A Tukuna Vei Au O Na
Na vuna beka eda na dau taleva tikoga kina na nodra loloma na tinada e vuravura taucoko baleta ni sa vaka o ya na loloma ni noda iVakabula.
Sa vakatikora oti na Turaga vei ira na itubutubu na nodra ilesilesi taumada me ra susugi ira vakayalo na luvedra. Ena so na gauna e dau nona sara ga e dua vei rau na itubutubu na ilesilesi oqo. Se marama bulabula tu o tinaqu sa mate o tamaqu, ka mani susuga duadua e va na luvena. Ia a vorata rawa na nona dredre ena vakabauta kei na yaloqaqa, ka yalataka vei keitou ni kevaka keitou na tikoga ena salatu ni dina, ena vinaka cake na kena itinitini mai na kena itekivu. Me vakataki ira ga na luvedra na tina yaloqaqa ena iVola i Momani, “keimami sega ni vakatitiqataka na nodra ivakavuvuli na tinai keimami.” (Alama 56:48). Kemuni na taciqu kei na ganequ, au sa kila vakataki au na nodra veivakayarayarataki cecere na tina.
E noqu itokani vinaka o Don Pearson e tukuna kina na ka oqo me vakamacalataka kina na veivakayarayarataki oqo. E dua na bogi a kerea vua o luvena tagane yabaki va me wilika mada e dua na italanoa ni vakarau moce. Sa taura rawa toka o Eric e dua na nona ivola talei: The Ballooning Adventures of Paddy Pork na italanoa ni dua na matavuvale eratou vakaitikotiko ena dua na yanuyanu wavolita na waitui ka ratou dau veivukayaki ki na veiyanuyanu ena baluni katakata. Na ivola oqo e vakaiyaloyalo ga ka sega kina na vosa, sa qai bulia ga o Baraca Pearson na kena vosa.
“Sa vodo tiko o Paddy ena baluni katakata. Sa mani ro sara ena yanuyanu. Sa tukuca sobu o koya ena yasani baluni e dua na wa.”
A tarovi koya o Eric. “Ta, e sega ni wa. Na dali.”
A rai yani vei Eric o Baraca Pearson ka raica tale na ivola italanoa, ka tomana tale: “Sa siro mai na baluni o Paddy ka kaba sobu mai ena dua na vunikau. Oi lei! Sa tao na nona kote ena dua na tabanikau!”
A tarovi koya tale o Eric. “Ta, e sega ni kote. Na jakete.”
Sa vaka me sa veilecayaki o Baraca Pearson. A kaya, “Eric, e sega ni tu ena ivola oqo e dua na vosa, na iyaloyalo ga. Na cava o kaya kina ni jakete?”
A sauma o Eric, “Baleta ni tukuna vei au o Na.”
A sogota na ivola o tamana ka kaya, “Eric, o cei o nanuma ni vakatulewa tiko eke, o koya e veiliutaki ena vale oqo?”
Sa vakasama sara o Eric ni bera ni sauma, “O iko Ta.”
A dredre yani o Baraca Pearson vei luvena. Sa qai dua na isau ni taro totoka! “O kila vakacava?”
A sauma vakatotolo o Eric, “Tukuna vei au o Na.”
Me vaka a kaya o Peresitedi James E. Faust: “Sa itovo cecere duadua ga e vuravura oqo na tina veiqaravi. Na veivakayarayarataki ni tina vei ira na luvena e sega ni vakasamataki rawa.” (“Fathers, Mothers, Marriage,” Liahona, Aug. 2004, 3).
Ni sa vakalou, na veisusugi sa vaka me tiki ni iyaubula vakayalo e soli vei ira na marama. Au raica na ka oqo vei iratou na luvequ yalewa, ia au sa raica talega vei iratou na makubuqu yalewa—ena gauna mada ga eratou se bera kina ni tucake, eratou sa vinakata me ratou taura ka maroroya tiko na nodratou matakau lalai.
