Tupã ñande rayhuetereígui
Tupã ombou ñandéve Ita’ýra Ypykue, ndaha’éi ñane kondena hag̃ua, ha katu ñande salva hag̃ua.
“Tupã ohayhuetereígui múndope, ome’ẽva’ekue Ita’ýra peteĩete, umi Hese ojeroviáva ani hag̃ua omano, oreko hag̃ua uvei tekove opave’ỹva”.(Juan 3:16). Ahendu ypýrõ guive ko versículo, naimeiva’ekue tupaópe ni noche de hogar-hápe. Ahechakurihína peteĩ deporte televisiõ rupive. Ha katu taha’e estanción ahecháva ha mba’eichagua ñembosaráipa, oĩ katuete peteĩ tekove ojokóva peteĩ señal he’íva “Juan 3:16.”
Ag̃uahẽ ahayhu peteĩcha versículo 17: “Tupã nomboúigui Ita’ýra múndope, okondena hag̃ua pe múndo; ha katu ha’e rupi, pe múndo ojesalva hag̃ua.”
Tupã ombou Jesucristo, Ita’ýra peteĩmi hetépe, ome’ẽ hag̃ua hekove opaite ñande rehehápe. Upéva Ha’e ojapo ñande rayhúgui ha ojapo peteĩ plan ñandéve g̃uarã, ikatu hag̃uáicha jahajey Hendápe.
Péina katu, kóva ndaha’éi oimeraẽ plan general, ni oimeháichaguarei plan. Ha’e mba’e personal, oñemoĩva’ekue peteĩ Túva Yvagagua oporohayhúvare, oikuaáva ñane korasõ, ñande réra ha Ha’e oikotevẽva ñande jajapo. Mba’ére jaguerovia upéva? Ñañehekombo’égui Escritura-kuéra imarangatúvape.
Moisés ohendu heta hendápe Tupã he’ívo ko’ã ñe’ẽ “Moisés, che ra’y” (tojehecha Moisés 1:6; tojehecha avei versos 7, 40). Abraham oikuaa ha’ehague Tupã ra’y, ojeporavova’ekue imisiõrã heñói mboyve jepe (tojehecha Abraham 3:12, 23). Tupã po rupive, Ester oñemoĩkuri peteĩ posición de influencia-hápe, osalva hag̃ua itavaguápe (tojehecha Ester 4). Ha Tupã ojerovia peteĩ kuñataĩ mitãre, peteĩ siérva, otestifika hag̃ua peteĩ proféta viviéntere, Naamán ikatu hag̃uáicha okuera. (tojehecha 2 Reyes 5:1–15).
Añetehápe ahayhu upe kuimba’e marangatu, karapemi, ojupiva’ekue peteĩ yvyramátare ohecha hag̃ua Jesús-pe. Salvador oikuaa ha’e oimẽhague upépe, opyta, omaña yvyramatakuápe, ha he’i ko’ã ñe’ẽ… “Zaqueo, … eguejy” (Lucas 19:5). Ha ndaikatúi ñanderesarái mitãrusu oguerekova’ekue 14 ary, ha ohova’ekue ka’aguýpe ha upépe oikũmby mba’éicha pe plan añetehápe ipersonal: “[José,] kóva ha’e Che Ra’y Ahayhuetéva. Ehendu Chupe!” (José Smith—Historia 1:17).
Hermano ha hermana-kuéra, ñande ha’e centro ñande Ru Yvagagua plan-pe, ha Salvador misiõ reheha. Opaite ñandekuéra, ñane añoháicha, ha’e Hembiapo ha Iglória.
Chéve g̃uarã, ndaipóri escritura-kuéra kuatiañe’ẽ omombe’u resakãvéva che estúdio Antiguo Testamento-gui. Cápitulo ha capítulo-re, jahechakuaa techaukarã mba’éichapa ñande Ru Yvagagua ha Jehová oime ñande rekovépe.
Ramoite ñañemoarandúkuri José rehe, Jacob ra’y ohayhuetéva. Imitã guive, José ohupyty heta favor Ñandejáragui, ha katu upéicha avei ohasa tuicha pruéba iñermanokuéra poguýpe. Ojapo mokõi arapokõindy, heta ñandekuéra ipirĩkuri mba’éichare José operdona iñermanokuérape. Eju, Chesegípe ñamoñe’ẽ: “Heta hendápe, José rekove ojogua Jesucristo-pe. Jepe ñande pekadokuéra ome’ẽ Chupe heta jehasa’asy, Salvador oikuave’ẽ ñandéve ñyrõ, opavavépe ñanemosãsovo peteĩ destíno ivaivéva vare’águi. Taha’e ñaikotevẽ jahupytu ñyrõ, térã ñame’ẽ ñyrõ—og̃uahẽta ára opavave ñaikotevẽtaha jajapo mokõive mba’e—José techapyrã ohechauka ñandéve Salvador-pe, sanación ha reconciliación rape añete”.1
Peteĩ lección ahayhuetéva upe rrelátogui, ou José hermano-gui, Judá, ojapova’ekue peteĩ tembiapo iñimportánteva Tupã plan personal José-pe g̃uarã. José oñetraisionarõguare iñermanokuérare, Judá okonvense chupekuéra ani hag̃ua ojuka José-pe, térã katu ohepyme’ẽ hag̃ua chupe esclávo ramo (Tojehecha Génesis 37:26–27).
