ម៉ាថាយ ១៣:២៤–១៧:២៧ ( មេរៀនទី ៤ )

ការរៀបចំសម្ភារសម្រាប់គ្រូបង្រៀន ដល់ សិស្ស ដែល សិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

សេចក្ដីសង្ខេបខាងក្រោមនៃព្រឹត្តិការណ៍ និង គោលការណ៍ដែលសិស្សបានរៀន នៅពេលពួកគេបានសិក្សា ម៉ាថាយ ១៣:២៤–១៧:២៧ ( មេរៀនទី ៤ ) ពុំមែនត្រូវយកមកបង្រៀនជាផ្នែកនៃមេរៀនរបស់អ្នកនោះទេ ។ មេរៀនដែលអ្នកបង្រៀន ផ្ដោតតែលើគោលលទ្ធិ និង គោលការណ៍ពីរបីប៉ុណ្ណោះ ។ សូមធ្វើតាមការបំផុសគំនិតពីព្រះវិញ្ញាណបរិសុទ្ធ នៅពេលអ្នកគិតពីតម្រូវការរបស់សិស្ស ។

ថ្ងៃទី ១ ( ១៣:២៤–៥៨ )

នៅក្នុងរឿងប្រៀបប្រដូចស្ដីពីស្រូវសាលី និង ស្រងែ សិស្សបានរៀនថា ព្រះអម្ចាស់នឹងប្រមូលពួកសុចរិតនៅថ្ងៃចុងក្រោយ រួចបំផ្លាញពួកទុច្ចរិតនៅឯការយាងមករបស់ទ្រង់ ។ ក្នុងរឿងប្រៀបប្រដូចបន្ថែមទៀត ដែលពួកគេបានរៀនពីសាសនាចក្រនៃព្រះយេស៊ូវគ្រីស្ទដែលបានស្ដារឡើងវិញ កំពុងបំពេញផែនដីទាំងមូល និងពរជ័យដ៏នៅអស់កល្បជានិច្ចដែលកើតមានដល់ជនដែលលះបង់ដើម្បីទទួលបានដំណឹងល្អនៃព្រះយេស៊ូវគ្រីស្ទ ។

ថ្ងៃទី ២ ( ម៉ាថាយ ១៤ )

នៅក្នុង ម៉ាថាយ ១៤ សិស្សបានយល់ដឹងថា តាមរយៈការបង្ហាញសេចក្ដីមេត្តាករុណាចំពោះអ្នកដទៃ សូម្បីតែពេលយើងកំពុងជួបប្រទះភាពសោកសៅក្ដី ក៏យើងនៅតែធ្វើតាមគំរូរបស់ព្រះយេស៊ូវគ្រីស្ទដែរ ។ ពួកគេក៏រៀនផងដែរថា ប្រសិនបើយើងស្វែងរកជំនួយរបស់ព្រះ ពេលសេចក្ដីជំនឿយើងទន់ខ្សោយ ទ្រង់អាចលើកយើងឡើងចេញពីសេចក្ដីភ័យខ្លាច និងការសង្ស័យរបស់យើងបាន ។

ថ្ងៃទី ៣ ( ម៉ាថាយ ១៥ )

នៅក្នុងសេចក្ដីបង្គាប់របស់ព្រះអង្គសង្គ្រោះដល់ពួកអាចារ្យ និង ពួកផារិស៊ី សិស្សបានរៀនថា ប្រសិនបើយើងមានបំណងចង់ខិតជិតនឹងព្រះ យើងត្រូវដាក់ព្រះបញ្ញត្តិរបស់ទ្រង់លើទំនៀមទំលាប់ និងប្រពៃណីទាំងឡាយដែលយើងមាន ។ ពួកគេក៏រៀនផងដែរថា ប្រសិនបើយើងជ្រើសបណ្តែតបណ្តោយចិត្តទៅតាមអំពើអាក្រក់ ឬគំនិត និង បំណងប្រាថ្នាមិនសមរម្យនានា នោះគំនិត និងបំណងប្រាថ្នាទាំងនោះនឹងធ្វើឲ្យយើងខូចកេរ្តិ៍ឈ្មោះ ហើយថានៅពេលយើងអនុវត្តសេចក្ដីជំនឿលើព្រះយេស៊ូវគ្រីស្ទ យើងអាចទទួលពរជ័យស្របតាមបំណងប្រាថ្នាដ៏សុចរិតរបស់យើង ។

