Agig Paghandum: Dugang sa Liahona
Elder Joseph B. Wirthlin Mapasaligon sa Gingharian
Hunyo 11, 1917–Disyembre 1, 2008
Sa usa ka halandumon nga Gabii sa Pasko niadtong 1937, si Elder Joseph B. Wirthlin, nianang higayona usa ka full-time nga misyonaryo, ug ang iyang kauban naglakaw gikan sa Salzburg, Austria ngadto sa usa ka balangay sa Oberndorf, nga nahimutang sa Bavarian Alps. Samtang nagbisita sa balangay nga nailhan isip inspirasyon sa himno nga “Mahilum nga Gabii,”1 mihunong sila sa usa ka gamay nga simbahan aron sa pagpaminaw sa musika sa Pasko nga gikanta sa usa ka choir.
“Ang bugnaw, linaw nga gabii sa tingtugnaw milukop kanamo samtang nagsugod kami sa among pagpamapauli,” si Elder Wirthlin mihinumdom. “Naglakaw kami ubos sa daghang mga bitoon ug tadlas sa walay timik nga humok nga bag-ong nahulog nga mga snow.”2
Samtang naglakaw sila, ang batan-on nga mga misyonaryo nakig-ambitay sa ilang mga pangandoy, mga damgo, ug mga tumong alang sa umaabut. Nianang langitnon nga kahimtang, si Elder Wirthlin mibag-o sa iyang pasalig nga moserbisyo sa Ginoo: “Ako nakahukom nga akong palamboon ang bisan unsa nga mga calling nga akong madawat sa gingharian sa Ginoo.”3
Si Elder Wirthlin mituman niana nga pasalig sa tibuok niyang mortal nga kinabuhi, nga natapos niadtong Disyembre 1, 2008, sa dihang malinawon siyang namatay sa edad nga 91 tungod sa katigulangon.
Sa iyang pagserbisyo isip usa ka bishop, magtatambag sa kapangulohan sa stake, magtatambag sa kinatibuk-ang kapangulohan sa Sunday School, Assistant sa Napulog Duha, ug sakop sa Unang Korum sa Seventy, siya mipahayag, “Ganahan kaayo ko sa matag katungdanan nga akong nadawat sukad diha sa gingharian.” Sa dihang gipaluyohan isip usa ka sakop sa Korum sa Napulog Duha ka mga Apostoles pagka Oktubre 4, 1986, siya mipasabut, “Ug niana nga pagserbisyo, ang matag adlaw daw sama sa Dominggo, tungod kay anaa kadto sa pagserbisyo sa Ginoo.”4
Hugot nga Pagtuo ug Football
Si Joseph Bitner Wirthlin natawo sa Siyudad sa Salt Lake, Utah, pagka Hunyo 11, 1917, ang kinamagulangan sa lima ka mga anak nga natawo ngadto nila ni Joseph L. Wirthlin, kinsa miserbisyo isip Presiding Bishop, ug ni Madeline Bitner Wirthlin. Ang amahan ni Joseph misuporta sa pamilya isip pangulo sa Wirthlin’s Inc., usa ka negosyo nga nagbaligya og dinaghan o tinagsa nga pagkaon, samtang ang iyang inahan miawhag sa ilang mga anak sa nagkalainlaing mga kalingawan, lakip na ang musika ug mga paugnat sa kusog. Si Joseph ug si Madeline mitudlo sa ilang mga anak og pagpaubos, pagkamatinuoron, pagkakugi, pagserbisyo, pagkamanggiloy-on, ug hugot nga pagtuo.
