Ako Mahimong usa ka Misyonaryo Karon
“Ako mag-uban kanimo: ug diha sa bisan diin nga dapit ikaw mopahayag sa akong ngalan usa ka masangputon nga pultahan ang pagabuksan nganha kanimo, aron sila makadawat sa akong pulong” (D&P 112:19).
Kilumkilum na sa pagluhod ni Micah tupad sa iyang higdaanan uban sa iyang manghud nga lalaki, si Noah, aron paghimo sa ilang mga pag-ampo. Siya naghunahuna pa gihapon mahitungod sa ilang silingan, usa ka mas gulangon nga tawo nga gipanganlan og Sam. Igo sab nga mitungha si Mama sa ganghaan.
“Ako nalipay nga kamong duha mohimo sa inyong mga pag-ampo,” siya miingon, nga nagpahiyum sa duha ka igsoong mga lalaki.
“Akong iapil si Sam sa akong mga pag-ampo karong gabii,” miingon si Micah. “Akong hangyoon siya sa pag-adto sa simbahan uban kanato sa Dominggo, ug gusto nako ang panabang sa Langitnong Amahan kon ako mohangyo kaniya.”
“Sa imong hunahuna moadto kaha siya sa simbahan uban kanato?” Nangutana si Noah. “Ang among magtutudlo sa Primary misulti kanamo nga ang Langitnong Amahan mahimuot kon atong dapiton ang atong mga silingan sa pag-adto sa simbahan.”
“Ako nasayud nga ang Langitnong Amahan motabang kanimo sa paghangyo ni Sam,” miingon si Mama.
Pagkasunod buntag si Micah ug Noah mimata og sayo. Mahinamon sila nga nakigsulti ni Sam. Si Sam nagpuyo sa sunod nga pultahan sa pamilya ni Micah ug Noah sa dugay na nga panahon sa wala pa matawo si Micah ug Noah. Si Micah nasayud nga si Sam masulub-on kaayo sukad mamatay ang iyang asawa.
Ang batang mga lalaki nanghipos sa ilang mga higdaanan nga wala pahinumdomi, dali nga mikaon sa ilang pamahaw, ug misul-ob sa ilang mga kupo ug mga gwantes sa wala pa mogawas sa pultahan.
“Nahadlok ka ba?” Si Noah nangutana ni Micah.
“Wala. Sa akong hunahuna si Sam moingon og oo,” mitubag si Micah. “Nan, tingali nahadlok ko og gamay,” siya midugang.
Ang duha midagan paingon sa balay ni Sam. Si Micah sigurado nga si Noah gikuyawan sama kaniya. Unsa kaha kon moingon si Sam nga dili? Unsa kaha kon si Sam dili na gusto nga makighigala kanila ug mohunong sa pagdala kanila ug ni Papa sa pagpangisda?
Sila hilum nga milakaw paingon sa atubangang pultahan ni Sam. Sa ilang pagtuktok sa pultahan, usa ka tawo ang naglakaw miliput sa pikas kilid sa balay. “Hello, mga bata!” siya miingon, nga naglakaw paingon kanila. “unsay tuyo ninyong duha karon?” Bisan tuod kon usa ka dakong buli nga kalo ang miali sa iyang nawong, ang batang mga lalaki nasayud sa tingog nga kini si Sam. Ug nasayud nga siya nagpahiyum.
“Mianhi kami aron sa pagbisita nimo,” miingon si Micah.
“Oo,” miingon si Noah. Dali siya nga nakadugang, “si Micah may usa ka butang nga ihangyo kanimo.”
Ang kasingkasing ni Micah mikulba diha sa iyang dughan. Miginhawa siya og lawum ug mibungat, “Mahimo ba nga moadto ka sa simbahan ugma uban kanamo? Mahimo nga mosakay ka uban namo—kami daghan pa og lugar—ug mahimo ka nga mutapad og lingkod kanamo sa simbahan.”
“Hinoon, akong makita ang inyong pamilya nga manglakaw aron mosimba matag Dominggo, ug wala ako makasimba sulod sa dugay na nga panahon,” miingon si Sam. “Sa akong hunahuna Ok ra kana nako sa pag-adto sa simbahan uban kaninyo niiining Dominggo.”
“Oo!” ang duha ka batang lalaki nakasinggit og dungan.
Si Noah miingon, “Mobiya kita sa alas 9:30. Unya amo kang hapiton!”
Samtang ang mga batang lalaki nanagan sa pagpauli, si Micah milingi ug mitawag ni Sam, kinsa nagpahiyum pa gihapon. “Magkita ta ugma sa buntag sa alas 9:30!”
Sa pagsulod nila sa ilang balay, si Mama ug Papa naghulat kanila.
“Unsa ang giingon ni Sam?” Nangutana si Papa. “Moadto ba siya sa simbahan uban kanato?”
Mingisi si Micah. “Oo. Miingon kami nga ato siya nga hapiton sa alas 9:30.”
Nianang gabii nga sila misulti sa ilang pag-ampo, si Noah ug Micah nahinumdom sa pagpasalamat sa Langitnong Amahan tungod sa pagtabang nila sa paghangyo ni Sam sa pag-adto sa simbahan uban kanila.
“Gibati nako ang tinuod nga kalipay,” miingon si Micah.
“Gibati usab nako,” miingon si Noah.
Ang duha mikatkat ngadto sa ilang higdaanan. ug si Micah nahinumdom sa usa ka butang nga gisulti sa ilang bishop sa miting sa sakrament sa milabay nga semana: “Ang matag miyembro usa ka misyonaryo!”
Paghulagway ni Gregg Thorkelson