Jean A. Stevens
iMatai ni Daunivakasala ena Mataveiliutaki Raraba ni Lalai
E vakabauta o Jean Alldredge Stevens ni dau vakavuna sara e dua na ka levu ki na nodra bula na gone na nodra vakila na loloma ena dua na yabaki ni bula lailai sara. Na nodra lomani na gone sa dau vukei ira me ra kila ka vakasamataka rawa na loloma levu sa tu vei rau na Tamada Vakalomalagi kei koya na iVakabula me baleti ira.
A sucu mai vei rau o Claron kei Helen Alldredge ena Noveba ni 1952 o Sisita Stevens, e Salt Lake City, Utah, e Merika.
“A susugi mai vei rau e rua na itubutubu ka dua na ka na nodrau vakabauta,” a kaya o Sisita Stevens. “Erau lomana na Turaga ka rau dau vakavulica na kosipeli e neitou vale. Sa dau vakasakiti sara na nona dau rawata o tinaqu me lomani ira na tamata.” E nanuma rawa, mai na dua na yabaki ni bula lailai sara, na nodrau dau lomani koya na nona itubutubu ka vakakina na nodrau dau marautaka talega na qarava na Turaga.
A dau vakayacora talega vakakina na ivakarau vata o ya o Sisita Stevens kei iratou na nona matavuvale ni oti na nodrau mai vakamau kei Mark Stevens, na watina ena Valetabu na Salt Lake ena ika 12 ni Sepiteba, 1973. Eratou lewe lima na luvedrau.
E marautaka o Sisita Stevens na nona qarava tiko na Turaga ka vakabibi ena madigi me veiqaravi vei ira na gone ena Lalai.
“Era dau vakila vakarawarawa sara na gone na veika vakayalo,” e a kaya o Sisita Stevens. “Era yaco vata mai kei na dua na yalo sa dau vakabauta ena vuravura oqo. E da dau vakila sara ga na kedra ituvaki vakalou ena gauna era qai yaco ga mai kina ki na vuravura oqo ni ra se qai biuta walega mai na nona iserau o Tamadra Vakalomalagi.”
E vakabauta o Sisita Stevens ni sa tu vei ira na iliuliu kei na qasenivuli ni Lalai na itavi bibi ni nodra vukei na itubutubu ena nodra vakavulica na kosipeli i Jisu Karisito. “Na Lalai sa dua dina na vanua totoka ka ra dau vakila kina na loloma na gone, ka vakakina vei ira na qasenivuli kei na iliuliu me ra vaqaqacotaka kina na lesoni era sa vulica mai vale,” e a kaya.
Ni bera na nona mai kacivi me veiqaravi vaka imatai ni daunivakasala ena mataveiliutaki raraba ni Lalai, e a dau veiqaravi tu mai ena matabose raraba ni Lalai o Sisita Stevens. Sa veiqaravi oti talega vaka- peresitedi ni iSoqosoqo ni Veivukei, daunivakasala ni mataveiliutaki ni Lalai ena tabanalevu, kei na qasenivuli ni iVakavuvuli ni Kosipeli. E a tauri ivola ni dua na koroi ni vuku ena veika vakavika kei na veivakavulici o Sisita Stevens mai na Univesiti e Utah.