Tauyavutaki ni Lewa Vinaka ka Kakua ni Vakalewai Ira Eso
E sega ni gadrevi walega na lewa vakadodonu ena nodra kilai na tamata, ia ena gauna talega meda vakatulewa kina ka na muataki keda yani se kauti keda tani mai vua na Tamada Vakalomalagi.
Eda bula tiko ena dua na vuravura eda na vakayacora kina e vuqa na lewa e dau dredre. Ia, sa solia kina na iVakabula e dua na ivakaro meda “kakua ni daulelewa”1 vei ira na wekada.1 Eda vakayacora rawa vakacava oqo me da qai lewa tiko vakavinaka ena dua na vuravura e sinai tu kina na ilawaki kei na cakacaka butobuto? Meda lewa vakavuku ena veika bibi ni ituvaki yadua ni noda bula, me vakataka na digitaki ni itokani, kunei e dua na itokani tawamudu, se digitaki na cakacaka ena maroroi kina na noda matavuvale ka qaravi kina na Turaga. E dina ga ni sa kerei keda na Turaga meda kakua ni vakalewai ira na tani, sa namaka tikoga o Koya meda dau lewa vakavuku.
Ena so gauna eda dau vakayacora eso na lewa totolo baleti ira na tamata, ka dau yaco me veisautaka se vakatanitaka na noda veimaliwai kei ira. E vakavuqa na noda dau lewa cala baleta na lailai ni itukutuku, se baleta ni da sega ni raica yani na veika e ulabaleti keda tiko yani e liu.
Me kena ivakaraitaki, na italanoa e dau tukuni tiko baleti Jisu ni a sikova yani na vale nei Meri kei Marica, mai Pecani vata kei Lasarusa na ganedrau. E dau taleitaki vakalevu mai kina na iVakavuvuli, me dau laki vakacegu kina ka marautaka na ituvaki ni bula savasava ni tikotiko o ya. Ena dua na Nona veisiko, a maqusa voli o Marica na vakarautaka na kakana ka laki dabe sara o Meri e yavani iVakavuvuli me vakasalataki mai Vua.
“Ia ko Marica sa veidreyaki na lomana, ni sa vakarau vakalevu, a sa lako mai ka kaya, Kemuni na Turaga, ko ni sa wele ga ni sa laivi au na taciqu meu vakarau duadua ga? …
“A sa vosa ko Jisu ka kaya vua, I Marica, I Marica, ko sa lomaocaoca ka veinananuyaka na veika e vuqa:
“Ia sa dua bauga na ka e yaga: a sa digitaka ko Meri na ivotavota vinaka, o koya ena sega ni kau tani mai vua.”2
E vuqa na lesoni ena Sigatabu e vakatavulici kina na italanoa oqo ka na rairai raici beka kina o Marica me lailai na nona vakabauta. Ia e tiko tale e dua na italanoa ni marama qaqa oqo, o Marica, ka da raica rawa kina vakatitobu na nona kila kei na ivakadinadina. A yaco oqo ena gauna a lako yani kina na iVakabula me laki vakaturi Lasarusa, na ganena, mai na mate. Oqo na gauna eda raica kina ni a laki tavaki Jisu o Marica “ena gauna ga sa rogoca kina” ni sa lako mai o Koya. Ni sa sotavi Koya, a kaya kina ni sa “kila” ni na “solia vei [Koya] edaidai na Kalou na ka kecega ena kerea vua na Kalou o [Koya].”
Sa qai wasea na Turaga vei Marica na vunau levu ni tucaketale, ka kaya,
“Oi au na vu ni tucaketale, kei na vu ni bula, ko koya sa vakabauti au, kevaka sa mate, ena bula ga:
“Ia ko koya yadua sa bula ka vakabauti au, ena sega sara ni mate. Ko sa vakadinata na ka oqo, se segai?”
