1 Ug karon tan-awa, hinigugma kong kaigsoonan, mamulong ako kaninyo; kay ako, si Nephi, dili motugot nga kamo magdahom nga kamo mas matarong kay sa mga Hentil. Kay tan-awa, gawas kon kamo motuman sa mga sugo sa Dios kamong tanan usab mag-antos sa espirituhanong paagi; ug tungod sa mga pulong nga gipamulong dili kamo angayang magdahom nga ang mga Hentil malaglag sa hingpit.

2 Kay tan-awa, sultihan ko kamo, nga kutob sa daghang mga Hentil nga maghinulsol mamahimo nga katawhan sa pakigsaad sa Ginoo; ug kutob sa daghang mga Judeo nga dili maghinulsol isalikway; kay ang Ginoo dili makigsaad ni bisan kinsa gawas niadtong maghinulsol ug motuo sa iyang Anak, kinsa mao ang Usa nga Balaan sa Israel.

3 Ug karon, managna ako og dugang mahitungod sa mga Judeo ug sa mga Hentil. Kay human nga ang basahon nga akong gisulti motungha, ug isulat ngadto sa mga Hentil, ug selyohan pagbalik ngadto sa Ginoo, adunay daghan nga motuo sa mga pulong nga gisulat; ug sila modala niini ngadto sa salin sa atong binhi.

4 Ug unya ang salin sa atong binhi mahibalo mahitungod kanato, kon sa unsang paagi kita nakagawas gikan sa Jerusalem, ug nga sila mga kaliwat sa mga Judeo.

5 Ug ang ebanghelyo ni Jesukristo ipahayag ngadto kanila; mao nga, ipahiuli sila ngadto sa kahibalo bahin sa ilang mga amahan, ug usab ngadto sa kahibalo bahin ni Jesukristo, nga nahibaloan sa ilang mga amahan.

6 Ug dayon magmaya sila; kay sila masayod nga usa kini ka panalangin kanila gikan sa kamot sa Dios; ug ang mga himbis sa kangitngit mag-anam og pangatagak gikan sa ilang mga mata; ug daghan sa ilang henerasyon dili mangamatay, gawas kon mahimo silang putli ug makapahimuot nga katawhan.

7 Ug mahitabo nga ang mga Judeo nga nagkatibulaag usab magsugod sa pagtuo kang Kristo; ug magsugod sila sa pagkapundok sa ibabaw sa yuta; ug kutob sa daghang motuo kang Kristo mamahimo usab nga makapahimuot nga katawhan.

8 Ug mahitabo nga ang Ginoong Dios mosugod sa iyang buhat taliwala sa tanang kanasoran, kaliwatan, pinulongan, ug katawhan, aron ipahitabo ang pagpahiuli sa iyang katawhan sa yuta.

9 Ug pinaagi sa pagkamatarong ang Ginoong Dios mohukom sa mga kabos, ug mohukom sa makiangayong paagi sa mga maaghop sa yuta. Ug hampakon niya ang yuta pinaagi sa pulong sa iyang ba-ba; ug pinaagi sa gininhawa sa iyang mga ngabil patyon niya ang daotan.

10 Kay ang panahon dihadiha dayon moabot nga ang Ginoong Dios mohimo og dakong pagbahinbahin sa katawhan; ug ang daotan iyang laglagon, ug iyang luwason ang iyang katawhan, oo, gani kon gikinahanglan siya molaglag gayod sa mga daotan pinaagi sa kalayo.

11 Ug ang pagkamatarong mamahimo nga bakos sa iyang hawak, ug ang pagkamatinud-anon maoy bakos sa iyang mga bat-ang.

12 Ug unya ang lobo makig-uban sa nati nga karnero; ug ang leopardo modulog sa nati nga kanding, ug mag-ipon ang nati nga baka, ug ang nati nga leon, ug ang mga binuhi nga patambokon, magkauban; ug ang gamay nga bata ang moguyod kanila.

13 Ug ang baka ug ang uso manibsib; ang ilang mga nati magdulog sa pagpanghigda; ug ang leon manibsib og kumpay sama sa toro.

14 Ug ang masuso nga bata magdula sa lungag sa malala nga bitin, ug ang linutas nga bata mopasok sa iyang kamot sa halwa sa mabangis nga bitin.

15 Dili nila maguba ug malaglag ang akong tanan nga balaan nga bukid; kay ang yuta mapuno sa kahibalo sa Ginoo sama sa pagkapuno sa tubig sa kadagatan.

16 Mao nga, ang mga butang sa tanang kanasoran ibutyag; oo, ang tanan nga butang ibutyag ngadto sa mga anak sa katawhan.

17 Walay butang nga tinago nga dili ibutyag; walay buhat sa kangitngit nga dili ipakita diha sa kahayag; ug walay butang nga sinelyohan dinhi sa yuta nga dili pagabadbaran.

18 Mao nga, ang tanan nga butang nga gikapadayag na ngadto sa mga anak sa katawhan niana nga adlaw ipadayag; ug si Satanas wala nay gahom sa kasingkasing sa katawhan, sulod sa taas nga panahon. Ug karon, hinigugma kong kaigsoonan, ako motapos sa akong mga pamahayag.