Sa Bula Tu! Ni sa Qaqa!
Na noda kila vakavinaka ka vakabauta na Veisorovaki i Jisu Karisito ena vakarautaka vei keda na qaqa kei na kaukauwa e gadrevi ena dua na bula rawa ka.
Oqo na mataka ni Siganimate, na siga vakalou sa soli kivei ira kece na lotu Vakarisito e vuravura taucoko me ra vakananuma kina na qaqa mai na mate nei Jisu Karisito. Na Nona Tucaketale sa mai voroka kina ena gauna o ya na ivesu ni mate ka tawa- vakaiyalayala. Sa mai tadola kina na salatu me rawa kina vei ira yadua na luve ni Tamada Vakalomalagi era sucu mai e vuravura na madigi me ra tucake mai na mate ka bula tale.
Sa marau kina vakalevu na Tamada mai Lomalagi ena siga vakalou o ya ena gauna sa voroka kina o Luvena talairawarawa vakaoti, ka taucoko ena kilikili na ivesu ni mate. Na inaki tawamudu cava beka ena tiko ena ituvatuva ni marau nei Tamada vakavo ga ke vakayacori dina na Veisorovaki tawayalani ka tawamudu ni Luvena lagilagi talairawarawa? Na inaki tawamudu cava ena rawa ni yaco mai na kena Buli ko vuravura, me ra na vakayago kina na veika bula vakayalo kevaka me sa itinitini ni veika kece na mate ka sega ni rawa me dua me tucaketale? Sa qai dua dina na mataka lagilagi vei ira taucoko era kila vakavinaka na kena bibi.
Na Siganimate sa gauna vakalou me ra vakavinavinaka ena yalomalua na tamata lotu Vakarisito vua na noda iVakabula daulomani. Sa gauna me na kauta mai na vakacegu kei na reki vei ira taucoko era lomani Koya ka vakaraitaka ena nodra talairawarawa ki na Nona vunau. Na Siganimate eda dau vakananumi Jisu kina, na Nona bula, Nona Veisorovaki, Nona Tucaketale, Nona loloma. Sa tucaketale mai na mate o Koya ia “ena kauta lako e tabana na veivakabulai” (Malakai 4:2; 3Nifai 25:2). Io, eda sa gadreva kece sara na veivakabulai oqo sa vakarautaka tu na Dauveivueti. Oqo sa noqu itukutuku ni inuinui vakayavutaki ena ivakavuvuli sa umanaki tu ena ivakavuvuli nei iVakavuvuli, Qasenivuli, o Jisu Karisito.
Sa rawa vei ira na lewe ni Lotu i Jisu Karisito ni Yalododonu Edaidai me ra kila vakavinaka cake na rabailevu kei na titobu ni veivakabulai sa vakarautaka na Nona Veisorovaki baleta ni sa tiko vei keda na taucoko ni Nona ivunau. Eda sa kila ni veika sa lomana me vakayacora ena rarawa kei na solibula cecere ena sega walega ni yaga vei keda ena bula oqo ia ki na veitabagauna tawamudu.
Na Siganimate oqo, ni o ni vakananuma na Tucaketale kei na kena isau kei na iloloma a soli mai ena Veisorovaki, mo ni vakananuma na cava e vakavulica tiko na ivolanikalou baleta na veika vakalou a yaco. Na nomuni ivakadinadina yadudua baleta na kena dina ena vaqaqacotaki. Me ra uasivi cake mai na ivakavuvuli ko ni sa cavuqaqataka tiko. E dodonu me ra semati ki na gacagaca ni nomuni bula me itataqomaki kaukauwa mai na ivalavala ca levu sa dewava tiko na noda vuravura.
A vakaraitaka e dua na dina bibi o Liai na parofita ena nona kaya: “Ia, sa yaco na bula ena vuku i koya na Mesaia Yalosavasava, ni sa sinai ena loloma kei na dina. A sa vakacabori Koya me isoro ni ivalavala ca, me vakayacori kina na ka sa tukuni ena vunau vei ira sa yalo raramusumusu ka bibivoro; raica sa sega ni dua tani tale sa rawa me vakayacora na ka sa tukuni ena vunau” (2 Nifai 2:6–7). Na ivolanikalou o ya e vakaraitaka vei ira na viavialevu kei na dokadoka sa vaka ga ni a sega ni yaco na Veisorovaki.
E bula tiko o Jisu Karisito. Sa noda iVakabula o Koya, ka noda Dauveivueti. Sa ka lagilagi ni sa tucaketale ka se bula tiko. Sa tikoVua na kaukauwa me vakadewataka na loloma sa kaukauwa sara, ka sa ulabaleti keda ka sega na yame vakatamata me vakamacalataka rawa vakavinaka. A solia na Nona bula me voroka kina na ivesu ni mate. Na Nona Veisorovaki sa mai vakayacori rawa kina na ituvatuva ni bula marau nei Tamana mai Lomalagi.
