Lēsoni 28 Naunau Teuteu ki he Kalasí: Tuʻu ko ha Kau Fakamoʻoni ʻo Sīsū Kalaisi
“Lēsoni 28 Naunau Teuteu ki he Kalasí: Tuʻu ko ha Kau Fakamoʻoni ʻo Sīsū Kalaisi,” Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó (2023)
“Lēsoni 28 Naunau Teuteu ki he Kalasí,” Ko Sīsū Kalaisi mo ʻEne Ongoongolelei Taʻengatá – Naunau ʻa e Faiakó
ʻĪmisi
Ko e Huhuʻi Fakalangí, tā ʻe Simon Dewey
Lēsoni 28 Naunau Teuteu ki he Kalasí
Tuʻu ko ha Kau Fakamoʻoni ʻo Sīsū Kalaisi
Kuo tākiekina fēfē nai hoʻo fakamoʻoni kia Sīsū Kalaisí ʻi hoʻo kau ki he kalasi ko ʻení? Ko e hā kuó ke ako mei he Laumālie Māʻoniʻoní ʻi hoʻo ngāue ʻi he tuí ʻaki hono ako ʻa e naunau teuteú, kau ʻi he ngaahi fealēleaʻaki fakakalasí, mo tali ki he ngaahi ueʻi fakalaumālié? ʻI hoʻo teuteu ki hoʻo kalasi fakaʻosí, fakalaulauloto ki he ʻuhinga ʻo e tuʻu ko ha fakamoʻoni ʻo Sīsū Kalaisí (vakai, Mōsaia 18:9).
Konga 1
Te u fakamālohia fēfē nai ʻeku fakamoʻoni ki he Fakamoʻuí?
ʻI hoʻo fakakaukau ki hoʻo fakamoʻoni kia Sīsū Kalaisí, manatuʻi ʻoku tau takitaha maʻu ha fakamoʻoni ʻi ha founga fakataautaha. Naʻe akonaki ʻa Palesiteni Tieta F. ʻUkitofa, ʻi heʻene hoko kimuʻa ko ha tokoni ʻi he Kau Palesitenisī ʻUluakí, ʻo pehē:
ʻĪmisi
Palesiteni Dieter F. Uchtdorf
ʻOku ʻi ai ha kāingalotu ʻo e Siasí ʻoku pau pea mālohi ʻa ʻenau fakamoʻoní. ʻOku ʻi ai e niʻihi ʻoku nau kei fāifeinga ke nau ʻiloʻi ia ʻiate kinautolu pē. Ko e Siasí ko ha ʻapi ia ke fakataha mai ki ai e kakaí kotoa, ʻo tatau ai pē pe ko e hā e mālohi ʻo ʻenau fakamoʻoní. (“Ko Hono Maʻu ha Fakamoʻoni ʻo e Māmá mo e Moʻoní,” Liahona, Nōvema 2014, 22)
Kapau ʻokú ke ongoʻi taʻe-pauʻia ʻi hoʻo fakamoʻoni ki he Fakamoʻuí pe ongoʻi ʻoku ʻikai fuʻu mālohi, manatuʻi “ʻoku tupulaki māmālie ʻa e fakamoʻoní ʻo fakafou ʻi he ngaahi meʻa ʻoku aʻusiá. ʻOku ʻikai ha taha te ne maʻu fakaʻangataha ha fakamoʻoni kakato” (Ngaahi Tefito ʻo e Ongoongoleleí, “Fakamoʻoní,” topics.ChurchofJesusChrist.org).
Fakakaukau ki he aʻusia ʻa ʻAlamā ko e Siʻí. Naʻá ne ʻalu holo ʻi heʻene kei talavoú ʻo feinga ke fakaʻauha e Siasi ʻo e ʻEikí. Hili e hā mai ha ʻāngelo kiate iá, naʻá ne fakatomala pea fili ke muimui ʻia Sīsū Kalaisi (vakai, Mōsaia 27:8–24). Neongo naʻe tākiekina moʻoni ʻa ʻAlamā ʻe he hā mai ko ʻení, ka naʻe ʻikai ko e fakavaʻe ia ʻo ʻene fakamoʻoní. Kimui ange ʻi he moʻui ʻa ʻAlamaá, lolotonga ʻene akoʻi e kakai ʻi he fonua ko Seilahemalá, naʻá ne vahevahe ʻa e founga naʻá ne maʻu ai ʻene fakamoʻoni kia Sīsū Kalaisí.
ʻĪmisi
fakaʻilonga, ako
Ako ke Teuteu ki he Kalasí
Lau ʻa e ʻAlamā 5:46–48, pea kumi ki he tupuʻanga ʻo e fakamoʻoni ʻa ʻAlamaá.
