Walay Usa Gayud nga Masayud
Ako natawo ug nagdako sa Burley, Idaho, USA. Ang akong amahan adunay usa ka uma ug bakahan, mao nga ako migahin sa akong panahon sa pagtrabaho diha sa gawas sa balay. Ang akong pamilya nahimong mga miyembro sa Simbahan sulod sa daghan nga mga henerasyon, ug ako nagtubo sa usa ka matinud-anon nga panimalay. Apan samtang hayskul pa ko, ang akong pagpamatuod nasulayan pinaagi sa usa ka oportunidad nga akong gipangita.
Ako adunay nakaila nga usa ka tawo sa high school pa kami nga usa ka exchange student. Ako naghunahuna nga daw usa kini ka makapainteres nga kasinatian, mao nga nagsiksik ko kon unsaon nga mahimong usa ka exchange student, nakit-an ang pamaagi, ug nangaplay. Ako nadawat. Ako 16 anyos pa lang niadtong higayona. Ako nakaeskwela og usa ka tuig sa pinulongan nga German, mao nga ako nagdahum, ingon man usab ang akong adviser, nga ako mapadala ngadto sa Germany. Kining piho nga exchange program mokuha sa tanan nga impormasyon kalabut kanimo, itukma kini sa pamilya nga andam nga mahimong kapuy-an, dayon ipadala ka ngadto sa usa ka nasud.
Sa dihang ako nadawat, ako gipadala sa Brazil ug ako miuyon sa buluhaton. Ako mipuyo uban sa maanindot nga pamilya sa São Paulo. Sila adunay unom ka mga lalaki ug usa ka babaye, sama sa akong pamilya sa balay. Maayo na lang, Iningles ang ilang sinultihan. Nahimo kadto nga usa ka maanindot nga kasinatian, bisan tuod og sa ting-init lamang ako didto.
Sa akong panahon didto sa Brazil, ako nakahigala og pipila kinsa anaa sa ang-ang sa kinabuhi diin sila nag-eksperimento sa mga butang. Sila misugod sa pagdapit kanako nga mokuyog kanila aron maglingaw-lingaw uban sa pipila ka mga babaye nga ilang nakaila.
Ako anaa sa liboan ka milya ang gilay-on gikan sa amoa diha sa usa ka nasud diin walay usa nga nakaila kanako gawas lamang sa akong gipuy-an nga pamilya. Ang mga higala kinsa midapit kanako nga mokuyog kanila migamit sa mga pulong “Walay usa gayud nga masayud.” Sa daghang mga paagi, tinuod kana. Sa pagkatinuod, ang akong pamilya sa Amerika dili gayud masayud. Usa ako ka batan-on, layo sa panimalay, nga gidapit sa pagbuhat unsay sayop, ug walay usa gayud nga masayud.
Apan ako nasayud nga ako masayud. Ako nasayud nga ang Ginoo masayud, mao nga ako miingon og dili ngadto sa ilang mga pagdapit ug mipadayon og ingon nga dili. Sila balik-balik nga midapit, nakasiguro nga sila makadala kanako. Kadto dili usa ka higayon nga hagit, apan sa matag higayon ako mobalibad, ako mitubo nga mas determinado nga mobarug sa akong gibarugan.
Ang Pangatarungan ni Satanas
“Walay usa gayud nga masayud” mao ang pangatarungan nga gigamit ni Satanas batok kanato diha sa atong mga kinabuhi. Bakak kini. Kana ang nadiskobrehan sa akong kaugalingon sa akong pag-adto sa Brazil panahon sa ting-init. Ang pagtuo ngadto sa bakak ni Satanas mao, sa tinuod, unsa ka daghan ang mga tawo nga nahilambigit sa ingon nga mga butang sama sa pornograpiya sa Internet. Sila naghunahuna nga sila makabuhat niini diha sa paagi nga walay usa gayud nga masayud. Apan sa matag kaso, sila nasayud ug ang Dios nasayud.
Palihug ayaw gayud tuhoi kana nga bakak diha sa bisan asa nga aspeto sa inyong kinabuhi. Ako mapasalamaton nga akong nakita ang sayop nga pangatarungan kon unsa kadto ug wala magpadala. Ang Espiritu mitabang kanako sa pagpabati sa kamatuoran. Ako usab misalig diha sa kamatuoran nga tungod sa unsay akong nakat-unan sa akong pamilya, ako nasayud unsay sakto. Ang akong mga ginikanan mitudlo kanako sa kamatuoran. Akong nakat-unan ang kamatuoran diha sa Primary, sa Sunday School, sa Aaronic Priesthood, ug sa seminary. Kana nga pundasyon sa ebanghelyo anaa diha sa akong panimalay, diha sa pamaagi sa pagpadako sa akong mga ginikanan, ug diha sa mga leksyon sa Simbahan.
Ang akong kasinatian sa tintasyon isip usa ka exchange student naggagikan sa gawas, gikan sa mapugsanon nga mga higala. Kadto usa ka hagit sa gawas ngadto sa mga butang nga akong gituohan, ug nakahimo ako sa pagbarug nga lig-on. Apan samtang dugang nga mga kasinatian miabut kanako, akong nakat-unan nga kita kinahanglan nga pagasulayan sa tanang dapit. Ang pipila sa labing lisud nga mga hagit mao ang naa sa sulod, diin ang mga tintasyon nga kinahanglang pakigbatukan anaa diha sa kinahiladman sa atong kaugalingong mga kasingkasing ug mga hunahuna.
