1 Upéicha ojejapopákuri yvága ha yvy, ha opa hekove atykuéra.

2 Ha ára sétimope, Che, Tupã, ajapopa che rembiapo ha opa mba’e Che ajapova’ekue; ha ára sétimope apytu’úkuri opa che rembiapógui, ha opa mba’e Che ajapova’ekue oñemohu’ã, ha Che, Tupã, ahechákuri umíva iporãha;

3 Ha Che, Tupã, ahovasákuri ára sétimo ha asantifika upéva; upe jave Che apytu’uguikuri opa tembiapo, Che, Tupã amohenda ha ajapova’ekuégui.

4 Ha ko’ág̃a, péina ápe, Che ha’e ndéve, ko’ãva ha’eha yvága ha yvy jejapo’ypy, ko’ãva ojejapórõguare ára Che, Tupã Ñandejára, ajapo haguépe yvága ha yvy,

5 Ha opa ka’avo ñumegua oĩ mboyve yvy ári, ha opa ñana ñumegua okakuaa mboyve. Che, Tupã Ñandejára, ajapógui opa mba’e, Che añe’ẽva’ekuégui, espiritualmente, oĩ mboyve hetépe yvy ape ári. Che, Tupã Ñandejára, namboúiguikuri ama pe yvy ape ári. Ha Che, Tupã Ñandejára, ajapova’ekue opa yvypóra ra’ykuéra; ha ndaipóri gueteri kuimba’e oñemitỹ hag̃ua; Che ajapóguikuri umíva yvágape, ha ndaipóri gueteri tekove yvy ári, ni ýpe ni yvytúpe;

6 Ha katu, Che, Tupã Ñandejára, añe’ẽkuri, ha ojupi yvýgui peteĩ ytimbo, ha omyakỹ opa yvy ape.

7 Ha Che, Tupã Ñandejára, ajapo yvypórape yvytimbógui, ha aipeju itĩme tekove pytu; ha oiko yvypóragui peteĩ ánga oikovéva, tete peteĩha yvy ári, yvypóra peteĩha avei; upevére, opa mba’e ojejapova’ekue upe mboyve; ha katu ojejapova’ekue espíritupe ha ojejapova’ekue che ñe’ẽ he’iháicha.

8 Ha Che, Tupã Ñandejára, añotỹ peteĩ yvotyty Edén kuarahyresẽme, ha upépe Che amoĩ pe kuimba’e ajapova’ekuépe.

9 Ha yvýgui, Che, Tupã Ñandejára, amoheñoiva’ekue opa yvyra, imáta reheve, ombohorýva yvypóra resa; ha yvypóra ikatúkuri ohecha. Ha oiko avei chuguikuéra ánga oikovéva. Ha’é guikuri espiritual ára Che ajaporõguare; opytágui upe tenda Che, Tupã, ajapo haguépe, héẽ, jepe opa mba’e Che ambosako’iva’ekue yvypóra jeporurã; ha yvypóra ohecha iporãha hi’upyrã. Ha Che, Tupã Ñandejára, añotỹ avei pe tekove yvyramáta upe yvotyty mbytépe, ha upéicha avei pe kuaapy iporãva ha ivaíva rehegua yvyramáta.

10 Ha Che, Tupã Ñandejára, ajapókuri tosẽ peteĩ ysyry Edén-gui, omohe’õ hag̃ua pe yvotyty; ha upégui oñemboja’óva irundy ysyrýpe.

11 Ha Che, Tupã Ñandejára, ambohéra peteĩháme Pisón, ombojeréva opa Havila yvy, Che, Tupã Ñandejára, ajapo haguépe heta óro;

12 Ha upe tetãmegua óro iporãite, ha upépe oĩ ita vedélio ha ónise.

13 Ha ysyry mokõiha réra ha’ékuri Gihón, ombojeréva opa Etiopía retã.

14 Ha ysyry mbohapyha réra ha’ékuri Hidekel; ha kóva osyry Asiria kuarahyresẽ gotyo; ha ysyry irundyha ha’ékuri Eufrates.

15 Ha Che, Tupã Ñandejára, ajapyhy kuimba’épe, ha amoĩ chupe Jardín de Edén-pe, oñemitỹ ha oñangareko hag̃ua hese.

16 Ha Che, Tupã Ñandejára, amandákuri yvypórape, ha’évo: Opaite yvotytygua yvyramátagui ikatúta re’u,

17 Ha katu yvyramáta kuaapy iporãva ha ivaíva reheguágui ndere’umo’ãi, upevére, reiporavokuaáta ndejehegui, oñeme’ẽgui ndéve upéva; ha katu, nemandu’áke Che ambotoveha, upévagui re’uha árape, añetehápe remanóta.

18 Ha Che, Tupã Ñandejára, ha’eva’ekue che Unihénitope, naiporãiha kuimba’e oĩ ha’eño; upévare, Che ajapóta pytyvõha porã chupe g̃uarã.

19 Ha yvýgui, Che, Tupã Ñandejára, ajapova’ekue opa ñumegua mymba, ha opa guyra yvytupegua; ha amandákuri toho hikuái Adán-pe, ohecha hag̃ua mba’e térapa ha’e ome’ẽta chupekuéra; ha ha’ékuri avei hikuái ánga oikovéva; Che, Tupã, Ñandejára aipejúgui ipypekuéra tekove pytu; ha amanda Adán ohenoiháicha opa tekove oikovévape, upeichataha herakuéra.

20 Ha Adán ombohéra opa mymba’aty, ha guyra yvytugua ha opa ñumegua mymba; ha katu Adán-pe g̃uarã ndojejuhúi pytyvõha porã.

21 Ha Che, Tupã Ñandejára, ajapókuri to’a topehýi atã Adán ári; ha ha’e oke, ha Che ajapyhy peteĩ ikostílla ha amboty hendaguépe to’o;

22 Ha upe kostílla, Che, Tupã Ñandejára aipe’ava’ekue reheve kuimba’égui, ajapo peteĩ kuña, ha agueru kuimba’épe.

23 Ha Adán he’i: Ko’ág̃a aikuaa kóva ha’eha umi che kanguekue kangue ha che ro’ogua ro’o; ha’e hérata Kuña, oñeguenohẽ haguére kuimba’égui.

24 Upévare, pe kuimba’e ohejava’erã itúva ha isy, ha ojoaju hembirekóre; ha ha’éta hikuái peteĩ to’o.

25 Ha mokõivéva ijopívo, pe kuimba’e ha hembireko, ha notĩri hikuái.