Mo Yaloqaqa
[Na] idusidusi mai na ivola i Josua era na cokoti vata mera vakarautaka na ivurevure ni yaloqaqa kei na kaukauwa cecere duadua: o ya na vakabauta na Tamada Vakalomalagi, kei na Luvena, o Jisu Karisito.
E vuqa na gauna, ni ra dau vosa na Vakaitutu Raraba vei ira na veitacini matabete ena koniferedi raraba, era na tekivu me vakila me vaka era sa vosa tiko ki na dua na “mataivalu qaqa” ni iliuliu ni matabete kaukauwa. Ena bogi nikua, au vakila ni vaka meu sa tucake tu e matadra e dua na “mataivalu qaqa” ni luvena yalewa digitaki na Kalou. Ko ni sa digitaki oti mo ni toso yani ki liu, ka laki tucake vata tu kei ira na lewe ni matabete yaloqaqa, ena bula dodonu, ena siga edaidai. E veivakayaloqaqataki ka totoka na kemuni irairai.
Au na tekivu ena yakavi nikua ena noqu lesuva tale na uto ni ivurevure ni noda itoko, Josua 1:9: “Mo kaukauwa ka qaqa; mo kakua ni rere, se yalolailai: ni sa tiko vata kei iko ko Jiova na nomu Kalou ena veiyasana kecega ko sa lako kina.”
Sai Mosese na parofita cecere ka a liutaki ira na luvei Isireli mai na vanua o Ijipita, era a bobula ka vakayarayarataki tiko kina me ra qarava na veikalou lasu. Ni oti e 40 na yabaki na nodra sotava na dredre ena lekutu, era sa volekata sara tiko kina na nodra vanua vou, na vanua me ra laki tiko vakacegu me ra qarava na Kalou dina sa bula tiko. Ni sa mate o Mosese, a kacivi Josua na Kalou me parofita me na vakacavara yani na ilakolako veivakurabuitaki oqo.
E liuliu veivakauqeti o Josua. E tukuni ena Dikiseniri ni iVolanikalou ni o koya “na sotia yalodina cecere duadua” ka ibalebale ni yacana na “Kalou sa dauveivuke” (Bible Dictionary, “Joshua,”). Sa gadrevi dina sara na nona veiliutaki veivakauqeti, baleta ni se vo levu tu e vuqa na uciwai me kosovi kei na ivalu me qaqa kina ni bera ni qai kilai ka rawati na veika kece a yalataka tu na Turaga vei ira na luvei Isireli.
Sa kila vinaka tu na Turaga ni na gadreva o Josua na parofita kei ira na luvei Isireli me ra yaloqaqa ena gauna vakaoqo. Ena imatai ni wase ni vola i Josua, a kaya vakavica na Turaga vei koya me “kaukauwa ka qaqa. ” Na vosa qaqa e kena ibalebale “na kaukauwa ni vakasama se yalo me … vorata, ka tudei ena gauna ni leqa, vakarerevaki se dredre” (Merriam-Webster’s Collegiate Dictionary, 11th ed.[2003], “courage”; vakamatatataki). Mai na nodra yaloqaqa kei na talairawarawa, a rawa kina vei Josua kei ira na luve i Isireli me ra curuma rawa na vanua yalataki ka kune marau ena veivakalougatataki ni Turaga.
Ena dua sara na gauna makawa sa oti e a bula voli kina o Josua kei ira na luvei Isireli. Ia ena noda gauna oqo eda sa sasaga tale tikoga yani meda curuma e dua na “vanua yalataki.” Sa noda inakinaki cecere duadua o ya meda laki bula tawamudu vata kei na Tamada Vakalomalagi. Ena imatai ni wase ni ivola i Josua, eda raica rawa kina e va na idusidusi dina sara ena vukea meda vorata rawa kina na veika dredre, vakacavara rawa na noda ilakolako ka marautaka na veivakalougatataki ni Turaga ena noda “vanua yalataki.”
