Paglampus isip usa ka Bag-ong Kinabig
Samtang kita motabang ngadto sa uban diha sa pakighigala, pag-apil diha sa serbisyo, ug pagpakabusog sa mga kasulatan, ang atong pagsalig mag-anam og kalig-on.
Ang kabuntagon sa ting-tugnaw nga ako unang mitambong sa Ang Simbahan ni Jesukristo sa mga Santos sa Ulahing mga Adlaw dili kaayo sa kasagaran nga mahayag ug matin-aw. Samtang ako nagpadulong sa balay tigumanan, ako walay ideya kon sa unsang paagi nga ang pagpasakop sa Simbahan mousab sa akong kinabuhi. Maayo na lang, adunay mga butang nga mabuhat sa mga kinabig sama kanako aron mahimong lig-on diha sa ebanghelyo. Kita kinahanglan nga mougmad og mga panaghigalaay, moserbisyo diha sa Simbahan, ug “magpakabusog sa mga pulong ni Kristo” (2 Nephi 32:3).
Pag-ugmad og Pakighigalaay
Ang tanan nga miyembro sa Simbahan, ilabi na ang bag-o nga mga kinabig, nagkinahanglan og mga higala nga motabang kanila sa pagpadayon. Ania ang pipila sa mga paagi nga ang pagpalambo sa mga panaghigalaay makahimo og kalainan.
Ang mga miyembro mahimong motabang sa mga kinabig. Sa wala pa ang akong bunyag, usa ka buotan nga sister milakaw gikan sa kinatumyan sa meetinghouse tungod kay gusto lamang niya nga makighimamat kanako. Natandog ko nga mibiya siya sa iyang nahimutangan aron tabangan ako nga mobati nga bililhon kaayo. Daghan usab ang mibuhat sa ingon. Samtang ang bag-ong mga kinabig makaamgo kon unsa sila ka mahal sa mga miyembro sa Simbahan, ang ilang mga kasingkasing mapuno sa gugma.
Ang mga magtutudlo diha sa mga klase sa Simbahan nagpakabana usab kanamo. Ang akong magtutudlo sa Gospel Essentials maoy usa sa tinubdan sa kadasig ngari kanako. Sa kasagaran gibati ko nga ingon og ang Manluluwas direktang nakigsulti ngari kanako pinaagi niini nga mga leksyon, nagbayaw kanako ug nag-awhag kanako sa pagpadayon sa unahan.
Ingon man usab, ang mga home ug visiting teacher nagbantay ug nagpanalangin sa mga miyembro sa Simbahan. Abi-abiha sila diha sa inyong mga panimalay, ug ipahayag ang pasalamat ngadto kanila ug ngadto sa Ginoo alang sa ilang pagserbisyo. Ingon sa gitudlo ni Elder David B. Haight (1906–2004) sa Korum sa Napulog Duha ka mga Apostoles, “Ang pagpasalamat … makapanalangin sa atong mga kasingkasing ug sa atong mga hunahuna ug sa atong mga kalag asa kita gustong magpadayon aron sa paglahutay ug sa pagbuhat sa mga butang nga gisugo nga atong buhaton.”1
Ang mga kinabig mapanalanginan kon sila, usab, motabang ngadto sa uban. Usa ka adlaw mipalit ko og usa ka greeting card nga adunay hulagway sa usa ka dako kaayo nga bola sa mata diha sa hapin niini. Sa sulod niini nag-ingon, “Salamat sa imong pagbantay kanako!” Ako mipadala niini ngadto sa usa ka sister diha sa ward kinsa mahigalaon kanako. Samtang ako mibuhat sa ingon, gibati ko ang usa ka init nga pagbati sa Kristohanong paghigugma alang kaniya.
Sa katapusan, kita kinahanglan nga mopalig-on sa atong mga relasyon uban sa Langitnong Amahan ug ni Jesukristo. Mahitabo kini samtang kita magserbisyo sa uban, magpahayag og pasalamat, ug mag-ampo. Ang Espiritu mopanghimatuod nga kita takus sa mahinungdanong sakripisyo nga gibuhat sa Manluluwas alang kanato.
