Nona Veikacivi Vakalou e Dua na Daukaulotu
E gadreva na Turaga na cauravou kece e rawa me ra vakavakarau ka yalataki ira tale, me tekivu ena bogi nikua, mo ni kilikili kaya na veikacivi mai vua e dua na parofita ni Kalou me ra laki kaulotu.
Ni bula vinaka, na taciqu lomani ena matabete. Ena bogi nikua au vinakata meu vosa me baleta na veiqaravi vakadaukaulotu. Au vagolea na noqu vosa ki na mataivalu vakaitamera ni cauravou ka ra taura tu na Matabete i Eroni era soqoni vata tiko ena veiyasai vuravura taucoko kei ira na tamadra, tukadra, kei ira na veiliutaki ni matabete era vakatawai ira.
Na cakacaka ni daukaulotu e dua na ka au dau vakamareqeta sara e yaloqu, me vakataki ira yadua na lewe ni walu na Kuoramu ni Vitusagavulu, ka sa lesi ira na Turaga me ra lako yani “ka liu vua ki na veikoro kecega kei na veitikina, sa via lako kina ko koya.”1 Na cakacaka ni daukaulotu sai koya na drabula ni Lotu ka na veivakabulai na kena veivakalougatataki vei ira kece era ciqoma na kena itukutuku.
Ni qaravi ira voli na tamata na iVakavuvuli, a kacivi ira na gonedau mai Kalili me ra biuta na nodra lawa ka muri Koya, ka tukuna kina, “Au na qisi kemudrau mo drau gonedau ni tamata.”2 A vakayacora na Turaga na veikacivi oqori vei ira na tamata yalomalumalumu me rawa kina ni ra rogoca na dina ni Nona kosipeli o ira na tani mai vei ira, ka ra lako mai Vua.
Ena June ni 1837, a kacivi Heber C. Kimball, e dua vei ira na iApositolo, na Parofita o Josefa Simici, me kaulotu ki Igiladi. A yaco mai na nona veikacivi o Elder Kimball ni rau dabe tiko na lewe rua oqo ena loma ni valetabu e Kirtland qai vosa kina ko Josefa ena veivakadonui vakalou: “Baraca Heber, sa vosa malua vei au na Yalo ni Turaga ‘Me na lako o Heber na noqu tamata ki Igiladi me laki kaburaka na noqu kosipeli ka tadolava na katuba ni veivakabulai ki na matanitu ko ya.’”3
Na vakasolokakana oqori ni Yalo sa ivakaraitaki ni ivakarau e dau yaco mai kina na veikacivi vei ira na italai ni Turaga ena nodra lesi na daukaulotu ki na vanua me ra laki veiqaravi kina.
Nikua era sa lako yarua na daukaulotu me vaka na veilesi ni Turaga, ka ra kauta voli na itukutuku vata o ya, kei na veikacivi vata vakalou ni veiqaravi mai vua na parofita ni Kalou. Na noda parofita, o Peresitedi Thomas S. Monson, e kaya me baleti ira era kacivi me ra veiqaravi: “Na madigi ni daukaulotu ni bula taucoko sa nomu. Sa waraki iko tu na veivakalougatataki ni tawamudu. Sa nomu na galala mo kakua ni sarasara ia mo vakaitavi ena buturara ni veiqaravi vakamatabete.”4
Sa nomuni na buturara, kemuni na gonetagane lomani ena Matabete i Eroni. Ko ni sa vakarau tu beka ka lomasoli mo ni vakayacora na nomuni itavi? E gadreva na Turaga na cauravou kece e rawa me ra vakavakarau ka yalataki ira tale, me tekivu ena bogi nikua, mo ni kilikili kaya na veikacivi mai vua e dua na parofita ni Kalou mo ni laki kaulotu.
Au nanuma vinaka toka na marau cecere ni neitou matavuvale taucoko ni rau sa ciqoma e rua vei iratou na luvei keirau na nodrau veikacivi me rau veiqaravi vakadaukaulotu tudei. E vakasinaiti na yaloi keitou ena vakanuinui kei na nanamaki ni rau sa dolava na nodrau dui ivola talei mai vua na parofita ni Kalou. A kacivi o Jenessa na luvei keirau yalewa ki na Tabana ni Kaulotu na Michigan Detroit, kei Christian na luvei keirau tagane, a kacivi ki na Tabana ni Kaulotu na Russia Moscow South. Sa dua na ka na yalo ni vakarokoroko kei na reki, ena dua vata ga na gauna!
Ena gauna keirau vakatulewa tiko kina kei Sisita Rasband ena Tabana ni Kaulotu na New York New York North ena vica na yabaki sa oti, au dau qoroqoro ni ra tadu yani ki na Korolevu o Niu Ioka.