ʻI hoʻo fakakaukau ki hoʻo fakamoʻoní, fiefia ʻi he meʻa ʻokú ke ʻiló, ʻamanaki lelei ki aí, pe tui ki ai fekauʻaki mo e Fakamoʻuí. Hili iá peá ke fakakaukauʻi ʻi he faʻa lotu ʻa e meʻa te ke lava ʻo fai ke langa ʻi he fakavaʻe ko iá, kae ʻoua kuo hoko ia ko ha fakamoʻoni pau. Naʻe akonaki ʻa ʻEletā ʻUkitofa ʻo pehē:
ʻĪmisi
ʻEletā Dieter F. Uchtdorf
ʻOku maʻu ʻa e ʻilo fakapapau mo e fakamoʻoni mālohi ko ʻení mei he fakahā faka-ʻOtua ko ia “ko e fakamoʻoni kia Sīsuú ko e laumālie ia ʻo e kikité” (Fakahā 19:10).
ʻOku tau maʻu ʻa e fakamoʻoni ko ʻení ʻi he taimi ʻoku lea ai ʻa e Laumālie Māʻoniʻoní ki hotau laumālié. Te tau maʻu ha ongo ʻoku nonga mo ha fakapapau ʻoku taʻe-toe-veiveiua, ʻa ia ko e tupuʻanga ia ʻo ʻetau fakamoʻoní mo ʻetau loto fakapapaú neongo pe ko e hā hotau anga fakafonuá, matakalí, leá, pe puipuituʻa fakasōsiale mo fakaʻekonōmiká. ʻE hoko ʻa e ngaahi ueʻi ko ʻeni ʻa e Laumālié, kae ʻikai ko e fakaʻuhinga pē ʻa e tangatá, ko e fakavaʻe totonu mo pau ke langa ai ʻetau fakamoʻoní.
Ko e ʻelito ʻo e fakamoʻoni ko ʻení ʻe hoko maʻu pē ia ko e tui mo e ʻilo kia Sīsū Kalaisi mo Hono misiona fakalangí, ʻa ia ʻokú Ne folofola ʻaki ʻi he folofolá, “Ko au ko e hala, mo e moʻoni, pea mo e moʻui” (Sione 14:6). (“The Power of a Personal Testimony,” Liahona, Nov. 2006, 38)
Aleaʻi mo ha taha ʻoku tui kia Sīsū Kalaisí ʻa e founga naʻá mo takitaha maʻu ai hoʻomo fakamoʻoni ki he Fakamoʻuí. Kapau ʻokú ke ongoʻi veiveiua ʻi ho lotó fekauʻaki mo e meʻa ʻokú ke tui ki aí, tokanga taha ki he meʻa ʻokú ke holi ke ʻilo fekauʻaki mo e Fakamoʻuí pea aleaʻi ʻa e founga ʻe lava ke iku ai ʻa e holi faingofua ko ʻení ki ha tui mo ha fakamoʻoni lahi angé (vakai, ʻAlamā 32:27–28).
Konga 2
ʻE faitāpuekina fēfē nai ʻa e niʻihi kehé ʻe heʻeku fakamoʻoni kia Sīsū Kalaisí?
Fakakaukau ki hoʻo fakamoʻoni kia Sīsū Kalaisí. ʻOku ʻiloʻi nai ʻe hoʻo ngaahi kaungāmeʻá, fāmilí, mo e niʻihi kehe ʻoku mou feohí ʻa e ongo ʻokú ke maʻu kiate Iá? ʻOkú ke mateuteu nai ke tali e ngaahi fehuʻi fekauʻaki mo e Fakamoʻuí ʻaki e tuí mo e fakamoʻoní? (vakai, 1 Pita 3:15). Kuó ke fakaafeʻi nai e niʻihi kehé ke nau omi ʻo ako kia Sīsū Kalaisi ʻiate kinautolu pē? (vakai, Sione 1:39).
ʻI hoʻo fakakaukau ki he ivi tākiekina ʻe lava ke maʻu ʻe he niʻihi kehé ʻi hoʻo fakamoʻoni kia Sīsū Kalaisí, fakakaukau ki he faleʻi ko ʻeni meia ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
ʻEletā Neil L. Andersen
Tuku muʻa ke tau talanoa mo e niʻihi ʻoku tau feohí ʻi he tauʻatāina loto-moʻoni mo e loto-fiemālie lahi ange fekauʻaki mo Kalaisi. Naʻe pehē ʻe Palesiteni [Lāsolo M.] Nalesoni, “ʻOku loto fiemālie e kau ākonga moʻoni ʻa Sīsū Kalaisí ke hā mahino, lea, pea mo makehe mei he kakai ʻo e māmaní.” …
… Tuku muʻa ke tau fakamoʻoniʻi [ʻi he] angaʻofa ʻa ʻetau tui kia Kalaisí. Kapau ʻe vahevahe ʻe ha taha haʻane palopalema ʻi heʻene moʻui fakatāutahá, ʻe lava ke tau pehē ange, “ʻE Sione, ʻe Mele, ʻokú ke ʻiloʻi pē ʻoku ou tui kia Sīsū Kalaisi. Kuó u faʻa fakakaukau ki ha meʻa naʻá Ne folofola ʻaki ʻe ala tokoni kiate koe.”
