Mga henerasyon
Usa ka man ka bag-o nga miyembro o ang imong pamilya nahimong miyembro sa Simbahan sulod sa mga dekada, ang Santos sa Ulahing mga Adlaw nga mga kabatan-onan sa Guadeloupe makasulti kaninyo nga ang pagpuyo sa ebanghelyo makatukod og kalig-on sa usa ka higayon.
Si Coralie “Coco” Gamiette, 12 anyos, adunay daghang paborito nga mga lugar nga bisitahan, ug usa niini mao ang usa ka busay. Kini gitawag og la Cascade aux Écrevisses. Kini ang lugar diin daghan sa mga unang mga miyembro sa Simbahan sa West Indies isla sa Guadeloupe gibunyagan.
Si Coco nag-ingon nga ang nagdagayday nga tubig nagpahinumdonm kaniya sa usa ka dapit sa Basahon ni Mormon, nga mao ang mga Katubigan sa Mormon, nga gihulagway isip “usa ka tuburan sa dalisay nga tubig” nga may “usa ka bagâ nga gagmay nga mga kahoy” sa duol niini. Diha gibunyagan ang 450 ka mga tawo kinsa mituo sa pagtulun-an ni Alma. (Tan-awa sa Mosiah 18.)
Siyempre, sa Guadeloupe karon, sama sa kadaghanan sa mga dapit diha sa Simbahan, ang mga bunyag gipahigayon diha sa usa ka bunyaganan sa chapel. Apan alang ni Coco, ang la Cascade maanindot pa gihapon nga dapit alang sa pagpiknik, pagbugsay-bugsay sa sapa, ug paglingkod diha sa bugnaw nga landong nga maghunahuna mahitungod sa kabilin sa Simbahan diha sa iyang kaugalingong pamilya.
Gikan sa France, uban sa Paghigugma
Kana nga kabilin nakabutang diha sa usa ka daw komplikado nga istorya pabalik ngadto sa mga 20 ka tuig, ngadto sa siyudad sa Angoulême, France. Didto, ang full-time nga mga misyonaryo gigiyahan ngadto sa usa ka tawo nga ginganlan og Michel Menardin, kinsa nagagikan sa Guadeloupe, usa ka tabok nga departamento sa France, aron sa paghimo sa iyang military nga pagserbisyo. Si Michel midawat sa ebanghelyo ug nabunyagan ug nakumpirmahan.
Niana gihapong tuiga sa samang lungsod, ang mga misyonaryo mibilin og usa ka pamplet diha sa usa ka huluganan sa sulat [mailbox]. Kini mipukaw sa interes sa usa ka dili minyo nga inahan, nga si Claudine, kinsa nagpadako og usa ka 19 anyos nga anak nga babaye, nga si Delphine. Silang duha nakabaton og mga pagpamatuod ug nabunyagan usab ug nakumpirmahan.
Si Michel ug si Claudine nagkahimamat sa simbahan, nakadesisyon nga sila angay sa usag usa, ug nagminyo. (Sila mao ang mga apohan ni Coco.) Sa dihang ang inahan ni Michel, nga si Marthé, mitambong og kasal, siya nagpabilin sa Angoulême, nailaila ang Simbahan, ug nagpamiyembro.
Wala madugay, si Delphine gitawag ngadto sa usa ka misyon sa Seattle, Washington. Samtang nagserbisyo siya, ang iyang mga ginikanan ug apohang babaye mibalik og puyo ngadto sa Guadeloupe. Pakahuman sa iyang misyon, si Delphine miadto aron sa pagbisita kanila, ug samtang didto sa Guadeloupe iyang nahimamat si Claude Gamiette, kinsa bag-o pa lamang nauli gikan sa Florida Jacksonville Mission. Siya nag-alagad isip usa ka counselor sa ama-ama ni Delphine diha sa presidency sa branch. Ang duha ka nauli nga mga misyonaryo nag-date ug nagminyo human sa mubong panahon. Si Claude ug si Delphine mao ang mga ginikanan ni Coco. Karon, 14 ka tuig na ang milabay ug may lima na ka mga anak, si Claude, kansang kaugalingong pamilya mga miyembro sa Simbahan sulod sa daghang mga katuigan, mao ang presidente sa Basse-Terre Guadeloupe District.
