Mga Kasulatan
Alma 17


Usa ka asoy sa mga anak ni Mosiah nga lalaki, kinsa misalikway sa ilang mga katungod sa gingharian alang sa pulong sa Dios, ug miadto sa yuta sa Nephi aron sa pagsangyaw ngadto sa mga Lamanita; ang ilang mga pag-antos ug kaluwasan—sumala sa talaan ni Alma.

Naglangkob sa mga kapitulo 17 hangtod 27.

Kapitulo 17

Ang mga anak nga lalaki ni Mosiah adunay espiritu sa pagpanagna ug pagpadayag—Miadto sila sa ilang nagkalainlain nga mga dapit aron sa pagsangyaw sa pulong ngadto sa mga Lamanita—Si Ammon miadto sa yuta sa Ishmael ug nahimo nga sulugoon ni Hari Lamoni—Si Ammon miluwas sa mga pundok sa gagmayng kahayopan sa hari ug mipatay sa iyang mga kaaway diha sa tubig sa Sebus. Mga bersikulo 1–3, mga 77 B.C.; bersikulo 4, mga 91–77 B.C.; ug mga bersikulo 5–39, mga 91 B.C.

1 Ug karon nahitabo nga samtang si Alma nagpanaw gikan sa yuta sa Gideon paingon sa habagatang bahin, paingon sa yuta sa Manti, tan-awa, sa iyang katingala, iyang anasugatan ang bmga anak nga lalaki ni Mosiah nga nagpanaw paingon sa yuta sa Zarahemla.

2 Karon kining mga anak nga lalaki ni Mosiah kauban ni Alma sa panahon nga ang anghel nagpakita sa aunang higayon kaniya; busa si Alma nagmaya sa hilabihan sa pagkakita sa iyang mga igsoun; ug ang nakadugang sa iyang kamaya, kay sila nagpabilin gihapon nga iyang mga igsoon sa Ginoo; oo, ug sila nakaangkon og dugang kahibalo sa kamatuoran; kay mga tawo sila nga mabuot og salabotan ug makugihon silang bmisiksik sa mga kasulatan, aron sila makahibalo sa pulong sa Dios.

3 Apan dili kini mao ang tanan; gihalad nila ang ilang kaugalingon ngadto sa hilabihan nga apag-ampo, ug pagpuasa; busa sila adunay espiritu sa pagpanagna, ug espiritu sa pagpadayag, ug kon sila bnagtudlo, sila nagtudlo uban sa gahom ug awtoridad sa Dios.

4 Ug nagtudlo sila sa pulong sa Dios sulod sa napulo ug upat na ka tuig taliwala sa mga Lamanita, nga nakaangkon og dakong akalamposan sa bpagdala sa daghan ngadto sa kahibalo sa kamatuoran; oo, pinaagi sa gahom sa ilang mga pulong daghan ang nadala sa atubangan sa altar sa Dios, sa pagtawag sa iyang ngalan ug sa cpagkompisal sa ilang mga sala sa iyang atubangan.

5 Karon mao kini ang mga sitwasyon nga ilang nasinati sa ilang mga pagpanaw, kay sila adunay daghan nga mga kasakit; nag-antos sila sa hilabihan, sa lawas ug sa hunahuna, sama sa kagutom, kauhaw ug kakapoy, ug usab sa daghan nga espirituhanong apagsulay.

6 Karon mao kini ang ilang mga pagpanaw: Human amakapanamilit sa ilang amahan, nga si Mosiah, sa unang tuig sa mga maghuhukom; human bmagdumili sa pagdawat sa gingharian nga gitinguha sa ilang amahan nga itugyan kanila, ug usab kini ang mga hunahuna sa katawhan;

7 Bisan pa niana mibiya sila sa yuta sa Zarahemla, ug midala sa ilang mga espada, ug sa ilang mga bangkaw, ug sa ilang mga gapasan, ug sa ilang mga panâ, ug sa ilang mga saplong; ug gibuhat nila kini aron makapangita sila og pagkaon alang sa ilang mga kaugalingon samtang anaa sa kamingawan.

