Mensahe sa Unang Kapangulohan
Bililhon nga mga Bunga sa Unang Panan-awon
Sa mga katuigan sa akong pagdako sa Germany, ako mitambong og simbahan sa daghang nagkalain-laing mga dapit ug mga kahimtang—diha sa usa ka yanong backroom, sa madanihong mga villa, ug sa magamit gayud nga modernong mga chapel. Tanan niining mga bilding adunay usa ka importanting butang nga komon: ang Espiritu sa Dios anaa. Ang gugma sa Manluluwas mabati samtang nagtigum kami isip usa ka pamilya sa usa ka branch o ward.
Ang Zwickau nga chapel adunay usa ka karaang organ nga bumbahan og hangin aron motingog. Kada Dominggo usa ka batan-ong lalaki gisangunan sa pagduso paibabaw ug paubos sa gahi nga ligwat nga nagpalihok sa mga hasohasan [bellows] aron motukar ang organ. Gani sa wala pa ako naghupot sa Aaronic Priesthood, usahay aduna koy dakong pribilehiyo sa pagtabang niining importante nga buluhaton.
Samtang ang kongregasyon manganta sa atong gimahal nga mga himno sa Pagpahiuli, ako mibomba sa tibuok nakong kusog aron ang organ dili mahutdan og hangin. Ang mga mata sa organista dili gyud masaypang nagpasabut kon sakto ba nakong pagkahimo o kinahanglan pa nga modugang dayon sa akong mga paningkamot. Kanunay kong mibati og pasidungog nga dala sa kaimportante niini nga katungdanan ug sa pagsalig nga gihatag sa organista ngari kanako. Nindot kadto nga pagbati sa kalampusan nga makaangkon og usa ka responsibilidad ug nahimong parte niining mahinungdanong buhat.
Adunay dugang kaayohan nga miabut gikan niini nga buluhaton: ang operator sa mga hasohasan [bellows] maglingkod sa usa ka lingkuranan nga naghatag og dakong kahigayunan nga makakita sa usa ka kinoloran nga bildo sa bintana nga nagpanindot sa atubangang bahin sa chapel. Ang kinoloran nga bildo naghulagway sa Unang Panan-awon, nga si Joseph Smith nagluhod sa Sagradong Kakahoyan, nga naghangad ngadto sa langit ug ngadto sa usa ka dakong haligi sa kahayag.
Sa panahon sa mga himno sa kongregasyon ug gani atol sa mga pakigpulong ug mga pagpamatuod nga gihatag sa among mga miyembro, kanunay kong motan-aw niining paghulagway sa usa ka sagradong higayon sa kasaysayan sa kalibutan. Sa akong hunahuna akong nakita si Joseph nga nakadawat sa kahibalo, pagpamatuod, ug sa balaang mga panudlo samatng siya nahimong gipanalanginan nga instrumento diha sa kamot sa atong Langitnong Amahan.
Mibati ko og espesyal nga espiritu samtang nagtan-aw sa matahum nga talan-awon niining hulagway diha sa bintana bahin sa usa ka matuohon nga batang lalaki diha sa usa ka sagrado nga kakahoyan kinsa nakahimo og usa ka maisugong desisyon nga tinuoray nga mag-ampo sa atong Langitnong Amahan—usa ka Amahan kinsa naminaw ug mahigugmaong mitubag kaniya.
Ang Pagsaksi sa Espiritu
Mao ako kaniadto, usa ka batang lalaki human sa Ikaduhang Gubat sa Kalibutan didto sa Germany, nagpuyo sa usa ka siyudad nga naguba, liboan ka mga milya gikan sa Palmyra, New York, sa Amihang Amerika ug sobra sa usa ka gatus ka mga tuig human sa pagkahitabo sa aktwal nga panghitabo. Pinaagi sa malukpanong gahum sa Espiritu Santo, gibati ko diha sa akong kasingkasing ug sa akong hunahuna nga kadto tinuod, nga si Joseph Smith nakakita sa Dios ug ni Jesukristo ug nakadungog sa Ilang mga tingog. Ang Espiritu sa Ginoo mihupay sa akong kalag diha niining batan-on uban sa kasigurohan sa katinuod niining sagradong higayon nga miresulta diha sa pagsugod sa usa ka tibuok kalibutan nga kalihokan nga ang padulngan mao nga “mokaylap, hangtud nga kini mopuno sa tibuok yuta” (D&P 65:2). Ako mituo sa pagpamatuod ni Joseph Smith nianang mahimayaong kasinatian didto sa Sagradong Kakahoyan nianang higayona, ug ako nasayud niini karon. Ang Dios nakigsulti na usab sa mga katawhan!
