Poravopyre
Moisés Kuatiañeʼẽgui

1 Umi Tupã ñeʼẽ, haʼe heʼivaʼekue Moisés-pe, peteĩ ára Moisés ojehupírõguare peteĩ yvyty ijyvatetévape,

2 Ha haʼe ohechákuri Tupãme ojováre, ha haʼe oñeʼẽ hendive, ha Tupã glória ojahoʼi Moisés-pe; upévare Moisés ikatúkuri ogueropuʼaka iñeime.

3 Ha Tupã oñeʼẽ Moisés-pe, heʼívo: Péina ápe, Che haʼe Tupã Ñandejára Ipuʼakapáva, ha Opaʼỹva haʼe che réra; Che haʼégui umi ára oñepyrũʼỹva ha ary opaʼỹva; ha ndahaʼéipa kóva opaʼỹva?

4 Ha, péina ápe, nde haʼe che raʼy; upévare emaʼẽ, ha Che ahechaukáta ndéve umi che po apopyre; ha katu ndaopavavéi, che rembiapokuéra opaʼỹgui, ha avei che ñeʼẽnguéra, arakaʼeve ndopáigui.

5 Upévare, avave ndaikatúi ohecha opa che rembiapokuéra ohechaʼỹre opa che glória; ha avave ndaikatúi ohechapa che glória ha upéi opyta hetépe ko yvy ári.

6 Ha Che aguereko peteĩ tembiapo ndéve g̃uarã, Moisés, che raʼy; ha nde Che Unihénito joguaha; ha haʼe ha haʼéta pe Salvador, henyhẽgui grásia ha añeteguágui; ha katu ndaipóri Tupã ndahahéiramo che, ha opa mbaʼe oĩ che renondépe, Che aikuaágui opa umíva.

7 Ha koʼág̃a, péina ápe, kóvante ahechaukáta ndéve, Moisés, che raʼy, nde reimégui múndope, ha koʼág̃a Che ahechauka ndéve.

8 Ha ojehu Moisés omaña, ha ohecha múndo haʼe ojejapohague ári; ha Moisés ohecha múndo ha umi opaha, ha opa yvypóra raʼykuéra haʼéva ha ojejapovaʼekue; tuicha ohecharamóva ha ohechapyrãva.

9 Ha ojei Moisés-gui Tupã ñeime, ha noĩvéima iglória Moisés ári; ha Moisés opyta haʼeño; ha opytávo haʼeño, hoʼa yvýpe.

10 Ha ojehu heta aravo pukukue aja Moisés ndaikatúi ohupytyjey imbarete rekoite kuimbaʼéicha, ha heʼi ijupe: Kóva rupi, koʼág̃a aikuaa yvypóra mbaʼeveha, mbaʼe che arakaʼeve aimoʼãvakuri.

11 Ha katu koʼág̃a che resa tee ohechákuri Tupãme; ha katu ndahaʼéi che resa rekoitépe, ha katu che resa espiritual-re; che resa rekoite ndaikatumoʼãiguikuri ohecha; chepyʼamanótagui ha amanótaguikuri hovake; ha katu iglória cheahoʼi; ha ahecha hova, añemoambuégui henondépe.

12 Ha ojehu Moisés heʼívo koʼã ñeʼẽ, péina ápe, ou Satana oipyʼaraʼã hag̃ua chupe, heʼívo: Moisés, kuimbaʼe raʼy, etupãitũ chéve.

13 Ha ojehu Moisés omaʼẽ Satanáre ha heʼi chupe: Mávapa nde? Péina ápe, che haʼégui peteĩ Tupã raʼy, Iñunihénito joguaha; ha moõpa oime nde glória, rotupãitũ hag̃ua?

14 Péina ápe, ndaikatumoʼãikuri ahecha Tupãme, ndahaʼéiramo cheahoʼíraʼe iglória ha añemoambue henondépe. Ha katu che ningo ikatu rohecha yvypóra rekóicha. Naʼañetéipa kóva?

15 Ojehovasapyre che Tupã réra, ndojeipáigui chehegui Ijespíritu, ha ndaupéichairamo, moõ oime nde glória?, pytũmbýgui chéve g̃uarã. Ha ahechakuaa nde ha Tupã apytégui; Tupã heʼígui chéve: Etupãitũ nde Tupãme, chupe añónte reservítagui.

16 Tereho koʼágui Satana; ani chembotavy; Tupã heʼígui chéve: Nde haʼe che Unihénito joguaha.

17 Ha haʼe avei omeʼẽvaʼekue chéve tembiapoukapykuéra, cherenoirõguare jukeri hendývagui, heʼívo: Ehenói Tupãme che Unihénito rérape ha chetupãitũ.

18 Ha heʼive Moisés: Nambopahamoʼãi Tupãme ñehenói; aguereko ambue mbaʼe aporandu hag̃ua chupea: iglória oĩgui che ári, upévare che ikatu ahechakuaa nde ha haʼe apytégui. Tereho koʼágui, Satana.

19 Ha koʼág̃a, Moisés heʼívo koʼã ñeʼẽ, Satana hatã osapukái ha okororõ yvy ári, ha omanda heʼívo: Che upe Unihénito, chetupãitũ.

20 Ha ojehu Moisés oñepyrũ okyhyjeterei; ha oñepyrũvo okyhyje, ohecha pe añaretã vyʼaʼỹ. Upevére, ohenóivo Tupãme, ohupyty mbarete, ha omanda heʼívo: Chereja, Satana, ko Tupã peteĩetépe añómente che atupãitútagui, haʼéva upe glória rehegua Tupã.