iMatai, ena tikina e 5 a yalataka kina na Turaga vei Josua, “au na sega ni weletaki iko, se biuti iko.” Eda rawa ni vakayaloqaqataki ka vakaukauwataki ena yalayala oqo ni na tiko vata kei keda na Turaga ka na sega ni biuti keda taudua tu. A vakavulici vei keda ni Tamada Vakalomalagi e kilai ira na Luvena yadua ka lomani ira. Me vaka ko ni dua na luvena yalewa talei, sa rawa me nomuni na Nona veivakadeitaki kei na veidusimaki ena kaukauwa ni masu. Ena Vunau kei na Veiyalayalati, eda wilika kina, “Ia mo yalomalumalumu; raica ena tubera na ligamu na Turaga na nomu Kalou, ka vakayacora na nomu kerekere” (V&V 112:10).
Au vakabauta na veivosa oqo kau yalataka vei kemuni ni sa dau rogoca ka sauma na Tamada Vakalomalagi na noda masu. Ia sa dau gadrevi meda dau vosota tiko ni da “waraki Jiova.” (Aisea 40:31). Ni da wawa tiko, eda na rairai tekivu vakabauta ni da sa guilecavi, se sa sega ni rogoci na noda masu, se rairai eda sega ni kilikili me ra saumi mai. Oqo e sega ni dina. Au taleitaka na vosa veivakacegui nei Tevita na Tui: “Au dau waraki Jiova tikoga; ka sa vakatu daligana vei au, ka rogoca na noqu tagi” (Same 40:1).
Se cava ga na veika o ni na rairai sotava ena nomuni ilakolako yadudua, e vakayadrati keda na imatai ni idusidusi ena Josua o ya meda dau masu, vosota tiko, ka nanuma deivaki na yalayala ni Kalou: “Au na sega ni weletaki iko, se biuti iko” (Josua 1:5).
Na ikarua ni idusidusi e tiko ena tikina e 7, ka a tukuna na Turaga vei Josua: “Mo cakava me vaka na ivakaro kecega … : mo kakua ni gole tani ki na imatau se na imawi, mo tamata yaco ena veiyasana kecega ko lako kina.” Sa vakasalataki Josua tiko na Turaga me muria sara vakadodonu na ivakaro, ka me kakua ni lako tani mai na salatu ni Turaga. A vakavulica o Peresitedi Howard W. Hunter: “Sa kila vakavinaka tu o Josua ni nona talairawarawa ena kauta mai na rawa ka, ka dina ga ni sega tu ni kila ena rawata vakacava, ia sa vakabauta tiko ni na yaco vakakina… . Sa dina sara ni sa mai [volai tu ena ivolanikalou] na veika era sotava na parofita cecere [ka taqomaki vinaka tu] me vukea na noda kila vakavinaka na bibi ni noda digitaka na salatu ni talairawarawa vakaidina” (“Commitment to God,” Ensign, Nov. 1982, 57, 58).
Ena vula sa oti au a laki sikova e dua na ilawalawa goneyalewa. Au a tarogi ira era sa qase cake toka na ivakasala cava me ra na solia vua e dua na Maqusa vou me vukea me yalodina ka bula dodonu tiko ena veidraki ni bula kecega ena rawa ni sotava. A kaya mai e dua, “Ni ko curuma yani na veiolo ni nomuni koronivuli, mai na tutu ni matamu, ko na rawa beka ni o raica e dua na ka ena toboka na nomu vakasama, e dua na ka ena sega toka beka ni kilikili. O na vakataroga beka ka via rai yani. Sa noqu ivakasala vei iko oqo: Kakua ni rai. Au yalataka vei iko ko na veivutunitaka ena nomu cakava. Vakabauti au; rai tikoga ki liu.”