8 Ug sa ingon niana mibiya sila padulong sa kamingawan uban sa gidaghanon sa mga tawo nga ilang gipili, aron sa pagtungas ngadto sa yuta sa Nephi, sa pagsangyaw sa pulong sa Dios ngadto sa mga Lamanita.

9 Ug nahitabo nga mipanaw sila sulod sa daghang adlaw sa kamingawan, ug nagpuasa sila sa hilabihan ug anag-ampo sa hilabihan aron ang Ginoo mohatag kanila og bahin sa iyang Espiritu nga mouban kanila, ug magpabilin kanila, nga sila mahimong binstrumento sa mga kamot sa Dios sa pagdala, kon mahimo, sa ilang kaigsuonan, ang mga Lamanita, ngadto sa kahibalo sa kamatuoran, sa kahibalo sa pagkadaotan sa cmga tradisyon sa ilang mga amahan, nga dili matarong.

10 Ug nahitabo nga ang Ginoo amiduaw kanila uban sa iyang bEspiritu, ug miingon kanila: cPagmahupayon. Ug sila nahupay.

11 Ug ang Ginoo miingon usab kanila: Adtoa ang mga Lamanita, nga inyong kaigsuonan, ug ipahayag ang akong pulong; bisan pa apagmapailobon kamo sa pagpas-an sa mga kasakit, aron makapakita kamo sa maayong mga panig-ingnan ngadto kanila bahin kanako, ug himoon ko kamo nga usa ka instrumento sa akong mga kamot nga igo alang sa kaluwasan sa daghang kalag.

12 Ug nahitabo nga ang mga kasingkasing sa mga anak nga lalaki ni Mosiah, ug usab niadtong miuban kanila, nagmaisogon sa pag-adto sa mga Lamanita aron sa pagpahayag kanila sa pulong sa Dios.

13 Ug nahitabo sa dihang miabot sila sa mga utlanan sa yuta sa mga Lamanita, nga sila amipahimulag sa ilang mga kaugalingon ug mibiya gikan sa matag usa, misalig sa Ginoo nga sila magkakita pag-usab sa kataposan sa ilang bpag-ani; kay nagdahom sila nga dako ang buluhaton nga ilang sagubangon.

14 Ug sa pagkatinuod malisod kadto, kay gihimo nila ang pagsangyaw sa pulong sa Dios ngadto sa usa ka aluog ug magahi ug mabangis nga katawhan; usa ka katawhan kinsa nahimuot sa pagpatay sa mga Nephita, ug pagpanulis ug pagpanglungkab kanila; ug ang ilang mga kasingkasing nagtinguha sa katigayonan, o sa bulawan ug plata, ug sa mahalon nga mga bato; gani nagtinguha sa pag-angkon niining mga butanga pinaagi sa pagpatay ug pagpanglungkab, aron dili sila maghago sa ilang kaugalingon nga mga kamot.

15 Sa ingon niana sila mga tapolan kaayo nga katawhan, daghan ang nagsimba og mga dios-dios, ug ang atunglo sa Dios miabot kanila tungod sa bmga tradisyon sa ilang mga amahan; bisan pa ang mga saad sa Ginoo gitanyag ngadto kanila sa mga kondisyon nga maghinulsol.

16 Busa, kini mao ang akatuyoan nga ang mga anak nga lalaki ni Mosiah naningkamot sa buluhaton, aron sila ilang maawhag sa paghinulsol; nga unta sila ilang magiyahan ngadto sa kahibalo sa plano sa katubsanan.

17 Busa nagbulagbulag sila sa matag usa, ug miadto aron makig-uban kanila, matag tawo nag-inusara, sumala sa pulong ug gahom sa Dios nga gihatag kaniya.

18 Karon si Ammon kay mao ang labaw taliwala kanila, o sa labing tukma siya ang nangalagad kanila, ug mibiya siya gikan kanila, human siya amanalangin kanila sumala sa nagkalain-lain nilang adtoanan nga mga dapit, human makahatag kanila sa pulong sa Dios, o makapangalagad kanila sa wala pa siya mobiya; ug sa ingon niana mipadayon sila sa nagkalain-lain nilang mga panaw sa tibuok yuta.

