Pagkahimong Sama ni Joseph
Ako wala madasig mahitungod sa pagdrama sa istorya ni Joseph Smith. Apan usa ka butang ang nahitabo nga miusab sa akong kinabuhi.
Ako gitudloan sa istorya ni Joseph Smith sa tibuok nakong kinabuhi. Ako mituo nga kini tinuod tungod kay misalig ako niadtong mitudlo kanako. Kon adunay bisan kinsa nga mosulti og negatibo kabahin ni Propeta Joseph, ako modepensa kaniya, dili tungod kay ako adunay pagpamatuod kaniya kondili sa baruganan, nasayud nga mao kini ang angay nakong buhaton.
Kanang tanan nausab sa dihang ang akong ward gisangunan sa paghatag og usa ka espesyal nga pasundayag alang sa usa ka kultural nga kalihokan sa Stake sa San Salvador El Salvador Ilopango. Ang akong mga higala ug ako naghunahuna nga usa ka kataw-anan nga pagdrama-drama [skit] tingali mao ang pinakamaayo; ang among presidente sa Young Men wala mouyon. Siya misugyot nga among i-drama ang pipila sa mga kasinatian ni Propeta Joseph Smith.
Kami wala ganahi mahitungod niini nga ideya. Ang akong mga higala ug ako nasayud nga ang tanan mohimo og kataw-anan nga sayaw o pagdrama-drama [skit], ug kami mauwaw mobuhat og lahi nga butang. Kami nasayud nga kataw-an lang kami sa mga tawo kon kami ilang makita nga magsul-ob og kinaraan nga sinina, nga naghimo og usa ka seryoso nga drama. Nakakita na ako niana nga nahitabo sa laing mga okasyon, ug moangkon ko nga gani usa ko niadtong kinsa mikatawa. Bisan pa man, ang among presidente sa Young Men misaad kanamo nga kon kami maingkamot sa pagpangandam sa istorya ni Joseph, walay tawo nga mokatawa.
Mao nga sulod sa sunod nga duha ka bulan, among gigahinan og dakong panahon ang pagtuon sa istorya ni Joseph Smith. Among gitan-aw ang salida sa Unang Panan-awon sa dili maihap nga mga higayon, ug among gisag-ulo ang matag pulong ug ang matag detalye niini. Among gidrowing ang usa ka dako kaayo nga set nga nagpakita sa Sagradong Kakahoyan ug sa kalangitan. Naghimo kami og usa ka pundok sa bulawan nga plata ug nakakita og usa ka dakong Biblia ug usa ka rocking chair aron gamiton isip mga props. Usa sa akong mga higala kinsa motukar sa piano mirekord sa himno nga “Ang Unang Pag-ampo ni Joseph Smith ” (Mga Himno ug Mga Awit sa Mga Bata, no. 14). Kami mirekord gani sa tingog sa mga langgam nga nanag-awit diha sa kakahoyan ug sa mga tunob ni Joseph samtang siya mitunob ibabaw sa mga dahon. Sa dihang naghulbot-hulbot kami alang sa among mga bahin, akong naangkon ang pagdrama sa papel ni Joseph Smith.
Sa adlaw sa pasundayag, among nabantayan nga, sama sa gituohan, kami lamang ang mipasundayag og seryoso. Mao nga sa wala pa moabut ang among turno, nagtapuk kami aron sa pag-ampo nga maayo ra ang tanan. Dayon usa ka butang ang nahitabo nga miusab sa akong kinabuhi.
Kadto panahon na alang kanako nga mosaka sa entablado. Ang set sa kakahoyan anaa sa akong atubangan. Milakaw ako padulong niini ug nakadungog sa girekord nga himno nga gipatukar sa luyo. Sa akong pagbuhat niini, gibati ko ang usa ka butang nga nagdilaab sa akong dughan. Sa maong paagi ako nasayud nga kadto nga panghitabo nga akong gihatagan og kinabuhi sa pagkatinuod nahitabo gayud, nga ang usa ka batang lalaki nga mas manghud pa nako nakabaton gayud niini nga kasinatian. Sa dihang miluhod ako alang sa eksena sa pag-ampo, dili mabuka ang akong mga ngabil—apan dili tungod sa usa ka impluwensya sa dautan. Hinoon, ako nasayud nga dili ako makasulti nga dili mohilak. Usa ka gamhanan nga pwersa ang nagpamatuod ngari sa akong kasingkasing nga ang asoy ni Joseph tinuod! Akong gibati ang dakong pasalamat ngadto sa Ginoo alang kang Joseph Smith, ug adunay miturok kanako nga usa ka dakong paghigugma alang kaniya.
Sa dihang akong gibuka ang akong mga mata, akong nabantayan nga ang pipila sa mga miyembro nga nanan-aw adunay mga luha usab sa ilang mga mata. Ako wala magduha-duha nga ang Espiritu mipamatuod ngadto kanila sa sagrado nga kamatuoran sa unsay among gihulagway.
Sa wala madugay dihang ako mialagad og misyon, gidepensahan ko gihapon ang Simbahan ug si Propeta Joseph Smith apan dili lamang sa baruganan. Ako mipamatuod kaniya tungod kay, sama sa giingon mismo sa Propeta, “ako nasayud niini, ug ako nasayud nga ang Dios nasayud niini, ug ako dili makalimud niini” (Joseph Smith—Kasaysayan 1:25).
Paghulagway ni John Zamudio