Ena kila vaka dauteitei kei na daususu manumanu, au sa raica e mataqu na nodra loloma uasivi na tina vei ira talega na veika bula. Ena veivula itubutubu keitou na kauta yani na neitou bulumakau kei na luvedra ena bati ni Uciwai na Snake e Idaho, ka ra laki kana tu e kea me dua na vula se sivia. Oti era sa qai kau lesu mai ka muria mai na gaunisala kuvu me yaco ki na nodra bai. Mai kea era na usa yani ena dua na lori me ra kau ki na kedra ikanakana ni vula katakata mai Montana.
Ena dua na siga katakata ni vula itubutubu, au a vukea na nodra kau tiko yani niu vodo ose tiko e muri ka ra muataki yani e gaunisala kuvu ki na nodra bai. Na noqu itavi meu kauti ira mai na luve ni bulumakau era lako sese. Era toso sara tiko vakamalua ka soli e dua na gauna meu na vakasama kina.
Baleta ga ni katakata sara, era cici yani na luve ni bulumakau me ra laki vakaruru ena veivunikau. E lako na noqu vakasama kivei ira na itabagone ena Lotu era dau vagolei tani mai na gaunisala qiqo ka rabalailai. Au nanumi ira vakakina era sa biuta na Lotu se ra nanuma ni sa biuti ira na Lotu, ena gauna era gole tani tiko kina. Au a vakasamataka sara ni gole tani e sega ni tukuni me dua na ka butobuto me qai mana kina—eso na gauna e rawa ga ni vanua rurugu.
Ni oti e vica na auwa na nodra kau lesu mai na luve ni bulumakau kau sa buno sara ga kina, au sa kailavaki ira na luve ni bulumakau ena rarawa, “Ni muri ira na tinamuni! Era kila na vanua era lako tiko kina! Era sa muri oti eke!” Era sa kila vinaka tu na tinadra ni dina ga ni katakata ka kuvu na gaunisala, ena vinaka cake na kena itinitini mai na kena itekivu.
Ena gauna ga era sa biu ki na kedra bai, keitou raica ni tolu na tinatina eratou veimuayaki tiko e mata ni bai. Eratou sa sega ni raici ira na luvedratou ka ratou vakila ni ra sa yali yani e gaunisala. A tarogi au e dua na tamata cakacaka na cava me caka. Au a kaya, “Au kila na vanua eratou sa tiko kina na luve ni bulumakau. E volekata ni dua na maile [0.4 kilomita] e muri era tiko kina eso na vunikau. Au kila tou na raici iratou kina.”
E dina sara, na noqu nanuma, keitou raici iratou na luve ni bulumakau ni ratou moce toka ena ruku ni vunikau. Ratou kidacala ni keitou sa yaco yani, ka ratou bese ni kau tani mai kea. Eratou rere baleta ni keitou sega ni tinadratou! Ni keitou saga me ratou vakacurumi e loma ni bai, eratou sa bese sara ga, kau sa mani kaya vei iratou na tamata cakacaka, “Dou vosota, au kila na ka me caka. Dou gole ka laki kauti iratou mai na tinadratou mai na bai. Eratou na lako mai na tinatina ka kauti iratou na luvena, ka ra na muri iratou na tinadratou.” Au a dina. Eratou kila vakavinaka na tinatina na vanua me ratou laki kauti iratou mai kina na luvedratou, ka liutaki iratou yani ki na bai me vaka au sa namaka tiko.