Heta ary uperire, Judá ha iñermanokuéra oikotevẽ ogueraha iñermáno imitãvéva, Benjamín, Egipto-pe. Ñepyrurã ituvakuéra ndoipotái. Péina katu Judá ojapo peteĩ promésa Jacob-pe— ogueraha jeytaha Benjamín-pe hógape.
Egipto-pe, Judá promésa oñemoĩkuri a prueba. Mitãrusu Benjamín, oje’akusa peteĩ krimen ndojapóivare. Judá, ijeroviakóvo ipromésape, oikuave’ẽ oñenkarsela hag̃ua chupe Benjamín rãngue. “Upévare”, ha’e he’i, “mba’éicha piko aháta che ru rendápe, ha pe mitãrusu noĩri chendive?” (tojehecha Génesis 44:33–34). Judá oĩKuri decidido okumplívo ipromésa, ha omondojeývo Benjamín-pe tesãime. Sapy’ántepa peñandúva ambuekuérare, Judá oñandu haguéicha Benjamín-re?
Ndaupéichai piko tuvakuéra oñeñandu ita’yrakuérare? Mba’éicha oñeñandu misionero-kuéra umi tekove oservívare hikuái? Mba’éichapa oñeñandu Primaria ha mitãrusukuéra líder, umi tekove ohekombo’e ha ohayhúvare?
No importái mávapa peẽ, ni mba’épa pehasahína ko’ag̃aite, oĩ upeichaite oñeñandúva penderehe. Oimẽ oĩva katuete ohoséva nendive Túva Yvagagua rendápe.
Amẽ’ẽ aguyje umi araka’eve ndopoíriva ñandehegui, umi oñohẽ meméva hi’ánga ñembo’épe ñanderehe, ha umi ñenerekombo’e meméva ha ñanepytyvõva jahupyty hag̃ua ñaikotevẽva jahajey hag̃ua ñande rógape, Túva Yvagagua rendápe.
Nda’aréi peteĩ che angirũ, ohasa 233 ára hospital-pe COVID–19 reheve. Upe ára aja, itúva omanomava’ekue ovisita chupe, ha ojerure chupe oñe’ẽ hag̃ua inietokuérape. Jepe vélo mboypýri, upe taita marangatu oipytyvõse inietokuérape ohojey hag̃ua hóga yvagaguápe.
Ára ha ára ohasávape, Cristo discípulo-kuéra oñegueromandu’ave umi “Benjamín” hekovepeguáre. Opa hendápe oñehendu Tupã profeta oikovéva, Presidente Russell M. Nelson ñehenói. Mitakuña ha mitãrusukuéra oparticipa Ñandejára huventukuéra batallón-pe. Tekove ha familia-kuéra oipysohína ijespíritu ministración rehegua—ohayhúvo, okompartívo, ha oipepirũvo angirũ ha vecino-kuérape, ou hag̃ua Cristo-pe Mitãrusu ha kakuaa imandu’ahína ha oñepia’ã okumplívo ikonveniokuéra: Tupã templo ñemyenyhẽ, jetopa ijypykuéra omanova’ekue réra, ha ojapyhývo ordenansa hesekuerahápe.
Mba’ére Túva Yvagagua plan personalizado ñandéve g̃uarã oike, ñaipytyvõ hag̃ua ambuekuérape oujey Hendápe? Péina upéicha, ikatu jaiko Jesucristo oikoháicha. Ipahaitépe, Judá ha Benjamín ñemombe’u ñanerekombo’e Salvador jehasa’asy ñanderehe. Iñexpiasiõ rupive, Ha’e ome’ẽ Hekove ñande gueraha hag̃ua ógape. Judá ñe’ẽngue ohechauka Salvador mborayhu. “Mba’éicha piko ajupíta che túva rendápe, ha [nde] nereimemo’ãi chendive”? Israel ñembyatyrarõ, umíva avei ikatu ha’e ñane ñe’ẽ.
Antiguo Testamento henyhẽ milagro ha poriahuvereko kyrỹigui, ha’éva Túva Yvagagua plan séllo rechaukaha. 2 Reyes, capítulo 4-pe, ñe’ẽ joaju “oikókuri peteĩ ára” ojeipuru mbohapy hendápe ojehechauka porã hag̃ua umi mba’e imba’eguasúva oikoha Tupã árape, ha mba’evete ndaha’éi vyrorei Chupe g̃uarã.
