Mga Pangutana ug mga Tubag
“Nahadlok ko nga usa ka tawo motanyag kanako og ilimnon nga makahubog o mga drugas. Dili ko gustong moingon og dili sa mga tawo o dili ko gusto nga masuko sila kanako. Unsaon man nako sa pagsiguro nga ako dili madala?
Tinoang daan—karon—nga ikaw moingon nga dili. Kon magpadala ka, mas lisud na ang pag-ingon nga dili sa umaabut. Kadaghanan sa mga tawo morespeto kanimo sa pagbarug sa imong sumbanan. Ug dili na kaayo sila mohangyo kanimo sa pagtilaw sa umaabut.
Ayaw og kabalaka sa mga tawo nga masuko kanimo. Ila kanang pagpili kon sila mobuhat sa ingon, apan imo kini nga pagpili sa pagbaton sa Espiritu uban kanimo ug dili mobuhat og butang nga imo unyang mahayan.
Mas sayon para kanimo sa pag-ingon og dili kon ikaw adunay usa ka higala sa imong kiliran. Ang suporta sa imong higala makatabang kanimo sa pagbarug diha sa usa ka grupo.
Usab, paninguhaa nga likayan kini nga sitwasyon nga mahitabo. Pilia ang mga higala kinsa pareho ug morespeto sa imong sumbanan. Kon moadto ka og usa ka party, pananglit, hunahunaa kon kinsay anaa didto. Ayaw og adto kon mobati ka nga dili komportable o giaghat nga dili paadtoon.
Tumana ang Imong Saad
Human ako mabunyagi, wala na ko moadto og mga party nga adunay inom ug sigarilyo. Usa ka adlaw ang akong mga higala miingon kanako nga, “Dali na, adto na ta. Wala lagi mahitabo.” Apan ako misulti kanila og dili tungod kay nakahimo ako og saad nga dili na ako moinom og makahubog, manigarilyo, o mosuyop og drugas. Sila misabut tungod kay sila nasayud nga ako sakop na sa Simbahan, ug sila nasayud kon unsa ka importante ang paghimo og usa ka saad.
Kita dili kinahanglan nga mopahimuot sa atong mga higala kondili sa atong Langitnong Amahan. Kon kita motuman sa mga saad nga atong gihimo ngadto Kaniya sa dihang kita gibunyagan, kita mapanalanginan.
Roxana C., 19, Lima, Peru
Himoa ang Pasalig
Nahadlok kaayo ko nga mahiubos ang akong mga higala. Apan naghunahuna ako nga kon magpadala ko, kinsa pa may laing mahiubos? Unsay pinakamaayo nakong gibuhat mao ang paghimo nang daan og desisyon sa dili pa moabut ang sitwasyon. Mihimo ako og pasalig ngari sa akong kaugalingon nga kinahanglan nga moingon ako nga dili ngadto sa mga drugas ug ilimnong makahubog. Human ako makaingon og dili sa daghang mga higayon, mas girespeto ako sa desisyon nga akong gihimo. Sa wala madugay, kon ang usa ka tawo mangutana pag-usab kanako kon gusto ba ako nga moinom, usa sa akong mga higala moingon nga, “Ayaw, si Calder dili moinom.” Mipahimo kining sayon alang kanako sa higayon nga naamgohan sa akong mga higala nga dili ako moinom
Elder Calder, 20, Idaho Pocatello Mission
Pangitaa ang Kaisug sa Pagpabilin nga Matinud-anon
Sayo niining tuig gitanyagan ko og drugas. Dili ko gusto nga masilo kanang tawhana, apan nakabaton ako og kaisug sa pagsulti kaniya nga dili ko interesado. Ako dili gani makasulti kanimo kon unsa kadako ang akong pasalamat sa pagpabilin nga matinud-anon sa unsay akong gituohan. Pipila ka semana ang milabay, ang lalaki kinsa mitanyag kanako og drugas miingon kanako nga nakadayeg kaayo siya nga akong gibarugan ang unsay akong gituohan. Siya miingon kanako nga wala pa siya sukad makasugat og usa ka tawo kinsa nakahimo niana ug kini nagkinahanglan og usa ka dakong kaisug. Miingon siya nga dili gayud niya makalimtan kana nga kasinatian.
Pinaagi sa imong ehemplo ikaw mahimong usa ka kahayag ngadto sa uban ug usa ka maayong impluwensya (tan-awa sa Mateo 5:16).
Mary T., 16, Arizona, USA
Magmakanunayon ug Dili Matarug
Ang imong mga kaubanan morespeto kanimo sa pag-ingon nimo og dili ug sa pagsunod sa imong sumbanan. Palibuti ang imong kaugalingon og mga higala kinsa adunay mga sumbanan nga sama kanimo. Sila mosuporta kanimo diha sa pagkamakanunayon ug pagkadili matarug.
Lindy S., 15, Utah, USA
Pagbaton og Kaisug
Ako usab adunay ingon niana nga kasinatian. Ako miampo ngadto sa atong Langitnong Amahan. Ako mibasa sa mga kasulatan ug namalandong niini ug naningkamot sa paglig-on sa akong pagpamatuod. Ug dayon sa dihang nag-atubang ako og ingon niana nga sitwasyon, ako miingon, “Pasensya na, pero dili ako moinom. Ako usa ka miyembro sa Ang Simbahan ni Jesukristo sa mga Santos sa Ulahing mga Adlaw.” Naningkamot ako sa pagtabang sa uban nga masabtan ang akong mga sumbanan. Sa sinugdan ako nakuyawan, apan karon naanad na ako sa pagbuhat niini, ug ako nagpadayon sa pagsunod sa mga sugo sa Ginoo. Ako mibuntog sa pagsulay uban sa panabang sa Ginoo, og ako napanalanginan usab og pagsalig, hugot nga pagtuo, maayong panglawas, ug taas nga sumbanan. Palihug ingna ang imong mga higala nga dili uban sa pagsalig ug kaisug. Kon ikaw dili mopaubos sa imong mga sumbanan, makahimo ka sa pagdan-ag sama sa usa ka mahayag nga kahayag.
Lee, M., 17, Seoul, Korea
Desisyoni Karon
Kon ikaw modesisyon karon nga dili gayud modawat og mga drugas o ilimnong makahubog, dayon sayon na lang kaayo ang dili pagbuhat niini. Kinahanglang dili ka magduhaduha mahitungod sa imong tubag. Ang mga tawo sa kasagaran morespeto sa imong pagpili, ug makabaton pa hinoon ka og usa ka kasinatian sa misyonaryo pinaagi sa pagsulti kanila mahitungod sa Pulong sa Kaalam.
Chandler H., 14, Alabama, USA