iTabatamata era Semati ena Loloma
Na gagadre eda sucu vata mai meda sema vata vakamatavuvale ena qai yaco dina ena gauna sa da sema kivei ira na qase e liu ena cakacakatabu vakalotu e valetabu.
Na ivola eda dau ciqoma ena gauna ni Siganimate kei na Siganisucu Siganisucu eda dau vakananumi ira lesu kina na noda itokani kei na wekada lomani. Eso vei ira na itukutuku oqo era vakabulabulataki ena itaba talei ni matavuvale. Oqo e dua au a taleitaka sara.
Oqo na itaba ni dua vei ira na makubui keirau goneyalewa vakarua. Au vakatokai koya me ko “Ruby Daulomani.” Au nanumi tinana sara niu raica na itaba oqo ni se qai yabaki vata talega vakaoqo. Au a taura mai na noqu faili na itaba oqo kei “tinai Ruby Daulomani—e dua vei ira na makubui keirau goneyalewa.
Au a tabaka na itaba oqo kei “tinai Ruby Daulomani ena 29 na yabaki sa oti. Se karakarawa vinaka toka ga na yaloka ni matana.
E cereki na balolo ni vakanananu talei ni veimama ni senitiuri sa oti, ki na gauna “a mai lewe vou kina ni matavuvale o bui Ruby Daulomani—dua vei iratou na luvei keirau yalewa. Oqo e dua vei ira na kena itaba ni se gone. Ia oqo sa mai dua toka na budra na gone dau loloma, kau sa mai “tukai Ruby Daulomani vakarua. (Au na sega ni vakaraitaka na kequ itaba niu se gone. Ena sega ni yaga.) Na itaba kece oqo era tukuna tiko na loloma e semata vata tiko e va na itabatamata.
Niu dau vakananuma na noqu lomani iratou yadua na lewe ni noqu matavuvale, au vakila kina edua na itagede, na loloma nei Tamada Vakalomalagi vei ira na Luvena. Ena kena sa boloraki tikoga na matavuvale e vuravura taucoko, na Lotu i Jisu Karisito ni Yalododonu Edaidai, sa mai vakaraitaka kina, ka taqomaka na dina ni matavuvale ni sa iusutu ni nona yavu na dauniveibuli me baleta na nodra rawata na bula tawamudu o ira na luvena. “Na Matavuvale: Ai Vakaro ki Vuravura Raraba” kei na noda sasaga levu ni tuva kawa sa rua ga na ivakadinadina o ya ni kauta mai na Lotu oqo na inuinui kei na veivuke ki na vakacokotaki vakalou ni matavuvale.
Eda vakavulica ni sa tawayalani na loloma ni Kalou vei ira na luvena. Se kawa tamata cava ga, matanitu, tagane se yalewa, E lomani ira taucoko sara.1 Sa vakayacora tu mai na ivakatekivu ka na vakayacora tikoga. Sa sureti keda taucoko o Koya meda rawata na bula vakalou tawamudu me baleta na noda matavuvale. Na Nona cakacaka kei na lagilagi me ra tucake tale mai na mate na tamata kece ga ka rawata na bula tawamudu—na nodra bula vakacerecerei—na luvena.2 “Ni sa lomani ira na kai vuravura vakaoqo na Kalou, me solia kina na luvena e duabauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”3
Na Veisorovaki nei Luvena Daulomani sa mai vakayacori rawa kina na inaki e rua nei Tamana. Ni sega na Veisorovaki, ena sega na tucake tale mai na mate. Ni sega na Veisorovaki, ena sega na lesu tale ki na itikotiko nei Tamada ka sega ni toso na matavuvale ni oti na mate.
Ena vuku ga ni Veisorovaki, sa rawa mera kila na veivakalougatataki cecere oqo o ira na luve ni Kalou yadua era vakamuria na Nona lawa tawamudu. Ena veitabayabaki, e vuqa sara vei ira na luvena era sa vakalougatataki ena kosipeli, ia e vuqa tale e sega. Ni bera ni tauyavu ko vuravura, sa tekivutaka rawa mai na Tamada Vakalomalagi na cakacakatabu vakalotu ni papitaiso baleti ira sa mate ka ra a sega ni kila na kosipeli.4 E lomani ira talega o Koya.
Sa vakarautaka talega e dua na sala vei ira me rawa ni ra lewe ni dua na matavuvale tawamudu. Na tamata yadudua era tadu mai ki na vuravura oqo sa kawa ni dua na itabatamata ni itubutubu. Sa tu vei keda na gagadre dina meda semavata kei ira na noda qase e liu. E buebue tiko e lomada na gagadre oqo, se cava ga na yabaki ni bula.
Meda vakasamataka mada na kena yaco e dua na isema vakayalo ni vukei buna e dua na goneyalewa me vakacuruma na itukutuku ni matavuvale ki na kompiuta se na gauna e raica kina e dua na cauravou na yacai tukana vakarua ena dua na itukutuku ni lewenivanua. Ni da vagolea na yaloda vei ira na qase e liu, sa veisau e dua na ka e lomada. Eda vakila e dua na ka e cecere cake mai vei keda. Na gagadre eda sucu vata mai meda sema vata vakamatavuvale ena qai yaco dina ena gauna sa da sema kivei ira na qase e liu ena cakacakatabu vakalotu e valetabu.