Niu vakatarogi ira ena imatai ni nodra siga ena kaulotu, au vakasinaiti ena yalo e vakavinavinaka ena vukudra na daukaulotu yadua. Au vakila ni nodra kacivi mai ki na neirau tabana ni kaulotu e lewa vakalou me baleti ira ka vakakina vei au niu nodra peresitedi.
Ni sa oti na neirau ilesilesi ni kaulotu, au a kacivi mai vei Peresitedi Gordon B. Hinckley meu veiqaravi me vaka e dua na Vitusagavulu ena Lotu. E tiki ni noqu tuberi taumada niu se qai Vakaitutu Raraba vou na madigi meu dabe vata kei ira na Le Tinikarua ena nodra lesi ira na daukaulotu me ra veiqaravi ena dua vei ira na 300 vakacaca na tabana ni kaulotu ni Lotu cecere oqo.
Ena veivakayaloqaqataki kei na veivakadonui nei Peresitedi Henry B. Eyring, au vinakata meu tukuna vei kemuni e dua na ka au a sotava, kau sa dau vakamareqeta vakalevu, au a sotava vata kei koya ena vica na yabaki sa oti ni se lewena voli na Kuoramu ni Le Tinikarua. Na iApositolo yadua e tu vei ira na idola ni matanitu ka ra na vakayagataka ena veidusimaki kei na veilesi ni Peresitedi ni Lotu. A lesi ira tiko na daukaulotu o Elder Eyring ki na nodra vanua ni veiqaravi, ka me tiki ni noqu tuberi, au a sureti meu laki sarava toka.
Keirau duavata kei Elder Eyring ena dua na mataka lailai ena dua na rumu sa vakarautaki tu kina e vica na kompiuta lelevu me baleta na soqoni oqo. E tiko talega e dua na vakailesilesi mai na Tabacakacaka ni Daukaulotu ka lesi me mai veivuke vei keirau ena siga ko ya.
Taumada, keirau a tekiduru vata ena masu. Au nanuma toka na nona vakayagataka o Elder Eyring na vosa dina mai yalona, ka kerea na Turaga me vakalougatataki koya me kila “vinaka sara” na vanua me ra lesi kina na daukaulotu. Na vosa “vinaka sara” e tukuna e levu sara na ka me baleta na vakabauta e vakaraitaka o Elder Eyring ena siga ko ya.
Ni tekivu na cakacaka, ena basika mai ena dua vei ira na kompiuta na kena itaba na daukaulotu me lesi. Ni basika mai e dua na itaba, vei au e vaka sara ga ni tiko vata kei keitou ena rumu na daukaulotu. Ena qai kidavaki koya o Elder Eyring ena domo rogo malumu ka veikauwaitaki: “Yadra Elder Reier se Sisita Yang. O vakaevei toka nikua?”
E tukuna vei au o koya ni dau vinakata me vakasamataka ena nona vakasama na vanua me laki tini kina na nona veiqaravi na daukaulotu. Oqo ena vukei koya me kila na vanua me ra lesi kina. Ena qai dikeva o Elder Eyring na nodra itukutuku na bisopi kei na peresitedi ni iteki, na itukutuku vakavuniwai, kei na veika tale eso me baleti ira na daukaulotu yadua.
Oti qai gole tale ki na dua na kompiuta ka vakaraitaki tu kina na veiwasewase kei na tabana ni kaulotu e vuravura raraba. Ni sa oti kece, me vaka na veivakauqeti ni Yalotabu, ena qai lesia na daukaulotu ki na vanua me laki veiqaravi kina.
Mai vei ira na vo ni Le Tinikarua, au sa vulica kina ni kena iwalewale raraba oqo sa dau kena ivakarau e veimacawa ena nodra veilesi na iApositolo ni Turaga vei ira e levu sara na daukaulotu me ra veiqaravi e vuravura raraba.
Ena noqu veiqaravi vakadaukaulotu ena noqu vanua ena Tabana ni Kaulotu ena Eastern States ena vica vata na yabaki sa oti, a tarai au sara vakalevu na veika oqo. Ka vakakina na noqu sa veiqaravi oti vakaperesitedi ni kaulotu, au vakavinavinakataka e dua tale na ivakadinadina ki yaloqu ni o ira na daukaulotu au a ciqomi ira ena Koro levu ko Niu Ioka era a vakau yani vei au ena ivakatakila.
Ni sa lesia oti e vica na daukaulotu, a vuki yani vei au o Elder Eyring ni vakasamataka tiko e dua na daukaulotu ka kaya, “I Baraca Rasband, evei na vanua o nanuma ni dodonu me lako kina na daukaulotu oqo?” Au a kidacala! Au a tukuna vakamalua vei Elder Eyring niu sega ni kila ka niu sega ni kila ni rawa niu kila! A raici au mai vakadodonu ka kaya ga, “Baraca Rasband, dikeva matua sara ena rawa talega mo kila!” E keri au a dreta tale yani vakavoleka vei Elder Eyring kei na kompiuta na noqu idabedabe, kau sa mai dikeva sara toka vakavoleka!
