José Smith—Mateo

1 Che ha’égui peẽme, ko’ag̃aite guive ndapecherechamo’ãvéima, ni ndapeikuaamo’ãvéima Che ha’eha umi proféta ohaiva’ekuégui, upe ára peje peve: Ojehovasapyre pe oúva Ñandejára rérape, yvága araípe, ha opa anhelkuéra marangatu hendive. Upérõ idisipulokuéra oikũmby ha’e oujeyva’erãta yvy ári, ojeglorifika ha oñekorona rire Tupã akatúape.

2 Ha osẽ Jesús ha oñemombyry upe témplogui; ha ou hendápe idisipulokuéra ohendu hag̃ua chupe, he’ívo: Mbo’ehára, emombe’u oréve umi témplo rogaguasu rehegua, eréguikuri—Umíva ojeitýta ha itaperetaha.

3 Ha Jesús he’i chupekuéra: Ndapehecháipa opa ko’ã mba’e, ha napeikũmbýi ko’ãva? Añetehápe Che ha’e peẽme, ndopytamo’ãiha ko’ápe, ko témplope, ita ita ári ojeity’ỹtava.

4 Ha Jesús oñemomombyry chuguikuéra, ha ojupi Olivo Monte-pe. Ha oguapy jave Olivo Monte-pe, disipulokuéra ou ñemiháme hendápe, he’ívo: Ere oréve araka’épa ojehúta ko’ã mba’e ereva’ekue pe témplo ñehundíre, ha Hudiokuérare; ha mba’épa nde jeju rechaukaha ha múndo ñembopaha rehegua térã umi iñañáva ñehundi, ha’éva múndo paha?

5 Ha Jesús ombohovái ha he’i chupekuéra: Pema’ẽ porãke ani avave penembotavy;

6 Heta oútagui che rérape, he’ívo—Che ha’e Cristo—ha ombotavýta hetápe;

7 Upérõ ha’ekuéra peneme’ẽta peñembohasa’asy hag̃ua, ha pendejukáta, ha opa tetã ndaija’emo’ãi penderehe che réra rupi;

8 Ha upérõ heta oñemyrõta, ha oñotraisionáta ojupe, ha ndaija’emo’ãi ojuehe;

9 Ha heta proféta japu opu’ãta, ha ombotavýta hetápe;

10 Ha hetátagui tembiapovai, heta tekove mborayhu ho’ysãmbáta;

11 Ha katu pe opytáva ñemovã’ỹme ha ndaikatúivare ojepu’aka, upéva ojesalváta.

12 Upévare, pehecha vove upe mba’evaiete oporohundíva Daniel upe proféta oñe’ẽhague, Jerusalén ñehundi rehegua, upérõ pepyta tenda marangatúpe; upe omoñe’ẽva, toikũmby.

13 Upérõ toñani yvtytyguasukuérape umi Judea-pe oikóva;

14 Ha upe oĩva óga ári toñani, ha ani ojevy oguenohẽ hag̃ua mba’eve hógagui;

15 Ha upe ñúme oĩva ani avei ojevy ijaokuéra rekávo;

16 Ha ái umi hyeguasúvagui, ha imemby kambúvagui umi árape;

17 Upévare, peñembo’e Ñandejárape ani hag̃ua peñani araro’y jave, ni pytu’uha árape;

18 Umi árape oútagui tuicha jeiko’asy hudiokuéra ári, ha umi Jesuralén-pe oikóva ári, Tupã araka’eve ombou’ỹ haguéicha Israel ári, irréino ñepyrũmby guive ko ára peve; nahániri, ni araka’eve noñembou jeymo’ãvéimava Israel ári.

19 Opa mba’e ojehuva’ekue chupekuéra ha’e umi jeiko’asy ñepyrũmby añónte oútava hi’arikuéra.

20 Ha ndaha’éiramo oñemombykýrõ umi ára, avave retekuéra ndojesalvamo’ãi; ha katu umi ojeporavopyréva ñeimeporãrã, konvéniope oĩháicha, umi ára oñemombykýta.

21 Péina ápe, ko’ã mba’e Che ha’ékuri peẽme judío-kuérare; ha avei, umi jeiko’asy ára rire oútava Jerusalén ári, oĩramo he’íva peẽme, Péina ápe Cristo, térã péina pépe, ani peguerovia chupe;

22 Umi árape opu’ãtagui avei Cristo añetegua’ỹva, ha proféta añetegua’ỹva, ha ohechaukáta tuicha techaukaha ha techapyrãnguéra, ha upéicha rupi oporombotavýta, ikatúramo, umi ojeiporavopyrévape jepe, ha’éva umi ojeiporavopyréva konvéniope oĩháicha.

23 Péina ápe, Che ha’e peẽme ko’ã mba’e umi ojeporavopyréva mba’eporãrã; ha pehendúta avei ñorairõguasu ha norairõguasu rerakuã; pejesarekóke ani pejepy’apy, opa Che ha’eva’ekue peẽme oikótagui; ha katu ndaha’éi gueteri ipaha.

24 Péina ápe, Che ha’émakuri peẽme;

25 Upévare, he’íramo hikuái peẽme: Péina ápe, ha’e oime tave’ỹme; ani peho: Péina ápe, ha’e oime umi kámara ñemíme; ani peguerovia;

26 Pe tesape pyharevegua osẽháicha kuarahyresẽme, ha omimbi kuarahyreike peve, ha ojaho’ipaite yvy, upéichata avei Kuimba’e Ra’y jeju.

27 Ha ko’ág̃a Che amombe’u peẽme peteĩ parávola. Péina ápe, upe te’õngue oĩháme, upépe ijatýta umi taguatoguasu; upéicha avei oñembyatýta umi che aiporavopyréva irundy yvy rembe’ýgui.

