Pagtabang sa Bag-ong mga Kinabig nga Magpabiling Lig-on
Kitang tanan apil sa proseso sa pagpabilin. Nagpadayon kini nga proseso sa pagkakabig—sa pagpaduol ug sa kanunay nga pagbalik ngadto sa Ginoo.
Litrato ni Sister Tanner sa Busath Photography; paghulagway sa litrato ni Henrik Als; paghulagway ni Steve Kropp
Sa dihang mibisita ako sa habagatang Brazil pipila na ka tuig ang milabay, ang akong bana mikuyog kanako. Mao kini ang dapit diin siya mialagad sa iyang misyon. Usa ka gabii sa dihang kami miabut sa usa ka miting, giabi-abi kami diha sa pultahan sa usa ka batan-ong inahan kinsa mipaila sa iyang kaugalingon isip akong tighuhubad alang sa miting. Mahinamon siya nga milingi ngadto sa akong bana ug miingon, “Elder Tanner, ikaw ang midala sa ebanghelyo ngadto sa akong pamilya daghan nang tuig ang milabay. Ako usa pa lang ka gamayng bata niadtong higayona, apan nagdako ako nga nakadungog sa imong pangalan inubanan sa unang mga bunyag diha sa among pamilya.” Dayon siya misulti kanamo mahitungod sa pakamatinud-anon sa matag miyembro sa pamilya diha sa Simbahan sa tanang katuigan. Nakapatandog nga panagkita kadto!
Panahon sa miting, samtang ang akong bana nagtan-aw sa mga nanambong, iyang nakita ang uban pa nga nagkatag diha sa kongregasyon kinsa iyang gitudloan sa ebanghelyo ug kinsa nagpabiling matinud-anon. Sa dihang mihatag siya sa iyang pagpamatuod, ang akong bana mipahayag sa iyang hingpit nga kalipay sa pagkasayud nga sila nagpadayon nga magmamatinud-anon. Siya miingon nga nahinumdom siya sa istorya sa Basahon ni Mormon diin si Alma nagkasugat sa iyang minahal nga mga higala, ang anak nga mga lalaki ni Mosiah, samtang siya nagpanaw:
“Karon kini nga anak nga mga lalaki ni Mosiah uban ni Alma sa panahon nga ang anghel mipakita sa unang higayon ngadto kaniya; busa si Alma nalipay sa hilabihan sa pagkakita sa iyang mga kaigsoonan; ug unsa ang labaw nga nakadugang sa iyang hingpit nga kalipay, sila nagpabilin sa gihapon nga iyang mga kaigsoonan diha sa Ginoo” (Alma 17:2; empasis gidugang).
Nianang gabhiona didto sa Brazil, ang akong bana nagkakita usab sa iyang suod nga mga higala sa nangagi kinsa “nagpabilin sa gihapon nga iyang kaigsoonang mga lalaki [ug mga babaye] diha sa Ginoo.”
Mao kini ang tinguha sa matag matinud-anong misyonaryo: nga ang bag-o nga mga kinabig magpabilin diha sa Simbahan ug “[mag-anam] og kalig-on diha sa kahibalo sa kamatuoran” (Alma 17:2). Mao kini ang tinguha sa matag matinud-anon nga ginikanan: nga ang ilang mga anak magpabiling tinuod diha sa pagtuo. Mao usab kini ang tinguha sa mga lider sa Simbahan alang sa mga miyembro nga anaa ubos sa ilang pag-amuma, ug mao kini ang kinasingkasing nga tinguha sa atong Amahan sa Langit alang sa Iyang mga anak (tan-awa sa Moises 1:39).
Pagpangita Niadtong Kinsa Nahisalaag
Natandog ako kon unsa ka makanunayon nga mipahayag ang Ginoo sa Iyang gugma alang sa Iyang katawhan, bisan kon sila nahisalaag—tingali ilabi na gayud kon sila nahisalaag. Hunahunaa ang mga sambingay nga gihatag sa Manluluwas mahitungod sa nawala nga mga butang: karnero, mga sinsilyo, usa ka anak nga usikan (tan-awa sa Lucas 15). Ang magbalantay sa karnero miadto aron sa pagpangita sa nawala nga karnero; ang babaye makugihong misiksik sa iyang balay alang sa nawala nga drakma [silver] ang amahan midagan paingon ngadto sa iyang masinupakon nga anak samtang “didto pa siya sa halayo … ug [migakos] kaniya, ug [gihagkan] siya” (Lucas 15:20). Maingon man usab, diha sa sambingay sa kahoy nga oliba atong malantaw ang mainantuson nga paghigugma alang niadtong kinsa nahisalaag (tan-awa sa Jacob 5). Pabalik-balik, ang Ginoo sa ubasan nasubo, “Kini nakapaguol kanako nga Ako mawad-an niini nga kahoy” (Jacob 5:7, 11, 13, 32). Sa tibuok nga basahon ni Isaias, ang Ginoo mipaniguro pag-usab sa Israel nga Siya dili makalimot kanila: “Ania karon, ako na ikaw nga gisilsil sa mga palad sa akong mga kamot” (Isaias 49:16). Diha sa basahon ni Ezequiel ang Ginoo nag-ingon, “Pangitaon ko kadtong nawala, ug pabalikon pag-usab kadtong ginapalaag sa halayo, ug bugkusan ko kadtong nabunggoan sa bukog” (Ezequiel 34:16).