Ena vica tale na gauna ni toso tiko na cakacaka, ena vuki mai vei au o Elder Eyring ka kaya, “Vinaka, Baraca Rasband, evei na vanua o nanuma ni dodonu me lako kina na daukaulotu oqo?” Au na tukuna e dua na yaca ni tabana ni kaulotu ka na raici au mai vakamalua o Elder Eyring ka kaya, “Sega, sega ni o koya oqori!” Ena qai tomana o koya na nona lesi ira na daukaulotu ki na vanua a vakauqeti vua.
Ni voleka tiko me keirau vakacavara na soqoni ni veilesi o ya, a basika na kena itaba e dua na daukaulotu. A basika vei au e dua na veivakauqeti kaukauwa sara, na kena e kaukauwa duadua ena mataka o ya, na daukaulotu e tu e matai keirau o ya me lesi ki Japani. Au sega ni kila ni na tarogi au o Elder Eyring me baleti koya oqo, ia e vakurabui ni a vakakina. Au kaya yani vakatovotovo ena yalomalumalumu vua, “Japani?” A vosa mai ena gauna vata o ya o Elder Eyring, “Io, daru gole mada kina.” A basika mai ena kompiuta na veitabana ni kaulotu mai Japani. Au kila sara ena gauna o ya me na lako ki na Tabana ni Kaulotu na Japan Sapporo na daukaulotu oqo.
A sega ni taroga vei au o Elder Eyring na yaca ni tabana ni kaulotu, ia a lesia na daukaulotu oqori ki na Tabana ni Kaulotu na Japan Sapporo.
A tarai au vakatitobu sara kau vakavinavinaka mai vu ni yaloqu vua na Turaga ena nona vakatarai au meu vakila na veivakauqeti meu kila na vanua me na lako kina na daukaulotu.
Ni tini na soqoni a wasea vei au o Elder Eyring na nona ivakadinadina me baleta na nona loloma na iVakabula, ka tu Vua me baleti ira yadua na daukaulotu era lesi me ra lako yani ki vuravura ka vunautaka na kosipeli vakalesui mai. E kaya ni ena nona loloma cecere ga na iVakabula sa rawa kina vei ira na Nona italai me ra kila na vanua me ra laki veiqaravi kina na cauravou kei na goneyalewa, daukaulotu qase kei ira na veiwatini qase daukaulotu. A vakuri tale na noqu ivakadinadina ena mataka o ya ni o ira kece na daukaulotu era kacivi ena Lotu oqo, ka ra lesi se lesi tale vakarua ki na dua na tabana ni kaulotu, sa kacivi ena ivakatakila mai vua na Turaga na Kalou Kaukauwa mai vua e dua vei ira oqo, na Nona italai.
Au na tinia ena nona vosa na Turaga vei iratou na veitacini na Whitmer, ka ratou a vakaitavi vakabibi sara ena veigauna taumada ni Veivakalesui mai. Eratou a ivakadinadina ni peleti koula, ka oka na nodratou ivakadinadina sainitaki ka tabaki tu ena ilavelave yadua ni iVola i Momani. Eratou a maliwai ira na imatai ni ilawalawa daukaulotu a kacivi ira e dua na parofita ni Kalou ena 1829 me ra vunautaka na kosipeli ni Turaga ko Jisu Karisito.
Ena ikau ni wase 14 ni Vunau kei na Veiyalayalati, e tukuni kina, “E tolu na luvei Whitmer tagane eratou sa vakadinadinataka yadua na dina ni cakacaka oqo, ka ratou sa via kila sara na nodratou dui ilesilesi.”
Ki vei John kei Peter Whitmer Lailai sa kaya vakaoqo na Turaga: “Raica ko sa dau masuta tiko mo kila na ilesilesi e baleti iko.”5
Au vakabauta ni vuqa vei kemuni na cauravou ko ni sa dau tarogi kemuni ena taro vata oqori. Oqo na kena isau mai vua na Turaga: “Ia au sa kaya vakaidina vei iko, sa nomu itavi bibi mo vunauci ira na tamata me ra veivutuni, io me ra lesu mai vei au, ka mo dou na tiko vata ena matanitu i Tamaqu.”6
Ena gauna oqo ni nomuni bula, na kaci ni kaulotu mai vua na Turaga, kemuni na noqu itokani gone, sai koya na cakacaka bibi duadua e rawa ni o ni cakava. Ni vakarautaki kemuni ena gauna oqo, bula dodonu, vuli mai na nomu matavuvale kei na veiliutaki ni Lotu, ka lako mai ka duavata kei keimami ena kena tarai cake na matanitu ni Kalou e vuravura —ciqoma na nomu ilesilesi vakalou ena “inaki uasivi oqo.”7 Oqo na noqu masu malumalumu ena yaca i Jisu Karisito, emeni.