E vakarautaka vakatautauvata o Jisu na kena soli na lewa kei na loloma vakalou ka na vakatau tiko ki na noda talairawarawa ki na Nona kosipeli. Sai Koya na rarama ni kawatamata kecega. Sai Koya na vureniwai ni ka dina kecega. Sa vakayacora kece na veika a yalataka. O ira kece era na talairawarawa ki na Nona vunau era na rawata na veivakalougatataki lagilagi duadua e bau nanumi rawa.
Ni sega na Veisorovaki, ena sega ni rawa me vakayacori taucoko sara na ituvatuva ni bula marau nei Tamada Vakalomalagi. Na Veisorovaki sa solia na madigi ki na tamata kecega me ra ulabaleta rawa na isau ni cakacala e vakayacori ena bula oqo. Ni da talairawarawa ki na dua na lawa, eda na vakalougatataki. Ni da voroka e dua na lawa sa sega tale ni tiko e dua na idole mai na talairawarawa e liu me vakadodonutaka na lawa sa voroki oqo. Na Veisorovaki ni iVakabula sa vakatara vei keda meda veivutunitaka na talaidredre o ya ka me levei kina na itotogi ena vakatauca na lewa dodonu.
Sa rabailevu tikoga na noqu rokova ka vakavinavinakataka na Veisorovaki nei Koya na Yalosavasava ni Isireli, na Tui ni Sautu ka noda Dauveivueti, e tomana tiko na vakalevutaki ni sasaga meu kila vakavinaka cake. Au kila ni sega ni rawa vua e dua me vakasamataka rawa vakavinaka, se me rawa ni dua e vakamacalataka rawa, na taucoko ni bibi ni veika sa mai vakayacora o Jisu Karisito me baleti ira na luvena na Tamada Vakalomalagi ena Nona Veisorovaki. Ia sa ka bibi kina meda vulica yadudua na ka oqo. Na Veisorovaki sa ikoya na gacagaca bibi ni ituvatuva ni bula marau nei Tamada mai Lomalagi ni sega oqo ena sega ni rawa me yaco na ituvatuva o ya. Na nomu kila vakavinaka na Veisorovaki kei na veivakararamataki e solia ki na nomu bula ena vakaceceretaka na vakayagataki vakadodonu ni nomu kila ka, veika e sotavi, kei na kila vakavuku o rawata ena bula oqo.
Au vakabauta ni sa ka yaga me da tovolea meda vakasamataka na veika e gadrevi ena Veisorovaki mai vei Tamana kei na Luvena talairawarawa. A sotava na iVakabula e tolu na bolebole oqo:
iMatai, ni sa dua na ilesilesi levu, ka sa kila o Koya ni vakavo ga ke vakayacori vakadodonu, ena sega ni rawa me dua vei ira na luvei Tamana me lesu rawa tale Vua. Era na yali vakadua mai na Nona itikotiko ni sa sega ni rawa na veivutuni baleta na voroki ni lawa ka sega ni rawa ki na dua na ka tawa savasava me tiko vata kei na Kalou. Ena sega ni yaco rawa na ituvatuva nei Tamana, ka ra yaco na luvena vakayalo yadua me ra lewai ka vakararawataki tawamudu tu vei Setani.
iKarua, mai na taucoko ni Nona vakasama kei na yalona savasava sa yaco kina me vakila vakaikoya na isau ni veika kece era na sotava na itabatamata kecega, vakakina na ivalavala ca butobuto, ka veivakacacani.
iKatolu, a yaco kina me vosota na ravuravu rerevaki ni ilawalawa i Setani ena gauna sa vakararawataki tiko kina vakalevu vakayago ka vakayalo. Ia, eda sega ni kila na vuna, ni gauna e taucoko tu kina na Nona rarawa, na gauna sa gadreva vakalevu kina na iVakabula me vukei, sa vakatara kina o Tamana me sa taqara e vatuvatu ni tabana na icolacola bibi vata kei na Nona kaukauwa walega kei na vosota.
Au saga meu raitayaloyalotaka se a vakacava beka na levu ni rarawa ni yalona na Tamada mai Lomalagi ni sa kaci mai na iVakabula mai na kauveilatai, “Noqu Kalou, noqu Kalou, ko sa biuti au ena vuku ni cava?” (Maciu 27:46; Marika 15:34). Au sega ni vakabauta ni Tamada mai Lomalagi a biuti Luvena ena kauveilatai. Au vakabauta ni a voqataki mai na kaci o ya ni sa vakila na Luvena ni sa takali na veitokoni ka dau marautaka voli mai vei Tamana. Sa kila kina o Tamana ni sa kilikili vua na iVakabula me vakayacora taucoko ka vakaidina na Veisorovaki vakataki Koya ga ka sega ni tokoni kina mai taudaku. A sega ni biuti Luvena o Tamana. Sa vakayacora rawa vua na Luvena uasivi duadua me rawata kina na tawamudu ni vua ni Veisorovaki.
E sega ni rawa me dua e taucoko na nona vakavinavinakataka ena bula oqo na taucoko ni yaga ni Veisorovaki.
