Ang Akong Tinuod nga Katuyoan isip Misyonaryo
Nakaserbisyo ako isip full-time nga misyonaryo sa Argentina sulod lamang sa duha ka bulan sa diha nga miabut ang balita nga ang akong manghud, ug bugtong, igsoon nga babaye gipamay-an. Si Rebecca ug ako suod kaayo nga nagtubo ug kanunayng nagdamgo sa kasal sa usag usa, apan karon dili ako makatambong sa iyaha.
Ang akong mga ginikanan mipadala kanako sa mga plano, mga litrato, mga menu, ug mga iskedyul, apan sa gihapon gibati ko nga nabiyaan, nag-inusara, ug layo kaayo. Ang misyonaryo nga buhat lisud ug hinay. Akong nakita ang akong kaugalingon nga naghunahuna kon unsay akong gibuhat sa layo kaayo sa panimalay, ug ako naglibog mahitungod sa unsay angay nakong himoon.
Bisan pa niana, ako nasayud nga ang Ginoo mitawag kanako aron moserbisyo, ug ako adunay lig-on nga pagpamatuod sa pag-ampo ug gahum sa priesthood. Ako nakadawat og panalangin sa kahupayan nga nagsaad kanako nga anaa ako diin ako gikinahanglan.
Isip mga misyonaryo sa kasagaran kami makigbahin sa pagdasig nga makita sa Moroni 10:4–5. Hugot akong mituo sa saad niadto nga mga bersikulo—nga kon ako mangutana sa Dios, akong Mahangturon nga Amahan, diha sa pangalan ni Jesukristo, ako masayud sa kamatuoran sa tanang mga butang pinaagi sa gahum sa Espiritu Santo. Ako matinguhaong miampo aron masayud kon nakahimo ba ako sa husto nga butang pinaagi sa pag-adto sa Argentina imbis nga magpabilin sa panimalay, diin makatabang sa akong igsoon nga babaye nga moandam sa iyang kasal. Samtang nagkaduol ang iyang kasal, ang akong mga pag-ampo nagkadugang nga mabati sa kasingkasing. Akong gibati ang mapasaligon nga impluwensya sa Espiritu, apan sa gihapon naglaum ako alang sa usa ka tubag.
Duha ka semana sa wala pa ang kasal, ang akong kauban ug ako naglakaw sa pagpauli gikan sa sabut sa pagpangaon og paniudto uban sa mga miyembro sa branch diin among gialagaran. Ang branch anaa sa usa ka gamay nga lungsod sa sentral Argentina, diin ang mga tawo sa naandan motagpilaw sa udto. Nianang orasa sa adlaw sa kasagaran walay tawo nga magtikawtikaw.
Samtang kami nanglakaw, bisan pa niana, usa ka batan-ong lalaki mitawag kanamo. Tungod kay daghang batan-ong mga lalaki ang nangumidya kanamo, amo siya nga gibaliwala ug mipadayon sa paglakaw. Sa diha nga mitawag siya pag-usab, gibati nako ang aghat sa pagtubag kaniya.
Ang iyang ngalan si Horacio, ug gusto siya nga masayud kon kami mga higala ba sa duha ka batan-ong mga babaye kinsa nagbasa sa ang Basahon ni Mormon uban sa iyang ig-agaw. Siya misulti kanamo nga siya mibati og usa ka talagsaong butang samtang ang mga sister, kinsa nag-alagad usab sa among branch, nagbasa. Gusto siyang masayud kon makaadto ba siya sa atong simbahan.
Samtang nagtudlo kami ni Horacio uban sa panabang sa lokal nga mga miyembro, paspas nga mitubo ang iyang paghigugma sa ebanghelyo. Iyang giusab ang iyang kinabuhi samtang nagtubo siya sa ebanghelyo, apan ang iyang pamilya mipahayag og mga pagsupak ug ang iyang mga higala misalikway kaniya. Bisan pa niana, si Horacio mibati sa gugma sa Ginoo ug mitinguha sa pagsunod Kaniya. Nakabaton ako og pipila ka labing espisyal nga mga kasinatian sa akong misyon sa pagtudlo ni Horacio.
Samtang ang akong pamilya naglingkod sa Templo sa Oakland California nagtan-aw sa akong igsoong babaye nga mohuman sa usa sa mga ordinansa nga makatabang sa pag-andam kaniya alang sa celestial nga gingharian, naglingkod ako sa gamay nga chapel sa General Pico, Argentina, naghulat ni Horacio nga mohuman sa usa ka interbyu agig pangandam sa pagdawat sa iyang unang makaluwas nga ordinansa—bunyag. Ang akong igsoong babaye nakahimo sa pag-andam alang sa iyang mga ordinansa nga wala ang akong panabang, apan si Horacio dili makahimo sa pagbuhat sa ingon. Iyang gikinahanglan ang akong kauban ug ako sa pagtudlo kaniya sa ebanghelyo, ug ako nagkinahanglan kaniya aron pagpahinumdom kanako sa akong tinuod nga katuyoan isip usa ka misyonaryo—motabang sa pagdala og mga kalag ngadto ni Kristo.
Samtang nangandam ako pagbiya sa Argentina sa paghuman sa akong misyon, si Horacio nangandam aron sa pagserbisyo sa iyang kaugalingong misyon. Pinaagi kaniya, ang Langitnong Amahan mitubag sa akong mga pag-ampo ug dayon mipadala ni Horacio aron sa pagtubag sa mga pag-ampo sa uban.