19 Ug miadto si Ammon sa yuta sa Ishmael, ang yuta nga gitawag sunod sa mga anak nga lalaki ni aIshmael, kinsa nahimo usab nga mga Lamanita.

20 Ug sa dihang si Ammon misulod sa yuta sa Ishmael, ang mga Lamanita midakop kaniya ug migapos kaniya, sumala sa ilang nabatasan nga gaposon ang tanan nga Nephita nga mahulog sa ilang mga kamot, ug dad-on sila sa atubangan sa hari; ug sa ingon niana ang hari ang magbuot kon patyon ba sila, o ipabilin ba sila nga bihag, o ibalhog ba sila sa bilanggoan, o isalikway ba sila gikan sa iyang yuta, sumala sa iyang kabubut-on ug kahimuot.

21 Ug sa ingon niana si Ammon gidala sa atubangan sa hari kinsa adunay gahom sa yuta sa Ishmael; ug ang iyang ngalan mao si Lamoni; ug kaliwat siya ni Ishmael.

22 Ug ang hari nangutana kang Ammon kon tinguha ba niya nga mopuyo sa yuta sa mga Lamanita, o sa iyang katawhan.

23 Ug si Ammon miingon kaniya: Oo, akong tinguha nga mopuyo taliwala niini nga katawhan sulod sa usa ka panahon; oo, ug tingali hangtod sa adlaw nga ako mamatay.

24 Ug nahitabo nga si hari Lamoni nahimuot pag-ayo kang Ammon, ug misugo nga badbaron ang iyang mga gapos; ug giawhag niya si Ammon nga mokuha og usa sa iyang mga anak nga babaye aron pangasaw-on.

25 Apan si Ammon miingon kaniya: Dili, apan ako mahimo nimong sulugoon. Busa si Ammon nahimo nga sulugoon ni hari Lamoni. Ug nahitabo nga gihatagan siya og buluhaton uban sa laing mga sulugoon sa pagbantay sa mga pundok sa gagmayng kahayopan ni Lamoni, sumala sa nabatasan sa mga Lamanita.

26 Ug human siya makaalagad sa hari og tulo ka adlaw, samtang siya uban sa Lamanitanhong mga sulugoon nga midala sa ilang mga pundok sa gagmayng kahayopan ngadto sa dapit nga adunay tubig, nga gitawag nga tubig sa Sebus, ug ang tanan nga mga Lamanita midala sa ilang mga pundok sa gagmayng kahayopan didto, aron kini makainom—

27 Busa, samtang si Ammon ug ang mga sulugoon sa hari midala sa ilang mga pundok sa gagmayng kahayopan niini nga dapit nga adunay tubig, tan-awa, usa ka pundok sa mga Lamanita, kinsa kauban sa ilang mga pundok sa gagmayng kahayopan aron makainom og tubig, mibarog ug mipatibulaag sa mga pundok sa gagmayng kahayopan ni Ammon ug sa mga sulugoon sa hari, ug sila mipatibulaag niini hangtod nga kini nanagan sa nagkalain-lain nga padulngan.

28 Karon ang mga sulugoon sa hari misugod sa pagbagulbol, nga nag-ingon: Karon ang hari mopatay kanato, sama sa iyang gibuhat sa atong kaigsuonan tungod kay ang ilang mga pundok sa gagmayng kahayopan gipatibulaag tungod sa pagkadaotan niining mga tawhana. Ug misugod sa pagbakho sa hilabihan, nga nag-ingon: Tan-awa, ang atong mga pundok sa gagmayng kahayopan nagkatibulaag na.

29 Karon nanagbakho sila tungod sa kahadlok nga patyon. Karon sa dihang si Ammon nakakita niini ang iyang kasingkasing napuno sa kamaya; kay, miingon siya, ako mopakita sa akong gahom ngadto niining akong kauban nga mga sulugoon, o sa gahom nga ania kanako, sa pagpabalik niini nga mga pundok sa gagmayng kahayopan ngadto sa hari, aron akong maangkon ang pagsalig niining akong kauban nga mga sulugoon, nga ako mogiya kanila aron motuo sa akong mga pulong.