ថ្ងៃទី ៤ ( ម៉ាថាយ ១៦-១៧ )

នៅក្នុងការសិក្សារបស់ពួកគេពី ម៉ាថាយ ១៦–១៧សិស្សបានរៀនថា សាសនាចក្ររបស់ព្រះយេស៊ូវគ្រីស្ទត្រូវបានស្ថាបនានៅលើវិវរណៈមកពីព្រះ ។ ពួកគេក៏រៀនផងដែរពីកូនសោនៃបព្វជិតភាព ដែលបានប្រគល់ឲ្យកាលពីបុរាណ និង ក្នុងសម័យរបស់យើង ដែលអនុញ្ញាតឲ្យពួកអ្នកបម្រើរបស់ព្រះអម្ចាស់ ដើម្បីគ្រប់គ្រងសាសនាចក្ររបស់ទ្រង់នោលើផែនដី ។

សេចក្តីផ្តើម

ព្រះយេស៊ូវគ្រីស្ទបានស្ដីបន្ទោសពួកផារិស៊ី និង ពួកសាឌូស៊ីដែលចង់បានទីសម្គាល់មួយនៃភាពជាព្រះរបស់ទ្រង់ ។ ពេត្រុសបានថ្លែងទីបន្ទាល់ថា ព្រះយេស៊ូវគឺជាព្រះគ្រីស្ទ ហើយត្រូវបានប្រគល់ឲ្យនូវកូនសោនៃនគរស្ថានសួគ៌ ។ គំនិតសម្រាប់ការបង្រៀនខាងក្រោមនេះអាចជួយសិស្សឲ្យយល់ ពីរបៀបដើម្បីពង្រឹងទីបន្ទាល់របស់ពួកគេ ។

យោបល់សម្រាប់ការបង្រៀន

ម៉ាថាយ ១៦:១-១២

ពួកផារិស៊ី និង ពួកសាឌូស៊ីចង់បានទីសម្គាល់មួយមកពីព្រះអង្គសង្គ្រោះ

សូមសរសេរឃ្លា ខាងក្រោម នេះនៅលើក្ដារខៀនពីមុនចាប់ផ្ដើមបង្រៀន ៖

តាមរយៈការលេចចេញមករបស់ទេវតាមួយអង្គ

តាមរយៈព្រះវិញ្ញាណបរិសុទ្ធ

តាមរយៈការជឿលើពាក្យមិត្តភក្ដិ ឬសមាជិកគ្រួសារម្នាក់

តាមរយៈការឃើញអព្ភូតហេតុមួយ

ដើម្បីចាប់ផ្ដើមមេរៀននេះ ចូរសុំឲ្យសិស្សជ្រើសឃ្លានៅលើក្ដារខៀន ដែលវាពិពណ៌នាល្អបំផុតពីរបៀប ដែលពួកគេចង់ទទួលបានទីបន្ទាល់មួយអំពីដំណឹងល្អ ។ សូមអញ្ជើញសិស្សពីរបីនាក់ឲ្យប្រាប់ពីឃ្លាដែលពួកគេបានជ្រើស ហើយពន្យល់ពីហេតុផលដែលពួកគេបានជ្រើសយកវា ។

នៅពេលពួកគេសិក្សា ម៉ាថាយ ១៦ សុំឲ្យសិស្សរកមើលសេចក្ដីពិតដែលទាក់ទងនឹងរបៀបដែលព្រះអម្ចាស់ជួយយើងឲ្យទទួលបាន ហើយពង្រឹងទីបន្ទាល់របស់យើងអំពីដំណឹងល្អ ។

សូមអញ្ជើញសិស្សម្នាក់អាន ម៉ាថាយ ១៦:១ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលពួកផារិស៊ី និង ពួកសាឌូស៊ីចង់បានពីព្រះយេស៊ូវ ។

តើពួកផារិស៊ី និង ពួកសាឌូស៊ីចង់បានអ្វីខ្លះពីព្រះយេស៊ូវ ?

