1 I awor ami, Yakob, ta papia na boso atrobe, mi kerido rumannan, konserniente e taki rekto aki di kual mi a papia.

2 Pasobra mira, e promesanan kual nos a optené ta promesanan na nos di akuerdo ku e karni; pues, manera el a wòrdu mustrá n’ami ku hopi di nos yunan lo muri den e karni pa motibu di inkredulidat, sin embargo, Dios lo ta mizerikordioso na hopi; i nos yunan lo wòrdu restourá, ku nan por bini na e lokual lo duna nan e berdadero konosementu di nan Redentor.

3 Pues, manera mi a bisa na boso, ta nesesario ku Kristu—pasobra ayera anochi e angel a papia n’ami ku esaki lo mester ta su nòmber—lo bini entre e hudiunan, entre esnan ku ta e parti mas maligno di e mundu; i nan lo krusifik’é—pues asina e ta kumbiní nos Dios, i no tin ningun otro nashon na tera ku lo krusifiká nan Dios.

4 Pasobra si e milagernan poderoso wòrdu efektuá entre otro nashonnan nan lo arepentí, i sa ku e ta nan Dios.

5 Pero pa motibu di nan mañanan saserdotal i maldatnan, esnan na Herusalèm lo hasi nan garganta duru kontra di dje, pa wòrdu krusifiká.

6 Pues, pa motibu di nan maldat, destrukshon, hamber, pèstnan, i dramamentu di sanger lo bini riba nan; i esnan ku lo no wòrdu destruí lo wòrdu plamá entre tur nashon.

7 Pero tende, asina Señor Dios ta bisa: Ora e dia yega ku nan lo kere den mi, ku ami ta Kristu, e ora ei lo mi hasi kombenio ku nan tatanan pa nan por wòrdu restourá den e karni, riba e tera, na e teranan di nan herensia.

8 I lo sosodé ku nan lo wòrdu reuní for di nan plamamentu largu, for di e islanan di e laman, i for di e kuater parti di e tera; i e nashonnan di e gentilnan lo ta grandi den mi wowonan, Dios ta bisa, den hiba nan na e teranan di nan herensia.

9 Si, e reinan di e gentilnan lo ta tatanan di kriansa pa nan, i nan reinanan lo bira mamanan di pechu; pues, e promesa di Señor lo ta grandi na e gentilnan, pasobra el a papié, i ken por disputá?

10 Pero tende, e tera aki, Dios ta bisa, lo ta un tera di boso herensia, i e gentilnan lo wòrdu bendishoná riba e tera.

11 I e tera aki lo ta un tera di libertat pa e gentilnan, i lo no tin reinan riba e tera, ku lo lanta riba e gentilnan.

12 I lo mi fortifiká e tera aki kontra tur otro nashonnan.

13 I esun ku kombatí kontra Sion lo muri, Dios ta bisa.

14 Pasobra esun ku lanta un rei kontra mi lo bai pèrdí, pasobra ami, Señor, e rei di shelu, lo ta nan rei, i ami lo ta un lus na nan pa semper, ku skucha mi palabranan.

15 Pues, pa e kousa aki, pa mi kombenionan por wòrdu kumplí kual mi a hasi na e yunan di hende, ku lo mi hasi na nan miéntras nan ta den e karni, i mi mester destruí e obranan sekreto di skuridat, i di asesinatonan, i di abominashonnan.

16 Pues, esun ku bringa kontra Sion, tantu hudiu i gentil, tantu katibu i liber, tantu hòmber i muhé, lo muri; pasobra nan ta esnan ku ta e prostituta di henter e tera; pasobra esnan ku no ta ku mi ta kontra di mi, Señor ta bisa.

17 Pasobra lo mi kumpli ku mi promesanan kual mi a hasi na e yunan di hende, ku lo mi hasi na nan miéntras nan ta den e karni—

18 Pues, mi kerido rumannan, asina nos Dios ta bisa: lo mi afligí boso simia pa medio di e man di e gentilnan; sin embargo, lo mi suavisá e kurason di e gentilnan, ku nan lo ta manera un tata pa nan; pues, e gentilnan lo wòrdu bendishoná i numerá entre e kas di Israel.

19 Pues, lo mi konsagrá e tera aki na boso simia, i nan lo wòrdu kontá entre boso simia, pa semper, pa e tera di nan herensia; pasobra e ta un tera skohí, Dios a bisa n’ami, riba tur otro teranan, pues ami lo ke pa tur hende ku ta biba riba dje ku nan lo adorá mi, Dios ta bisa.

20 I awor, mi kerido rumannan, mirando ku nos Dios mizerikordioso a duna nos asina gran konosementu konserniente e kosnan aki, laga nos rekord’é, i pone un banda nos pikánan, i no baha nos kabes, pasobra nos a wòrdu saká afó; sin embargo, nos a wòrdu ekspulsá for di e tera di nos herensia; pero nos a wòrdu guiá na un tera mihó, pasobra Señor a hasi e laman nos kaminda, i nos ta riba un isla di e laman.

21 Pero grandi ta e promesanan di Señor na esnan ku ta riba e islanan di e laman; pues manera e ta bisa islanan, mester tin mas ku esaki, i nan tambe ta habitá pa nos rumannan.

22 Pasobra tende, Señor Dios a hiba algun di nan di tempu pa tempu for di e kas di Israel, di akuerdo ku su boluntat i plaser. I awor tende, Señor ta kòrda nan tur ku a wòrdu kitá, pues e ta rekòrda nos tambe.

23 Pues, alegrá boso kurason, i kòrda ku boso ta liber pa aktua pa boso mes—pa skohe e kaminda di morto eterno òf e kaminda di bida eterno.

24 Pues, mi kerido rumannan, rekonsiliá boso mes na e boluntat di Dios, i no na e boluntat di e diabel i e karni; i kòrda, despues ku boso ta rekonsiliá na Dios, ku ta solamente den i pa medio di e grasia di Dios ku boso ta salbá

25 Pues, ku Dios lo lanta boso for di morto pa medio di poder di e resurekshon, i tambe for di morto eterno pa medio di e poder di ekspiashon, ku boso por wòrdu risibí den e reino eterno di Dios, pa boso por alab’é pa medio di grasia divino. Amèn.