Sa qai kaya lesu ena dua na ivakadinadina kaukauwa: “Io, na Turaga: au sa vakadinata ni sa Karisito koi kemuni, na Luve ni Kalou, ko koya sa dodonu me lako mai ki vuravura”3
Sa vakavica beka na nona vakalewai o Marica ni dua e dau kauwai vakalevu ena veika vakayago ka sega ena ka ni Yalotabu? Ia, na nona ivakadinadina me baleta na veivakatovolei ena mate nei ganena e vakaraitaki vakamatata kina na titobu ni nona kila kei na vakabauta.
E vuqa na marama era sa rogoca oti na imatai ni talanoa ka vakataroga se o Meri beka o ya se o Marica, ia na dina e tiko ena kena kilai na ituvaki taucoko ni tamata ka vakatauca e dua na lewa vinaka. Ni da sa kilai Marica vakavinaka, eda qai kila kina ni o koya e dua e titobu sara na kena ituvaki vakayalo ka a douvaka ka yaloqaqataka me vakadinadinataka na ilesilesi ni iVakabula kei na Nona kaukauwa vakalou e ulabaleta na bula. Na noda nanuma cala baleti Marica e rairai sa vakavuna meda kila kina na ituvaki dina ni marama vinaka oqo.
Vei au mada ga, niu se vuniwai gone, au vulica kina e dua na lesoni me baleta na lewa vakatotolo. Ena dua na bogi ni noqu cakacaka ena tabana ni leqa tubukoso, a lako yani e dua na cauravou kei watina e tauvi koya e dua na mosi bibi. Mai na kedrau irairai, eda raica votu ni rau curuma tiko e dua na bula voravora. E rakoi ca ka balavu na ului cauravou. E dukaveluvelu na nodrau isulu ka laurai e matadrau ruarua na revurevu ni bula voravora.
Ni sa laurai oti, keirau a dabe vata kau vakamacalataka vua na leqa kei na veiqaravi me caka. A raici au mai na cauravou oqo ka laurai e matana e dua na loloma titobu ka dau kunekune dredre ka taro mai ena loloma dina ni tagane vakawati veikauwaitaki, “Vuniwai, ena vinaka beka o watiqu?” Ena gauna o ya, au vakila ni tukuna vei au na Yalotabu ni luve ni Kalou o koya kau raica e matana na ivakadinadina ni iVakabula. E dua oqo e lomana dina e dua kau a vakalewai koya. Au a vuli mai kina kau na nanuma tikoga.
E sega ni gadrevi walega na lewa vakadodonu ena nodra kilai na tamata, ia ena gauna talega meda vakatulewa kina ka na muataki keda yani se kauti keda tani mai vua na Tamada Vakalomalagi. Niu raica lesu na noqu bula, au raica rawa e levu na gauna a yaco kina na veisau ni ilakolako, mai na lewa cala, ka a rawa ni kauti au vakayawa sara mai na vanua a gadreva na Turaga meu a tiko kina—na vakatulewa meu vakamatavuvale niu se vuli tiko, vakaitavitaki au ena ituvaki taucoko ni kosipeli, saumi ikatini kei na isolisoli ni lolo ena gauna e lailai tiko kina na isau, ka ciqoma na veikacivi eso ena gauna dredre, ka a vukei au meu kila vakavinaka vakalevu na solibula. E calati e vuqa na veivakalougatataki ena bula oqo baleta ni a tau kina na lewa vakavuravura ka a dodonu me lewa vakayalo.
Era tiko e vuqa sara na mataqali tamata era sa tauyavutaka na lewa vinaka. Au na solia mada e va na idusidusi me tauyavutaki na lewa vakaoqori ni dau vakayacori na vakatulewa bibi.
