Mga Elder, Mosakay ba Mo?
Human sa taas nga adlaw sa pagpadagan sa akong bus didto sa Victoria, Australia, ako naghimo na sa akong katapusang pagbyahe sa gabii, paingon sa panimalay. Diha sa agianan akong nakita ang duha ka maayo og pamiste nga duha ka batan-ong mga lalaki nga naglakaw. Mihukom ako sa paghunong sa bus ug sa pagpangutana kanila kon mosakay ba sila.
Ako silang gipangutana kon ngano nga nagsul-ob sila og mga name tag, puti nga mga polo, ug mga kurbata. Ang usa kanila mipasabut nga sila mga misyonaryo sa Ang Simbahan ni Jesukristo sa mga Santos sa Ulahing mga Adlaw. Samtang ako nangutana kabahin sa ilang trabaho, akong gibati ang usa ka butang nga mipuno sa bus nga sa kaulahian akong naamgohan nga mao ang Balaang Espiritu. Sa diha nga ako silang gihangyo sa pagsulti pa og daghan mahitungod ni Jesukristo, dili nako mapugngan nga nahimong madasigon sa ilang mga tubag.
Dili lang swerte kay nagkalawom na ang kagabhion, mao nga akong gipakanaog ang mga misyonaryo sa Dandenong. Human niana, ako nagguol sa dihang akong namatngonan nga wala nako makuha ang ilang numero sa telepono. Sulod sa mga semana ako nag-ampo nga ako silang makita pag-usab. Samtang nagpadagan ako sa rota sa akong bus, ako silang gipangita. Milabay ang mga bulan, ug unya usa ka dili katuohan nga butang ang nahitabo sa akong adlaw nga natawhan, Agosto 19, 2002.
Samtang naniudto ako uban sa akong asawa, si Camelia, adunay mituktok sa pultahan. Sa diha nga gitubag niya kini, nakadungog ako og sinati nga mga tingog. Mga misyonaryo kini nga akong gikahimamat sa bus! Sama sila nga nakuratan gayud sa pagkakita kanako sama sa pagkakita ko kanila. Nag-tracting sila sa among kalye ug gidala paingon sa among balay. Ang akong mga pag-ampo natubag.
Sila Elder Jason Frandsen ug James Thieler misugod dayon sa pagtudlo kanamo. Ang Basahon ni Mormon ug si Propeta Joseph Smith mga bag-o alang kanamo, apan sayon ra namong nasabtan ang ebanghelyo tungod kay kami adunay kasinatian sa Kristyanismo. Ang mga misyonaryo mihangyo kanamo sa pag-ampo mahitungod niini ug mamalandong sa akong makat-unan. Sa ingon amo kining gibuhat, among gibati ang Espiritu, ang tinguha sa pagsimba, ug usa ka aghat sa pagpabunyag. Kami napanalanginan sukad niana.
Karon, pipila ka tuig na ang milabay, nag-drive gihapon ako og bus, ug sa gihapon mopasakay sa mga misyonaryo. Apan karon nagtabang ako kanila nga mohimo og misyonaryo nga buhat pinaagi sa pagpaila sa mga tawo ngadto kanila ug sa pagpakigbahin sa Basahon ni Mormon ug ubang mga materyal sa Simbahan ngadto sa akong mga pasahero.
Ang mga tawo sa akong bus dili mahimo nga dili makamatikod kon unsa ako ka malipayon. Kon sila mangutana og ngano, moingon lamang ako, “Ang Ginoo mibuhat niini kanako. Siya sad makapausab sa inyong kinabuhi.”