Mensahe sa Visiting Teaching
Sabta ang Balaang mga Tahas sa mga Babaye
Itudlo ang mga kasulatan ug mga kinutlo nga makatubag sa mga panginahanglan sa mga sister nga inyong bisitahan. Pagpamatuod sa doktrina. Dapita kadtong inyong gitudloan sa pagpakigbahin unsay ilang gibati ug nakat-unan.
Julie B. Beck, kinatibuk-ang presidente sa Relief Society: “Ako adunay pagpamatuod nga nabatunan gikan sa pagpamalandong ug pagtuon sa mga kasulatan sa usa ka plano sa kalipay nga gihatag ngari kanato sa atong Amahan sa Langit Kana nga plano adunay bahin alang sa Iyang anak nga mga babaye. Kita adunay katunga sa plano nga tumanon sa mga babaye, ug kon kita dili mohimo sa atong bahin, walay laing tawo nga mohimo niini alang kanato. Ang katunga sa plano sa Amahan nga maglalang og kinabuhi, nga mag-amuma og mga kalag, nga magpasiugda og kalamboan, nga mag-impluwensya sa tanan pa nga mga butang, gihatag kanato. Kita dili makatugyan niini ngadto sa uban. Kita dili makapasa niini ngadto ni bisan kinsa. Atoa kini. Kita mahimong mobalibad niini, kita mahimong molimud niini, apan ato gihapon kining bahin, ug manubag kita alang niini. Moabut ang adlaw nga kitang tanan makahinumdom unsay atong nahibaloan sa wala pa kita matawo. Kita makahinumdom nga kita nakig-away diha sa usa ka dakong panagsumpaki alang niini nga pribilihiyo. Unsaon man nato sa pagtubag niini nga responsibilidad? Sa inadlaw-adlaw atong ibutang ang atong mga kusog ngadto sa buhat nga talagsaon nga atong pagabuhaton.”
Elder M. Russell Ballard sa Korum sa Napulog Duha ka mga Apostoles: “Ang sukaranong katuyoan sa doktrina sa Paglalang sa yuta mao ang paghatag sa espiritu nga mga anak sa Dios sa pagpadayon sa proseso sa kahimayaan ug kinabuhing dayon. …
“… Bisan og adunay dili kaayo daghan nga mahinungdanon nga kontribusyon nga inyong mahimo ngadto sa katilingban, sa Simbahan, o sa mahangturon nga kapalaran sa mga anak sa atong Amahan kaysa unsay inyong mahimo isip usa ka inahan o amahan, ang pagkainahan ug ang pagkaamahan dili lamang ang mga sukdanan sa kamaayo o pagdawat sa usa ka tawo sa atubangan sa Ginoo. …
“Ang matag igsoong babaye dinhi sa Simbahan kinsa mihimo og mga pakigsaad uban sa Ginoo adunay usa ka balaan nga mando aron sa pagtabang sa pagluwas sa mga kalag, sa pagpangulo sa mga babaye sa kalibutan, sa paglig-on sa mga panimalay sa Zion, ug sa pagtukod sa gingharian sa Dios” (“Women of Righteousness,” Liahona, Dis. 2002, 36, 39; Ensign, Abr. 2002, 68, 70).
Elder David A. Bednar of the Quorum of the Twelve Apostles: “Sa balaanong plano, lalaki ug babaye gituyo nga mouswag og dungan ngadto sa pagkahingpit ug kahingpitan sa himaya. Tungod sa ilang kalainan sa mga taras ug mga kapasidad ang mga lalaki ug babaye tagsa-tagsa nagdala ngadto sa relasyon sa kaminyoon og mga talagsaong panan-aw ug mga kasinatian. Ang lalaki ug ang babaye nagtampo og lahi apan parehas ngadto sa pagkausa ug panaghiusa nga dili mahimo sa laing paagi” (“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 51–52; Ensign, Hunyo 2006, 83–84).
Silvia H. Allred, unang magtatambag sa kinatibuk-ang kapangulohan sa Relief Society: “Ang Ginoo mipanalangin sa kababayen-an og diosnong mga kinaiya sa gugma, kalooy, kaayo, ug gugmang putli. Pinaagi sa atong binulang pagbisita isip mga visiting teacher, kita adunay gahum sa pagpanalangin sa matag sister samtang atong gitunol ang atong mga kamot sa gugma ug kamabination ug sa paghatag sa mga gasa sa kalooy ug gugmang putli. Dili igsapayan kon unsa man ang atong tagsatagsa ka mga kahimtang, kitang tanan adunay kahigayonan sa pagmatuto ug pag-amuma sa uban” (“Pakan-a ang Akong mga Karnero,” Liahona ug Ensign, Nob. 2007, 113).
Presidente Spencer W. Kimball (1895–1985): “Ang mahimong matarung nga babaye sa panahon sa katapusang dispensayon niini nga yuta, sa dili pa ang ikaduhang pag-anhi sa Manluluwas, usa ka talagsaong balaanon nga tawag. Ang kalig-on ug impluwensya sa matarung nga babaye karon mahimong kapulo pil-on sa unsa kini sa mas linawong mga panahon” (“Privileges and Responsibilities of Sisters,” Ensign, Nob. 1978, 103).
Paghulagwag sa litrato pinaagi ni Matthew Reier; talan-awon sa luyo pinaagi ni Shannon Gygi Christensen