Niu rogoci goneyalewa oqo, au kila niu sa rogoca tiko na ivakasala ni Turaga vei Josua, “Mo kakua ni gole tani ki na imatau se na imawi” (Josua 1:7), ni sa ka yaga sara ki na veidraki ni bula ena iotioti ni gauna oqo. Kemuni na goneyalewa, ni vorata rawa na veitemaki e vakavolivoliti kemuni tiko ena nomuni vakamuria vakadodonu tiko na ivakaro. Raica tikoga yani ki liu na nomuni lalawa tawamudu. E vakayadrati keda na ikarua ni idusidusi ni gauna eda vakayacora kina oqo, ko ni na taqomaki ka “tamata yaco ena yasana kecega ko [ni na] lako kina” (Josua 1:7).
Ena tikina e 8 eda raica kina na ikatolu ni noda idusidusi. Eke e vosa na Turaga me baleta e dua na “ivola ni lawa” ka tukuna vei Josua vakaoqo “mo vakanananu kina ena siga kei na bogi, mo vakabauta kina mo cakava me vaka na ka kecega sa volai kina: … ia ko na qai tamata yaco. ” Sa vakasalataki Josua tiko na Turaga ka vakakina vei keda kecega meda wilika na ivolanikalou. Na wiliki ni ivolanikalou ena veisiga—vakabibi na wiliki ni iVola i Momani—e tauyavutaka e dua na yavu tudei me baleta na tarai cake ni nomuni ivakadinadina i Jisu Karisito kei na Nona kosipeli. Ena sureta na Yalo Tabu ki na nomuni bula. E vakasalataka vakaoqo o Peresitedi Harold B. Lee, “Kevaka eda na sega ni wilika na ivolanikalou e veisiga, e sa na mamare noda ivakadinadina, [ka] sa na sega ni titobu na noda vakasama vakayalo” (Nodra iVakavuvuli na Peresitedi ni Lotu: Harold B. Lee [2000], 75).
Era sa tuvanaki tu vakayauyau ena ivolanikalou na veidusimaki, yalayala, iwali ni leqa, kei na veivakayadrati ena vukea na noda ilakolako oqo ki na “vanua yalataki.” Na ikatolu e dusimaki keda meda wilika ka vakanananu ena ivolanikalou ena veisiga me rawa kina ni da tamata yaco ka qaqa.
Ni sa vosa oti na Turaga vei Josua, sa qai vosa o Josua vei ira na luvei Isireli. Ni oti na nona vosa, ena tikina e 16 era vakarorogo na luvei Isireli ki na nona vosa ka sa ikava tiko ni noda idusidusi. Era a kaya kina, “Na ka kecega ko sa vakarota vei keimami, keimami na kitaka, ia keimami na lako ki na yasana kecega ko na talai keimami kina.”
Oi keda na lewe ni Lotu i Jisu Karisito ni Yalododonu Edaidai, sa donumaki keda na madigi meda yalataka me da vakarorogo vua na noda parofita, o Peresitedi Thomas S. Monson, e tiko vata kei keda ena bogi nikua. Ena masumasu kei na veivakadeitaki ni Yalotabu, sa rawa vei keda yadudua meda vakadinadinataka rawa kina na noda parofita bula. Ena tubu cake na noda ivakadinadina oqo ni da vakarogoca, vakayacora, ka bulataka na nona ivakavuvuli ena noda bula ena veisiga.
Ni da vakarogoca ka talairawarawa ki na nona ivakasala na noda parofita eda na rawata na veivakalougatataki ka dutani toka. Mo ni rogoca mada eso na yalayala vakaparofita a vakaraitaka vei keda o Peresitedi Monson ena noda koniferedi raraba sa oti: “Me vakalougatataki kemuni na Kalou. Me tiko vata kei kemuni na Nona vakacegu sa yalataki tu ena gauna oqo kei na veigauna kecega” (“iOtioti ni Vosa,” Liaona, Nove. 2009, 110). “Sa waraki keda tu na veiyalayalati cecere kevaka eda sa dina ka yalodina tiko” … Au sa laiva vei kemuni yadua na veivakalougatataki mai lomalagi” (Liaona, Nove. 2009, 110).