Kon kita moapil diha sa buhat sa pagpabilin ug pagpa-aktibo og usab, kita mamahimong mga suluguon sa Ginoo diha sa mahigugmaon nga buhat sa pagpangita sa atong mga kaigsoonan kinsa sama tingali sa nawala nga karnero, nawala nga mga sinsilyo, o usa ka anak nga usikan.
Pagsulod sa Bag-ong Kalibutan
Ang paagi mahimo usab nga makuyaw alang niadtong kinsa mga bag-o pa sa Simbahan samtang sila naningkamot sa pagpahiangay niining dakong kausaban sa ilang mga kinabuhi. Usa ka bag-ong miyembro mihulagway niining malisud nga kausaban. Siya miingon: “Sa dihang kami isip mga investigator nahimong mga miyembro sa Simbahan, kami natingala sa pagkadiskubre nga kami misulod ngadto sa usa ka hingpit nga langyaw nga kalibutan, usa ka kalibutan nga adunay kaugalingong mga tradisyon, kultura, ug pinulongan. Kami nakadiskubre nga walay tawo o walay dapit sa pakisayran nga mahimo namong adtoan alang sa giya sa among pagbiyahe niining bag-o nga kalibutan.”1
Si Presidente Gordon B. Hinckley (1910–2008) mibalik-balik sa pagtudlo nga ang atong bag-o nga mga miyembro ug ang atong nahisalaag nga mga miyembro nagkinahanglan sa atong tabang. Sila nagkinahanglan og usa ka higala, usa ka responsibilidad, ug espirituhanong pag-amuma, ingon sa gitudlo sa basahon ni Moroni: “Human sila madawat ngadto sa bunyag, … sila giihap uban sa mga katawhan sa simbahan ni Kristo; ug ang ilang mga ngalan gikuha, nga sila mahinumduman ug maamumahan pinaagi sa maayo nga pulong sa Dios, aron pag-agak kanila sa matarung nga agianan” (Moroni 6:4).
Atol sa samang biyahe ngadto sa Brazil mibisita ko sa daghan nga mga batan-on nga mga babaye diha sa ilang panimalay, nagtinguha sa “paghinumdom ug sa pag-amuma” kanila. Ang uban hingpit nga lig-on diha sa ilang mga pagpamatuod, samtang ang uban dili na aktibo sa Simbahan. Diha sa matag kahimtang ako mihangyo kanila kon mahimo ba nilang isuti ang tema sa Young Women. Ang matag usa nakahimo! Dayon ako nangutana sa matag usa kon unsa nga mithi sa Batan-ong mga Babaye nga makahuluganon kaayo kaniya ug ngano. Samtang ang matag babaye mitubag kanako gibati ko ang Espiritu ug nakita bisan man lang usa ka kidlap sa hugot nga pagtuo ang nagpabiling buhi niadtong kinsa wala na nagtambongan sa simbahan. Ako nasayud nga kon ang usa ka tawo makahinumdom sa matag usa kanila ug higugmaon sila ug amumahan kana nga gamay nga kidlap sa hugot nga pagtuo, ang ilang kahayag mahimong modilaab pag-usab.
Personal nga Responsibilidad
Ang pag-amuma pinaagi sa maayong pulong sa Dios nagpasabut nga kita mabinantayon ngadto sa uban nga espirituhanong paglambo ug pagkamaayong tawo, sama gayud sa atong pag-amuma sa atong pisikal nga lawas. Samtang ang mga ginikanan, mga lider, ug mga higala kinahanglan nga motabang niining proseso, ang bag-ong mga kinabig, nagpangutana nga mga kabatan-onan, ug nanglimbasug nga mga miyembro adunay usa ka personal nga responsibilidad aron sa pagtabang usab sa ilang mga kaugalingon. Kini mahitabo gayud pinaagi sa personal nga pagtuon sa ebanghelyo.
