Elder Patrick Kearon
Ena Vitusagavulu
Ena nona a tiko vakalailai e California, a tiko vata kei na dua na matavuvale Yalododonu Edaidai “vakasakiti” o Elder Patrick Kearon, ka ratou a wasea kina vua na kosipeli.
Ni oti e rua na yabaki, ni sa tiko tale mai nodratou e Igiladi, e a sotavi rau kina na daukaulotu ena dua na tolo ni sala e Lodoni, ka tekivu sara me vakataroga na Lotu. E a raica sara e dua na ivolanikalou ena Vola i Momani ka tukuni kina, “Sa sucu na tamata me rawata na marau” (2 Nifai 2:25). E vakavoqataka tale vua na ivolanikalou ena nona nanuma lesu na reki ena nodratou vale na matavuvale YDE vakakina ena nodrau bula na daukaulotu erau a vakavulici koya tiko.
“E tatagi e daligagu na ivolanikalou,” a kaya o Elder Kearon. “Mai vei ira au a sotava, au a raica na sala ka rawa me cokonaki sara kina vakavinaka na noda bula ena noda muria na nona ivakasala na iVakabula meda reki tikoga.”
Ena nona a curu mai kina na Lotu ena ika 24 ni Tiseba, 1987, sa kauta mai kina na reki oqo ki na vuqa sara na ilesilesi, o Elder Kearon, oka kina na peresitedi ni Cauravou, daunivakasala vei bisopi, peresitedi ni tabana, peresitedi ni iteki, kei na Vitusagavulu ni iWasewase.
Me vaka ni sa mai lewe vou ni iMatai ni Kuoramu ni Vitusagavulu, e a kaya ni a dau “tovolea vakaukauwa tu ga me dusimaki tiko ena ivakavuvuli ni Lotu. Au sa raica na sala e veisautaka kina na bula ni tamata na bulataki ni veiivakavuvuli oqori.”
E a sucu o Elder Kearon e Carlisle, Cumberland, e Igiladi, ena Julai ni 1961, vei rau o Paddy kei Patricia Kearon. Ena gauna a veiqaravi tiko kina o tamana ena Mataivalu e Macawa ni Peritania, e a vuli mai na Tokalau e Loma vata kei Igiladi o Elder Kearon.
E a sotavi Jennifer Carole Hulme ena gauna e a vuli tiko kina e Igiladi ena Univesiti na Brigham Young. Erau a vakamau ena Valetabu na Oakland California ena 1991. Erau nodra itubutubu e va na gone, ka sa mate e dua.
E a sa vakaitikotiko ka cakacaka oti e Igiladi, Saudi Arabia, kei Amerika o Elder Kearon ena veikabani, oka kina na politiki, veiqaravi vakavuniwai, kei na kabani ni motoka. Ni bera na nona kacivi erau a cicivaka tiko e dua na kabani ni dauveivakasalataki e Igiladi, o Elder kei Sisita Kearon.