Usa ka Pagdapitsa Adlaw sa Kalihokan
“Pagtigum aron magkahiusa ang mga anak sa Dios” (Juan 11:52).
“Hinumdumi nga adlaw sa kalihokan karon inig human sa klase,” miingon si Mama diha sa pamahaw.
Nanghupaw si Clarissa. “Nasayud ako.”
“Unsay problema?” Nangutana si Mama. “Abi nako og giganahan ka sa adlaw sa kalihokan.”
“Maayo ra man ang tanan,” miingon si Clarissa.
“Kahinumdum ka unsa ikaw ka madasigon sa pag-adto sa dihang ikaw nag-edad og walo?” Si Mama nangutana. “Ug giganahan ka ni Sister Cobian.”
“Maayo kaayo siya,” Miingon si Clarissa. “Lisud lang kini tungod kay si Ashley ug ako mao lamang duha ang moadto. Gusto nako si Ashley, ug buotan kaayo siya kanako. Apan hapit na siya mag-12, ug ako bag-o pa lang nga nag-9. Wala gayud ako masayud kon unsay akong isulti ngadto kaniya. Dili gyud kini ingon ana kalingaw.”
Gigakos ni mama si Clarissa. “Gikasubo ko usahay malisud kini. Kita adunay gamay nga Primary nga walay daghang batang mga babaye, apan nakasiguro ako nga ikaw malingaw kaayo karong hapon.”
Human sa klase si Clarissa naglakaw sa kalye paingon sa simbahan diin ilang gipahigayon ang adlaw sa kalihokan. Si Sister Cobian ug Ashley malipayon nga miabi-abi kaniya. Human sa pangbukas nga pag-ampo miingon si Sister Cobian, “Akong gipangutana ang presidente sa Primary mahitungod sa batang mga babaye nga kinsa anaa sa mga lista sa Primary apan dili motambong sa adlaw sa kalihokan o sa Primary. Aduna ako niini nga lista sa batang mga babaye ug ang numero sa ilang telepono. Akong gihunahuna nga kon ato silang tawagon sa dili pa ang matag adlaw sa kalihokan, tingali og sila moanhi ug moapil kanato.”
“Nindot kana nga ideya!” Nakasinggit si Clarissa. “Makalingaw kini kon daghang batang mga babaye ang ania.”
Si Sister Cobian mipahiyum. “Nalipay ako nga nagustohan nimo kini nga ideya, tungod kay gusto nakong mohangyo kanimo sa pagtawag sa batang mga babaye sa dili pa ang atong sunod nga adlaw sa kalihokan.”
“Ako?” Nakapanglad-ok si Clarissa. Dili siya siguro mahitungod niana. Si Sister Cobian mitunol kaniya sa lista. Nakaila siya sa tanang batang mga babaye gikan sa eskwelahan, ug pipila kanila panagsa ra nga mosimba. Apan tingali og makahahadlok ang pagtawag ug pagdapit kanila.
“Imo ba kining buhaton?” Nangutana si Sister Cobian.
Si Clarissa mitan-aw pag-usab sa lista. Pipila niining batang mga babaye mga kaedad niya. Ang adlaw sa kalihokan mas makalingaw kon motambong usab sila. “Sigurado,” siya miingon.
Sa wala pa ang sunod adlaw sa kalihokan, si Clarissa mitawag sa batang mga babaye diha sa lista. Mibilin siya og mga mensahe o nakigsulti kanilang tanan. Dili man diay lisud.
Pagka sunod adlaw sa eskwelahan, si Olivia, usa sa batang mga babaye nga gitawag ni Clarissa, mihangyo kaniya kon mahimo ba nga magdungan sila paglakaw ngadto sa adlaw sa kalihokan. Si Clarissa naghinamhinam! Pagkahuman sa eskwela si Clarissa ug Olivia nagdungan og panglakaw ngadto sa simbahan. Sa dihang misulod sila sa lawak sa Primary, si Sister Cobian mihatag kanila og dakong pahiyum.
