Dali Paminaw sa Tingog sa usa ka Propeta

Panabang sa Pag-ayo

Ni Presidente Thomas S. Monson

Gikan sa usa ka pakigpulong sa Abril 2007 nga kinatibuk-ang komperensya.

Si Presidente Monson mipamatuod nga kita may katungod sa panabang sa Ginoo.

President Thomas S. Monson

Atol sa Ikaduhang Gubat sa Kalibutan, naorden ako nga elder—usa ka semana sa wala pa ako mobiya alang sa aktibo nga katungdanan sa navy. Usa ka miyembro sa among bishopric miadto sa istasyonan sa train aron sa pagpanamilit kanako. Sa wala pa molarga ang train, iyang gibutang sa akong kamot ang usa ka libro: Ang Hand Book sa Misyonaryo. Mikatawa ako ug mikomentaryo, “Mag-navy ako—dili mag misyon.” Siya mitubag, “Dad-a lang ni. Magamit ra unya kini.”

Mao gayud. Atol sa unang pagbansay ang among kumander sa company mitudlo kanamo kabahin sa unsay pinakamaayo nga paagi sa pag-impake sa among biste diha sa dako nga seabag. Siya dayon mitambag, “Kon duna kamoy gahi, rectangular nga butang mahimong ibutang ilalom sa bag, dili magum-os ang inyong mga biste.” Ako naghunahuna, “Asa man ko mangita og gahi, rectanglular nga butang?” Sa kalit lang ako nakahinumdom Ang Hand Book sa Misyonaryo. Ug sa ingon nagamit kini og 12 ka semana sa ilawom niadto nga seabag.

Nianang gabii sa wala pa ang among bakasyon sa Pasko, ang mga barrack hilum. Sa kalit akong namatngonan nga ang akong kauban sa tapad nga higdaanan—usa ka miyembro sa Simbahan, si Leland Merrill—nag-agulo sa kasakit. Nangutana ako, “Merrill, naunsa ka?”

Siya mitubag, “nasakit ako. Nasakit gayud ako.”

Ang mga oras nagkataas; ang iyang pag-agulo nagkakusog. Dayon diha sa pagkawalay paglaum, mihagawhaw siya, “Monson, dili ba elder ka man?” Ako kining giangkon nga tinuod, tungod niana mihangyo siya, “Hatagi ako og panalangin.”

Akong gihunahuna og maayo nga wala pa gayud ako makahatag og panalangin. Ang akong pag-ampo sa Dios mao ang pagpangamuyo og tabang. Ang tubag miabot: “Tan-awa ang ilawom sa seabag.” Mao nga, pagka alas 2:00 sa buntag akong gihabwa ang bag. Dayon akong gipatungod ang panggabii nga suga sa Ang Handbook sa Misyonaryo ug mibasa kon unsaon pagpanalangin sa masakiton. Uban sa gibanabana nga 120 ka kuryuso nga mga navy nga nanan-aw, mipadayon ako sa pagpanalangin. Sa wala pa nako ibalik og sulod ang akong butang sa bag, si Leland Merrill nakatulog.

Pagka-sunod buntag, mapahiyumon si Merrill nga milingi kanako ug miingon, “Monson, nalipay ako nga naghupot ka sa priesthood!” Ang iyang kalipay nalabwan sa akong pagpasalamat—pagpasalamat dili lamang tungod sa priesthood kon dili tungod sa pagkatakus sa pagdawat sa panabang nga ako nagkinahanglan sa panahon nga kini hilabihang gikinahanglan.

Kon kita anaa sa buluhaton sa Ginoo, kita may katungod sa panabang sa Ginoo. Ang Iyang tabang miabut kanako sa dili maihap nga mga okasyon sa tibuok nako nga kinabuhi.

Mga Butang nga Angay nga Hunahunaon

1. Sa sinugdan si Presidente Monson naghunahuna nga wala niya kinahanglana ang Ang Hand Book sa Misyonaryo tungod kay moadto siya sa navy, apan nakaplagan nga kinahanglan niya nga mahibaloan ang mga butang nga anaa niini. Sa unsang paagi nga masayud kon unsa ang anaa sa mga kasulatan makatabang kaninyo sa nagkalainlaing mga higayon ug mga dapit?

2. Si Leland Merrill mipakita sa iyang hugot nga pagtuo sa Dios ug sa gahum sa priesthood pinaagi sa pagpangayo og panalangin. Sa unsa nga paagi kamo makapakita sa inyong hugot nga pagtuo?

3. Unsa sa inyong hunahuna ang gibati ni Presidente Monson, nga nasayud nga 120 nga laing mga marinero nagtan-aw kaniya nga mihatag sa iyang unang panalangin sa priesthood? Sa unsa nga paagi kamo makabaton og kaisog sa pagbuhat sa unsay gusto sa Langitnong Amahan, bisan kon ang laing mga tawo nga nagtan-aw kaninyo tingali wala makasabut?

Gilitratohan ni David Newman; paghulagway ni Michael T. Malm