Mao nga uban nianang taas nga kasaysayan, si Coco usa ka upat ka henersyon nga Santos sa Ulahing mga Adlaw. “Ako nagtubo diha sa Simbahan,” siya nag-ingon. “Ako nakadungog mahitungod niini sa akong tibuok nga kinabuhi, mitambong sa Primary ug karon sa Young Women, ug nakadungog sa akong mga ginikanan ug sa ilang mga ginikanan ug sa ilang mga ginikanan nga naghatag sa ilang mga pagpamatuod. Ako sa kanunay nasayud nga ang ebanghelyo tinuod. Kon magbasa ako sa Mosiah mahitungod sa mga saad nga gihimo sa mga tumutuo sa dihang gibunyagan sila ni Alma, mao kana ang akong nakita ug nabati sa tibuok nakong kinabuhi.”
Si Coco nakahinumdum sa iyang lola sa tuhod nga nag-ingon nga ang usa ka pamilya dili lamang kutob usa ka inahan ug amahan ug sa ilang mga anak kondili lapas pa. “Siya nag-ingon nga ang pamilya mosangkad tabok ngadto sa mga henerasyon, gikan sa kahangturan ngadto sa kahangturan,” si Coco nag-ingon. “Mao kana ang akong nakita sa akong pamilya.”
Hinay-hinay, Matag Adlaw
Diha sa laing bahin sa isla, sa ulohang siyudad sa Basse-Terre, ang Simbahan nahimong duha ka henerasyon nga kabilin alang kang Luidgia Duflo, 13, ug sa iyang igsoon nga si Stella, 17, kinsa mipasakop sa simbahan duha ka tuig na ang milabay sa samang higayon ingon man usab ang ilang maguwang nga babaye, ilang manghud nga lalaki, ug ilang mga ginikanan. Sila nag-ingon nga ang ebanghelyo nagtudlo kanila sa pagtahud sa ilang inahan ug sa ilang amahan. Sila labing nalingaw sa family home evening, nga ilang pagahimoon diha sa ilang apartment sa pamilya, nga makita ibabaw sa gamayng tindahan sa ilang amahan. Siya namaligya og mga produkto sa panimalay, asukar, mga lamas, candy, ug pagkaon sa hayop. Usa sa ilang paboritong dapit sa pagpakig-istorya uban kaniya mao ang iyang opisina sa luyo sa tindahan, diin ang mga bungbong napuno sa mga hulagway sa nagkalain-laing mga templo sa Santos sa Ulahing mga Adlaw.
“Kini naghatag kaniya og oportunidad sa pagbuhat og gamay nga buhat sa misyonaryo kon ang mga tawo mosulod alang sa negosyo ug gusto masayud kon unsa kadtong tanan nga mga bilding,” pasabut ni Stella. “Apan ako naghunahuna nga kini nagpahinumdum usab kaniya matag adlaw sa iyang mahangturong mga saad ug mga tumong; kini mao gayud ang nahimo niana ngari kanamo. Kita kinahanglan nga andam sa pag-adto sa templo, ug kanunay siyang nagpahinumdom kanamo niana.”
Ang pamilyang Duflo nakakita og usa ka mahayag nga kaugmaon sa unahan. “Ang Simbahan nagpadayon sa pagtubo didto sa Guadeloupe, ug kini molambo,” si Stella nag-ingon. “Kinahanglan lamang nga kami mohimo sa among bahin, hinay-hinay, matag adlaw, mosalig sa Ginoo diha sa tanan nga mga butang ug mopakigbahin sa ebanghelyo sa tanang higayon kutob sa atong mahimo.”
Ang Seminary ug si Goliath
Si Eole Montredon, 15, motambong sa seminary kada buntag sa ting-klase, bisan og dili pa siya miyembro sa Simbahan. Diha sa daghan nga mga paagi,” siya nag-ingon, “daw namiyembro na ako sa akong tibuok nga kinabuhi tungod kay ako nagtubo sa palibut sa Simbahan, ug pamilyar na ako sa ebanghelyo.”
Siya nag-ingon nga ganahan siyang motambong sa seminary tungod kay “maayo kaayo alang kanamo nga mga batan-on nga magkaubang magtuon sa mga kasulatan, bisan og kami momata sa dili pa mosilang ang adlaw.” Ang seminary magsugod sa alas 6:00 sa buntag, mao nga siya momata og alas 5:00. “Ang pipila sa akong mga higala naghunahuna nga nabuang ko, apan sa dihang ako mipasabut kanila unsay among gibuhat, sila naghunahuna nga kini daw sakto. Gawas pa, akong mabati ang Espiritu Santo kon anaa ako didto. Kini usa ka maanindot nga pagbati nga akong pagahinumduman sa tibuok adlaw.”
