Fe rehegua Artikulokuéra
Jesucristo Tupao Santokuéra Ára Pahapeguáva

1 Roguerovia Tupã, pe Túva Ijapyra’ỹva, ha Ita’ýra Jesucristo, ha pe Espíritu Santo-pe.

2 Roguerovia yvyporakuéra ojehavirataha iñangaipa teére, ha ndaha’éi Adán jejapyharáre.

3 Roguerovia Cristo Expiasiõ rupive, opavave yvypóra ikatuha ojesalva, Evanhélio léi ha ordenansakuérare ñeñe’ẽrendu rupive.

4 Roguerovia umi peteĩha Evanhélio prinsípio ha ordenansakuéra ha’eha: peteĩha, Jerovia Ñandejára Jesucristo-re; mokõiha, Arrepentimiénto; mbohapyha, Ñemongarai ñeñapymíme angaipakuéra jorarã; irundyha, Po ñemoĩ Espíritu Santo don ñeme’ẽrã.

5 Roguerovia tekovekuéra oñehenoiva’erãha Tupãre, profesía rupive ha po ñemoĩ rupive, umi oguerekóvare autorida ombo’e hag̃ua Evanhélio ha oadministra hag̃ua iñordenansakuéra.

6 Roguerovia upe organisasiõ oĩva’ekue voi Tupao Ñepyrũme, upéva ha’e, umi apóstol, proféta, pastor, mbo’ehára, evanhelista, ha hetave.

7 Roguerovia umi ñe’ẽ rehegua don, profesía, rrevelasiõ, umi visiõ, ñemonguera, umi ñe’ẽ ñehesa’ỹijo, ha ambue.

8 Roguerovia Bíblia ha’eha Tupã ñe’ẽ oñembohasa porãha meve; roguerovia avei Mormón Kuatiañe’ẽ ha’eha Tupã ñe’ẽ.

9 Roguerovia opa mba’e Tupã oikuaaukava’ekue, opa umi ko árape oikuaaukáva, ha roguerovia oikuaaukataha gueteri heta mba’e Tupã rréino rehegua tuicha ha imba’eguasúva.

10 Roguerovia Israel ñembyaty tee ha umi Diez Tribu ñemoĩjey; ha Sion (pe Jerusalén Pyahu) oñemopu’ãtaha kontinénte Amerikáno ári; Cristo voi orreinataha yvy ári; ha, pe yvy oñembopyahutaha ha ohupytýta iglória iporãmbajepéva.

11 Rojerure mbarete priviléhio rotupãitũ hag̃ua Tupã Ipu’akapávape ore konsiénsia he’iháicha, ha rome’ẽ upeichagua priviléhio opa tekovépe: totupãitũ ojaposeháicha, oipotahápe ha otupãitũsévape.

12 Roguerovia roimeha umi rréi, presidente, sãmbyhyhára ha huekuéra poguýpe; oreñe’ẽrendúvo, romoherakuãporã ha romo’ãvo pe léi.

13 Roguerovia orerekojapu’ỹ, oreañete, orerekopotĩ, orepy’aporã, orevirtuóso ha rojapova’erãha iporãva opa tekovépe; añetehápe, ro’ekuaa rosegiha Pablo ñehekombo’e: Roguerovia opa mba’e, roha’arõ opa mba’e; heta mba’e rogueropu’akákuri, ha roha’arõ rogueropu’akuaataha opa mba’e. Oĩramo oimeraẽ mba’e ivirtuóso térã iporãva, térã herakuãporã, térã oñemomorãva, ko’ã mba’e rohupytyse.