Na iTinitini ni Vosa
E vakauta yani na cina ni Turaga na ivakatakilakila ka vakaraitaka vei keda na ivakatakila rawarawa me da kila ka sega kina ni druka.
E rui totoka na iotioti ni noda soqoni oqo. E sega ni vakalevu na noqu dau rogoca na vunau totoka vakaoqo me vaka eda sa mai vakadinadinataka nikua. Eda mai tiko taucoko nikua baleta ni da lomana na Turaga. Eda vinakata meda qaravi Koya. Sa dau nanumi keda tikoga na Tamada Vakalomalagi. Au vakadinadinataka o ya. Au sa vakavinavinakataka na Nona loloma ena veika kecega.
E tukuna na ivolanikalou:
“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.
“Mo vakarogotaka vua na nomu sala kecega, ia ena vakadodonutaka na nomu ilakolako ko koya.”1
Sa vakaoqori na italanoa ni noqu bula.
Kemuni na taciqu kei na ganequ lomani, eda sa yacova mai oqo na icavacava ni dua na koniferedi veilaveti ka veivakauqeti dina sara. Ni oti na noqu vakarogoca tiko na ivakasala kei na nodra ivakadinadina era sa vosa oti vei keda, au vakabauta ni da sa vakalougatataki vakalevu sara ka da sa duavata me da bulataka na ivakavuvuli ni kosipeli nei Jisu Karisito. Sa vinaka na noda tiko eke. Eda vakaraitaka na noda vakavinavinaka vei ira vakayadua era vosa vei keda, ka vakakina o ira era a cabora na masu.
E totoka vakaoti na sere. Au vakananumi ena tikini ivolanikalou ka kune ena Vunau kei Veiyalayalati: “Raica au sa rekitaka sara na sere sa lagati ena yalodina; io na nodra sere na yalododonu sa nodra masu vei au; kau na vakalougatataki ira kina.”2
Mo ni nanuma tiko na veiitukutuku eda rogoca ena gauna ni koniferedi oqo ena tabaki ena mekasini na Ensign in vula o Me vakakina na Liaona. Au vakauqeti kemuni mo ni vulica na itukutuku, ka vakananuma na kedra i vakavuvuli, ka qai bulataki ira ena nomuni bula.
Au kila ni o ni duavata kei au ena vakavinavinaka vei ira na tuakada kei na ganeda era sa mai vakacegui ena koniferedi oqo. Era sa veiqaravi vakavinaka ka cau vakalevu ki na cakacaka ni Turaga. E taucoko na nodra yalodina. Eda vakavinavinakataki ira mai na vu ni yaloda.
Oqo, eda a sa veitokoni, ena laveliga, vei ira na tuakada kei na ganeda era sa mai kacivi ena veitutu vou ena koniferedi oqo. Eda gadreva me ra kila ni da sa tu vakarau meda cakacaka vata kei ira ena nona cakacaka na iVakavuvuli.
Kemuni na taciqu kei na ganequ, nikua, ni da raica na vuravura vakavolivoliti keda, eda sa sotava tiko na leqa ka ra sa bibi ka vakavu kauwai vei keda. Sa tekivu me yali na vuravura mai na ivakarau ni tataqomaki kei na vakacegu ka sa tekivu me kasere mai na kena ikelekele.
E sa vakavuna vei ira e vuqa me ra kui wavoki ena wasawasa ni ivalavala ca ka takasa yani ena cakau voravora ni yali ni veimadigi, vakuwai mai na veivakalougatataki, kei na rusa ni tatadra na sega ni vosota, ivalavala dukadukali, iyaloyalo vakasisila, sega na dina kei na vuqa tale na leqa.
Sa noqu i vakasala vei keda kece sara me da rai ki vua na Turaga. E sega kina na kabu me vavaku, na cina me buto, na cagi me kaukauwa, na dausoko me yali ka sega ni vueti koya rawa na Turaga. E kacivi keda ni cagilaba na bula. E vakauta yani na Nona cina ka vakaraitaka vei keda na ivakatakila rawarawa me da kila ka sega kina ni druka.
Au taleitaka na vosa e kune ena Same: “A noqu uluvatu ko Jiova, kei na noqui drodro, kei na noqui vakabula; na noqu Kalou, o ko ya na noqu kaukauwa, kau na vakararavi vua; … Au na masu vei Jiova … Kau na vakabulai kina mai vei ira na noqu meca.”3
Kemuni taciqu kei na ganequ na Turaga e lomani keda, ena vakalougatataki keda ni da kaci yani Vua.
Sa levu dina na noda marau ena vuku ni kosipeli i Jisu Karisito a vakalesui mai kei na veika vivinaka e kauta mai ki na noda bula. Sa sovaraka mai na Turaga na nona veivakalougatataki vei keda vakayadua na mata tamata. Au vakaraitaka na noqu i vakadinadina vei kemuni ni dina na cakacaka oqo, e bula tiko na iVakabula, ka dusimaka ka liutaka tiko na Nona Lotu ena dela ni vuravura.
Ia, ni da sa yacova tiko mai na tinitini ni koniferedi oqo, sa sinai na yaloqu kau vakila na loloma. Au vakaraitaka na noqu loloma kei na vakavinavinaka vei kemuni. Vinaka vakalevu na nomuni dau masulaki au ka vakakina o ira na Vakaitutu Raraba ena Lotu. E rogoca na nomuni masu na Turaga ka sa vakalougatataki keimami ka liutaki keimami ena vuku ni cakacaka ni Nona matanitu ena dela ni vuravura. Ena vuku ni ka oqo keimami sa vakavinavinaka dina sara kina.
Ni da sa biubiu yani ena koniferedi, au sa laiva vei kemuni yadudua na veivakalougataki mai lomalagi. O ni sa suka lesu ki na nomuni dui veivale e vuravura raraba, sa noqu masu me na vakalougatataki kemuni, vakakina na nomuni matavuvale na Tamada Vakalomalagi. Me vakaraitaki ena veika kece eda cakava na itukutuku kei na yalo ni koniferedi oqo—ena noda veivale, ena cakacaka, ena bose ka kei na veiitavi se ogaoga eda vakaitavitaki keda kina.
Au lomani kemuni. Au masulaki kemuni. Me vakalougatataki kemuni na Kalou. Sa noqu masu me na nomuni tikoga kei na veigauna na Nona vakacegu yalataki, ena yaca i Jisu Karisito, emeni.