Sa tiko e dua na dodonu vei keda yadua meda vaqaqacotaka na noda kila vakavinaka na bibi ni Veisorovaki i Jisu Karisito me rawa ni dua na yavu tudei kaukauwa meda tara cake kina na noda bula. Ena kena sa roboti vuravura tikoga mai na ivakatagedegede vakayavu e sega ni tudei, ka sa biu tani tikoga na vakarokoroko, bula dodonu, kei na savasava me yaco ga na gagadre vakayago, ia na noda kila vakavinaka ka vakabauta na Veisorovaki i Jisu Karisito ena vakarautaka vei keda na qaqa kei na kaukauwa e gadrevi ena dua na bula rawa ka. Ena kauta talega mai na yalonuidei ena gauna ni veivakatovolei kei na veivakacegui ena gauna ni voravora.
Au maqusa ena noqu vakauqeti kemuni mo ni tauyavutaka e dua na ituvatuva ni nomuni vuli mo ni kila vakavinaka kina ka taleitaka na veika uasivi sa cakava rawa o Jisu Karisito e sega ni vakatauvatani rawa, tawamudu, ka tawayalani ni Nona ilesilesi vakalou sa kacivi kina me sa noda iVakabula ka Dauveivueti. Na noda dui vakasamataka vakatitobu na ivolanikalou ka lako vata kei na vakasaqaqara, kei na masu ena yalodina ena vaqaqacotaka na noda kila ka marautaka na Nona Veisorovaki e sega ni saumi rawa. E dua tale na sala qaqa me da vulica kina na veika baleti Jisu Karisito kei na Nona Veisorovaki sa ikoya na noda dau lakova wasoma na valetabu.
Me sa vakavoui na noda gugumatua meda vakavulica na ivakavuvuli dina ena loma ni noda vuvale. Ni da vakayacora oqo, sa na yaco mai na veimadigi cecere ni bula marau kivei ira na yalo eda qaravi ira tiko. Vakayagataka na Lotu ni sa iyaragi dodonu me vaqaqacotaki kina na vuvale, ia me da kila oi keda na itubutubu ni sa noda ilesilesi bibi ka madigi meda dusimaki mai vua na Turaga ena nodra susugi cake na luvena vakayalo eda sa qaravi ira tiko.
Sa ka bibi kina na kena vakavulici na dina ena loma ni vuvale. E ka bibi na Lotu, ia ena vuvale duadua ga era na veivakavukui ka veivakasalataki kina na itubutubu vei ira na gone. Sa dina sara, ni veikacivi bibi duadua ena gauna oqo kei na veigauna tawamudu e nodra na tama kei na tina. Ena gauna oqo eda na vakagalalataki mai na noda ilesilesi taucoko tale eso, ka segai mai na ilesilesi vakatama kei na tina.
Ni ko vakananuma—sega ni wilika walega ia mo vakananuma ka vakasamataka—na veitiki ni ivolanikalou, na kaukauwa ni Yalo Tabu ena vakadewataka na dina ki na nomu vakasama kei na lomamu me dua na yavu tudei ena gauna veilecayaki ka da bula donuya tiko oqo. Ni o ni itubutubu ni vakarautaki ira na luvemuni ki na bolebole era na sotava. Vakavulica vei ira na dina, vakayaloqaqataki ira me ra bulataka era na bula vinaka kina se cava ga na levu ni yatayata ni vuravura oqo.
Na Siganimate oqo, mo vakadeitaka me na vakaliuci ni bula tiko na Turaga o Jisu Karisito ena nomuni vuvale. Mo ni qarauna na nomuni vakatulewa, e vakayalo se ka vakayago, me na dusimaki tikoga ena vakasama “Na cava beka e vinakata vei au na Turaga o Jisu Karisito meu cakava?” Ni sa vakaliuci na iVakabula ena nomuni vuvale, ena vakasinaiti ena vakacegu kei na vakarokoroko. E tiko e dua na yalo veivakadeitaki malumu e kovuta tiko na vuvale era dau vakila na gone kei ira talega na qase.
Na sala vinaka duadua me vakayacori e dua na veisau tudei ni ka vinaka o ya me nomu ivakatakarakara o Jisu Karisito kei na Nona veivakavulici me dusimaki kina na nomu bula.
Ke sa yaco beka mo talaidredre ki na Nona vunau ka nanuma ni ko sa sega ni kilikili, mo kila sara ni oqo sara ga na vuna a solia kina na Nona bula na Turaga o Jisu Karisito. Mai na Nona Veisorovaki sa dolava tawamudu tu kina na veimadigi meda ulabaleta rawa na noda caka cala, veivutunitaka na digidigi cala, ka valuta rawa na meca ni bula e veisaqasaqa kei na Nona ivakavuvuli.
Sa lomani keda yadudua sara na iVakabula ka sa yaco rawa kina meda vakacegui mai na noda gagadre yadua ni da sa talairawarawa ka da sa kilikili vakakina ki na veivakalougatataki taucoko e gadreva o Koya meda rawata ena vuravura oqo. Au lomana kau taleitaki Koya. Niu sa Nona italai dina au sa vakadinadinataka kina ena vakarokoroko ena levu ni kaukauwa taucoko e tu vei au ni bula tiko ko Koya, ena yaca i Jisu Karisito, emeni.