Sa pagtan-aw sa nangangi ako mapasalamaton alang sa daghan kaayong mga higala nga mitabang nako sa batan-on pa ako aron makabaton og usa ka pagpamatuod sa gipahiuli nga Simbahan ni Jesukristo. Una nagbansay ko og yanong pagtuo diha sa ilang pagpamatuod, ug dayon nakadawat ako sa balaang pagsaksi sa Espiritu ngari sa akong hunahuna ug sa akong kasingkasing. Giisip nako si Joseph Smith nga apil niadtong kansang pagpamatuod bahin ni Kristo nakatabang kanako sa pagpalambo sa akong kaugalingon nga pagpamatuod sa Manluluwas. Sa wala pa nako maamgohi ang pagtudlo sa Espiritu nga nagpamatuod ngari nako nga si Joseph Smith usa ka propeta sa Dios, ang akong batan-ong kasingkasing mibati nga usa siya ka higala sa Dios ug mao nga, natural lang, nga mahimo usab nako nga usa ka higala. Ako nasayud nga makasalig ako kang Joseph Smith.
Ang mga kasulatan nagtudlo kanato nga ang espirituhanong mga gasa gihatag ngadto niadtong nangayo sa Dios, kinsa nahigugma Kaniya, ug kinsa nagsunod sa Iyang mga sugo (tan-awa sa D&P 46:9).
“Dili tanan aduna sa matag gasa nga ihatag ngadto kanila; kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios.
“Ngadto sa uban gihatag ang usa, ug ngadto sa uban gihatag ang lain, nga ang tanan makaangkon og kaayohan pinaagi niana” (D&P 46:11–12).
Karon ako nasayud nga ang akong linghod nga pagpamatuod nahatagan gayud og dakong kaayohan gikan sa pagpamatuod ni Propeta Joseph Smith ug sa uban pang mga higala diha sa Simbahan kinsa nasayud “pinaagi sa Espiritu Santo … nga si Jesukristo mao ang Anak sa Dios, ug nga siya gilansang sa krus alang sa mga sala sa kalibutan” (D&P 46:13). Ang ilang maayong mga ehemplo, maamumahong gugma, ug matinabangong mga kamot, nakapanalangin kanako aron makadawat og laing espesyal nga gasa sa Espiritu nga gihulagway diha sa mga kasulatan samtang naghandom ko alang sa dugang kahayag ug kamatuoran: “Ngadto sa uban kini gihatag sa pagtuo sa ilang mga pulong, nga sila unta makabaton sa kinabuhi nga dayon kon sila magpadayon nga matinud-anon” (D&P 46:14). Pagkanindot ug pagkabililhon niini nga gasa!
Ang Gasa sa Hugot nga Pagtuo
Samtang tinud-anay kitang nagpaubos sa atong mga kaugalingon, mapanalanginan kita niini nga gasa aron makabaton og hugot nga pagtuo ug sa paglaum alang sa mga butang nga dili makita apan tinuod (tan-awa sa Alma 32:21). Samtang mag-eksperimento kita sa mga pulong nga gihatag ngari kanato pinaagi sa mga kasulatan ug sa buhing mga propeta—bisan kon duna lamang kitay tinguha sa pagtuo—ug dili mobalibad sa Espiritu sa Ginoo, ang atong mga kalag mapadako ug ang atong salabutan madan-agan (tan-awa sa Alma 32:26–28).