Pagserbisyo diha sa Simbahan
Kasagaran sa pipila ka punto human gayud sa bunyag, ang bag-o nga mga miyembro hangyoon sa pagdawat og usa ka mas dakong tahas sa pagserbisyo diha sa ward o branch. Ang bishop o branch president mohatag og usa ka calling. Kini mahimong usa ka lisud nga panahon alang sa uban.
Sa dihang ako midawat sa unang calling isip—Relief Society secretary—naghunahuna ako, “Nganong gihatagan man ako og ingon ka mahinungdanon nga responsibilidad?” Si Presidente Henry B. Eyring, Unang Magtatambag sa Unang Kapangulohan, mipasabut kon ngano: “Adunay mga panahon nga kamo mobati nga gibug-atan pag-aayo. Usa sa mga paagi nga kamo atakihon mao ang pagbati nga kamo dili angay. … Apan kamo adunay katungod sa paggamit sa labaw pa sa inyong natural nga mga kapasidad, ug kamo wala mag-inusara sa pagbuhat.”2
Sa wala madugay human niana, ang presidente sa Relief Society mikomemtaryo nga ang mga sugyot nga akong gihimo diha sa miting sa presidency mipakita nga ako gidasig. Naglibog, ako mitubag, “Ako?” Siya buotang mipaniguro og usab kanako nga ako misunod ngadto sa Espiritu. Ang pag-ila sa kamot sa Dios nga naggiya sa buhat nga atong gihimo dili sayon sa sinugdanan, apan samtang kita nagsunod sa mga kasugoan ug makugihong nagbuhat, kita makaila nga Siya mopalambo niadtong kinsa Iyang gitawag.
Magbusog sa mga Pulong ni Kristo
Tingali ang pinakamaayong paagi sa pagdiskubre nga ang Ginoo nahigugma kanato ug mopaluyo kanato mao ang pagtuon sa mga kasulatan. Ang mga kasulatan nagtudlo nga ang Dios nagdapit sa “tanan sa pagduol ngadto kaniya ug sa pag-ambit sa iyang kaayo; ug siya wala maglimud kang bisan kinsa nga moduol ngadto kaniya” (2 Nephi 26:33).
Ang pipila sa bag-o nga mga miyembro tingali mahingangha sa kahibalo ug pagpamatuod sa uban. Apan hinumdumi, ang paagi sa Ginoo sa pagtudlo mao “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Matag usa kanato kinahanglan nga makat-on samtang kita nagpadayon. Bisan si Jesus “wala makadawat sa kahingpitan sa sinugdanan, apan nakaangkon og grasya ug dugang pa nga grasya, hangtud nga siya nakadawat sa kahingpitan; ug sa ingon siya gitawag og Anak sa Dios, tungod kay siya wala makadawat sa kahingpitan sa sinugdanan” (D&P 93:13–14).
Kana nga kahibalo mipalawon sa akong balaang pagtahud ug respeto alang Kaniya. Siya tinuod nga nasayud sa kasakit, tintasyon, kalisdanan, ug kagul-anan nga akong nasinati (tan-awa sa Alma 7:11). Mahimo akong moduol Kaniya uban sa hingpit nga pagsalig. Ang mga kasulatan nagtudlo nga ang gugma, pagsabut, ug kalooy sa Manluluwas alang kanato, asa man kita, hingpit ug walay kinutuban.
Samtang kita motabang ngadto sa uban diha sa pakighigala, moapil sa serbisyo, ug magbusog sa mga kasulatan, ang atong pagsalig mag-anam og kalig-on ug kita mamahimong matinud-anon nga mga Santos sa Ulahing mga Adlaw nga atong gitinguha nga maingon.
Mga paghulagway sa litrato pinaagi nila ni Matthew Reier, John Luke, ug Frank Helmrich