Nodra Vakavulici na Gone e Vale Mai vei Tinadra
Au vakabauta ni sa lewa vakalou me nodra ilesilesi na tina na nodra susugi ka vakavulici na itabatamata e tarava.
Ena dua na gauna lekaleka sa oti au a gole vata kei Elder Hallstrom ki na lima na siti ena iwase levu ni loma i Amerika. Ena siti yadua keirau gole kina, keirau na dau soqoni vata tiko kei ira na daukaulotu tudei, ka tarava sara na soqoni vata kei ira na iliuliu ena iteki kei na tabanalevu me baleta na cakacaka ni kaulotu. Ena tadrua ni soqoni e rua oqo, era dau vakarautaka na iSoqosoqo ni Veivukei ni iteki e dua na vakalomavinaka me keirau sotavi ira rawa kina na peresitedi ni iteki. Ni keirau yaco yani ki Milwaukee, Wisconsin, rau a kerea ki na iSoqosoqo ni Veivukei e rua na matavuvale gone me rau vakarautaka ka qarava na ivakayakavi. Rau a veiqaravi e valenikuro na turaga vakawati. Ka rau vakarautaka ka qarava na kakana oi rau na marama watidrau. Eratou tuvanaka na teveli ka qarava na kakana e tolu na gone lalai ena veiliutaki nei tinadratou. Oqo e dua na gauna vei ira na tina me ra vakavulici ira kina na luvedra. Sa dua na ka talei na saravi ira na gone ena nodra vakayacora na veika vakayadua me vaka era vakavulici kina mai vei ira na tinadra. Era sa vakacavara ka taucoko sara na nodra itavi.
Na veika a sotavi oqo au vakananuma lesu kina na veivakavulici au a ciqoma mai vei tinaqu. Me vakataki Nifai na parofita, ka vakataka e vuqa vei kemuni, erau sa rui vinaka na noqu itubutubu (raica 1Nifai 1:1).
E dua vei ira na vugoqu yalewa a qai vakaraitaka walega oqo vei au e va na ivolalalai a volavola tu kina o tinaqu ni vakarau veivakavulici ena kalasi ni iSoqosoqo ni Veivukei. Au vakabauta o iratou na ivolalalai oqo—kei na so tale au se bera ni raica—ena laurai kina e vuqa na auwa ni nona vakavakarau o tinaqu.
E dua na dauveituberi cecere o tinaqu e dau gugumatua ka taucoko na nona vakavakarau. Au nanuma vinaka tu na veisiga ni bera nona dau veitauri ena lesoni. Era dau tuvai tu ena teveli ni kana na veiivola kei na pepa ni nona vakavakarau baleta nona lesoni. E levu sara ga na ivola e vakarautaka kau vakabauta ni lailai ga e dau vakayagataki ena kalasi, kau vakadeitaka talega ni sega ni maumau e dua vei ira na nona vakavakarau vakaoqo. Meu na vakadeitaka rawa vakacava oqo? Niu tekivu cega na nona ivolalailai, sa vaka me rogo tale mai na nona vakavulici au. E dina, e vutucoqa vinaka tu na nona ivolalailai me vola rawa kina e dua ga na ulutaga me baleta e dua na kalasi, ia na veika a sega ni vakayagataka ena kalasi a vakavulici iratou kina na luvena.
Au vakabauta ni sa rawa me tukuni ni a qasenivuli gugumatua sara o tinaqu vei ira na marama veitacini ena iSoqosoqo ni Veivukei, ia na nona veivakavulici totoka duadua ga a vakayacora e vale vei iratou na luvena. E dina, ni levu sara na gauna a vakayagataka me vakavulici iratou kina na luvena ni vakatautauvatataki ki na nona vakavulici ira na marama veitacini ena iSoqosoqo ni Veivukei, ia au vakabauta ni a taucoko na nona vakavakarau, imatai, me ivakaraitaki vei iratou na luvena ena cakacaka gugumatua ena Lotu ka, ikarua, baleta e kila ni veika sa vulica mai na nona vakavakarau ki na nona lesoni ena rawa me vakayagataki tikoga ena dua na inaki cecere cake—o ya me vakavulici iratou kina na luvena tagane kei na yalewa.
