Elder Larry R. Lawrence
Ena Vitusagavulu
Mai na vica na ilesilesi kei na gauna ni veiqaravi ena Lotu, sa vulica kina, o Elder Larry Ray Lawrence me “vakararavi vei Jiova ena vu ni [yalona]” (Vosa Vakaibalebale 3:5).
A sucu ena Okosita ni 1947 vei rau o Argil kei Mary Lawrence e Cheverly, Maryland, ka tubu cake mai o Elder Lawrence e Tucson, Arizona. E a tomana yani na nona vuli ena Univesiti e Arizona, na vanua ka rawata mai kina na nona koroi ni vuku ena veiwainimate ni teitei (agricultural biochemistry) kei na dua na koroi cecere ni vuku ena veiqaravi vakavuniwai (doctorate of medicine), ka veivakauti yani ki na bula vakacakacaka ni dauvakadidike ni mata (ophthalmology).
E a lewena na Lotu ena 1970, ni sa yabaki 23, ka vakamautaki Laurel Stott ena Valetabu na Mesa Arizona ena ika 5 ni Noveba, 1971.
Ni bera nona kacivi ki na iKarua ni Kuoramu ni Vitusagavulu, e a veiqaravi oti vakaperesitedi ni kuoramu ni italatala qase, bisopi, lewe ni matabose e cake, peresitedi ni iteki, ka vakakina vaka peresitedi ni kaulotu ena iteki.
E kaya o Elder Lawrence ni gauna vata e sa vaka me malumu sobu tiko yani kina na nona bula, ka ratou sa mai lelevu yani na ono na luvedrau ka rau sa mai tiko taurua ga yani erau a kacivi kei watina me rau laki vakatulewa ena Tabana ni Kaulotu na Russia Novosibirsk e Siberia ena 2001. E a gadrevi vei rau o Elder kei Sisita Lawrence me rau cakacakataka na nodrau vakabauta ena gauna erau a biuta kina na nodrau vale kei na matavuvale me laki veiqaravi ena dua na vanua ka sega sara tu ga ni matau kina vei rau na kena vosa, o ira na tamata, ka vakakina na kena draki.
“E a dua na ka ni veivakatovolei levu vei keirau me keirau vakabauta tikoga na Turaga,” a kaya o Sisita Lawrence. “Era a veilutuki ga mai ena kedra vanua donu na veika keirau nuiqawaqawataka tu, ka veisautaka sara na neirau bula na [veika keirau sotava].”
A vakarautaka tu e dua na veivakananumi wasoma e dua na ivakatakilakila ka tiko e valenikuro ni itikotiko ni kaulotu “drau kakua ni rere se lomalomarua; ia mo drau vakaliuca [na iVakabula] ena nomudrau nanuma kecega” (V&V 6:36).
Erau raica o Elder kei Sisita Lawrence na veika rau sotava ena kaulotu me dua vei ira na veika cecere ena nodrau bula ka rau a vakila ni a vakavakarautaki rau ki na nodrau itavi ena nona a kacivi o Elder Lawrence ki na Vitusagavulu.
“Keirau sega ni kila na veika sa tu mai liu, ia keirau kila ni na vinaka,” e a kaya o Elder Lawrence.