Ang Manluluwas Mismo mipasabut og maayo niining baruganan sa kalooy ngadto sa tibuok kalibutan diha sa Iyang mahinungdanon nga mapangamuyoong pag-ampo, nga gihatag dili lamang sa Iyang Apostoles pero alang sa tanang mga Santos, bisan asa man kitang dapita nagpuyo. Siya miingon:
“Nangamuyo ako dili lamang alang kanila ra, kondili alang usab sa mga mosalig kanako pinaagi sa ilang pulong;
“Aron silang tanan mausa; maingon nga ikaw, Amahan, ania kanako, ug ako anaa kanimo, aron sila usab maania kanato: nga ang kalibutan motuo nga ikaw mao ang nagpadala kanako” (Juan 17:20–21; empasis gidugang).
Mao kining paagiha kon sa unsa nga paagi nakapanalangin ang Unang Panan-awon ni Joseph Smith sa atong kaugalingong personal nga mga kinabuhi, sa mga kinabuhi sa pamilya, ug sa katapusan ang tibuok tawhanong pamilya—mituo kita kang Jesukristo pinaagi sa pagpamatuod ni Propeta Joseph Smith. Ang mga propeta ug mga apostoles sa tibuok nga kasaysayan sa katawhan adunay balaang mga pagpakita nga sama sa kang Joseph. Si Moises nakakita sa Dios nawong sa nawong ug nakat-on nga siya anak sa Dios “may pagkasama sa [Iyang] Bugtong Anak” (Moises 1:6). Si Apostol Pablo mipamatuod nga ang nabanhaw nga si Jesukristo mipakita kaniya didto sa dalan padulong sa Damascus (tan-awa sa Mga Buhat 26:9–23). Kini nga kasinatian mihimo kang Pablo nga usa sa bantugang misyonaryo sa Ginoo. Sa pagkadungog sa pagsaksi ni Pablo sa langitnon nga panan-awon atol sa husay sa Caesarea, ang gamhanang Haring Agrippa miangkon, “Hapit mo ako makabig nga mahimong usa ka Kristohanon” (Mga Buhat 26:28).
Ug adunay daghan pang karaang mga propeta kinsa mihatag usab og gamhang pagpamatuod kang Kristo. Tanan niining mga pagpakita, karaan ug moderno, midala niadtong mituo sa balaang tinubdan sa tanang pagkamatarung ug paglaum—ngadto sa Dios, ang atong Langitnong Amahan, ug ngadto sa Iyang Anak, nga si Jesukristo.
Ang Dios nakigsulti ngadto kang Joseph Smith alang sa katuyoan sa pagpanalangin sa tanang mga anak sa Dios uban sa Iyang kalooy ug gugma, bisan sa mga panahon sa mga pagduhaduha ug sa walay ksiguroan, sa mga gubat ug mga hungihong sa mga gubat, sa kinaiyahan ug personal nga mga katalagman. Ang Manluluwas miingon, “Tan-awa, ang akong bukton sa kalooy gitunol nganha kaninyo, ug kinsa kadto nga moduol Ako modawat kaniya” (3 Nephi 9:14). Ug ang tanan kinsa modawat niini nga pagdapit paga “liyokan uban sa iyang dili hitupngan nga gasa sa paghigugma” (Alma 26:15).
Pinaagi sa atong hugot nga pagtuo diha sa personal nga pagsaksi ni Propeta Joseph ug sa pagkatinuod sa Unang Panan-awon, pinaagi sa pagtuon ug pag-ampo, nga tulukibon ug kinasingkasing, mapanalanginan kita og usa ka lig-on nga hugot nga pagtuo sa Manluluwas sa kalibutan, kinsa namulong ngadto kang Joseph “usa ka buntag sa usa ka matahum, maayo nga panahon, sayo sa tingpamulak sa usa ka libo walo ka gatus ug kawhaan” (Joseph Smith—Kasaysayan 1:14).