Me baleta ga na bibi ni cakacaka oqo, sa tara kina na Lotu na veivaletabu me volekati ira ga na tamata, 5 ka sa toso cake tikoga na vakadidike ni tuva kawa. Sa toso cake tale tikoga na iwalewale ni nodra vakasaqarai ka vakarautaki na yaca ki na cakacakatabu vakalotu ena valetabu. Ena koniferedi ni Okotova 2005, a vakaraitaka kina o Peresitedi Gordon B. Hinckley e dua na ituvatuva vakasakiti ni toso ki liu ni cakacaka ni tuva kawa kei na valetabu. A kaya: “E dua na tikina e veivakaleqai tiko ena noda veiqaravi ni valetabu sai koya ena kena sa levu cake tiko na valetabu … ena veiyasai vuravura sa yaco tiko kina na kena tokaruataki na qaravi ni cakacaka tabu ena vukudra na mate… . O koya keitou a sa mai qarava tiko kina ena dua na gauna sa oti e dua na cakacaka dredre… . E koto na kena iwali ena kila ka vakompiuta vereverea.”6
Mai na gauna o ya, e sega walega ni vakaruataki na cakacaka, ia sa vakarawarawataki na kena ivakarau me rawa ki na lewe yadudua ni Lotu mera vakaitavi ena cakacaka ni valetabu kei na tuva kawa. Sa sega tale ni ra vakayacora na cakacaka oqo o ira na kenadau. Se cava ga na kemu ituvaki, sa rawa me tiki ni nomu bula na tuva kawa ena gauna sara ga oqo. Sa rawa vei ira na gone ni Lalai mera droinitaka e dua na ituvatuva ni kawa ni matavuvale. Sa rawa mera papitaisotaki ena vukudra eso o ira na itabagone. Sa rawa talega mera vukei ira sa qase sara ena kompiuta. Sa rawa vei ira na itubutubu mera talanoataka na nodra bula vei ira nodra kawa. Sa rawa vei ira na qase cake bula kilikili me vaka-ivolatara ni valetabu ka vakayacora na cakacaka tabu vakalotu baleti ira na wekadra.
A kaya o Parofita Josefa Simici, “Na ilesilesi cecere duadua ena vuravura oqo sa vakataqara vei keda na Kalou o ya meda vakasaqarai ira na noda mate.”7 Na tekinolaji vou sa mai vakarawarawataka sara na kena vakayacori rawa na ilesilesi oqo. Sa vakayacori tiko na cakacaka ni valetabu kei na tuva kawa ena dua na parokaramu vou e vakatokai na “FamilySearch.”8 Na kena semati ena Initaneti e vukei ira na lewenilotu mera kilai ira na nodra qase e liu, vakadeitaka na mataqali cakacaka cava me vakayacori ena vukudra, ka vakarautaki na yacadra me baleta na valetabu. E rawa ni laurai ga mai vale, ena valenivolavola ni tuva kawa,9 se vanua ga e tiko kina na Initaneti. E rawarawa na kena icakacaka.10
Mo raica taumada na yacai koya o gadreva mo cakava na nona cakacaka ni valetabu.
Mo qai lavetaka e dua na Family Ordinance Request. Na ivola oqo ena vakarautaka na itukutuku e gadrevi mai ena valetabu ka sega ni gadrevi kina mo kauta na disi ni kompiuta.
Mai na Family Ordinance Request, era na lavetaki kina e valetabu na kadi ni cakacakatabu vakalotu. Ni caka oti na cakacakatabu vakalotu, ena qai vakacurumi sara ki na FamilySearch vou ena siga tiko ga o ya.
Ia e na vakacava oi kemuni e sega na nomuni kompiuta se ko ni sega ni via vakayagataka na tekinolaji oqo? Kakua ni leqa! Kalawa yadudua. Tekivu e vale. Tekivu ena dua na kateni lala, ka a vakatura o Peresitedi Boyd K. Packer.11 Biuta kina na itukutuku bibi baleti iko kei nomu matavuvale. Vakuria kina na itukutuku ni nomu matavuvale era solia mai na tamata. Mo qai kere veivuke vei daunivakasala ni tuva kawa ni nomu tabanalevu se tabana. Na veiqaravi ni FamilySearch vou ena vakarawarawataka vei daunivakasala ni tuva kawa me vakayacora rawa kina na cakacaka taucoko vakompiuta baleti iko, oka kina na vakarautaki ni yaca ki na valetabu. E volekata ni 60,000 na daunivakasala era veiqaravi tiko e vuravura taucoko. O koya e tiko ena nomudou tabanalevu se tabana ena vukei iko vakalevu sara.