Ang batan-ong Joseph adunay daghang mga talento apan sa katapusan giganahan sa paugnat sa kusog, nakadawat og mga pasidungog sa high school football, basketball, ug track. Human og duwa isip quarterback sa East High School, mipadayon siya og duwa isip running back sulod sa tulo ka tuig sa University of Utah.5
Diha sa pulpito, si Elder Wirthlin ganahan nga mopakigbahin og mga leksyon nga iyang nakat-unan isip usa ka magduduwa sa football. Usa ka importante nga leksyon miabut sa kinailadman sa usa ka nagpatong-patong nga 10 ka mga magduduwa atol sa conference championship nga duwa. Human sa pagpangahas nga makapuntos sa unsay madaugan unta nga touchdown, si Joseph gihasmagan dihang duol na lang kaayo sa goal line.
“Nianang higayona natintal ko sa paglabay sa bola ngadto sa unahan. … mahimo unta ko nga usa ka bayani,” siya mihinumdom. Apan nianang higayona iyang nahinumduman ang mga pulong sa iyang inahan: “Joseph,” siya kanunayng moingon ngadto kaniya, “buhata kon unsa ang matarung, bisan unsa pa man ang sangputanan.”
Si Joseph gusto nga mamahimong usa ka bayani sa mga mata sa iyang inahan labaw pa kay sa mga mata sa iyang mga kauban sa team. Mao nga, siya miingon, “Akong gibiyaan ang bola kon asa kini nahimutang—duha ka pulgada gikan sa goal line.”6
Human sa katapusan sa 1936 football season, ang amahan ni Joseph nakigsulti kaniya mahitungod sa pagserbisyo sa misyon. Ang politikanhong mga kalamboan didto sa Uropa paingon na sa gubat, ug kon si Joseph dili mobiya dayon, mahimong mawala kaniya ang kahigayonan sa pagserbisyo.
“Gusto nakong kab-uton ang akong pangandoy nga mopadayon sa pagduwa og football ug mogradwar sa unibersidad,” si Elder Wirthlin miingon. “Kon akong dawaton ang tawag sa misyon, kinahanglan nakong ihunong ang tanan. Niadtong panahona ang tawag sa misyon 30 ka bulan ang gidugayon, ug nasayud ako nga kon akong dawaton, adunay dakong kahigayunan nga dili na gayud ako makaduwa pag-usab og football —tingali basin dili na ako makagradwar.”7
Apan si Joseph nangandoy usab nga mamahimong usa ka misyonaryo, ug siya nasayud kon unsa ang angay niyang buhaton. Pipila ka mga bulan ang milabay padulong na siya sa Uropa, diin siya moserbisyo sa German-Austrian ug sa Swiss-Austrian nga mga Misyon gikan sa 1937 hangtud 1939.
Wala na gayud siya makaduwa pag-usab og football, apan migradwar siya sa unibersidad, nag-major sa business administration. “Bisan pa man, wala gayud ako nagmahay nga miserbisyo og misyon ug mipasalig sa akong kaugalingon sa pagserbisyo sa Ginoo,” siya miingon. “Sa pagbuhat sa ingon, ang akong kinabuhi napuno sa makadasig nga kalihokan, espirituhanong mga kasinatian, ug hingpit nga kalipay nga dili matukib sa panabut.”8
“Usa ka Perpekto nga Kaminyoon”
Usa sa mga resolusyon nga gihimo ni Elder Wirthlin nianang gabhiona sa Pasko didto sa Oberndorf mao nga siya makigminyo og usa ka babaye nga lig-on sa espirituhanong paagi kinsa nagsunod sa ebanghelyo. Iyang gihulagway ang iyang pisikal nga mga kinaiya ngadto sa iyang kauban sa misyon: lima ka pye ug lima ka pulgada (1.6 m), blonde og buhok, ug asul ang mga mata. Duha ka tuig ug tunga human sa iyang misyon, iyang nahimamat si Elisa Young Rogers. Siya hingpit nga mihaum sa iyang gihulagway.