Au kerea meu talanoataka mada eso na lesoni au a vulica rawa mai vei tinaqu me baleta na vakavulici ni kosipeli e vale. E kila vakavinaka tu o tinaqu na yaga ni nodratou vakavulici na luvena ena ivakatagedegede, iyavunibula, kei na vunau ni ratou se gone. A vakavinavinakataki ira kina na tani era a vakavulici iratou na luvena ena taudaku ni nona vuvale o ya e koronivuli se e valenilotu, ia e raica ni sa nodra itavi dina na itubutubu me ra vakavulici ira na luvedra ka kena iusutu me ra raica na itubutubu ni ra vakavulici na luvedra ena veika sa gadreva na Tamada Vakalomalagi me ra kila. A dau vakatarogi keitou vakavinaka sara vakaveitacini o tinaqu ni oti na neitou tuberi mai tautuba me vakadeitaka ni keitou sa rogoca ka tugana vinaka tu ena neitou vakasama na lesoni donu.
Ena so na siga au dau vakananuma niu cici yani i vale, ni suka na vuli ni sa rauti au na vuli ena siga o ya, ia na vakasama oqori e dau yali vakasauri niu raici tinaqu ni sa waraki au tu mai e katuba. Ni keitou se lalai keitou dau yadua tiko na teveli e valenikuro me keitou vakavulici tale mai vua ena gauna e cakava tiko kina na nona cakacaka ka vakasaqa tiko. E dua dina na qasenivuli o koya ka dau vakatulewa vakaukauwa vakalevu cake mai vei ira na neitou qasenivuli e koronivuli kei na lotu.
Na iusutu ni veivakavulici nei Tinaqu e baleta na lesoni ni bula vakayago kei na vakayalo. Ena raica me kakua ni dua vei keitou me lutu ena nona cakacaka ni vuli, ni na rawa me vakuria. Ena dau vakatovotovotaka talega vei keitou na nona lesoni ni iSoqosoqo ni Veivukei. Keitou dau vakavulici kina mai na veika taucoko era tiko ena nona ivolalailai, ka sega ni kena vakalekalekataki me dau rauta ga e dua na gauna ni kalasi.
E tiki ni neitou vuli e vale na cavuqaqataki ni ivolanikalou, okati kina na Yavu ni Vakabauta, nodra vosa na parofita, daurairai, ka dauvakatakila. E dua o tinaqu e vakabauta ni na malumalumu na vakasama ke sega ni dau vakayagataki tikoga. E dau veivakavulici ni keitou masimasi, buli bata, kei na veivuke ena cakacaka tale eso. E sega ni vinakata me curuma na nodratou vakasama na luvena na veika tawa yaga ena gauna mada ga eratou cakacaka tiko kina.
Au sega ni vakayagataki tinaqu me dua na ivakaraitaki tudei vei ira na itubutubu e vuravura nikua. Sa duatani na siga nikua, ia ni sa veisau na gauna, me kakua ga ni vakawaleni na veivakavulici ni dua na itubutubu. E vuqa na itaviqaravi e semata na nodra iyavunibula e dua na itabatamata ki na kena e tarava, ia sa kedra iusutu beka na itaviqaravi vakaoqo o ya na nodra vakavulici ira na luvedra e vale na itubutubu. E dina sara na ka oqo vakabibi ni da vakasamataka tiko na vakavulici ni iyavunibula, ivakatagedegede ni bula vakayalo kei na veika dodonu, kei na vakabauta.