30 Ug karon, mao kini ang mga gihunahuna ni Ammon, sa dihang nakita niya ang mga kasakit niadtong kinsa iyang gitawag nga iyang kaigsoonan.

31 Ug nahitabo nga siya milukmay kanila sa iyang mga pulong, nga nag-ingon: Akong kaigsuonan, pagmadasigon kamo ug atong pangitaon ang mga pundok sa gagmayng kahayopan, ug atong pundokon kini ug dad-on kini pagbalik ngadto sa dapit nga adunay tubig; ug sa ingon niana kita mopanalipod sa mga pundok sa gagmayng kahayopan sa hari ug kita dili niya patyon.

32 Ug nahitabo nga nanglakaw sila sa pagpangita sa mga pundok sa gagmayng kahayopan, ug gisunod nila si Ammon, ug nagdali sila uban ang tumang kalagsik ug nakit-an ang mga pundok sa gagmayng kahayopan sa hari, ug gipundok kini pag-usab ngadto sa dapit nga adunay tubig.

33 Ug kadtong mga tawo mibalik na usab aron patibulaagon ang ilang mga pundok sa gagmayng kahayopan; apan si Ammon miingon sa iyang kaigsuonan: Liboti ang mga pundok sa gagmayng kahayopan aron dili kini makadagan; ug moadto ko ug makig-away niining mga tawhana kinsa mitibulaag sa atong mga pundok sa gagmayng kahayopan.

34 Busa, gisunod nila ang gisugo ni Ammon kanila, ug miadto siya ug nakig-away niadtong kinsa mibarog sa mga tubig sa Sebus; ug ang ilang gidaghanon dili diyotay.

35 Busa wala sila mahadlok kang Ammon, kay nagtuo nga usa sa ilang mga tawo makapatay kaniya sumala sa ilang kahimuot, kay wala sila masayod nga ang Ginoo misaad kang Mosiah nga siya amoluwas sa iyang mga anak nga lalaki gikan sa ilang mga kamot; ni sila nasayod sa bisan unsa kabahin sa Ginoo; busa kalipay nila ang kalaglagan sa ilang kaigsuonan; ug tungod niini nga hinungdan mibarog sila aron patibulaagon ang mga pundok sa gagmayng kahayopan sa hari.

36 Apan si aAmmon mibarog ug misugod sa paglabay og mga bato ngadto kanila gamit ang iyang saplong; oo, uban sa dakong gahom iya silang gipangsaplong; ug niana nakapatay siya og bpipila kanila hangtod nga nagsugod sila sa pagkatingala sa iyang gahom; bisan pa niana nasuko sila tungod sa pagkamatay sa ilang kaigsuonan, ug gipaniguro nila nga siya ilang mapatay; busa, kay nakita nga sila dili cmakaigo kaniya sa ilang mga bato, sila miduol dala ang mga bunal aron patyon siya.

37 Apan tan-awa, ang matag tawo nga mialsa sa iyang bunal aron pagbunal ni Ammon, gitigbas niya sa ilang mga bukton gamit ang iyang espada; kay gisanta niya ang ilang mga bunal pinaagi sa pagtigbas sa ilang mga bukton sa suwab sa iyang espada, hangtod nga nagsugod sila sa pagkatingala, ug nagsugod sa pagpanglayas gikan sa iyang atubangan; oo, ug dili diyotay ang ilang gidaghanon; ug siya mipasibog kanila pinaagi sa kusog sa iyang bukton.

38 Karon unom kanila ang napatay pinaagi sa saplong, apan siya walay usa nga napatay gawas sa ilang pangulo gamit ang iyang espada; ug nakaputol siya og daghan nga bukton dihang sila mibunal batok kaniya, ug sila dili diyotay.

39 Ug sa dihang siya miabog kanila palayo, mibalik siya ug gipainom nila ang ilang mga pundok sa gagmayng kahayopan ug gibalik kini sa tugwayanan sa hari, ug dayon miadto sa hari, nagpas-an sa mga bukton nga gitigbas sa espada ni Ammon, kadtong kinsa nagtinguha sa pagpatay kaniya; ug gidala kini ngadto sa hari alang sa pagpamatuod sa mga butang nga ilang nabuhat.