Talanoa tauʻatāina ʻi he mītia fakasōsialé ʻo kau ki hoʻo falala kia Kalaisí. …
Ko e taimi ʻe niʻihi, ʻoku taʻe-pauʻia ha niʻihi ʻo hotau kaungā Kalisitiané ʻi heʻetau tuí mo ʻetau ngaahi taumuʻá. Tuku muʻa ke tau fiefia moʻoni mo kinautolu ʻi hono fevahevaheʻaki ʻetau tui kia Sīsū Kalaisí pea mo e ngaahi folofola ʻi he Fuakava Foʻoú ʻoku tau ʻofeina kotoá. …
ʻI he siʻisiʻi ange ʻa e talanoa ʻa e māmaní ʻo kau kia Sīsū Kalaisí, tuku muʻa ke lahi ange ʻetau talanoa fekauʻaki mo Iá. ʻI he taimi ʻe fakahaaʻi ai hotau tufakanga totonu ko ʻEne kau ākongá, ʻe tokolahi hatau niʻihi ʻe mateuteu ke fanongo. ʻI heʻetau vahevahe ʻa e maama kuo tau maʻu meiate Iá, ʻe ulo atu ʻa ʻEne māmá pea mo Hono mālohi faifakamoʻui fisifisimuʻá ki he niʻihi ʻoku nau loto-fiemālie ke fakaava honau lotó. (“ʻOku Mau Lea ʻia Kalaisi,” Liahona, Nōvema 2020, 90)
Fili ha taha ʻo e ngaahi fokotuʻu ʻi laló ke tokoni atu ke ke fakalaulauloto mo fakafuofuaʻi e founga kuo tupulaki ai hoʻo fakamoʻoni kia Sīsū Kalaisi mo ʻEne ongoongolelei taʻengatá lolotonga e kalasi ko ʻení. Haʻu mateuteu ki he kalasí ke vahevahe hoʻo aʻusiá.
Lau ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló” (ʻi he ChurchofJesusChrist.org), pea fakakaukauloto ki he founga kuo tupulaki ai hoʻo fakamoʻoni ki he Fakamoʻuí. Hiki hoʻo fakamoʻoni kia Sīsū Kalaisí pe ko hoʻo ngaahi fakakaukau pe ngaahi ongo fekauʻaki mo Iá.
Kapau naʻá ke ako maʻuloto ʻa e “Ko e Kalaisi Moʻuí,” hiki ʻa e founga kuo tākiekina ai ʻe he ngāué ni hoʻo mahinó mo hoʻo fakamoʻoni ki he Fakamoʻuí.
Lau ʻa e 3 Nīfai 27:13–21, pea fakalaulauloto ki he ʻuhinga ʻo e ongoongolelei ʻa e ʻEikí kiate koé. Hiki ʻa e founga kuo liliu ai hoʻo moʻuí ʻi hoʻo fāifeinga ke moʻui ʻaki ʻEne ongoongoleleí.
Toe vakaiʻi e fakahokohoko ʻo e tohí ki he tohi lēsoni ko ʻení, pea feinga ke ʻiloʻi ʻa e lēsoni naʻe tokoni lahi taha kiate koé. Toe vakaiʻi ʻa e naunau teuteu ki he lēsoni ko iá, pea lekooti ʻa e ʻuhinga naʻá ne fakahoko ai ha meʻa mahuʻinga ʻi hoʻo moʻuí.
Fakakaukau ki he founga kuó ke hoko ai ʻo hangē ange ko e Fakamoʻuí ʻi hoʻo fakaʻaongaʻi ʻa e meʻa kuó ke ongoʻi mo ako lolotonga e kalasi ko ʻení. Lekooti e ngaahi liliu kuó ke mamata ai ʻi hoʻo moʻuí.
Fili ha potufolofola ʻe taha pe lahi ange fekauʻaki mo Sīsū Kalaisi ʻa ia kuó ne fakalahi hoʻo mahinó mo hoʻo fakamoʻoni kiate Iá. Hiki ʻa e meʻa naʻá ke ako mei he ngaahi potufolofola ko ʻení pea mo e meʻa makehe kuo nau fakahoko ʻi hoʻo moʻuí.
Fili ha himi pe foʻi hiva fekauʻaki mo e Fakamoʻuí ʻokú ne fakahaaʻi hoʻo fakamoʻoni kiate Iá. Hiki ʻa e ngaahi fakakaukau mo e ongo ʻoku ʻomi ʻe he himi pe hiva ko ʻení ki ho ʻatamaí mo ho lotó.
Fai ha tohi fakamālō ki he Fakamoʻuí. Hiki ʻa e ongo ʻokú ke maʻu fekauʻaki mo ʻEne moʻuí mo ʻEne mahuʻinga kiate koé. Kapau ko ha tokotaha ʻaati koe, te ke lava ʻo tā ha fakatātā ʻoku fakahoʻata ai hoʻo ngaahi ongo ki he Fakamoʻuí pea vahevahe ia mo hoʻo kalasí.