Sulayi ang Ginoo
Usa niini nga mga hagit miabut sa dihang ako mipili sa pagbayad og matinuoron nga ikapulo dihang didto ako layo sa akong pamilya. Matag tuig ang akong amahan kanunayng modala kanamo ngadto sa tithing settlement. Kami iyang tabangan sa pagkwenta sa among ikapulo, ug bayaran namo kini. Sa tanang panahon sa akong pagdako, ako napalambo niini nga kinaiya sa pagbayad og ikapulo. Kon ako inyo pa lang gipangutana nianang higayona, ako mosulti unta kaninyo nga ako adunay pagpamatuod kalabut sa tithing.
Sa dihang nahuman na ako sa hayskul, nadawat ako sa Harvard University, mao nga mitrabaho ko nianang pagkasummer ug nakatigum og kwarta aron ibayad sa mga galastuhan nga dili apil sa akong scholarship. Pagkahuman sa unang semester, walay pulos nakong nagasto ang tanan nakong kwarta nga akong natigum alang sa tibuok tuig nga pag-eskwela.
Sa pagsugod sa ikaduhang semester, nakakita ko og trabaho. Dili kaayo ako makatrabaho tungod kay usa ako ka full-time nga estudyante, apan mitrabaho ako og pipila ka oras sa usa ka semana ug nadawat nako ang akong unang sweldo. Siyempre, dili kaayo kadto dako, apan sakto lang kini kanako nga makapadayon hangtud sa sunod nga sweldo.
Dayon ang pangutana miabut sa akong hunahuna, “Unsaon naman lang ang ikapulo?” Kinaiya na nako ang pagbayad sa akong ikapulo apan sa kanunay adunay igong kwarta nga ibayad sa ikapulo. Ania ako miatubang sa hagit: mobayad ba kaha ako sa akong ikapulo nga wala man gani ko masayud kon ako may igo pa bang kwarta nga makaabut pa hangtud sa sunod nga duha ka semana?
Samtang ako naghunahuna mahitungod niini, akong nahinumduman ang kasulatan sa Malaquias 3:10, diin ang Ginoo nagsaad, “Sulayi ninyo ako karon, nagaingon ang Ginoo sa mga panon, kon dili ba buksan ko kaninyo ang mga tamboanan sa langit, ug bu-boan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini.”
Akong naamgohan nga mao kadto ang akong tubag. Itugyan ko na lang kini ngadto sa Ginoo. Mibayad ako sa akong ikapulo, walay kasiguroan kon aduna pa ba akoy igong kwarta nga makalahutay ko hangtud sa sunod sweldo. Ug ang usa ka milagro ang nahitabo. Nakalahutay gyud ko nianang duha ka semana.
Kini miabut kanako sa gamhanan kaayo nga paagi nga ang Ginoo mituman sa Iyang pulong. Ang Ginoo miabut pinaagi sa paagi nga Iyang gisaad. Sama sa giingon sa kasulatan, nga kon kita mobayad sa atong ikapulo, Siya mopanalangin kanato. Kanang susama nga milagro nahitabo sa matag duha ka semana sa tibuok semester. Sa una, naghunahuna ako nga ako adunay usa ka pagpamatuod kalabut sa ikapulo, apan karon, tungod sa akong saktong desisyon, ako adunay usa ka gamhanang pagpamatuod sa ikapulo. Ang Ginoo kanunay nga mobuhat kon unsay Iyang gisulti, mao nga ang akong pagpamatuod mitubo og hinay-hinay.
Tuhoi ang Ginoo
Ako moawhag kaninyo, samtang kamo anaa sa katuigan sa inyong kabatan-on ug samtang kamo nagpalambo sa inyong kaugalingong pagpamatuod, nga kamo kinahanglang motuo sa unsay gisulti sa Ginoo. Kon ang Ginoo mosaad og usa ka butang, makasalig kita niana, ingon sa gitudlo sa kasulatan kanato, ang Dios dili mamakak. Ang Ginoo motuman sa Iyang pulong. Kon ang Ginoo mohimo og usa ka saad pinaagi sa Iyang propeta o direkta pinaagi sa Iyang mga kasulatan, kita makasalig niini.
Diha sa mga kasulatan kita giawhag nga moduol ngadto sa Ginoo. “Busa, pangayo, ug kamo makadawat; tuktok, ug kini pagabuksan nganha kaninyo; kay siya nga nangayo, makadawat; ug ngadto kaniya nga motuktok, kini pagabuksan” (3 Nephi 27:29).
Ako nakakat-on pinaagi niini ug sa uban nga mga kasinatian nga kining kasulatan tinuod. Ang Langitnong Amahan kanunayng anaa alang kanato. Bisan ang atong hagit sa gawas man o sa sulod, ang Iyang plano, ang Iyang mga kasulatan, ang Iyang gugma, ug ang Iyang gasa sa Espiritu Santo magauban kanato.
Akong nakat-unan nga kita pagasulayan sa tanang mga dapit. Ang pipila sa labing lisud nga mga hagit mao ang naa sa sulod, diha sa kinahiladman sa atong kaugalingong mga kasingkasing ug mga hunahuna.
Mibayad ako sa akong ikapulo, walay kasiguroan kon aduna pa ba akoy igong kwarta nga makalahutay ko hangtud sa sunod sweldo. Ug ang usa ka milagro ang nahitabo. Nakalahutay gyud ko nianang duha ka semana.
Mga paghulagway ni Dan Burr