Pagtudlo diha sa Nursery, Pagtudlo sa Panimalay
Daghang mga butang ang nakapahimong espesyal sa bag-o nga manwal sa Primary, naglakip sa mga kalihokan aron sa pagtabang sa mga bata nga anaa sa edad sa nursery nga makat-on sa mga kamatuoran sa ebanghelyo pinaagi sa pagtan-aw, pagpaminaw, ug pagbuhat.
Si Charlie, sa edad nga 20 ka bulan, madasigon nga motubag ngadto sa pagkat-on sa ebanghelyo diha sa balay. Siya makatudlo ngadto sa usa ka hulagway sa Manluluwas ug moingon, “Jesus.” Hinoon, kon siya motambong sa nursery nga klase sa Primary, diin siya usab nakat-on mahitungod ni Jesus, siya maulaw pa gihapon og gamay.
Si Sam hapit magtulo ka tuig ug komportable diha sa nursery. Siya nakat-on sa lain-laing mga kanta sa Primary diha sa klase ug ganahan mokanta niini panahon sa family home evening. Gani, sa dihang ang iyang lola mikanta uban kaniya, siya nasurprisa nga si Sam makakanta labing menos usa ka dosena ka mga kanta nga nasag-ulo.
Si Charlie ug si Sam miapil diha sa ilang unang gitukod nga kasinatian sa Simbahan—ang klase sa nursery. Anaa dinhi ang mga bata nga nag-edad og 18 ka bulan ngadto sa tulo ka tuig nagpadako sa ilang pagkat-on sa ebanghelyo. Ang bag-ong manwal sa nursery sa Primary, Tan-awa ang Inyong Gagmayng mga Bata, usa ka talagsaon nga kapanguhaan alang sa mga magtutudlo diha sa nursery ug sa mga ginikanan diha sa panimalay aron sa pagtudlo sa mga bata sa mga kamatuoran sa sukaranan sa ebanghelyo.
Usa ka Mapahiuyonon nga Himan sa Pagtudlo
Ang mga bata niining edara makasabut na og sugod sa yano, apan matuod, nga mga baruganan sa ebanghelyo sama sa katinuod ug paghigugma sa Langitnong Amahan ug ni Jesukristo, sa paghigugma sa pamilya, sa kalig-on sa pag-ampo, sa kamatuoran sa Unang Panan-awon, ug sa katahum sa mga nilalang sa Dios.
Sila aktibo, nagkinahanglan sa gugma ug pagpangga, adunay mubo nga gidugayon sa pagpaminaw, nagbaton og kahanas sa pagsulti, ug malingaw sa nagkalain-lain nga mga kalihokan. Sila sa kanunay nagkat-on. Si Presidente Thomas S. Monson mikutlo sa panultihon sa usa ka inilang awtoridad sa medisina miingon “nga ang edad sa kinabuhi sa tawo nga daling makasabut mao ang edad nga dos o tres anyos.”1
Panahon sa klase, ang mga bata malingaw sa musika nga mga kalihokan, oras sa pagdula, oras sa snack, ug sa usa ka leksyon diin sila gitudloan og sukaranon nga mga doktrina sa ebanghelyo. Ang mga leksyon diha sa bag-ong manwal sa nursery gihimo nga mapahiuyunon ug motubag sa mga panginahanglan sa grupo niining mga edara. Ang matag leksyon nagsugod og introduksyon alang sa magtutudlo Kini nagpasabut sa mubo nga paagi sa doktrina nga kinahanglang itudlo ug naglakip sa mga pakisayran sa kasulatan. Kini naglakip sa mga sugyot sa pagtudlo aron ang mga ginikanan ug mga magtutudlo mahibalo kon unsay ilang mapaabot gikan sa mga bata nga nag-edad alang sa primary ug unsaon sa pagpahiangay sa kasinatian sa pagtudlo aron matubag ang mga panginahanglan sa mga bata. Ang mga leksyon usab naglakip sa nagkalain-lain nga makapakat-on nga mga kalihokan nga motabang sa mga bata sa pagpaminaw sa doktrina, pagtan-aw sa usa ka butang nga may kalabutan ngadto sa doktrina, pagkanta og usa ka kanta, pagbuhat og usa ka pisikal nga kalihokan, ug pagsulti og usa ka butang nga may kalabutan ngadto sa doktrina.