សូមអញ្ជើញសិស្សបីបួននាក់ប្ដូរវេនគ្នាអានឲ្យឮៗនៅក្នុង ម៉ាថាយ ១៦:២-៤ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលចម្លើយរបស់ព្រះអង្គសង្គ្រោះទៅកាន់ពួកផារិស៊ី និង ពួកសាឌូស៊ី ។

តើព្រះអម្ចាស់បានមានបន្ទូលថាទីសម្គាល់ណាខ្លះ ដែលទ្រង់នឹងប្រទានឲ្យ ?

សូមពន្យល់ថា ព្រះយេស៊ូវបានមានបន្ទូលពីព្យាការីក្នុងព្រះគម្ពីរសញ្ញាចាស់ឈ្មោះ យ៉ូណាស ដែលត្រូវលេបចូលក្នុងពោះ« ត្រីមួយយ៉ាងធំ » ( យ៉ូណាស ១:១៧ ) ។ « ការបញ្ចុះ » របស់យ៉ូណាស រួចបានចេញមកពីពោះត្រី ក្រោយពីបានបីថ្ងៃមក គឺតំណាងឲ្យការសុគត ការបញ្ចុះ និង ការមានព្រះជន្មរស់ឡើងវិញរបស់ព្រះយេស៊ូវគ្រីស្ទពីផ្នូរនៅថ្ងៃទីបី ។

អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់ បានពន្យល់ពីទីសម្គាល់របស់ព្យាការី យ៉ូណាស ៖ « ការបញ្ចុះ » របស់យ៉ូណាស រួចបានចេញមកពីពោះ ‹ ត្រីមួយយ៉ាងធំ › (យ៉ូណាស ១:១៥–១៧, ២ ) តំណាងឲ្យការសុគត ការបញ្ចុះ និង ការមានព្រះជន្មរស់ឡើងវិញរបស់ព្រះគ្រីស្ទ ( Mormon Doctrine ការបោះពុម្ពលើកទី ២ [ ឆ្នាំ១៩៦៦ ] ទំព័រ ៧១១–១២ ) ។

តើព្រះអង្គសង្គ្រោះបានធ្វើអ្វីខ្លះ បន្ទាប់ពីបានស្ដីបន្ទោសដល់ពួកផារិស៊ី និងពួកសាឌូស៊ី ?
តើយើងអាចរៀនអ្វីខ្លះនៅក្នុងបទពិសោធន៍នេះស្ដីពីវិធីពុំត្រឹមត្រូវ ដើម្បីស្វែងរកសេចក្ដីពិតខាងវិញ្ញាណ ? ( សិស្សអាចនឹងប្រើពាក្យខុសគ្នា ប៉ុន្តែត្រូវប្រាកដថាពួកគេស្គាល់ពីសេចក្ដីពិតខាងក្រោមនេះ ៖ យើងពុំបានទទួលសេចក្ដីពិតខាងវិញ្ញាណ ដោយការស្វែងរកទីសម្គាល់ឡើយ ) ។

សូមសង្ខេប ម៉ាថាយ ១៦:៥–១២ ដោយពន្យល់ថា ព្រះអង្គសង្គ្រោះបានព្រមានពួកសិស្សរបស់ទ្រង់ពីការបង្រៀនខុឆ្គងរបស់ពួកផារិស៊ី និង ពួកសាឌូស៊ី ។

ម៉ាថាយ ១៦:១៣-២០ ។

ពេត្រុសបានថ្លែងទីបន្ទាល់ពីព្រះយេស៊ូវគ្រីស្ទ ហើយត្រូវបានសន្យាថាប្រគល់ឲ្យនូវកូនសោនៃនគរស្ថានសួគ៌

