Me ra Raica Rawa Kina na Luveda na Mata ni iVakabula
Sa noda ilesilesi tabu me vaka ni da itubutubu ka nodra iliuliu na itabatamata gone ka tubu cake tiko mai oqo me da kauti ira vua na iVakabula.
Ena vica na yabaki sa oti au a vakavulici ira tiko kina eso na iliuliu ni isususu na ivakarau ni soli lesoni leleka ni kosipeli vei ira na gone lalai. E dua vei ira na iliuliu a tenea tiko na luvena tagane lailai. Au a taura tiko e dua na iyaloyalo ni iVakabula ka, vakaraitaka tiko na ivakarau ni kena dau tau na vosa vei ira na gone lalai, kau tekivu meu vakamacalataki Jisu. A siro sobu sara mai na nona tene vei tinana na gonetagane lailai oqo, ka cavu yava yani vei au, raica matua na iyaloyalo ka tara na matai Jisu. Ena gauna ni lesoni, au a taroga, “O cei oqo?” Ena matadredredre, a kaya mai na gone, “Jisu.”
Se gone sara na gone oqo me bau cavuta rawa mada ga na yacana, ia a kila vinaka na iyaloyalo o ya ka kila na yaca ni iVakabula. Niu raica na ivukivuki totoka oqo, au nanuma kina na vosa ni iVakabula Nona a kaya; “ “Dou daumasu tikoga vua na Turaga, io dou vosota tikoga mo dou bula kina, ka rawata na bula tawamudu” (V&V 101: 38).
Na cava na kena ibalebale me vakasaqarai na mata ni iVakabula? Au vakabauta ni sega walega ni kila na kena iyaloyalo. Na veisureti nei Karisito meda vakasaqarai Koya o ya na veisureti meda kila se o cei o Koya, na veika sa cakava vei keda, kei na veika sa kerea vei keda meda vakayacora. Na lako mai vei Karisito, ka raica rawa sara na matana, ena yaco ga mai ni da toro voleka yani Vua ena noda vakabauta kei na noda cakacaka. E yaco mai ena sasaga ena gauna ni bula taucoko. Meda sa qai vakasaqarai Koya vakacava ena bula oqo meda raica rawa kina na matana ena bula e tarava?
E tukuni tiko ena ika 3 ni Nifai e dua na kawa tamata era a raica dina e matadra na iVakabula ena bula oqo. Eda sega beka ni raici Koya tiko oqo, ka rairai ni rawa meda vuli mai na ka era sotava o ya. Ni oti na mate ni iVakabula, a rairai o Koya vei ira na tamata oqo, vakavulici ira, ka vakalougatataki ira. Ia; “ a sa kaya me ra kau mai vua na gone lalai.” (3 Nifai 17: 11).
Sa noda ilesilesi tabu me vaka ni da itubutubu ka nodra iliuliu na itabatamata gone ka tubu cake tiko mai oqo me da kauti ira vua na iVakabula me rawa kina ni ra raica na Matana kei na matana talega na Tamada mai Lomalagi. Ni da cakava oqo, eda sa kauti keda talega yani.
Na taro tale oqo, meda cakava vakacava, vakabibi ena dua na vuravura sa curuma tu na veika dau veivagolei tani? Ena ika 3 ni Nifai, o ira na itubutubu oqo era lomana na Turaga. Era tamata vakabauta. Era vakabauta na cakamana a vakayacora o Jisu. Era lomani ira na luvedra. Era vakasoqoni ira me ra mai rogoca na vosa ni Turaga ka muria na Nona vunau ka kauti ira na gone Vua.
Ni ra sa kau oti mai na gone, a kerea na Karisito me ra tekiduru na itubutubu. A qai cakava vei ira o Koya na ka a cakava vei keda yadudua. A masulaki ira vei Tamana, ia ni sa cakava oqo, Nona masu e tukuni ni a “ka levu ka veivakurabuitaki” ka sega na vosa me vakamacalataka rawa. Ni ra gole vua na iVakabula, ka ciqoma na Nona Veisorovaki, era vaqaqacotaki kina na itubutubu oqo me ra cakava na veika dodonu kece me ra “kauti” ira mai na luvedra.