28 Ha ohendúta hikuái ñorairõguasu ha ñorairõguasu rerakuã.

29 Péina ápe Che añe’ẽ umi che aiporavopyréva rehehápe; tetã opu’ãtagui tetã rehe; ha rréino rréino rehe; oĩta ñembyahýi, mba’asyvai, ha yvy ryrýi heta henda rupi.

30 Ha avei, hetaiterei rupi tembiapovai, heta tekove mborayhu ho’ysãmbáta; ha katu pe ojepu’aka’ỹva hese, kóva ojesalváta.

31 Ha avei, ko Rreinogua Evanhélio oñembo’éta opa múndore, testimónio ramo opa tetãnguérape, ha upérõ oúta ipaha, térã pe iñañáva ñehundi;

32 Ha avei, upe mba’evaiete oporohundíva, Daniel upe proféta oñe’ẽ haguégui, oñekumplíta.

33 Ha umi aragua jeiko’asy rirete, pe kuarahy iñypytũta, ha jasy ndohesapemo’ãi, ha mbyjakuéra ho’áta yvágagui, ha yvagagua pu’akakuéra oryrýita.

34 Añetehápe Che ha’e peẽme, ko ñemoñareaty, ko’ã mba’e ojehechaukahápe, ndohasamo’ãi umi mba’e Che ha’eva’ekue peẽme oñekumplipa peve.

35 Og̃uahẽtarõ jepe umi ára, pe yvága ha yvy opataha; upevére, che ñe’ẽnguéra ndopamo’ãi, opaitéva katu oñekumplíta.

36 Ha Che ha’éma haguéicha, umi aragua jeiko’asy rire, ha umi yvagagua pokatu ojeityvyro rire, upérõ ojekuaáta upe Kuimba’e Ra’y rechaukaha yvágape, ha upérõ opa trívu yvy arigua ojahe’óta; ha ohecháta hikuái Kuimba’e Ra’y oúva umi yvága araípe, pokatu ha tuicha glória reheve;

37 Ha pe oñongatúva che ñe’ẽ noñembotavymo’ãi, upe Kuimba’e Ra’y oútagui ha omboúta henonderã hi’anhelkuéra turupu atã reheve, ha ombyatýta hikuái ijeporavopyrekuéra irundy yvytúgui, peteĩ yvága apýra guive ambue peve.

38 Ko’ág̃a peikuaa igéra rehegua parávola—Hakãnguéra ikyrỹivo gueteri, ha oñepyrũ hogue heta, peikuaa arahaku hi’ag̃uimaha;

39 Upeichaite umi che aiporapyréva, ohecha vove hikuái opa ko’ã mba’e, oikuaáta hikuái ha’e hi’ag̃uimaha, jepeve okẽmema;

40 Ha katu upe ára ha aravógui, avave ndoikuaái; nahániri, ni Tupã anhelkuéra yvágape, ha katu che Ru añónte.

41 Ha katu Noé arapeguáicha, upéichata avei Kuimba’e Ra’y jejúpe;

42 Oikótagui hendivekuéra oiko haguéicha umi ára amaguasu mboyve; upe ára Noé oike peve árkape, ha’ekuéra okaru ha hoy’úgui, omenda ha oñeme’ẽgui ñemendápe;

43 Ha ndoikuaáikuri hikuái og̃uahẽ meve amaguasu ha oguerahapaite chupekuéra; upéichata avei Kuimba’e Ra’y jeju.

44 Upérõ oñekumplipáta upe ojehaíva, umi ára pahápe, mokõi oĩtaha upe ñúme, ha peteĩ ojegueraháta, ha ambue ojehejáta;

45 Mokõi oñembisotahína molínope, peteĩ ojegueraháta, ha ambue ojehejáta;

46 Ha upe Che ha’éva peteĩme, Che ha’e opavavépe; pejesarekóke upévare, ndapeikuaáigui aravo pende Jára ouha.

47 Ha katu peikuaa kóva, pe kuimba’e óga jára oikuaávora’e mba’e vihíliapepa oúta pe mondaha, ha’e oñangarekótakuri, ha ndohejamo’ãi ojeike hógape, ha katu oĩtakuri ñembosako’ípe.

48 Upévare, peime avei peẽ ñembosako’ípe, upe ára peimo’ã’ỹ jave oútagui upe Kuimba’e Ra’y.

49 Mávapa, upérõ, pe tembiguái ijeroviareko ha iñarandúva, ijára omoĩva’ekuépe hóga majordómo ramo, ome’ẽ hag̃ua chupekuéra tembi’u hi’árape?

50 Ojehovasapyre upe tembiguái, ijára ou vove, ojejuhúva chupe upéicha ojapóvo; ha añetehápe Che ha’e peẽme, ha’e ojapóta chugui sãmbyhyhára opa imba’erepykuéra ári.

51 Ha katu upe tembiguái aña he’íramo ikorasõme: Che jára ombo’are ijeju,

52 Ha oñepyrũ ojopy ikonsiervokuérape, ha okaru ha hoy’u umi oka’úvandi.

53 Upe tembiguái jára oúta ára kóva oha’arõ’ỹ vove chupe, ha aravo ha’e oikuaa’ỹvape,

54 Ha omboja’óta chupe pehẽnguépe, ha ohechaukáta chupe ipehẽngue umi hovamokõivandi; upépe oĩta jahe’o ha tãi pururũ.

55 Ha upéicha ou umi iñañáva paha, Moisés profesíape oĩháicha, he’íva: Ojeipe’áta hikuái tavayguakuéra apytégui; ha katu ndaha’éi gueteri yvy paha, ha katu hi’ag̃uíma.