សូមពន្យល់ថា បន្ទាប់ពីព្រះយេស៊ូវបានស្ដីបន្ទោសដល់ពួកផារិស៊ី និង ពួកសាឌូស៊ីដោយការចង់បានទីសម្គាល់មួយមក ទ្រង់បានបង្រៀនពួកសិស្សរបស់ទ្រង់ពីរបៀបទទួលបានទីបន្ទាល់មួយពីសេចក្ដីពិត ។ សូមអញ្ជើញសិស្សម្នាក់អាន ម៉ាថាយ ១៦:១៣-១៤ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលសំណួរ ដែលព្រះយេស៊ូវបានចោទសួរ និង ចម្លើយរបស់ពួកសិស្សរបស់ទ្រង់ ។

តើព្រះអង្គសង្គ្រោះបានសួរអ្វីខ្លះដល់ពួកសិស្សរបស់ទ្រង់ ? តើពួកគេបានឆ្លើយយ៉ាងដូចម្ដេច ? ( អ្នកគួរតែពន្យល់ថា អេលីយ៉ាស និង យេរេមា គឺជាពួកព្យាការីក្នុងព្រះគម្ពីរសញ្ញាចាស់ឈ្មោះ អេលីយ៉ា និង យេរមា ) ។
តើចម្លើយរបស់ពួកគាត់អាចប្រាប់អ្វីខ្លះដល់យើងថា មនុស្សបានយល់ដឹងដល់កម្រិតណាដែរថាព្រះយេស៊ូវគឺជានរណា មកដល់ពេលនេះនៅក្នុងការងារបម្រើរបស់ទ្រង់ ?

កំណត់ចំណាំ ៖ នៅក្នុងមេរៀនសម្រាប់ថ្ងៃទី ៤ សិស្សបានសិក្សាវគ្គចំណេះចំណានខគម្ពីរ ម៉ាថាយ ១៦:១៥–១៩ ។ សូមពិចារណាចំណាយពេលពីរបីនាទី មើលវគ្គនោះឡើងវិញជាមួយពួកគេ ។

សូមអញ្ជើញសិស្សម្នាក់អាន ម៉ាថាយ ១៦:១៥-១៧ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលសំណួរទីពីរដែលព្រះអង្គសង្គ្រោះបានចោទសួរ ។

តើសំណួរទីពីរដែលព្រះអង្គសង្គ្រោះបានសួរនោះជាអ្វីទៅ ? តើពេត្រុសបានឆ្លើយបែបណាដែរ ?
យោងតាម ខទី ១៧តើពេត្រុសបានដឹងថា ព្រះយេស៊ូវគឺជាព្រះរាជបុត្រានៃព្រះបានដោយរបៀបណា ? ( សូមចង្អុលបង្ហាញថា ព្រះវរបិតាសួគ៌បានបើកសម្ដែងសេចក្ដីពិតនេះដល់លោកតាមរយៈព្រះវិញ្ញាណបរិសុទ្ធ ) ។
តើយើងអាចរៀនសេចក្ដីពិតអ្វីខ្លះ នៅក្នុងខគម្ពីរទាំងនេះអំពីរបៀបដែលយើងអាចទទួលបានទីបន្ទាល់មួយអំពីព្រះយេស៊ូវគ្រីស្ទ ? ( សិស្សអាចនឹងប្រើពាក្យខុសគ្នា ប៉ុន្តែពួកគេគួរស្គាល់ពីសេចក្ដីពិតខាងក្រោមនេះ ៖ យើងទទួលបានទីបន្ទាល់មួយអំពីព្រះយេស៊ូវគ្រីស្ទតាមរយៈវិវរណៈមកពីព្រះវិញ្ញាណបរិសុទ្ធ ) ។
ហេតុអ្វីអ្នកគិតថា ការទទួលបានទីបន្ទាល់មួយតាមរយៈវិវរណៈមកពីព្រះវិញ្ញាណបរិសុទ្ធជាជាងតាមវិធីផ្សេងទៀត គឺជារឿងដ៏សំខាន់សម្រាប់យើង ?