E dua tale na ka a kerea na Karisito vei ira na itubutubu oqo e tiko ena 3 Nifai 22:13: “ A luvemu kecega ena vakavulici ira na Turaga; ena ka levu talega na nodra vakacegu na luvemu.”
Ia, era a vakamuria na veika era cakava vata kei na iVakabula, ka ra vakavulica na luvedra na itubutubu ni Nifai baleti Koya. Era vakavulica vei ira me ra lomana na Turaga. Era vakavulica vei ira na Nona kosipeli. Era vakavulica vei ira na sala me ra bulataka kina. Era a vakavulici ira vakavinaka sara ka yaco me ra bula dodonu ka tiko sautu ena vanua me 200 na yabaki (raica na 4 Nifai 1:1–22).
Ia oqo, au kerea mo ni raici ira mada yani o ni dau lomana. Oqo sara ga na ka bibi duadua—noda matavuvale. Au vakabauta ni ka talei duadua sara, o ni gadreva na matavuvale oqo me nomu tawamudu. Na italanoa ena ika 3 ni Nifai, e rawa ni vukei keda ena noda kauti ira mai na luveda Vua baleta ni solia vei keda e dua na ivakarau meda vakamuria. Taumada, meda lomana na Turaga ena yaloda taucoko ka meda lomani ira na luveda. iKarua, e dodonu meda ivakaraitaki kilikili vei ira ena noda vakasaqara tikoga na Turaga ka saga tiko meda bulataka na kosipeli. iKatolu, e dodonu meda vakavulici ira na luveda ena kosipeli kei na sala me ra bulataka kina na kena ivakavuvuli.
Ni da vakamuria na ivakarau oqo me da kauti ira mai na luveda vua na iVakabula sa dua na ituvatuva. Meda raica tale mada na ivakarau oqo. iMatai meda kila na sala meda lomana kina na Turaga kei na noda matavuvale. Ena taura toka na gauna, na cakacaka, na vakabauta ka gadrevi kina na veiqaravi yalodina. Ia, ni da sa vakasinaiti ena loloma ni Turaga, sa na rawa meda loloma. Ena rairai tagicaka na ka eda cakava, ia e lomani keda o Koya ka sa tu e yasada me vukei keda. Oqori na sala e dodonu meda lomani ira kina na luveda.
iKarua, meda sa ivakaraitaki kilikili. Oqo talega e dua na ituvatuva. Kevaka eda gadreva meda kauti ira mai na luveda vua na Karisito me ra raica rawa kina na Matana, sa ka bibi meda vakasaqara meda raica talega. E dodonu meda kila na kena salatu meda vakatakila rawa kina vei ira. Meda vakadodonutaka vakavinaka na noda bula me ra raici keda kina na luveda ka muri keda. Eda na taroga beka: “Na cava era raica na luvequ ni ra raica na mataqu?” “Era raica beka na mata ni iVakabula e mataqu baleta na sala au sa bula voli kina?”
Mo ni nanuma, e sega ni dua vei keda ena ivakaraitaki uasivi duadua vei ira na luveda, ia sa rawa meda itubutubu ka iliuliu bula kilikili. Na noda sasaga meda kilikili sa ivakaraitaki tiko. Eda na vakila beka ni da sa malumu mai ena so na gauna, ia meda tosoya tikoga. Vata kei na Turaga ka vakakina ena Vukuna, sa rawa meda vaqaqacotaki me da yacova na itagede e dodonu me da yacova. Eda na cakava rawa na veika eda gadreva tiko.
