Panahon sa Pagpakigbahin

Ako Mamahimo nga usa ka Lig-on nga Sumpay

Ni Cheryl Esplin

“Ang banay giorden sa Dios” (“Ang Banay: Usa Ka Pamahayag Ngadto sa Kalibutan”).

Sa diha nga si Presidente Gordon B. Hinckley (1910–2008) usa pa ka batan-on nga lalaki, siya ug ang iyang pamilya nagpuyo sa usa ka umahan panahon sa ting-init. Siya nakabaton niini nga kasinatian didto:

“Dihay patay nga kahoy nga gusto nakong birahon. Akong gihigot ang usa ka tumoy sa kadena ngadto sa traktora ug ang pikas tumoy ngadto sa kahoy. Samtang ang traktora misugod sa pag-irog, ang kahoy miuyog lang og gamay, ug dayon ang kadena naputol.

“Akong gitan-aw ang naputol nga sinumpayan ug nahibulong kon giunsa niini sa pagkaputol. Miadto ako sa tindahan sa hardware ug mipalit og para sumpay. Ako kini nga gitaud pagbalik, apan kini bakikaw ug ngil-ad nga pagkasumpay. Ang kadena dili gayud, dili na gayud sama.”¹

Hunahunaa ang inyong kaugalingon isip kabahin sa kadena—usa ka kadena sa pamilya. Si Presidente Hinckley miingon nga kinahanglan gayud nga dili nato tugotan ang atong mga kaugalingon nga mahimong huyang nga sumpay sa atong kadena sa pamilya.

Si Adan ug Eva mao ang unang pamilya sa yuta. Sila ang misugod sa kadena sa pamilya. Ang Dios misulti kanila sa pagbaton og mga anak. Sa pagbaton og anak ni Adan ug Eva, sila mitudlo kanila sa ebanghelyo.

Sama nga ang mga anak ni Adan ug Eva nakat-on gikan sa ilang mga ginikanan ug dayon mitudlo sa ilang kaugalingong mga anak, ang Langitnong Amahan gusto nga kamo makat-on gikan sa inyong mga ginikanan. Dayon kon kamo makabaton og mga anak, gusto Niya nga kamo motudlo kanila. Kamo mahimo nga motan-aw ngadto ni Adam ug Eva ug ubang matarung nga mga pamilya diha sa mga kasulatan aron makat-on kon unsaon sa pagtabang sa inyong pamilya nga mahimong lig-on nga mga sumpay diha sa kadena sa pamilya.

Kalihokan

Tangtanga ang pahina H4, ug ipapilit kini sa mas baga nga papel. Guntinga ang matag sumpay diha sa baga nga itom nga mga linya. Aron sa paggunting sa sulod sa mga sumpay, paggunting lahus sa sumpay diha sa putol-putol nga linya. Isulat ang inyong ngalan diha sa usa sa mga sumpay ug ang mga ngalan sa inyong mga ginikanan, igsoon nga mga lalaki, mga babaye, mga apohan, mga iyaan, mga uyoan, mga ig-agaw, o ubang mga paryente diha sa pikas nga mga sumpay. Idugtong ang mga sumpay. Ibitay ang inyong kadena diin kini makapahinumdom kaninyo nga kamo kabahin sa usa ka pamilya ug nga kamo mahimo nga usa ka lig-on nga sumpay. Diha sa family home evening, papilia ang inyong mga miyembro sa pamilya og ngalan sa usa sa mga sumpay ug mosulti og usa ka butang nga ilang nakat-unan gikan niana nga tawo nga nakatabang kanila nga mahimong lig-on.

Mga Ideya sa Panahon sa Pagpakigbahin

Isulat ang mosunod nga kasulatan nga mga pakisayran diha sa gawas sa unom ka mga sobre, usa ka pakisayran sa matag sobre: Moises 3:24; Moises 5:1; Moises 5:2; Moises 5:4; Moises 5:5; Mosies 5:12. Andama kining unom ka ginunting nga mga pulong: kaminyoon, maghiusa sa pagtrabaho, magbaton og mga anak, pag-ampo, sunod sa mga sugo, pagtudlo sa mga anak. Guntinga ang mga letra nga managbulag, gamiti og paper clip ang matag pulong aron mahiusa, ug ibutang kini sa sulod sa tukmang sobre. Pangita og mga litrato sa mga pamilya nga maglarawan sa matag ginunting nga mga pulong. Ipakita ang Pakite sa Hulagway sa Ebanghelyo 119 (Si Adan ug Eva Nagtudlo sa Ilang mga Anak). Isaysay sa laktud ang istorya ni Adan ug Eva, nga naghatag og gibug-aton nga pinaagi kanila ang sundanan sa mga pamilya sa Langitnong Amahan natukod na. Bahina ngadto sa unom ka mga grupo, ug hatagi ang matag grupo og usa ka sobre. Ipabasa sa mga bata ang kasulatan, ihan-ay ag mga litra, ug ipapilit o usaha kini pinaagi sa paggamit og tape. Magsugod sa Moises 3:24 ug maglakaw nga magsunod, himoa nga ang matag grupo mopakita sa ilang ginunting nga mga pulong ug mopili sa nahiangay nga litrato. Ipapilit ang mga litrato palibut sa litrato ni Adan ug Eva. Ipasabut nga ang pamilya mao ang labing maayo nga dapit sa pagkat-on ug pagsunod sa ebanghelyo.
Aron sa pagtudlo nga ang Langitnong Amahan mopanalangin sa matarung nga mga pamilya, pagpasundayag og usa ka dramatisasyon mahitungod sa anak nga mga lalaki ni Helaman nga gipanalipdan sa gubat. Paglakip og bahin alang sa usa ka tigsaysay. si Helaman, ug ang anak nga mga lalaki ni Helaman (tan-awa sa Alma 53:10–23; 56; 57). Paggamit og mga name tag o simple nga costume kon ganahan. Uban pang matarung nga mga pamilya gipanalinganan usab sa Langitnong Amahan. Bahina ngadto sa duha ka mga grupo. Hatagi ang matag grupo sa mosunod nga mga istorya: Pamilya ni Nephi (1 Nephi 17:7–13; 18:1–6) ug mga pamilya sa Jaredite (Genesis 11:1–9; Ether 1:33–43). Ipabasa sa matag grupo ang istorya. Paglihok isip usa ka reporter (paggamit og mikropono kon anaa), ug interbyuha ang matag grupo pinaagi sa pagpangutana og mga pangutana nga mopagawas sa mga detalye sa matag istorya. Hatag og pagpamatuod nga ang Langitnong Amahan mopanalangin sa matarung nga mga pamilya.

Paghulagway ni Thomas S. Child