ដើម្បីជួយសិស្សឲ្យយល់បន្ថែមទៀតពីតួនាទីរបស់ព្រះវិញ្ញាណបរិសុទ្ធក្នុងការជួយយើងឲ្យទទួលបានទីបន្ទាល់អំពីព្រះអង្គសង្គ្រោះ សុំឲ្យសិស្សម្នាក់អានឮៗនូវសេចក្ដីថ្លែងការណ៍ខាងក្រោមនេះដោយប្រធាន យ៉ូសែប ហ៉្វីលឌីង ស៊្មីធ ៖

រូបភាព
ប្រធាន យ៉ូសែប ហ្វីលឌីង ស្ម៊ីធ

«ការមានបន្ទូលរបស់ព្រះវិញ្ញាណព្រះទៅកាន់វិញ្ញាណរបស់មនុស្សមាននូវព្រះចេស្ដា ដើម្បីប្រទានសេចក្ដីពិតដ៏មានឥទ្ធិពល និង ការយល់ដឹងច្រើនជាងសេចក្ដីពិតដែលអាចបានផ្ដល់ឲ្យដោយទំនាក់ទំនងផ្ទាល់ខ្លួន ទោះជាជាមួយនឹងអង្គសួគ៌ាក្ដី ។ តាមរយៈព្រះវិញ្ញាណបរិសុទ្ធ សេចក្ដីពិតត្រូវដាក់បញ្ចូលទៅក្នុងគ្រប់រចនាសម្ព័ន្ធនៃសរីរាង្គ និង សរសៃពួរសាច់ដុំនៃរូបកាយ ដើម្បីវាត្រូវបានចងចាំជារៀងរហូត » (Teachings of Presidents of the Church: Joseph Fielding Smith [ ឆ្នាំ២០១៣ ] ទំព័រ ១៨៣–៨៤ ) ។

តើអ្វីខ្លះដែលយើងអាចធ្វើ ដើម្បីរៀបចំខ្លួនយើងទទួលវិវរណៈតាមរយៈព្រះវិញ្ញាណបរិសុទ្ធ ?
តើអ្នកបានដឹងថា ព្រះយេស៊ូវគ្រីស្ទគឺជាព្រះរាជបុត្រានៃព្រះ និង ជាព្រះអង្គសង្គ្រោះរបស់អ្នកតាមរបៀបណាដែរ ? តើអ្នកបានធ្វើអ្វីខ្លះ ដើម្បីទទួលបានសាក្សីនោះមកពីព្រះវិញ្ញាណបរិសុទ្ធ ?

សូមអញ្ជើញសិស្សសញ្ជឹងគិតពីរបៀបដែលពួកគេអាចពង្រឹងទីបន្ទាល់របស់ខ្លួន ឬអ្វីដែលពួកគេត្រូវធ្វើដើម្បីទទួលបានទីបន្ទាល់មួយតាមរយៈព្រះវិញ្ញាណបរិសុទ្ធ ។ សូមលើកទឹកចិត្តពួកគេឲ្យធ្វើតាមការបំផុសគំនិតដែលពួកគេបានទទួល ។

មេរៀនបន្ទាប់ ( ម៉ាថាយ ១៨:១-២២:២៦ )

ចូរសុំឲ្យសិស្សពិចារណាពីគ្រាមួយដែល ពួកគេមានការលំបាកក្នុងការអភ័យទោសឲ្យមនុស្សម្នាក់ទៀត ។ សូមអញ្ជើញពួកគេសញ្ជឹងគិតអំពីសំណួរខាងក្រោម ៖ ហេតុអ្វីបានជាអ្នកមានអារម្មណ៍ថា វាជាដំណោះស្រាយសមហេតុផល ដោយពុំចាំបាច់អភ័យទោសដល់បុគ្គលនេះ ? ហេតុអ្វីបានជាយើងគួរអភ័យទោសឲ្យអ្នកដទៃចំពោះការបំពានរបស់ពួកគេ សូម្បីតែយើងមានអារម្មណ៍ថាមិនចង់អភ័យទោសដល់ពួកគេក៏ដោយនោះ ? សូមអញ្ជើញសិស្សរកមើលចម្លើយចំពោះសំណួរទាំងនេះ នៅពេលពួកគេបន្តការសិក្សារបស់ខ្លួននៅសប្ដាហ៍ក្រោយ ។