Ang lider o ginikanan sa nursery, ingon nga giniyahan pinaagi sa pagdasig, mahimong motudlo sa bisan asa sa mga leksyon. Aron mapalig-on ang pagkat-on, ang mga leksyon ug mga kalihokan mahimong balik-balikon sulod sa sunod-sunod nga mga semana o balikon og kaduha atol sa usa ka klase sa nursery depende sa panginahanglan ug interes sa mga bata.
Ang opsyonal nga mga kalihokan nga gilista mahimong gamiton bisan onsang orasa ug bisan kapila atol sa klase sa nursery. Ang tanan nga mga visual aid ug mga kalihokan nahilakip diha sa manwal.
Mga Pagpamatuod sa Kalampusan
Samtang ang manwal sa nursery gipalambo, ang mga lider diha sa mga Primary sa tibuok kalibutan misulay sa mga leksyon. Sila mitanyag og maayo nga mga sugyot nga gihiusa nga nahimong manwal.
Gikan sa Cape Coast Ghana Stake, usa ka lider sa nursery misulat, “Ako nakakat-on og daghan mahitungod sa pagtudlo samtang misulay sa mga leksyon. Ang mga bata intresado sa mga istorya, mitubag sa mga pangutana, ug midrowing og mga hulagway. Sila malipayon kaayo. Usa ka lider sa Primary gikan sa Scranton, Pennsylvania, USA, misulat: “Kami adunay usa ka gamay nga branch, ug kami walay magtutudlo kanunay. Kini nga mga leksyon mahimong pagahiusahon sulod sa mubong panahon ug sa gihapon mahimong epektibo alang sa mga bata.”
Sa Caracas Venezuela Los Teques Stake, usa ka lider midayeg sa kamatuoran nga ang mga leksyon nagtugot alang sa magtutudlo sa paggamit niini ingon nga gigiyahan sa Espiritu.
“Ang mga bata ganahan sa finger puppets,” misulat ang usa ka lider gikan sa West Jordan, Utah. “Among hatagan og higayon ang mga bata nga mosulti kanako og usa ka sugilanon gamit ang ilang kaugalingong puppets. Maayo kaayo ang ilang pagkabuhat nga ako nagtuo nga sila makahimo niini diha sa ilang kaugalingon alang sa family home evening.” Siya midugang, “Ang mga sugyot sa pagtudlo dako usab og natabang kanako.”
Alang sa mga Ginikanan ug mga Lider sa Nursery
Kini usa ka pribilehiyo alang sa mga ginikan o mga lider sa Primary nga saligan sa pag-amuma ug pagtudlo sa mga bata nga anaa sa edad sa nursery. Kini nga mga bata makahimo ug puno sa hugot nga pagtuo. Sila dali nga motuo, gusto nga makat-on, ug malipayon nga moapil diha sa mga kalihokan. Sila magtubo og maayo diha sa palibut sa gugma ug kahayag sa ebanghelyo.
Ang bag-o nga manwal sa nursery sa Primary, kon gamiton uban sa pagdasig ug pagpamatuod, motabang sa mga ginikanan ug sa mga lider sa Primary sa tibuok kalibutan sa pagtudlo sa gagmayng mga bata, sama nila ni Charlie ug Sam, sa ebanghelyo ni Jesukristo.
Ang mga magtutudlo diha sa nursery ug ang mga ginikanan sa balay mahimong mogamit sa Tan-awa Ang Inyong Gagmayng mga Bata sa pagtudlo sa mga bata sa mga kamatuoran sa sukaranan sa ebanghelyo.
Matag leksyon naglakip og duha ka pahina sa mga biswal aron sa pagpalig-on sa doktrina nga gitudlo diha sa leksyon.
Adan ug Eva
Noe
Moises
Ang mga bata nga anaa sa nursery nga edad magtubo og maayo diha sa palibut sa gugma ug kahayag sa ebanghelyo.
Ang mga sugyot sa pagtudlo motabang sa ginikanan ug mga magtutudlo mahibalo kon unsaon sa pagpahiangay sa leksyon aron matubag ang mga panginahanglan sa mga bata.
Sa wala: gilitratohan sa Busath Photography; sa tuo: Story Time in Galilee, ni Del Parson; mga paghulgaway sa litrato pinaagi ni Christina Smith; arte sa linya pinaagi ni Beth Whittaker
Taas sa wala: paghulagway ni Jerry Thompson; layo sa tuo Si Kristo ug mga Bata sa Basahon ni Mormon, ni Del Parson