Che angirũ pyahu Pablo, otestifika ko añeteguáre. Pablo okakuaa peteĩ óga sapy’ánte ndojehasa porãihápe ha katuete ndojeikuaasevéiva mba’eve religión-gui. Oike aja mbo’ehaópe peteĩ base militar Alemánia-pe, ohechakuaa mokõi hermana-pe, oguerekóvaicha peteĩ tesape espiritual. Oporandúvo mba’érepa iñambue hikuái, ogueru ñembohovái ha’eha Jesucristo Tupao Santokuéra Ara Pahapeguáva.
Uperiremínte Pablo oñepyrũ oñemboja misionero-kuéra rehe ha oñeipepirũ chupe oho hag̃ua tupaópe. Domingo upeiguápe, oguejývo colectivo-gui, ohecha mokõi kuimba’e oñemondéva kamisã morotĩ ha korváta rehe. Oporandu chupekuéra ha’épa hikuái élderes Tupaópegua. Ha’ekuéra ombohovái ha’eha, ha upémarõ Pablo osegi chupekuéra.
Servicio aja, peteĩ predicador ohechauka tekovekuéra oiméva congregación-pe, ha oipepirũ chupekuéra otestifika hag̃ua. Testimonio pahápe, peteĩ tekove tamborillero ome’ẽ peteĩ saludo de tambor, ha congregación he’i, “Amen”.
Predicador ohechaukávo Pablo-pe, ha’e oñembo’y ha he’i, “Che aikuaa José Smith ha’ehague peteĩ profeta, ha Mormón Kuatiañe’ẽ ha’eha añetegua” Ndaipóri maitei tambor rehegua, ni amén. Ipahápe, Pablo ohechakuaa, ojavyhague tupao ohose haguépe. Uperiremínte, Pablo ojuhu tape oimẽ porãva ha oñemongarai.
Pablo ikaraiha árape, peteĩ miembro oikuaa’ỹva oñemboja hese ha he’i chupe, “Nde resalvákuri che rekove”. Mbovymi ára upe mboyve, upe kuimba’e o’decidi oheka ambue tupao, ha ohómi servicio tambores ha amén-hápe. Upe kuimba’e ohendúvo Pablo-pe ome’ẽ itestimónio José Smith ha Mormón Kuatiañe’ẽ rehe, ohechakuaa Tupã oikuaaha chupe, ohechakuaaha ijeiko’asy ha oguerekoha peteĩ plan chupe g̃uarã. Pablo ha upe kuimba’épe g̃uarã, “oikókuri peteĩ árape”, añetehápe!
Ñande avei jaikuaa Túva Yvagagua oguerekoha peteĩ plan jevy’a rehegua opavavetépe g̃uarã. Tupã ombou rupi Ita’ýra Ohayhuetévape ñande rehehápe, milagros ñaikotevẽva, “[oikóta] pe [araite]” oñeikotevẽvape Iplan oñekumpli hag̃ua.
Atestifika ko arýpe ikatuha ñaikũmby hetave mba’ẽ Tupã plan rehegua, ha’éva ñandeve g̃uarã ha oĩva Antiguo Testamento-pe. Upe kuatiañe’ẽ sagrádo ohekombo’e función oguerekóva profetakuéra ára hasývape, ha Tupã pógui, peteĩ múndo konfúso ha vokoiete ojeikovaívape. Oñe’ẽ avei umi humilde oguerovíavare, oha’arõva’ekue fidelidápe ñande Salvador-pe, ñande ñaha’arõ ha ñañembosako’iháicha Ijejujey mokõiharã—Ijejujey glorióso ha heta ára ojeprofetisava’ekue.
Upe ára peve, ikatu ndajahechái ñande resa natural rupive, Tupã rembipota opa ñande rekovépe g̃uarã (tojehecha Doctrina ha Konveniokuéra 58:3). Péina katu, ikatu ñagueromandu’a Nefi ñembohovái ombohovakerõguare mba’e oikũmby’ỹvape: jepe ndoikuapái mba’épa he’ise opa mba’e, ha’e oikuaa Tupã ohayhuha Ita’yrakuérape. (Tojehecha 1 Nefi 11:17).
Kóva ha’e che testimónio ko Domingo pyhareve porãme. Tajahai ñane korasõme ha jaheja tahenyhẽ ñane ánga py’aguapy, esperanza ha goso eterno rehe: Tupã ñanderayhuetégui ombou Ita’ýra Peteĩete—ndaha’éi ñane kondena hag̃ua, ha katu ñande salva hag̃ua. Jesucristo rérape, Amén.