Kena ikatolu, sa tiko vei keda na ituvatuva ni nodra kau mai na luveda vua na iVakabula ena noda vakavulici ira na dina ni kosipeli mai na ivolanikalou kei na parofita, ka vukei ira me ra vakila ka kila rawa na Yalotabu. O ira mada ga na gone lalai sara e rawa ni ra kila vakavinaka ka ciqoma na inaki tawamudu. Era taleitaka na ivolanikalou, kei ira na parofita. Era vinakata me ra caka vinaka. Sa na vakatau ga vei keda meda tadolava tiko na isema o ya ki lomalagi. Sa na vakatau vei keda meda taqomaki ira mai na veivakauqeti dau veivagolei tani mai na Yalotabu. Sa rawa meda dusimaki ena ivolanikalou. Oti sa rawa ni da qai vakavulici ira na luveda me ra raica ga kina na nodra isau ni taro. Meda vakavulici ira na luveda ena ivakavuvuli dodonu ka vukea me ra bulataka na veivakavuvuli oqori ena nodra bula. Sa rawa meda muataki ira yani vua na Yalotabu me ra ciqoma kina na nodra dui ivakadinadina ni ka dina era sa vulica tiko. E rawa ni da vukei ira me ra kunea na reki ena kena bulataki na kosipeli. Oqo ena tara cake e dua na yavu tudei ni vakabauta kei na talairawarawa ena nodra bula ka na vaqaqacotaki ira.
Ia, na ka kece oqo e sega ni rawarawa. Na nodra itukutuku na Nifai e tukuna ni, o ira na matavuvale oqo, era a tiko vakacegu me 200 na yabaki. Ia e dina sara ni a dua na sasaga levu a vakayacori kina. A vakayacori kina na cakacaka kaukauwa kei na vosota vakadede kei na vakabauta ia, e sega ni dua na ka e bibi cake se veivakacegui. Ka, na vukei keda na Turaga, ni sa dau lomani ira na gone vakalevu cake mai vei keda. E lomani ira, ka na vakalougatataki ira o Koya.
Ko ni nanuma tiko ni a vakalougatataki ira yadudua na gone ni Nifai ka masulaki ira kina. Ka; “sa qai vosa vei ira na lewevuqa ka kaya: Dou raici ira na nomudou lalai.”
“Ia ni ra sa raici ira yani era sa rai cake sara ka raica sa tadola ko lomalagi, ka ra sa siro sobu mai na agilosi ka sa vaka e nodra sala sobu mai na yameyame ni bukawaqa; era sa mai vakavolivoliti ira na gone lalai ka qaravi ira” (3 Nifai l7:23–24).
Me ra sotava vakacava na luveda na veivakalougatataki vakaoqo e nikua? A kaya o Elder M. Russell Ballard; “Sa dina, oi keda sa soli kina na ilesilesi totoka ni vakagone sa soli vei keda e dua na itutu vakalou ka dokai ni ivakatawa, ni sa digitaki keda na Kalou meda viribaiti ira na gone nikua ena loloma kei na bukawaqa ni vakabauta kei na noda kila tiko o cei o ira” (“Behold Your Little Ones,”Tambuli, Oct. 1994, 40).
Kemuni na taciqu kei na ganequ, sai keda na agilosi a talai keda mai na Tamada Vakalomalagi nikua meda vakalougatataki ira na gone, ka sa rawa meda vukei ira me dua na siga me ra raica na matana na iVakabula ni da vakavulica na ivakavuvuli ni kosipeli ka vakasinaita na noda vuvale ena reki ni kena bulataki. Sa rawa meda duavata meda kilai Koya. Sa rawa meda vakila na Nona loloma kei na Nona veivakalougatataki. Ena Vukuna ga sa rawa meda lesu ki na itikotiko ni Tamada. Eda cakava oqo ni da sa gadreva meda talairawarawa, yalodina, ka gugumatua ena muria na Nona ivakavuvuli.
“Raica sa kaya vakaoqo na Turaga: Ko koya yadua sa veivutunitaka na nona ivalavala ca ka lako mai vei au, ka masuta na yacaqu, ka rogoca na noqu vosa ka muria na noqu vunau, ena raica vakaidina na mataqu ka kila ni sa i au” (V&V 93:1).
Kemuni na taciqu kei na ganequ, au kila ni bula tiko na Kalou. O Jisu Karisito sa ikoya na Luvena, na noda iVakabula ka Dauveivueti. Sa sureti keda tiko o Koya meda lako mai Vua ka sa vakaroti keda meda kauti ira mai na luveda, me rawa ni da mai raica vata na Matana ka bula tawamudu vata kei Koya kei na Tamada mai Lomalagi. Sa noqu masu meda na cakacaka taucoko meda ciqoma kina na veivakalougatataki cecere oqo ena yaca i Jisu Karisito, emeni.