Rosemary M. Wixom
Peresitedi Raraba ni Lalai
Ena dua na vuravura ka vakasinaiti tu ena rorogo kei na vakanuinui kara, sa dodonu vei ira na gone me ra kila ka rogoca na vakasolokakana ni Yalo, a kaya o Rosemary Mix Wixom, ka sa mai tokoni vou vaka-peresitedi raraba ni Lalai.
“E rawa me ra na nuidei na gone mai na masu,” e a kaya. “E rawa me ra na kila ni ra sega ni tu taudua, ni sa dau lako vata voli ga kei ira na iVakabula, ka sa Lomani ira vakakina—ena gauna mada ga era malumalumu kina.”
Sucu ena Tiseba ni 1948 vei rau o Robert Wayne kei Mary Mix, a tubu cake e Salt Lake City, Utah, e Merika o Sisita Wixom. Ena gauna e tubu cake tiko kina, a nona itokani vinaka duadua o tacina yalewa ka kena isa ni drua, ka rau vakavulici koya na nona itubutubu me dau solisoli ena yalomarau. “Au dau nuidei, niu dau curuma yani na katuba e vale,” a kaya o Sisita Wixom.
Ena gauna a yabaki 12 kina, a yavutaki vakatitobu cake na waka ni nona bula ni vakanuinui. Ena nona a dabe tiko ena soqoni ni vakadinadina, a vakila vakaukauwa sara na gagadre me vakaraitaka na ka e vakila me baleta na iVakabula. “Au a tucake, kau sa sovaraka ga mai tuba na noqu lomani Jisu,” e a nanuma lesu tale tiko o Sisita Wixom. A vukei koya o tinana me kila ni sai koya na Yalo Tabu ka a vakauqeta na veika e a vakila.
“Au a se sega ni kila me na kaukauwa ka dina tu vaka o ya na Yalo Tabu,” a kaya o Sisita Wixom. E a luvuci koya vakalevu na yalo ni vakacegu mai vua naYalo Tabu ena vuqa na yabaki ka tarava mai o ya ena nona a masulaka tiko e dua vei iratou na luvena. Sa nona vakanuinui ena gauna oqo me ra vukei ira na gone ena nodra rogoca na vakasolokakana ni Yalo Tabu o ira na itubutubu, liuliu ni Lalai kei ira na qasenivuli.
E a rawata mai na Univesiti na Utah State o Sisita Wixom na nona koroi ni vuku ena veika vakavuli. A vakamau kei Blaine Jackson Wixom, na watina ena Valetabu na Salt Lake ena ika 18 ni Okosita, 1970. Erau nodra itubutubu e ono na gone.
E a lewe tu mai ni matabose raraba ni Lalai o Sisita Wixom ni bera ni rau mai veiqaravi kei watina ena gauna a vakatulewataka tiko kina na Tabana ni Kaulotu na Washington D.C. South. E muri e a qai veiqaravi yani ena matabose raraba ni Goneyalewa o Sisita Wixom, na ilesilesi ka veiqaravi tiko kina me yacova na nona mai kacivi oqo me peresitedi raraba ni Lalai.