Ang hugot nga pagtuo diha kang Jesukristo ug ang usa ka pagpamatuod bahin Kaniya ug sa Iyang malukpanong Pag-ula dili lamang usa ka doktrina nga dunay dakong bili sa teyolohiya. Ang ingon nga hugot nga pagtuo maoy usa ka malukpanong gasa, mahimayaon alang sa tanang kultura sa rehiyon niini nga yuta, nga dili maghunahuna sa kaliwat, kolor, pinulongan, nasyonalidad, o socioeconomic nga kahimtang. Ang mga gahum sa pangatarungan mahimong gamiton aron sa pagsulay sa pagsabut niini nga gasa, pero kadtong kinsa mibati sa mga epekto niini sa labing tinuoray nga paagi mao kadtong andam nga modawat sa mga panalangin niini, nga nagagikan sa usa ka putli ug limpyo nga kinabuhi sa pagsunod sa dalan sa tinud-anay nga paghinulsol ug pagsunod sa mga sugo sa Dios.
Pasalamat alang sa usa ka Propeta
Sa atong paghinumdom ug pagpasidungog kang Propeta Joseph Smith, ang akong kasingkasing mohangop kaniya sa pagpasalamat. Siya usa ka buotan, matinuoron, mapainubsanon, maantigo, ug maisug nga batan-ong lalaki nga adunay usa ka mabinationg kasingkasing ug dili matarug nga hugot nga pagtuo sa Dios. Duna siya’y kaligdong. Agig tubag sa iyang mapaubsanong pag-ampo, ang kalangitan naabli pag-usab. Si Joseph Smith sa pagkatinuod nakakita og usa ka panan-awon. Siya nasayud niini, ug siya nasayud nga ang Dios nasayud niini, ug siya dili makalimud niini (tan-awa sa Joseph Smith—Kasaysayan 1:25).
Pinaagi sa iyang buhat ug sakripisyo, ako karon aduna nay tinuod nga panabut sa atong Langitnong Amahan ug sa Iyang Anak, nga atong Manunubos ug Manluluwas, nga si Jesukristo, ug akong mabati ang gahum sa Espiritu Santo ug nasayud sa plano sa Langitnong Amahan alang kanato, nga Iyang mga anak. Para kanako, kini maoy tinud-anay nga mga bunga sa Unang Panan-awon.
Ako nagpasalamat nga sayo sa akong kinabuhi ako gipanalanginan og usa ka yanong hugot nga pagtuo nga si Joseph Smith usa ka propeta sa Dios, nga siya nakakita sa Dios nga Amahan ug sa Iyang Anak, nga si Jesukristo, diha sa usa ka panan-awon. Si Joseph Smith mihubad sa Basahon ni Mormon pinaagi sa gasa ug gahum sa Dios. Kana nga pagpamatuod napamatud-an na ngari kanako sa makadaghan.
Ako mopamatuod nga si Jesukristo buhi gayud, nga Siya mao ang Mesiyas. Ako adunay personal nga pagsaksi nga Siya mao ang Manluluwas ug Manunubos sa tanang katawhan. Akong nadawat kini nga kahibalo pinaagi sa dili matukib nga kalinaw ug gahum sa Espiritu sa Dios, ug ang tinguha sa akong kasingkasing ug sa akong hunahuna mao nga mahimong putli ug magmatinud-anon diha sa pagserbisyo Kaniya karon ug sa kahangturan.
Mao kining paagiha kon giunsa sa pagpanalangin ang Unang Panan-awon ni Joseph Smith sa atong kaugalingong personal nga mga kinabuhi, ang mga kinabuhi sa pamilya, ug sa katapusan ang tibuok tawhanong pamilya—mituo kita kang Jesukristo pinaagi sa pagpamatuod ni Propeta Joseph Smith.
Ang hugot nga pagtuo diha kang Jesukristo ug ang usa ka pagpamatuod bahin Kaniya ug sa Iyang malukpanong Pag-ula dili lamang usa ka doktrina nga dunay dakong bili sa teyolohiya. Ang ingon nga hugot nga pagtuo maoy usa ka malukpanong gasa, mahimayaon alang sa tanang kultura sa rehiyon niini nga yuta, nga dili maghunahuna sa kaliwat, kolor, pinulongan, nasyonalidad, o socioeconomic nga kahimtang.
The Desires of My Heart, ni Walter Rane, sa maayong kabubut-on sa Museum of Church History and Art
Mga paghulagway sa litrato pinaagi ni Matthew Reier; He Is Risen, ni Del Parson