iMatai, semata vata na nomu ivakatagedegede kei na kosipeli i Jisu Karisito. Ena sega ni rawa vua e dua me lewa vakavinaka ke sega vua na kosipeli i Jisu Karisito me rai kina. E sa balavu sara mai ka mana na veidusimaki ni kosipeli vei ira na tamata me ra bula marau. Eso vei ira na vakasama vakavuravura era sa ciri yawa tiko kina na tamata ni ra saga tiko me ra kila na nodra dui ivakatagedegede. Ena vuku ni ka oqo, eda rogoca na malanivosa me vakataka “e dua na bula vou.” Na malanivosa oqo e veilawakitaki! Na ivakatagedegede ni bula savasava era tawamudu ka se bera ni bau veisau; meda kakua talega ni via raica e dua na kena ivakadewa vou. Vei ira na itabagone na ivakatagedegede oqo era sa volai tiko ena ivola lailai Me iSakisaki ni iTabagone. Na ivakatagedegede oqo sa semati vata tu kei na kosipeli i Jisu Karisito ka se kedra inaki me laki tomani yani ni ra qase. Ena rairai vinaka cake vei keda na qase meda wilika ka bulataka na veika e tiko ena ivola lailai oqo ki na noda bula.
iKarua, rogoca na nona itukutuku na parofita bula. Sa na rairai levei e vica beka na vakatulewa cala vakailavo ke da a vakarorogo beka ki na veivakasala ni veiyabaki mai vei ira na noda parofita me baleta na noda dro tani mai na vakanananu cala ka muria e dua na tuva ilavo vuku me kakua kina na dinau? Sa na vakabulai e vica beka na vakamau ena kena tau na vakatulewa vinaka ni lako tani mai na veiitukutuku e kauti keda ki na vakatotogani ena iyaloyalo vakasisila kei na mosi ni yalo? E tiko ena koniferedi yadua kei na mekasini ni Lotu na nodra veivakasalataki na parofita ni kevaka ena vakamuri, ena vakatara vei keda meda lewa vinaka. Sa sega kina na noda iulubale ke da vakawalena.
iKatolu, bucina vata kei na Yalo Tabu e dua na veimaliwai ni vakarorogo. Sa soli tu vei keda na isolisoli ni Yalo Tabu ni da papitaiso oti, ia eda dau biuta tu ga na isolisoli oqo, ka da guilecava ni na vukei keda o Koya ena vuqa na vakatulewa bibi ni noda bula. Sa solia vei keda na Turaga na isolisoli oqo ni kila eda na sotava eso na vakatulewa dredre ena noda bula. E ka bibi meda rogoca na domo oqo me vakatorocaketaki meda lewa vakavinaka. Na veimaliwai ni veirogorogoci e dau gadrevi kina na veivanua vakanomodi me da na tugana ka rogoca na domo lailai malumu e vinaka. Na ituvaki veivakacegui vakaoqo e vakayago ka vakayalo. O koya gona, ni sega walega ni kena tagutuvi na ivakatagi vakavuravura se na veiitukutuku rogolevu tale eso; sai koya talega na kena tagutuvi na rorogo ni ivalavala ca e tiko e lomada. Oqo ena tadolava na veirogorogoci kei na Yalotabu, ka sa gadrevi vakaca sara.
E kaya na Karisito: “Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.”4 Na vakacegu e kauta mai na vakarorogo ki na Yalo Tabu ena tagutuva laivi na rere ni vakatulewa cala ni bula oqo.
iKava, maroroya na vunau. Ni da gadreva meda maroroya na vunau ni Kalou ena dolavi vei keda e vuqa na veivakalougatataki sa yalataki tu. Na iVola i Momani, ka sa dua tale na ivakadinadina kei Jisu Karisito, sa baleta na isau ni kena maroroi kei na sega ni maroroi na vunau. A kaya na Turaga vei Nifai ena ikarua ni wase ni imatai ni nona ivola: “Ia kevaka ko na muria na noqu vunau, ko na kalougata.”5
Oqo na yalayala vata ga era dau cavuta tiko e vuqa vei ira na parofita cecere ena iVola i Momani. Sa mai volai kina na itukutuku ni udolu na yabaki ka vakadinadinataka tiko ni sa dina na veika oqo. Na itukutuku talega oqo sa baleti keda tiko nikua. Ena vulici vakavinaka ga na lewa vinaka ena loma ni bai ni Turaga ni solia vei keda na ivunau.
Au sa vakadinadinataka ni gauna eda sotava kina na vakatulewa dredre ka vakamuria na idusidusi oqo, eda na kila vakavinaka cake na sala meda vakatulewa kina. Ena yaca i Jisu Karisito, emeni.