“Akong nahinumduman sa unang higayon nga ako siyang nahimamat,” si Elder Wirthlin miingon atol sa usa ka pakigpulong sa komperensya pagka 2006, duha ka bulan human siya mamatay. “Isip pabor sa usa ka higala, miadto ako sa ilang balay aron hapiton ang iyang igsoong babaye, nga si Frances. Si Elisa miabli sa pultahan, ug alang kanako, kadto usa ka gugma sa unang pagkakita.
“Nagtuo ko nga aduna usab siyay pagbati, kay ang una gayud nga pulong nga mahinumduman nako nga iyang gisulti mao, ‘Nakaila ko kon si kinsa ka.’”
Si Elder Wirthlin nangomedya mahitungod nianang sayop nga grammar tungod kay nag-major siya og English. Apan, siya miingon, “Hangtod karon ako gihapong gihandom ang lima ka mga pulong isip pipila sa labing matahum sa pinulongan sa tawo.”9
Naminyo sila didto sa Templo sa Salt Lake pagka Mayo 26, 1941, ug sulod sa 65 ka tuig nag-ambitay sa unsay gitawag ni Elder Wirthlin nga “usa ka hingpit nga kaminyoon.”10 Sila milig-on, midasig, ug mipaluyo sa usag usa, ug sila nagtinambagay kon maghimo og mga desisyon. Si Elder Wirthlin dili gayud mobiya sa balay nga dili mohalok og panamilit ni Elisa, ug kanunay siyang motawag matag adlaw aron pagsusi kaniya.11
Ang amahan ni Elder Wirthlin natawag ngadto sa Presiding Bishopric pagka 1938, mao nga si Elder Wirthlin ang mipuli sa negosyo sa pamilya nga pagkaon sa dihang nahibalik na siya gikan sa iyang misyon. Sa wala madugay, samtang siya ug si Elisa nagpadako sa ilang mga anak, siya migahin og taas nga oras sa pagtubag sa mga panginahanglan sa trabaho ug sa mga responsibilidad sa Simbahan. Si Elisa ug ang ilang pito ka mga anak nga babaye ug usa ka anak nga lalaki, hinoon, nagpabilin nga garbo ug hingpit nga kalipay ni Elder Wirthlin. Sa iyang pagkamatay, siya adunay 59 ka mga apo ug hapit 100 ka mga apo sa tuhod.
Paghigugma sa Uban
Si Elder Wirthlin, kinsa gitawag ni Presidente Thomas S. Monson nga “usa ka tawo nga adunay labihan ka tiunay nga kabuotan,”12 gihigugma sa tanan kinsa nakaila kaniya. Sulod sa 33 ka tuig samtang siya miserbisyo isip usa ka General Authority, lakip sa 22 ka tuig isip usa ka Apostol, kana nga pagkabuotan napakita mismo samtang siya nagpaambit sa iyang pagpamatuod—diha sa pulong ug sa buhat—kabahin sa Manluluwas ug sa Iyang gipahiuli nga ebanghelyo.
Uban sa pagpaubos ug kasagaran uban sa pasiaw, si Elder Wirthlin miawhag sa mga Santos sa Ulahing mga Adlaw sa pagpahimulos sa mortalidad pinaagi sa pagsunod sa ehemplo sa Manluluwas. Aron sa pagbuhat niana, siya mitudlo, sa pagtumong og usa, pag-ugmad og kaayo, ug paghigugma sa uban.
