Inom og usa ka Tasa
Dili pa lang dugay human kami mipasakop sa Simbahan, ang akong bana ug ako nagbakasyon didto sa Bermuda. Usa ka adlaw samtang naa didto ako miapil og usa ka tunga-tunga sa hapon nga kalihokan nga gihimo sa among hotel. Samtang nagtan-aw ako sa lamiang mga pastri, akong nasimhutan ang baho sa tsa. Ako kining nakita nga madanihon nga sa akong hunahuna daw nakadungog ako og tingog nga nag-ingon, “Inom og usa ka tasa.”
Matinud-anon ako nga nagsunod sa Pulong sa Kaalam sukad sa akong pagbunyag. Sa akong hunahuna, miingon ako, “Dili, dili ako.”
“O, sige na,” usa ka makahuhupay nga tingog nga daw nag-ingon agig tubag. “Wala kay nailhan nga bisan kinsa dinhi, ug layo ka sa panimalay.”
Uban sa labaw pa sa hugot nga pagtuo, sa makausa pa mitubag ako sa akong hunahuna, “Dili, dili ako!”
Sa gihapon kanang madanihong pangatarungan nga tingog miabot: “Walay usa gayud nga masayud.”
Hugot akong mitubag, “Ako masayud!”
Nianang higayona nagbarug ako tupad sa usa ka waiter kinsa nagbubo og tsa. Sa matinuorong paagi akong gilabyan. Samtang nangita ako og lamesa, nakuratan ako sa pagkadungog og usa ka tawo nga nagtawag sa akong ngalan. Sa akong katingala akong nakita ang nagpahiyum nga dagway sa kanhi boss kinsa wala nako igkita sulod sa daghang mga tuig. Siya miduol kanako, ug samtang nagpaingon kami paingon sa usa ka lamesa siya miingon, “Ako nakadungog nga ikaw mipasakop sa Simbahan sa Mormon. Sultihi ako kabahin niini.”
Malipayon ako sa pagpahigayon, sa pagpakigbahin uban kaniya sa pipila ka mga baruganan sa ebanghelyo, ang akong kalipay isip usa ka miyembro sa Ang Simbahan ni Jesukristo sa mga Santos sa Ulahing mga Adlaw, ug sa akong pagpamatuod. Ang akong kanhi boss misulti kanako nga nagsiksik siya sa iyang apelyido ug siya nakatala na og daghang mga henerasyon sa family history. Matinud-anon ang iyang pagkamaikagon sa unsay akong gikinahanglang ipakigbahin kabahin sa Simbahan, ug akong gibati ang hilabihan nga pagbubo sa Espiritu samtang kami nagsultihanay.
Panahon sa among pagbisita usa ka hunahuna ang misulod sa akong hunahuna: “Makahimo ba ikaw niining panagsultihanay kon imong gibutang pa ang usa ka tasa sa tsa sa imong bandiha?” Ako nasayud sa tubag. Kon ako misunod sa tintasyon, malabyan unta nako ang usa ka halandumon nga espirituhanong kasinatian ug kahigayonan sa pagpakigbahin sa akong pagpamatuod.