Ena macawa ka tu mai ena koniferedi raraba au sureti kemuni mo ni mai vakarorogo ki na nona ivakasala kei na yalayala na noda parofita kei ira na iapositolo. Mo ni qai vakayagataka na ikava ni idusidusi ka yalataka kina mo ni muria na nona ivakasala na parofita ka vakadeitaka ni “ka kecega [e] sa vakarota vei [keda], [eda] na kitaka, ia [eda] na lako ki na yasana kecega [e]na talai [keda] kina” (Josua 1:16)
Ena gauna oqo na idusidusi e va oqo—o ya na masu, talairawarawa ki na ivakaro ni Kalou, vulici ni ivolanikalou ena veisiga, kei na yalodina ni vakarorogo ki na parofita bula—ena vaka toka beka me dua ga na ka lailai ka rawarawa tu ga. Meu vakayadrati kemuni mada ena ivolanikalou e tiko ena Alama: “Raica na ka lailai ka beci sa tubu mai kina na ka levu ” (Alama 37:6). Ni bulataki oqo ena noda bula, ena yaco o iratou na va na idusidusi “lailai ka beci oqo” mai na ivola i Josua mera na cokoti vata ka vakarautaka na ivurevure ni yaloqaqa kei na kaukauwa cecere duadua: o ya na vakabauta na Tamada Vakalomalagi, kei na Luvena, o Jisu Karisito.
E kila tu na Tamada Vakalomalagi ni sega ni dau rawarawa na noda ilakolako yadudua. Eda sotava ena veisiga na veika e gadrevi kina na yaloqaqa kei na kaukauwa. E dua na italanoa ena Church News e vakadeitaki kina na dina oqo:
“Ena vica na vula sa oti a tekivuna e dua na qasenivuli na nona kalasi ena nona vakasalataki ira na nona gonevuli me ra tucake ena dua na yasana o ira era tokona na veika vakapolitiki, kei ira era saqata ki na yasana ka dua.
“Ni ra sa vakayacora oti na gonevuli, a laki tucake o qasenivuli ena yasana era saqata. A tekivu sara o qasenivuli me vosataka e dua na goneyalewa vata kei ira era tokona me baleta na nodra nanuma.
“Na goneyalewa o ya e lewe ni Leba ena nodratou tabanalevu, ka sega ni kaya e dua na ka ni vosa vakacacataki na nona vakabauta.
“[E tucake galugalu] tu ga ni vakacacani e matadra na tamata mai vua e dua na iliuliu” (“What Youth Need,” Church News, March 6, 2010, 16).
E vakaraitaka na goneyalewa oqo na nona yaloqaqa cecere ni a valuti, ena loma sara ga ni nona kalasi. Se evei ga o ni tiko kina se cava ga o ni na rawa ni sotava, au vakabauta ko ni na vakayagataka na idusidusi e tiko ena ivola i Josua mo ni na nuitaka kina na yalayala ni Turaga: “Mo kaukauwa ka qaqa; mo kakua ni rere, se yalolailai: ni sa tiko vata kei iko ko Jiova na nomu Kalou ena veiyasana kecega ko sa lako kina” (Josua 1:9).
Au gadreva meu laiva vei kemuni na noqu ivakadinadina ni Tamada Vakalomalagi e kilai kemuni ka lomani kemuni yadudua. Kevaka mo ni na lesu Vua, ena sega ni vakawaleni kemuni! Ena vakalougatataki kemuni ena kaukauwa kei na yaloqaqa o ni na gadreva mo ni vakacavara kina na nomuni ilakolako lesu Vua. Au vakavinavinakataka vakalevu na ivolanikalou, kei na ivakaraitaki kaukauwa, me vakataki Josua na parofita. Au vakavinavinaka vei Peresitedi Monson, ena nona sasaga me muataki keda lesu yani vua na Tamada Vakalomalagi. Sa noqu masu, me vakataki ira na luvei Isireli, ni da na curuma rawa na noda “vanua yalataki” ka kune vakacegu ena veivakalougatataki ni Turaga. Au cavuta na veika kecega oqo ena yaca i Jisu Karisito, emeni.