Na parokaramu vou ni FamilySearch e veisautaka na iwalewale ni cakacaka ni tuva kawa ena kena tauyavutaki e dua na yavu ni kawa. E liu, era cakacaka yadudua ga na tamata, ka maroroya toka vakai koya na itukutuku ni nona kawa. E dau cakacaka tiko e dua ka sega ni kila na veika era cakava tiko na nona lewe ni matavuvale. Ia oqo sa rawa ki na tamata yadua me soli itukutuku mai ka ra cakacaka vata kei na so tale ena kena tuvanaki na nodra kawa.
Ni sa toso ki liu na FamilySearch vou, se dua tikoga na ikalawa. E se levu tiko na cakacaka. Baleta ga ni vakacuruma tiko na gacagaca oqo na veiitukutuku e biu ki na Lotu ena veitabayabaki sa oti mai na vuqa na ivurevure, sa na rawa ki na FamilySearch vou me toboka rawa na itukutuku e vakacurumi vakarua se cala ka a sega ni bau laurai e liu. E yaga sara vakabibi na ka oqo vei ira era kawa ni painia e liu. Na vakaruataki ni cakacaka kei na cala me na vakadodonutaki, ka sega e dua me na vakavinakataka cake, sai ira sara ga na lewe yadudua ni veimatavuvale.
Ko na rairai lomaleqa ni ko cakacaka ka sotava na veibolebole oqo. Ni yalo vakacegu sa kilai tiko na nomuni leqa. Ena veiliutaki veivakauqeti nei Peresitedi Thomas S. Monson, sa cakacaka tiko kina vagumatua na Lotu me vukei iko ena kena wali na leqa oqo. Eda sa gu vata tiko me tauyavutaki e dua ga na kawa ni luvena taucoko na Kalou. Oqo e dua na sasaga vakaitamera ka vakaitamera na kena kalougata.
E cakacaka marautaki oqo. Raica mada na kedra itaba na curuvou era cakava tiko oqo na cakacaka ni valetabu baleti ira na wekadra. Era gole mai na Yalododonu talei oqo mai na iteki o San Salvador El Salvador Ilopango ka sa isevu tiko ni nodra curuma na Valetabu e Guatemala City. Era taura tu qo na nodra kadi ni valetabu, ka tiko kina e dua na yaca ni nodra qase e liu ka ra sa papitaisotaki oti ena vukudra.
Ena kena gadrevi me mana na sasaga ni tuva kawa ni Lotu, sa ka bibi kina na veidusimaki kei na veiliutaki ni matabete. Era na veivakavulici ka vakadinadinataka na iliuliu na ivakavuvuli e tokona tiko na cakacaka vakalou oqo.12 Era na kaciva eso ka raica mena vakarautaki tu na idusidusi.13 Era na raica na itaviqaravi ni valetabu kei na tuva kawa me dua na sala ni laveti cake vakayalo ni nodra tabanalevu, vaqaqacotaki na wakadra vakayalo na curuvou, ka vakalougatataka na nodra bula na lewenilotu kecega.
Sa tiko ena cakacaka ni valetabu kei na tuva kawa na kaukauwa mera vakalougatataki kina o ira era tiko mai yasa kadua ni ilati, sa tiko talega ga kina na kaukauwa me vakalougatataki ira era bula tiko. E veivakasavasavataki na kena veivakauqeti vei ira era cakava na cakacaka oqo. Era sa veivuke sara tiko ga mera vakacerecerei na nodra matavuvale.
Eda na vakacerecerei ni da bula vata kei ira na lewe tale eso ni noda matavuvale ena itikotiko ni Kalou sa Cecere. A raica oti tu mai o Parofita Josefa Simici na noda itavi oqo: “Raica sa voleka ni yaco mai na siga sa levu ni Turaga … ,” a kaya. “Ia meda ia koi keda kece ga na tamata eda sa i soqosoqo lewe ni Lotu, me da vakacabora vua na Turaga na i madrali sa dodonu; ia meda vakacabora ki na nona valetabu … na kedra ivola tukutuku na wekada era sa mate, io me dodonu vinaka me vakadonui kina.”14
Na vakarautaki ni itukutuku o ya sa itavi ni tamata yadudua ka noda itavi vata. Ni da cakacaka vata, sa rawa me qai kilikili kina ka me vakadonuya na Turaga. Na itukutuku o ya ena laki vakayacori rawa kina na cakacaka vakalotu ena vukudra ka ra ciqoma talega o ira na noda qase e liu, ni ra sa digitaka vakakina. Na cakacakatabu vakalotu oqo ena kauta mai na veisereki vei ira era vesuki tu ena yasana kadua ni ilati.15
O ira na luvei keirau, makubui keirau, “o Ruby Daulomani,” kei ira taucoko na makubui keirau vakarua era sa semati tu ena loloma. Era sa sematitale tu ga vei ira na nodra qase e liu ena loloma. Na isema oqori, ka ra sa laki vakacurumi ena cakacaka vakalotu, sa veimuataki yani ki na nodra laki vakacerecerei na noda matavuvale.16 Sa noqu masu me da na kila vakayadudua na inaki vakalou oqo ena yaca i Jisu Karisito, emeni.