Sa bibi cake tiko na veivakavulici ena vuvale e vuravura nikua, ni sa rabailevu sara na veivakauqeti nei vu-ni-ca, ka sa valuti keda tiko, ka saga me vakamalumalumutaka ka vakarusa na yavu ni noda itikotiko, o ya na matavuvale. Me ra vakadeitaka na itubutubu ni veivakavulici ena vuvale sa ilesilesi vakalou ka bibi duadua. Sa rawa vei ira na veivanua ni vuli, me vakataka na lotu kei na koronivuli me ra vukei ira na itubutubu me ra “vakatavulica na gone ena sala e dodonu me lako kina” (Na Vosa Vakaibalebale 22:6), ia oqo sa nodra itavi dina ga na itubutubu. Me vaka ena ituvatuva cecere ni bula marau, sa nodra ilesilesi na itubutubu me ra karona ka vakatorocaketaki ira na luvena na Tamada Vakalomalagi. O ira na noda matavuvale era sa tiki bibi ni Nona cakacaka kei na lagilagi—“me ra tucake tale mai na mate na tamata kecega, ka rawata na bula tawamudu” (Mosese 1:39). Ena nona ituvatuva tawamudu na Kalou, sa dau vakadeitaki tikoga ni sa nodra ilesilesi tudei na itubutubu na bula ni luvedra. E ka talei, ni sa tiko talega eso era na qaravi ira tiko me ra veisosomitaki vei ira na itubutubu. Ia, sai ira ga na itubutubu era sa vakaroti mai vua na Turaga me ra susugi ira cake na luvedra me ra kila na rarama kei na dina (raica V&V 93:40).
O ira na itubutubu me ra kauta yani na rarama kei na dina ki na nodra vuvale, ena veigauna yadua ni nodra masu vakamatavuvale, vulici ni ivolanikalou, lotu vakamatavuvale, wiliki e cake ni ivola, lagasere, kei na gauna ni kana vakamatavuvale. Era kila ni veivakayarayarataki ni veiqaravi vakaitubutubu e dodonu, e dina, gugumatua ena veisiga sa dua vei ira na igu e kaukauwa ka veitokoni ni veika vinaka duadua e vuravura. Na bulabula ni dua na isoqosoqo, na nodra marau na kena tamata, nodra tubu, kei na nodra tiko vakacegu era vakayavutaki kecega mai na nodra vakavulici e vale na gone.
E vakavulica o Peresitedi Joseph Fielding Smith ni: “Sa nodra itavi na itubutubu me ra vakavulici ira na luvedra ena ivakavuvuli veivakabulai ni kosipeli i Jisu Karisito, me ra kila kina na vuna me ra papitaiso kina ka me tugani e lomadra e dua na gagadre me ra maroroya tikoga na vunau ni Kalou ni oti na nodra papitaiso, ka me ra lesu tale mai Vua. Ko ni gadreva beka na taciqu kei na ganequ vinaka, me ra vauci na nomuni matavuvale, kei na luvemuni vei ira na tamamuni kei na tinamuni era sa liu? … Kevaka e io, ia mo ni tekivu veivakavulici ni ra se qai sucu mai. Mo ni veivakavulici ena ivakaraitaki ka vakakina ena vunau” (Conference Report, Oct. 1948, p 153).
Na ivakaraitaki nei tinaqu ni dua na qasenivuli ena vuvale e kauta mai e dua na vakasama, sa baleta tikoga na veivakavulici. Era dau vakasamataka vakalevu na iliuliu ni Lotu na sala me vakatorocaketaki kina na veivakavulici ena Lotu. Na cava eda vakayagataka kina na gauna oqo kei na kena sasaga? Sa baleta ni da vakabauta na kaukauwa cecere ni veivakavulici me vakatorocaketaka na nodra vakabauta na tamata yadudua ka vaqaqacotaka na matavuvale. Au vakabauta ni dua vei ira na ka mana meda vakatorocaketaka rawa kina na veivakavulici ena Lotu o ya meda vakatorocaketaka na noda veivakavulici e vale. Na noda veivakavulici e vale ena vakarautaki keda meda veivakavulici gugumatua cake kina ena Lotu, kei na noda veivakavulici ena lotu ena vukea me da veivakavulici gugumatua cake e vale. Ena loma ni Lotu era sa tuvanaki tu ena teveli ni kana na veiivola kei na ivolalailai ni lesoni me na vakavulici. E sega ni okati me dua na ka na vakavakarau vakasivia me vakavulici kina na kosipeli i Jisu Karisito, vakararamataki ena kosipeli, vakayagataki se sega ena gauna ni kalasi, sa rawa ni vakavulici tikoga e vale.