Kemuni na taciqu kei na ganequ, ena vuravura sa soli ki na tamata yadua na galala ni digidigi, eso vei ira na noda daulomani era na gole tani tu vakabalavu. Ia meda kakua ni soro. E dodonu meda lesuvi ira—meda kakua ni guce ena sasaga tiko. Sa vakamamasu tiko vei keda na noda parofita o Peresitedi Thomas S. Monson, meda lesuvi ira ka vueti ira mai na noda daulomani era sa rairai yali yani (raica, kena ivakaraitaki, “Stand in Your Appointed Place,” Liahona, Me 2003,54–57). Ena nodra veivuke na iliuliu ni matabete, sa dodonu vei ira na itubutubu me ra na lesuvi ira tikoga na nodra daulomani era sa yali, ka vakadeitaka vei ira ni sa na dau tikoga e dua na “vale” ena loma ni matavuvale kei na Lotu, sa waraki ira tiko. Eda sega ni kila na gauna ena rawa me saumaki kina na yalo ni tamata. Eda sega ni kila na gauna sa vakaocataki ka vakamalumalumutaki kina e dua mai na vuravura oqo. Ni yaco … na ka oqo, e laurai ni ra na rai taumada yani na gone vei Na, ena yalo luluvu me vaka e tukuni toka ena serekali oqo nei Elizabeth Akers Allen:
Di mada, di mada, ua rarawa ni veiyabaki,
Au sa oca ena cakacaka kei na tagi…
Oca ena ka lasu, ena lolovira, na sega ni dina,
Tinaqu, Isa tinaqu, na yaloqu sa kacivi iko kina!…
Isa na yaloqu e vukaca na kena veisiga,
Totoka na loloma nei Na e vaka na siga; …
O tinaqu ga ena vakacegui au
Ni mavoa na yaloqu se vakasama vakayauyau.
Meu moce mada ga ni sa bi na mataqu;
Vakamoceri au, vakamoceri au, Isa tinaqu!
(“Rock Me to Sleep,” ena The Family Library of Poetry and Song, ed. William Cullen Bryant [1870], 190–91; vakavoui na pagitueti.)
Na vuna beka eda na dau taleva tikoga kina na nodra loloma na tinada e vuravura taucoko baleta ni sa vaka o ya na loloma ni noda iVakabula. Me vaka a kaya o Peresitedi Joseph F. Smith, “Na loloma ni dua na tina dina sa voleka ni vakataka na loloma ni Kalou ka sega ni dua tale” (“The Love of Mother,” Improvement Era, Jan. 1910, 278).
Ena veika kecega, sa vakayacora kina na iVakabula na ivakarau ni loloma a vakaraitaka vei tinana e vuravura. Ena iotioti ni Nona gauna bibi duadua ni Nona bula eke—ni vakararawataki oti mai Kecisemani, na veilewai veivakacacani, na isala wa vakavotona, na bibi ni kauveilatai a vakoti kina vakararawa—ena gauna bibi duadua e vuravura taucoko, a rai mai o Jisu mai na kauveilatai ka raici tinana, o Meri, ni gole mai me mai tiko vata kei Luvena. Na iotioti ni nona cakacaka ni loloma ni bera ni ciba o ya me vakadeitaka ni na maroroi o tinana, ka kaya kina vei Nona tisaipeli, “Raici tinamu!” Ka vakatekivu mai na gauna o ya a kauta na tisaipeli na tinana ki nona vale. Me vaka e tukuna na ivolanikalou, sa qai kila o Jisu ni “sa oti na ka kecega,” ka vakacuva na uluna ka ciba yani. (raica na Joni 19:27–28, 30).
Au mai tu oqo e matamuni meu vakadinadinataka ni sai Jisu Karisito dina ga na iVakabula ka Dauveivueti kei vuravura. Oqo na Nona Lotu, na Lotu i Jisu Karisito ni Yalododonu Edaidai. E gadreva na Tamada Vakalomalagi me ra lesu taucoko Vua na luvena. Au sega ni vakabekataka na ka oqo baleta ni sa tukuna e yaloqu na Yalo Tabu. Au a sega tu ni kila—niu se gone au dau vakararavi tu ga ena nodrau ivakadinadina na noqu itubutubu. A vakadeitaka vei au o tinaqu ni kevaka meu na muria tikoga na salatu ni dina, ena gauna mada ni katakata na siga se kuvu, ena gauna mada ni gole tani, ena vinaka cake na kena itinitini mai na kena itekivu. Sa tawamudu kina na noqu vakavinavinaka ni a tukuna vei au o Na. Ena yaca i Jisu Karisito, emeni.