Ako nakahinumdom kaayo sa summer nga ako nakagradwar sa high school. Kadto usa ka magubot nga panahon alang kanako sa espirituhanong paagi, usa ka panahon nga ako nangita sa akong agianan diha sa ebanghelyo, sama sa daghang bag-o nga mga kinabig. Ang akong tambal alang niini nga mga problema mao ang pagkugi sa pagbasa ug pagtuon sa Basahon ni Mormon matag adlaw, kasagaran sa luag nga mga gutlo sa oras. Ako nakahinumdom pa gihapon sa pipila niadtong puno sa Espiritu nga mga panahon. Usa kini sa masukaranong gutlo alang sa pag-amuma ug pagpatubo sa akong pagpamatuod.
Agig dugang ngadto sa paghinumdom ug pag-amuma niadtong kinsa nawala o nahisalaag, kita kinahanglang motugot kanila sa oportunidad sa pagserbisyo. Ang Manluluwas miawhag ni Apostol Pedro, “Ug sa nahibalik na ikaw kanako, lig-ona ang imong igsoon” (Lucas 22:32). Ang mga calling sa Simbahan naghatag sa mga miyembro og oportunidad sa paglig-on sa uban ug sa niana gayud nga pagserbisyo motubo usab ang ilang mga kaugalingon.
Sa dihang ang akong mga anak mga tin-edyer pa ug usahay dili sila gusto nga moapil sa ilang Mutual o mga miting, ako misulti ngadto kanila mahitungod sa ilang responsibilidad. Miingon ko nga dili kanunay nga kita moadto sa usa ka miting tungod sa unsay atong makuha gikan niini, apan kon unsay atong mahatag. Ako kanunay nga moingon nga, “Kamo nagkinahanglan sa Simbahan, ug ang Simbahan nagkinahanglan kaninyo.” Ang bag-o nga mga kinabig ug ang dili kaayo aktibo nga mga miyembro kinahanglang mobati nga gikinahanglan tungod kay silamga gikinahanglan.
Usa ka Buhat alang sa Tanan
Kitang tanan apil diha sa proseso sa pagpabilin. Nagpadayon kini nga proseso sa pagkakabig—sa pagduol ug sa kanunay nga pagbalik ngadto sa Ginoo. Si Alma mipasabut niini isip usa ka dako nga kausaban (tan-awa sa Alma 5:14). Ang pagkakabig mao ang buhat nga atong giatubang, nagtrabaho man kita uban sa mga investigator, mga kabatan-onan, dili kaayo aktibo nga mga miyembro, o bisan sa aktibo nga mga miyembro. Kitang tanan kinahanglan nga moapil sa pagtabang diha sa buhat sa Ginoo, sa pagpahinabo sa pagka-imortal ug sa kinabuhi nga dayon sa Iyang mga anak (tan-awa sa Moises 1:39).
Ang akong bana misulat sa iyang journal sa misyon: “Ang pagkakabig mao ang pinakadakong milagro. Mas makahibulongan pa kini kaysa pagpang-ayo sa sakit o pagpabangon sa patay. Kay samtang ang usa ka tawo kinsa naayo sa ngadto-ngadto masakit pag-usab ug sa katapusan mamatay, ang milagro sa pagkakabig molungtad sa kahangturan ug makaapekto sa mga kahangturan alang sa kinabig ingon man usab sa iyang kaliwatan. Ang tibuok henerasyon mamaayo ug matubos gikan sa kamatayon pinaagi sa milagro sa pagkakabig.”
Kita moapil sa Ginoo sa pagpangita niadtong nawala, ug pabalikon pag-usab kadtong ginapalaag sa halayo, ug pagbugkos niadtong nabunggoan sa bukog. Dayon, diha nianang mahinungdanong adlaw sa Ginoo, kita unta magmaya sama sa akong bana, nga makita nga kadtong atong gihigugma diha sa ebanghelyo mga kaigsoonan gihapon nato diha sa Ginoo.
Ang bag-o nga mga miyembro ug ang nahisalaag nga mga miyembro nagkinahanglan sa atong tabang Sila nagkinahanglan og usa ka higala, usa ka responsibilidad, ug espirituhanong pag-amuma.
Paghulagway sa litrato pinaagi ni Steve Bunderson; They Brought Me Back, ni Steve Kropp