E tukuni vakaoqo ena ivola veivakauqeti “Na Matavuvale: Ai Vakaro ki Vuravura Raraba” ni:
“Sa rui ka vakamareqeti kina na nodrau itavi na tagane kei na yalewa vakawati me rau dau veilomani ka veikauwaitaki vakaveiwatini ka vakakina vei ira yadudua sara na luvedrau. ‘Raica na gone era sa nona isolisoli na Kalou’ (Same 127:3). Sa nodrau itavi bibi na itubutubu me rau susugi ira cake na luvedrau ena loloma kei na bula dodonu, me rau vakarautaka na veika vakayago ka vakakina na veika vakayalo era gadreva, ka me rau vakavulici ira me ra dau veilomani ka veirairaici vakataki ira, muria na ivakaro ni Kalou ka me ra lewenivanua vinaka ena veivanua cava ga era tiko kina… .
“… Sa lewa vakalou, me ra veiliutaki ena yalololoma na tama ena nodra dui matavuvale, ena loloma kei na ivalavala dodonu ka sa nodra itavi talega na kena vakarautaki na veika me ra bula ka ra taqomaki kina na nodra matavuvale. Sa nodra itavi vakatabakidua na tina na nodra susugi cake na gone. Ena vuku ni veiitavi bibi oqo, era sa vakaitavitaki kina na tama kei na tina me ra veivukevukei me vaka ni sa nodra icolacola vata” (Liaona, Okot. 2004, 49).
E tukuni e “Na Matavuvale: Ai Vakaro ki Vuravura Raraba,” na ivakavuvuli au vakavulica me baleta na veivakavulici e vale ni sa itavi ni itubutubu ruarua, ia sa ka bibi duadua tiko na itavi nei tina. O ira na tama era na dau yali tiko vakalevu mai vale ena vuku ni cakacaka. Oqori e dua vei ira na vuna e vakatabakiduataki tiko kina vei tina na ilesilesi me veivakavulici. Ena vuku ni duidui na bula ka na sega ni rawa me taucoko na ilesilesi oqori, au vakabauta ni sa lewa vakalou me nodra ilesilesi na tina na nodra susugi ka vakavulici na itabatamata e tarava. Eda sa raica tu nikua e vuqa na bolebole ni veivakauqeti ni veivagolei tani kei na veivakacacani vei ira na luve ni Kalou. Eda sa raica e vuqa na itabagone era sega ni vakayavutaki titobu vakayalo me ra tudei tiko ena vakabauta ni ravuti ira tiko na cava ni tawa vakabauta kei na lomaleqa. E vuqa vei ira na luvena na Tamada mai Lomalagi era sa rawai tu ena gagadre vakavuravura. Sa vereverea ka doudou cake tikoga mai na nodra vakacacani tiko na luveda ena veika butobuto. Na vakavulici ni kosipeli i Jisu Karisito e vale ena vaqaqacotaka na kaukauwa ni nodra itataqomaki na luveda mai na veivakayarayarataki vakavuravura.
Me vakalougatataki kemuni na Kalou na tina kei na tama vakasakiti kei Saioni. Sa solia vei kemuni na ilesilesi mo ni qaravi ira na Luvena tawamudu. Oi keda na itubutubu me da duavata, ka sema vata kei na Kalou, ka vakayacora na Nona cakacaka kei na lagilagi vei ira na Luvena. Sa noda ilesilesi vakalou me da vakayacora ena noda uasivi kece sara. Sa noqu ivakadinadina oqo ena yaca i Jisu Karisito, emeni.