Elder Jairo Mazzagardi
Ena Vitusagavulu
E kila tu o Elder Jairo Mazzagardi na ibalebale ni solibula ki na cakacaka ni Turaga. Ena 1990, e a ciqoma e dua na talevoni mai vei Peresitedi Thomas S. Monson, ni se dua kina na daunivakasala ena Mataveiliutaki Taumada, ka kacivi Elder Mazzagardi kina me laki vakatulewa ena Tabana ni Kaulotu na Salvador Brazil.
“Au a sega ni tadra niu na yaco meu dua na peresitedi ni kaulotu,” a kaya o Elder Mazzagardi. “Au a peresitedi tu mai ni iteki me volekata na lima na yabaki. E a dua na gauna osooso—ka vinaka—ena neitou bisinisi. Na ciqomi ni veikacivi oqo sa na kena ibalebale ni sa na biu tu mai ni veika kece.”
Ni mai cava na qiri, e a solia o Peresitedi Monson e dua na gauna vei Elder Mazzagardi me vakasamataka kina na ilesilesi oqo. Ia o irau o Elder Mazzagardi kei watina erau a sa nanuma tu mai ena vica vata na yabaki yani e liu me rau na bula vakatabui tu vua na Turaga, ka yaco kina vua me vakaio ena gauna vata sara ga o ya. “Se cava ga ena gadreva vei keirau na Turaga, keirau sa tu vakarau me keirau lako,” e a kaya.
Ni bera na nona kacivi ki na iKarua ni Kuoramu ni Vitusagavulu, e a veiqaravi tu vaka-daunivakasala vei bisopi o Elder Mazzagardi, lewe ni matabose e cake, daunivakasala ena mataveiliutaki ni iteki, peresitedi ni iteki, mata ni iwasewase, Vitusagavulu ni iWasewase, daunivakasala ena mataveiliutaki ni Valetabu na Campinas Brazil, ka peresitedi ni Valetabu na São Paulo Brazil.
O Elder Mazzagardi, e dua na itaukei ni bisinisi, e a vakayagataka tu mai e dua na tiki ni nona bula vakacakacaka ena kabani ni lewe ni bulumakau ka qai yaco e muri me taukena e dua na kabani ni voli vale. A veiqaravi talega ena mataivalu ni Brazil vaka dua na satini ni iyaragi mai na 1965 ki na 1966. A sucu vei rau o Antonio kei Margarida Mazzagardi ena Epereli ni 1947 e Itú, Brazil. A tubu cake e kea ka vakakina e Jundiaí, Brazil. O koya kei Elizabeth Ienne, na watina, erau a sota ni rau a se gone ka rau a vakamau e Hoboken, New Jersey, ena July ni 1970.
E dina ga ni rau a sega ni dau kauwaitaka sara tu na Lotu ena vica vata na yabaki, ia ni rau a lesu tale yani ki Brazil na Mazzagardis, a sureti rau e dua na itokani me rau tiko ena dolavi raraba ni Valetabu na São Paulo Brazil. Erau a vakila ruarua mai kea na veivakauqeti kaukauwa vakayalo. Rau a papitaisotaki ena ika 31 ni Okotova, 1978, ka ratou vauci tawamudu vakamatavuvale ena Noveba ni 1979. Eratou lewe tolu na luvedrau na Mazzagardis.