Dili Kini Sayon
… nga mao lamang ang miyembro sa Simbahan diha sa akong pamilya. Apan wala gyud ako mag-inusara.
Ako nagtubo sa Simbahan nga Methodist. Bisan tuod ang akong pamilya kasagaran mosimba lamang sa Pasko ug sa Adlaw sa Pagkabanhaw, ako kanunayng nasayud nga ako adunay Amahan sa Langit. Ang akong igsoong lalaki ug ako sa una mag-ampo uban sa akong inahan. Unsay gitudlo sa akong mga ginikanan kanako isip usa ka bata miandam kanako alang sa unsay akong makat-unan sa umaabut.
Diha sa ikaunom nga grado akong nahibaloan nga ang akong mga ginikanan magdiborsyo. Nasakitan gyud ako ug mibati nga nag-inusara gayud. Ang akong higala nga si Courtney makasabut kanako tungod kay ang iyang mga ginikanan nagdiborsyo sa dihang siya usa pa ka gamayng bata nga babaye. Siya nahimo nakong suod nga higala.
Si Courtney ug ako naglingkod sa ibabaw sa akong kama nag-istoryahanay sa unang higayon nga siya mipailaila sa Simbahan ngari kanako. Wala niya kini gidetalye. Gipangutana lamang niya ako kon ganahan ba ko nga mokuyog kaniya sa Simbahan inigka-Dominggo. Nagsugod ako sa pag-adto sa simbahan uban kaniya panagsa, ug dayon miadto na ako kada Dominggo. Pagka 12 anyos nako, ako mitambong gani sa Mutual. Adunay usa ka butang nga anaa didto. Wala ko masayud kon unsa kadto, apan nalipay ako niini.
Diha sa ikapitong grado si Courtney ug ang laing buotang higala, nga si Aubrey, mipailaila kanako ngadto sa mga misyonaryo. Nahibaloan dayon nako unsay gipasabut sa mga misyonaryo sa dihang sila naghisgut kabahin sa pagbati sa Espiritu. Ako nasayud nga ang Simbahan tinuod human sa ikaduhang hisgutanan.
Bisan pa man sa akong pagpamatuod sa ebanghelyo, mora ko og mamatay sa kahadlok nga mohangyo sa akong mga ginikanan kon mahimo ba ko nga magpabunyag. Mipadayon ko sa pag-adto sa simbahan ug nakabaton og talagsaon nga makapalig-on sa pagpamatuod nga mga kasinatian, apan gilangan-langan ko ang “dakong pangutana” sulod sa duha ka tuig.
Sa unang tuig nako sa high school, mi-enrol ko sa seminary, ug pagka Nobyembre nasayud ko nga kinahanglan na ako nga mangutana. Nakig-istorya ko sa akong inahan. Siya miingon kanako nga ang Simbahan lamang ang nakapausab kanako ngadto sa mas maayo, ug kon ang pagpabunyag mao gayud ang akong gusto, nan mopadayon ko ug mobuhat niini. Ang una nakong gihunahuna mao, “Nganong naghuwat pa man ko og dugay?”
Dayon akong gitawagan ang akong amahan, apan wala kaayo siya malipay. Sa dihang gipangutana ko siya kon mahimo ba ako nga magpabunyag, siya miingon nga dili. Miingon siya nga gusto niya nga motambong una ko sa laing mga simbahan. Busa miadto ko sa laing mga simbahan, ug nakahimamat usab ako og mga talagsaong mga tawo—mga tawo kinsa nagpuyo og matarung kaayo nga mga kinabuhi. Apan walay makapausab sa pagbati nga akong gibati kon ako mosulod sa chapel sa Santos sa Ulahing mga Adlaw. Pagka Pebrero akong gitawagan ang akong amahan ug miingon, “Bunyagan ko inigka-Marso 7. Manghinaot ko nga naa ka.”
Ang akong tibuok pamilya miabut, lakip na ang akong amahan. Ang pagtambong sa akong pamilya dako kaayo og kahulugan alang kanako. Kadto ang labing talagsaong adlaw sa akong kinabuhi.
Usahay ang mga tawo mangutana kanako: “Giunsa man nimo kadto sa pagbuhat? Giunsa man nimo sa pagpabilin nga lig-on sa Simbahan nga ikaw lang? Walay mopukaw nimo ug mopaadto nimo sa simbahan o sa seminary. Nag-inusara ka lang.”
Nan, ang tubag yano lang. Wala ko mag-inusara. Ako adunay mga pagpanglimbasug sukad sa akong bunyag—dili sayon nga mag-inusarang miyembro sa Simbahan sa akong pamilya. Apan ang Ginoo misaad nga Siya dili gayud mobiya kanato nga mag-inusara (tan-awa sa Juan 14:16–18). Ang Langitnong Amahan nahigugma kaayo kanato nga Siya mipadala ni Kristo aron mamatay alang kanato. Unsaon man Niya sa pagkalimot kanato?
Ang kinabuhi lisud, ug kitang tanan nakaagi sa mga panahon diin kita mibati nga ang atong kalig-on nahanaw ug ang atong hugot nga pagtuo nahuyang. Apan kon kita mogunit ngadto sa Usa kinsa nahigugma kanato sa hilabihan—ang Langitnong Amahan—ug palig-unon ang atong relasyon uban Kaniya pinaagi sa pagtuon ug pag-ampo, kita makalahutay niini. Ang Ginoo misaad: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).
Detalye gikan sa Ikaduhang Pag-anhi, ni Grant Romney Clawson; paghulagway pinaagi ni Daniel Lewis