Escritura-kuéra
Ñepyrũmby

Ñepyrũmby

Pérla Hepyetéva ha’e matéria ha téma poravopyre hepyetéva, ohóva heta Jesucristo Tupao Santokuéra Ára Pahapegua jerovia ha doctrina imba’eguasúvare. Proféta José Smith ombohasa ha ombosako’iva’ekue ko’ã téma ha hetave oñeguenohẽva’ekue umi Tupao kuatiahai hi’árape.

Peteĩha jehaipyre aty osẽva’ekue Pérla Hepyetéva título reheve, ojapova’ekue Élder Franklin D. Richards, upe jave ha’eva’ekue Dóse Konsého miembro ha Misión Británica presidente. Oñeguenohẽkuri ko’ã jehai imba’eguasúva, sa’i oñemosarambiva’ekue José Smith árape, hasy’ỹve hag̃ua opavavépe ohupyty. Hetavévo ohóvo Tupao miembro Europa ha Amérikape, tekotevẽkuri ojehupyty’uka ko’ã téma. Pérla Hepyetéva ojeporúkuri heta hendápe, ha upéi oiko chugui peteĩva umi Tupaogua kuatiajehaipyre kanóniko oñemoneĩva’ekue Primera Presidencia ha conferencia general mba’e’apo rupi, ojejapova’ekue Salt Lake City-pe, octubre 10, 1880-pe.

Tupao oikotevẽháicha, ojejapókuri heta jehechajey ipypeguágui. Ary 1878-pe, oñemoĩvékuri Moisés Kuatiañe’ẽ pehẽ, noĩriva’ekue edisiõ peteĩháme. Ary 1902-pe ojepe’ákuri Pérla Hepyetéva pehẽ jehai oñeguenohẽmava’ekue avei Doctrina ha Konveniokuérape. Kapítulo ha versíkulo ñemboja’o, nóta reheve páhina guýpe, ojejapókuri 1902-pe. Peteĩha ñeguenohẽ páhinape mokõi kolumnape, ha índise reheve, ojejapókuri 1921-pe. Ndojejapóikuri mba’evéichagua ñemoambue abril 1976 peve, oñemoĩrõguare mokõi rrevelasiõ. Ary 1979-pe, ojepe’ákuri umi mokõi rrevelasiõ Pérla Hepyetévagui ha oñemoĩ Doctrina ha Konveniokuérape, ko’ág̃a oĩva umi sección 137 ha 138 ramo. Ojejapókuri sa’i ñemoambue edisiõ ko’ág̃aguápe, upe jehaipy ohoporãve hag̃ua umi dokuménto upemboyveguándi.

Ko oúva ha’e mbykymi ñepyrũmby upe matéria ko’ág̃a oguerekóvagui ipype:

  1. Moisés Kuatiañe’ẽguigua Jeporavopyrekuéra. Peteĩ Génesis kuatiañe’ẽguigua pehẽnguéra José Smith ñembohasa ojapova’ekue Biblia-gui, upe ha’e omoñepyrũva’ekue junio 1830-pe.

  2. Abraham Kuatiañe’ẽ. Peteĩ ñembohasa oñeinspiráva Abraham ohaiva’ekuégui. José Smith omoñepyrũva’ekue upe ñembohasa 1835-pe, ohupyty rire umi papíro egipcio. Upe ñembohasa oñeguenohẽ ojoapykuéri Times and Seasons-pe, oñepyrũvo marzo 1, 1842-pe, Nauvoo, Illinois-pe.

  3. José Smith—Mateo. Peteĩ Mateo testimónio pehẽ, ojepe’ava’ekue José Smith ñembohasa ojapova’ekue Biblia-gui (tojehecha Doctrina ha Konveniokuéra 45:60–61, oĩháme mbo’epy divíno oñemoñepyrũ hag̃ua Testaménto Pyahu ñembohasa).

  4. José Smith—Tembiasakue. José Smith testimonio ha historia oficial jeporavokuéra, pe ha’e ha umi ihaiharakuéra ombosako’iva’ekue 1838–1839-pe, ha oñeguenohẽva’ekue ojoapykuéri Times and Seasons-pe, Nauvoo, Illinois-pe, oñepyrũvo marzo 15, 1842-pe.

  5. Fe rehegua Artikulokuéra, Jesucristo Tupao Santokuéra Ára Pahapeguáva. Peteĩ José Smith deklarasiõ oñeguenohẽva’ekue Times ha Seasons-pe, marzo 1, 1842-pe, Tupao rembiasakue mbyky reheve, opavave oikuaava’ekue Wentworth kuatiáramo.