Sa wala pa ang sunod nga adlaw sa kalihokan, si Clarissa mitawag pag-usab sa mga batang babaye. Si Olivia naghinamhinam nga moadto pag-usab. Si Chelsea miingon nga moadto usab siya. Pagkasunod hapon si Clarissa mibati og hilabihan nga kalipay samtang naglakaw siya paingon sa balay-tigumanan uban ni Olivia ug Chelsea.
Nianang pagkagabii si Clarissa misulti sa iyang inahan kon unsa kalingaw ang adlaw sa kalihokan uban sa daghang mga batang babaye. “Manghinaut gyud ako nga si Madison makaanhi,” miingon si Clarissa. “Siya ang akong labing suod nga higala.”
“Nan, nganong dili siya makaanhi?” Si mama nangutana.
“Ma, wala siya sa lista. Dili siya miyembro sa Simbahan.”
“Dili kana igsapayan,” miingon si Mama. “Naghimo ikaw og misyonaryo nga buhat kon imo siya nga dapiton. Ikaw nahimo na nga misyonaryo pinaagi sa pagdasig ni Olivia ug Chelsea.”
Si Clarissa naghunahuna mahitungod niana. Sa diha nga gitawag niya pag-usab ang mga batang mga babaye para sa adlaw sa kalihokan. iya usab nga gitawag si Madison. Si Madison nangutana sa iyang mama kon makahimo ba siya sa pag-adto, ug ang iyang mama miingon og oo. Si Clarissa dili makatuo kon unsa ka sayon kadto. Siya mihunahuna kon nganong wala niya dapita si Madison sa miaging mga bulan!
Sa adlaw sa kalihokan niana nga semana, si Sister Cobian mihimo og makapadasig nga pahibalo. Sa sunod nila nga adlaw sa kalihokan, sila adunay usa ka espesyal nga bisita nga motudlo kanila kon unsaon sa pag-adorno og mga cake. Si Clarissa ug Madison nagpahiyumay sa usag usa. Ingon og makalingaw kana! Sa ilang pagbiya nianang hapona, si Madison miingon, “Salamat sa pagdapit kanako. Gusto ko nga moadto sa sunod higayon aron pag-adorno og mga cake.”
Sa pagkasunod gayud nga adlaw, si Clarissa misugod sa pagsulti ngadto sa tanan niyang mga higala sa eskwelahan mahitungod sa kalihokan sa pag-adorno sa cake. Si Madison mitabang. Daghan sa ilang mga higala miingon nga gusto sila nga moadto.
“Tingali adunay 15 ka batang mga babaye sa among sunod nga adlaw sa kalihokan,” miingon si Clarissa sa iyang inahan.
“Kinse!” Nakalitan si Mama. “Diin ka makakaplag nianang kadaghan nga batang mga babaye?”
“Ako na nga gidapit ang tanang batang mga babaye sa akong klase,” miingon si Clarissa.
“Maanindot kana!” Miingon si mama. “Apan maayo nga pahibaloon nimo si Sister Cobian aron siya makaandam alang niana nga gidaghanon.”
Si Clarissa mitawag ni Sister Cobian aron pagsulti kaniya kon pila ka batang mga babaye ang paabuton. Sa adlaw sa kalihokan ang lawak sa Primary napuno uban sa batang mga babaye nga nagtabi ug nangatawa samtang nag-adorno sa mga cake. Si Sister Cobian mikidhat ngadto ni Clarissa ug mihatag kaniya og dako nga pahiyum.
Pagkahuman si Clarissa mitabang ni Sister Cobian sa pagpanglimpyo. Ang iyang higala nga si Emily miduol ug nanamilit. “Salamat,” maulawon siya nga miingon ni Sister Cobian. “OK ra ba kon akong dapiton ang akong magulang nga igsoong babaye ug akong duha ka ig-agaw sa sunod higayon?”
Si Sister Cobian mipahiyum. “Labing maayo kana, Emily, siya miingon.
Si Clarissa hapit dili makahulat alang sa sunod nga adlaw sa kalihokan!
Mga paghulagway ni Jennifer Tolman