21 Ha upérõ Satana oñepyrũ oryrýi, ha osusũ yvy; ha Moisés ohupyty mbarete, ha ohenói Tupãme, heʼívo: Pe Unihénito rérape, tereho koʼágui Satana.

22 Ha ojehu Satana osapukái hatã, tasẽ ha jaheʼópe ha tãi pururũ reheve; ha ojei upégui, héẽ, Moisés oĩhágui, ha ndohechavéima haʼe chupe.

23 Ha koʼág̃a Moisés otestifika ko mbaʼégui; ha katu ndaipóriva yvypóra raʼykuéra apytépe tekoñaña rupi.

24 Ha ojehu Satana osẽvo Moisés oĩhágui, Moisés ojesarupi yvágape, henyhẽvo Espíritu Sántogui, otestifikáva Túva ha Taʼýragui:

25 Ha ohenóivo Tupã réra, haʼe ohechajey iglória, ojahoʼígui chupe; ha ohendu peteĩ ñeʼẽpu heʼíva: Ejehovasapyre, Moisés, Che, pe Ipuʼakapáva, roiporavógui, ha nembaretevéta heta ygui, koʼãva iñeʼẽrendútagui nde remandávare, nde haʼerõguáicha Tupã.

26 Ha péina ápe, Che aime nendive, umi nde ára paha peve; remosãsótagui che tavayguakuérape ñeñapytĩmbýgui, Israel-pe jepeve, che aiporavopyréva.

27 Ha ojehu, oñeʼẽ aja gueteri upe ñeʼẽpu, Moisés omaʼẽkuri ha ohecha pe yvy, héẽ, ohechapaite; ha ndaipóri mbaʼe pehẽngueʼi ohechaʼỹva, ohechakuaávo umíva Tupã Espíritu rupive.

28 Ha haʼe ohecha avei umi upépe oikóva, ha ndaipóri ni peteĩ ánga ohechaʼỹva; ha ohechakuaákuri umíva Tupã Espíritu rupive; ha hetákuri ipapapy, jepe ojeipapakuaaʼỹva umi yvykuʼi yguasu rembeʼypeguáicha.

29 Ha ohecha heta tetã; ha opaitéva oñembohéra yvy, ha oĩkuri oikóva ijape ári.

30 Ha ojehu Moisés ohenói Tupãme, heʼívo: Ajerure ndéve eremi chéve, mbaʼérepa koʼã mbaʼe kóicha, ha mbaʼe rupive rejapóraʼe?

31 Ha péina ápe, Ñandejára glória ojahoʼi Moisés-pe, ha Moisés oĩkuri Tupã oĩháme ha oñeʼẽ hendive ojováre. Ha Tupã Ñandejára heʼi Moisés-pe: Che proposito-rãite Che ajapovaʼekue koʼã mbaʼe. Kóina ápe oĩ arandu ha opyta chepype.

32 Ha che ñeʼẽ pokatu rupive, Che ajapovaʼekue umíva, haʼéva che Raʼy Unihénito, grásia ha añeteguágui henyhẽva.

33 Ha ojeipapakuaaʼỹva múndo Che ajapovaʼekue; ha avei ajapovaʼekue che propósito-rãite; ha Taʼýra rupive Che ajapovaʼekue umíva, haʼéva che Raʼy Unihénito.

34 Ha peteĩha kuimbaʼe opa kuimbaʼégui Che ahenoivaʼekue Adán, haʼéva heta.

35 Ha katu ameʼẽnte ndéve peteĩ ñemombeʼu ko yvy ha ipype oikóvagui. Ha péina ápe, oĩgui heta múndo opavaʼekue che pokatu ñeʼẽ rupi. Ha heta oĩva koʼág̃a, ha ojepapakuaaʼỹ umíva yvypórape g̃uarã; ha katu opa mbaʼe ojeipapa chéve g̃uarã, chembaʼégui ha Che aikuaa umíva.

36 Ha ojehúkuri Moisés oñeʼẽ Ñandejárape, heʼívo: Ndeporiahuverekóke ne rembiguáindi, O Tupã, ha emombeʼu chéve ko yvy rehegua ha ipype oikóvare, ha avei yvagakuéragui; ha upéicharõ ne rembiguái ovyʼáta.

37 Ha Tupã Ñandejára oñeʼẽ Moisés-pe, heʼívo: Yvagakuéra heta, ha yvypóra ndaikatúi oipapa; ha katu ojeipapa chéve g̃uarã, chembaʼégui umíva.

38 Ha opataháicha peteĩ yvy ijyvagakuérandi, upéicha ambuéva iñapysẽta; ha ndopái che rembiapokuéra, ni umi che ñeʼẽ.

39 Péina ápe, kóva haʼégui che rembiapo ha che glória—toiko yvypóra ñemanokuaaʼỹ ha tekove ijapyraʼỹva.

40 Ha koʼág̃a, Moisés, che raʼy, Che añeʼẽta ndéve ko yvy rehe, reimeha ári; ha rehaíta umi mbaʼe Che añeʼẽtava.

41 Ha ára yvypóra raʼykuéra nomombaʼéi vove umi che ñeʼẽ ha oipeʼa heta umíva upe kuatiañeʼẽ nde rehaívagui, péina ápe, Che amopuʼãta ambue ndeichagua; ha oĩ jeýta umíva yvypóra raʼykuéra apytépe—opa ogueroviáva apytépe.

42 (Koʼã ñeʼẽ ojeʼékuri Moisés-pe yvyty ári, upe téra ojeikuaaʼỹtava yvypóra raʼykuéra apytépe. Ha koʼág̃a ojeʼe ndéve umíva. Ani rehechauka avavépe, ndahaʼéirõ umi ogueroviávape. Taupéicha. Amén).