Usa sa iyang paborito nga istorya sa Biblia mao ang sugilanon nila ni David ug Goliath. Siya miingon nga nakahatag kini kaniya og kadasig nga masayud nga ang Ginoo motabang sa gagmay nga mga tawo nga makabuntog sa dagkong mga problema, tungod kay siya nag-atubang og usa ka hagit nga usahay alang kaniya daw sama ka dako ni Goliath. Ang iyang mga ginikanan nagkabulag, ug bisan og ang iyang inahan usa ka aktibo nga miyembro kinsa gusto kaayo nga makita siya nga mahimong usa ka Santos sa Ulahing mga Adlaw, ang amahan ni Eole mi-insister nga maghulat lang siya. Ug mao nga, aron sa pagtahud sa iyang amahan, siya naghulat, mapainubsanong nagsunod sa ebanghelyo, ug nag-ampo nga sa umaabut ang iyang kasingkasing mausab.
Kon ako mohatag og usa ka mensahe ngadto sa mga kabatan-onan sa Simbahan,” si Eole nag-ingon, “kini mao ang pagtambong sa seminary kada adlaw sa tingklase ug sa Simbahan matag Dominggo, tungod kay kon magbuhat ka og dugang, makakita pa gyud ka og dugang kon unsa kini ka maayo ug unsa kini ka makahatag kanimo og kalig-on.” Bisan tuod og si Eole dili makatagamtam sa kabilin sa daghang mga henerasyon diha sa Simbahan—dili pa karon—siya nasayud nga siya makahimo sa pagbuhat karon aron sa pagtukod niana nga kabilin alang sa umaabut nga mga henerasyon. “Ako nasayud nga kinahanglan ko nga magsugod karon,” siya nag-ingon, “kon ako magpadayon nga matinud-anon, maayo nga mga butang ang mahitabo.”
Sayo sa Buntag nga Pagbag-o
Sa usa ka sayo sa buntag nga klase sa seminary sa Abymes, ang sama nga tinguha sa pagtukod og kalig-on sa usa ka higayon makita. Ang mga sakop sa klase naglumbaanay sa pagpangita sa mga pakisayran sa kasulatan. Sila makugihon kaayo nga moadto sa blackboard sa pagdrowing og mga hulagway. Sa matag higayon nga ang magtutudlo mangutana og usa ka pangutana, ang mga kamot moisa aron sa pagboluntaryo nga motubag.
“Ang Seminary nakatabang kanamo nga mas masayud sa Dios,” miingon si Travis Devarre, 14. “Kini usab nagtabang kanamo sa pagpangandam aron kami makahimo sa misyonaryo nga buhat karon ug mahimong andam alang sa usa ka full-time nga misyon sa dili madugay. Kamo nakat-on pinaagi sa pagtuon sa pulong sa Dios, ug maabut kamo sa eskwelahan nga nagmata na kaayo, nga ang inyong mga ulo puno sa maayong mga hunahuna. Kini makapabag-o kaninyo.”
Usa sa mga kahulugan sa makapabag-o mao ang “pagkahimong espirituhanon nga natawo pag-usab o pagkakabig.” Kini nagpasabut usab nga “pagpahiuli ngadto sa usa ka mas maayo, mas taas, o mas takus nga kahimtang.” Si Travis nag-ingon nga ang serbisyo sa priesthood nakapabag-o usab kaniya. “Mipanalangin kini kanako ug sa akong pamilya, tungod kay kini nagtugot kanako sa pagtabang niadtong anaa sa akong palibut, lakip na ang akong pamilya. Kana mipuno sa akong kasingkasing uban sa kalipay.”
“Kon kita adunay pagsalig diha sa Langitnong Amahan, kita mapanalanginan,” nag-ingon si Leslie Amoussouga, 15. “Kita nasayud nga Siya sa kanunay nag-andam og usa ka agianan alang kanato. Kon kita dili magduhaduha, kon kita adunay hugot nga pagtuo ug mosunod sa iyang mga sugo, Siya mohatag og kahayag ngadto sa atong mga kalag.” Sa laing pagkasulti, Siya motabang kanato sa pagpabag-o sa atong mga kaugalingon, gikan sa henerasyon ngadto sa henerasyon.
Mga gilitratohan ni Richard M. Romney
Ibabaw, gikan sa taas: Mga estudyante sa seminary sila si Luidgia, Travis, Eole, ug Leslie (atbang nga pahina) nalingaw nga magkaubang nagkat-on sa ebanghelyo. Si Coco (pikas pahina) nasayud nga ang ebanghelyo nagpalig-on sa iyang pamilya.