Mga Ideya sa Family Home Evening

Kining mga sugyot sa pagtudlo mahimong gamiton sa klasehanan ingon man usab sa panimalay. Mahimo ninyong ipahaum kini nga mga ideya sa inyong pamilya o klase.

“Dili Kini Sayon,” p. 16: Dapita ang mga miyembro sa pamilya sa pagsulat diha sa ginunting nga mga papel sa mga paagi ang Ginoo mitabang o mipanalangin kanila. Paghimo og garapon sa pagpasalamat, ug ibutang ang ginunting nga mga papel sa sulod niini. Awhaga ang mga miyembro sa pamilya sa pagpadayon og dugang ngadto sa garapon (o sa pagsulat mahitungod niini diha sa ilang mga journal) sa bisan unsang panahon nga sila makabaton og kasinatian diin ang Ginoo nagtabang kanila.

“Pagsunod isip usa ka Bag-ong Kinabig,” p. 22: Bisan kon kamo usa ka bag-o nga miyembro o dili, ang pagpalambo og pakighigala tali sa mga miyembro sa Simbahan mao ang importante. Isip usa ka pamilya, paghisgot og mga paagi nga kamo makapalambo og pakighigala ngadto sa mga miyembro sa inyong ward o branch. Ipasabut nga ang pagpalig-on niini nga pakigrelasayon makamugna og mahangturon nga mga pakighigala ug makatabang kanato sa pagduol ngadto ni Kristo pinaagi sa pag-alagad sa uban.

“Walay Usa Gayud nga Masayud,” p. 28: Unsa ang ipasabut sa mga tawo kon moingon sila walay usa gayud nga masayud? Paghisgut kon ngano nga kining pangatarungan sayop ug sa unsa nga paagi ang mga miyembro sa pamilya makapugong sa tintasyon. Paglista og pipila ka mga tintasyon, ug ipadula sa mga miyembro sa pamilya kon unsaon nila sa pagtubag kon kana nga tintasyon motunga. Basaha ang 1 Mga Taga-Corinto 10:13.

“Mga henerasyon,” p. 40: Ipakigbahin ang inyong mga istorya sa pagkakabig, o pagpakigbahin og mga istorya sa mga katigulangan kinsa nakakaplag sa ebanghelyo. Dapita ang mga miyembro sa pamilya nga mopakigbahin ngano nga ang ebanghelyo importante sa ilang mga kinabuhi.

“Usa kaPagdapit sa Adlaw sa Kalihokan,” p. H10, ug “Ako Mahimong usa ka Misyonaryo Karon,” p. H14: Human sa pagbasa niini nga mga istorya, paghunahuna og mga tawo nga inyong madapit sa miting sa Simbahan o kalihokan. Paglista og mga silingan, mga higala, ug mga miyembro sa pamilya. Bisan kon kamo naghunahuna nga ang usa ka tawo mahimong dili interesado, ilakip siya sa lista. Dili lang ninyo mahibaloan kon kinsa ang modawat sa inyong pagdapit. Sa dili pa ang miting o kalihokan, mainampoon nga mopili og pipila ka mga tawo diha sa inyong lista, ug dapita sila sa pagtambong uban kaninyo. Pagtanyag nga maglakaw uban kanila o pasakya sila kon mahimo. Kon pilion nila nga dili motambong, padayon sa inyong pakighigala uban kanila.