuel ug kadtong nagsunod kaniya, kutob sa nakapamulong, nagpamatuod kanako.

25 Ug tan-awa, kamo ang mga anak sa mga propeta; ug mga sakop kamo sa balay ni Israel; ug mga sakop kamo sa pakigsaad nga gihimo sa Amahan ngadto sa inyong mga amahan, nga nag-ingon kang Abraham: Ug diha sa imong binhi ang tanan nga kaliwatan sa yuta mapanalanginan.

26 Ang Amahan kay unang mituboy kanako nganha kaninyo, ug mipadala kanako sa pagpanalangin kaninyo sa pagpabiya sa matag usa kaninyo gikan sa iyang mga kadaotan; ug tungod kay kamo mao ang mga anak sa pakigsaad—

27 Ug human nga kamo mapanalanginan niana natuman na sa Amahan ang pakigsaad nga iyang gihimo ngadto kang Abraham, nga nag-ingon: Diha sa imong binhi ang tanang kaliwatan sa yuta mapanalanginan—diha sa pagbu-bo sa Espiritu Santo pinaagi kanako ngadto sa mga Hentil, diin nga panalangin nganha sa mga Hentil makapahimo kanilang gamhanan labaw sa tanan, ngadto sa pagpatibulaag sa akong katawhan, O balay ni Israel.

28 Ug mahimo sila nga usa ka latigo ngadto sa katawhan niini nga yuta. Bisan pa, kon makadawat na sila sa kahingpitan sa akong ebanghelyo, unya kon mopatig-a sila sa ilang mga kasingkasing batok kanako akong ibalik ang ilang pagkadaotan diha sa kaugalingon nilang mga ulo, miingon ang Amahan.

29 Ug ako mohinumdom sa pakigsaad nga akong gihimo ngadto sa akong katawhan; ug ako nakigsaad ngadto kanila nga ako mopundok kanila sa akong kaugalingong tukma nga panahon, nga akong ihatag kanila pag-usab ang yuta sa ilang mga amahan alang sa ilang kabilin, nga mao ang yuta sa Jerusalem, nga mao ang gisaad nga yuta ngadto kanila sa kahangtoran, miingon ang Amahan.

30 Ug mahitabo nga ang panahon moabot, nga ang kahingpitan sa akong ebanghelyo isangyaw ngadto kanila;

31 Ug motuo sila kanako, nga ako si Jesukristo, ang Anak sa Dios, ug mag-ampo sa Amahan sa akong ngalan.

32 Unya ang ilang mga magbalantay mopataas sa ilang tingog, ug uban sa nagkahiusa nga tingog manag-awit sila; kay sila magkakitaay mata sa mata.

33 Unya ang Amahan mopundok kanila pag-usab, ug ihatag ngadto kanila ang Jerusalem alang sa yuta nga ilang kabilin.

34 Ug dayon maninggit sila sa kamaya—Pag-awit kamo og dungan, kamong mga awaaw nga dapit sa Jerusalem; kay ang Amahan mihupay sa iyang katawhan, gitubos niya ang Jerusalem.

35 Ang Amahan mipakita sa iyang balaan nga bukton sa mga mata sa tanang kanasoran; ug ang mga lumulupyo sa yuta makakita sa kaluwasan sa Amahan; ug ang Amahan ug ako usa ra.

36 Ug unya mahitabo kana nga nahisulat: Pagmata, pagmata pag-usab, ug isul-ob ang imong kalig-on, O Zion; isul-ob ang imong matahom nga mga sapot, O Jerusalem, ang balaan nga siyudad, kay sukad karon dili na moabot nganha kanimo ang dili tinuli ug ang dili limpyo.

37 Yabyabi ang imong kaugalingon gikan sa abog; tindog, lingkod, O Jerusalem; badbari ang imong kaugalingon gikan sa mga higot sa imong liog, O binihag nga anak nga babaye sa Zion.

38 Kay ang Ginoo miingon: Kamo mibaligya sa inyong mga kaugalingon sa walay hinungdan, ug pagatubson kamo nga walay salapi.

39 Sa pagkatinuod, sa pagkatinuod sultihan ko kamo, nga ang akong katawhan makaila sa akong ngalan; oo, nianang adlawa makaila sila nga ako mao siya nga namulong.

40 Ug unya moingon sila: Pagkatahom sa mga tiil diha sa mga bukid kaniya nga nagdala og maayong mga balita ngadto kanila, nga nagsangyaw sa kalinaw; nga nagdala og maayong mga balita ngadto kanila nga matarong, nga nagsangyaw sa kaluwasan; nga nag-ingon sa Zion: Ang imong Dios naghari!

41 Ug unya usa ka pagpahibalo ang mabati: Pahawa kamo, pahawa kamo, biya kamo gikan dinha, ayaw paghikap nianang mahugaw; biya kamo gikan sa taliwala kaniya; magmahimong limpyo kamo nga nagdala sa mga sudlanan sa Ginoo.

42 Kay kamo dili mobiya nga magdali, ni molayas; kay ang Ginoo mogiya kaninyo, ug ang Dios sa Israel mahimo nga inyong bantay sa likod.

43 Tan-awa, ang akong sulugoon maalamon nga modumala; pagabayawon siya ug pagadayegon ug mahimo nga labihan ka halangdon.

44 Sama nga daghan ang nahibulong kanimo—ang iyang panagway ngil-ad kaayo, labaw pa ni bisan kinsa nga tawo, ug ang iyang pamarog labaw pa sa mga anak nga lalaki sa mga tawo—

45 Busa siya mobisbis sa daghang nasod; ang mga hari motak-om sa ilang mga ba-ba nganha kaniya, kay kanang wala pa gisugilon kanila ilang makita; ug kanang wala pa nila madungog ilang masabtan.

46 Sa pagkatinuod, sa pagkatinuod sultihan ko kamo, tanan kini nga butang moabot gayod, gani sama sa gisugo sa Amahan kanako. Unya kini nga pakigsaad nga gipakigsaad sa Amahan ngadto sa iyang katawhan matuman; ug unya ang Jerusalem puy-an pag-usab sa akong katawhan, ug mao kini ang yuta nga ilang kabilin.