Komentaryo

Usa ka Gidugang nga Kalig-on sa Espiritu

Usa ako ka inahan nga adunay duha ka matahum nga mga anak ug usa ka bana nga mosuporta. Niining kalibutan nga walay kasigurohan, ang Liahona sa pagkatinuod mao ang moderno nga kompas sa among pamilya. Samtang kami nagbasa sa Mensahe sa Unang Kapangulohan ug uban pang makapadasig nga mga artikulo diha sa among mga family home evening, usa ka gidugang nga kalig-on sa Espiritu sa Ginoo misulod sa among panimalay. Among nabati ang gahum sa Pag-ula sa atong Manluluwas, nga si Jesukristo, ug nakaplagan ang kahupayan ug kalinaw.

Crisanta Estayo Padilla, Philippines

Pagpaubos ug Pagpasaylo diha sa Kaminyoon

Ang artikulo nga “Pag-una sa Akong Kaminyoon kaysa Akong Garbo” (Ene. 2008) nakatabang kanako nga mas masabtan sa hingpit ang responsibilidad sa pakigsaad sa kaminyoon. Akong gibasa ang artikulo uban sa akong pamanhunon, ug mihimo kami og mga tumong aron ang pagpaubos ug pagpasaylo mahimong importanting mga baruganan sa among relasyon. Naghunahuna ko sa pag-frame sa artikulo aron ibutang sa among umaabut nga panimalay aron among mahinumduman ang maanindot nga diwa nga among gibati sa among pagpakigbahin niini nga mensahe ug milig-on sa among gugma.

Clébi Nascimento, Brazil

Ang Impluwensya sa Liahona

Nakabig ko ngadto sa Simbahan pinaagi sa makapadasig nga mga mensahe nga anaa diha sa Liahona. Akong nabantayan nga makahimo ako sa pag-ila sa paagi nga gisulti sa atong mga lider kanato, ug akong gi-aplay sa akong kaugalingon ang ilang tambag. Mao kini ang paagi nga ang akong pagpamatuod misugod sa paglambo. Nagbasa ko sa magasin uban sa kadasig, nag-ampo nga makabaton sa mas dako nga bahin sa Espiritu ug makadawat og panudlo gikan sa kahitas-an.

Panahon sa akong misyon, magbitbit ko og pipila ka mga kopya sa magasin ug ihatag kini ngadto sa mga investigator ug sa dili kaayo aktibo nga mga miyembro. Bag-ohay lang nanghatag ko og mga kopya ngadto sa pipila ka mga higala nga gustong mobasa mahitungod sa atong tinuohan.

Karon ako adunay calling nga Representante sa Liahona. Ang among tumong mao nga ang matag miyembro sa among branch adunay usa ka kopya. Kami mohatag sa mga magasin nga among madawat gikan sa distribution center ngadto sa bag-ong mga kinabig, ug sila milambo diha sa ebanghelyo ug mibati og paghigugma alang sa Liahona. Ako nasayud nga ang Liahona nagtudlo sa ebanghelyo ni Jesukristo ug sa atong mahigugmaong Langitnong Amahan. Kita mapasalamaton alang sa inspirasyon, sa sinseridad, sa kayano, ug sa maayong tambag nga atong nadawat sa matag isyu.

Edison Geovanny Zapata Heredia, Ecuador