“Ang labing gimahal ug sagrado nga mga higayon sa atong mga kinabuhi mao kadtong puno sa espiritu sa gugma,” siya mitudlo. “Kon mas dako ang sukod sa atong gugma, mas dako ang atong kalipay. Sa katapusan, ang kalamboan sa mao nga gugma mao ang tinuod nga sukod sa malampuson nga kinabuhi.” Aron tinuoray nga makakat-on kon unsaon sa paghigugma, siya midugang, kinahanglan lamang natong panaminan ang kinabuhi sa Manluluwas.13
“Kitang tanan okupado,” si Elder Wirthlin miingon sa laing higayon. “Sayon pagpangita og mga pasangil nga dili makatabang sa uban, apan akong nahunahunaan nga kini walay kahulugan ngadto sa atong Langitnong Amahan sama sa usa ka estudyante sa elementarya nga mitunol og mubo nga sulat ngadto sa iyang maestra nga nananghid nga dili mosulod sa klase gikan sa Marso 30 hangtud sa 34.”14
Si Elder Wirthlin miawhag usab sa mga miyembro sa Simbahan nga “magpuyo diha sa pasalamat matag adlaw,” bisan pa man sa kalisdanan.15 “Kon atong hunahunaon ang mga panalangin nga anaa kanato, atong makalimtan ang uban natong mga kabalaka,” siya mitudlo.16
Usa ka Panamilit nga Pagpamatuod
“Tingali adunay pipila nga naghunahuna nga ang mga Kinatibuk-ang Kadagkoan panagsa ra makasinati og kasakit, pag-antus, o kaguol. Kon unta kana tinuod lamang,” si Elder Wirthlin miingon atol sa iyang katapusan nga pakigpulong sa kinatibuk-ang komperensya. “Ang Ginoo diha sa Iyang kaalam dili mosagang ni bisan kinsa gikan sa kasubo o kaguol.”17
Ang “labing dako nga kasub-anan” ni Elder Wirthlin miabut dihang namatay ang iyang minahal nga si Elisa. Atol sa masulub-on nga mga oras nga misunod, siya mikuha og kalig-on gikan sa “makapahupay nga mga doktrina kabahin sa kinabuhing dayon” ug gikan sa iyang pagpamatuod nga ang mangitngit nga Biyernes sa Paglansang sa Manluluwas gisundan og mahayag nga Dominggo sa Iyang Pagkabanhaw.18
Tungod kay si Elder Wirthlin adunay usa ka lig-on nga pagpamatuod sa maulaong sakripisyo sa Manluluwas, siya nasayud nga ang kamatayon dili mao ang katapusan sa pagpakabuhi ug nga ang usa ka panagtigum naghulat sa mga matinud-anon kinsa mihimo og mga saad diha sa balaang mga templo.
“Kitang tanan mobangon gikan sa lubnganan,” siya mipamatuod pagka Oktubre 2006. “Nianang adlawa ang akong amahan mogakos sa akong inahan. Nianang adlawa sa makausa pa akong magakos sa akong mga bukton ang akong minahal nga si Elisa.”19
Ug nianang adlawa, ang usa ka pasalig nga gihimo niadtong gabii sa mabugnaw nga tingtugnaw dugayng panahon na ang milabay mao ang nakahimo og kalainan sa tanan.
Gilitratohan ni Craig Dimond; border pinaagi ni Pat Gerber
Mga litrato pinaagi sa maayong kabubut-on sa pamilyang Wirthlin, gawas kon gipahibalo; wala: litrato sa football pinaagi ni Christina Smith; tuo: litrato ni Sister ug Elder Wirthlin pinaagi ni Michael Lewis, BYU–Idaho, dili mahimong pakopyahan; painting pinaagi ni Cloy Kent
Sulod sa tulo ka tuig si Joseph B. Wirthlin (numero 4) miduwa isip running back sa University of Utah football team sa wala pa mohunong sa football ug mihunong sa pag-eskwela aron mamahimong usa ka misyonaryo (ubos) pagka 1937. Tuo: Si Joseph B. ug si Elisa Young Rogers Wirthlin sa adlaw sa ilang kasal, Mayo 26, 1941.
Ibabaw: Mga kaliwat sa pamilyang Wirthlin pagka Hunyo 1999. Wala: Si Elder ug si Sister Wirthlin mitimbaya sa mga miyembro sa Simbahan human sa debosyonal sa Education Week didto sa Ricks College (karon Brigham Young University–Idaho) pagka 1998. Ubos: Usa ka 1999 nga painting nila ni Elder ug Sister Wirthlin.