1 Ha ojehu Ñandejára oñe’ẽkuri Moisés-pe, he’ívo: Péina ápe, Che aikuaauka ndéve ko yvága ha ko yvy rehegua; ehai umi ñe’ẽ Che ha’éva. Che ha’e pe iñepyrũmby ha Ipaha, pe Tupã Ipu’akapáva; che Unihénito rupive Che ajapova’ekue ko’ã mba’e; héẽ, iñepyrũme Che ajapova’ekue yvága ha yvy reñembo’yha ári.

2 Ha yvy isarambipa ha nandi; ha Che ajapókuri tou ypytũ pe y pypuku ape ári; ha che Espíritu oñemomýikuri upe y ape ári; Che ha’égui Tupã.

3 Ha Che, Tupã, ha’ékuri: Toiko tesape; ha oikókuri tesape.

4 Ha Che, Tupã, ahecha tesape; ha iporãha pe tesape. Ha Che, Tupã, amboja’o tesape umi pytũmby apytégui.

5 Ha Che, Tupã, ambohéra tesape Ára; ha umi pytũmbýpe Che ahenói Pyhare; ha kóva ajapo che pokatu ñe’ẽ rupive, ha ojejapo Che ha’e haguéicha; ha ha’eva’ekue ka’arupytũ ha pyhareve ára peteĩháme.

6 Ha jeyve, Che Tupã, ha’ékuri: Toiko peteĩ arapy pe y mbytépe; ha oiko, upe Che ha’e haguéicha; ha Che ha’ékuri: Toñemboja’o umi y ykuéragui; ha upéicha oiko;

7 Ha Che, Tupã, ajapókuri arapy ha amboja’o ykuéra; héẽ, umi y guasu arapy guypegua umi y oĩvagui arapy ári; ha oiko, upe Che ha’e haguéicha.

8 Ha Che, Tupã, ambohéra pe arapy Yvága; ha ha’ékuri ka’arupytũ ha pyhareve ára mokõiháme.

9 Ha Che, Tupã, ha’ékuri: Toñembyaty peteĩ hendápe umi y oĩva yvága guýpe, ha oiko; ha Che, Tupã, ha’ékuri: tojehecha umi yvy ikãva; ha oiko.

10 Ha Che, Tupã, ahenói ikãvape Yvy; ha umi y ñembyatýpe Che ahenói Yguasu; ha Che, Tupã, ahecha opa mba’e Che ajapova’ekue iporãha.

11 Ha Che, Tupã, ha’ékuri: Pe yvy tomoheñói kapi’ipe, ha pe ñana tome’ẽ yvara’ỹi, pe yvyramáta hi’áva tome’ẽ yva, heseguáicha, ha pe yvyramáta ta’iha, ijyvara’ỹi ha’ỹiva ijehegui yvy ári; ha oiko, Che ha’e haguéicha.

12 Ha pe yvy omoheñóikuri kapi’ipe, opa ñana ome’ẽvo yvara’ỹi hesegua, ha pe yvyramáta ome’ẽvo yva, yvara’ỹi oĩvo ipype, heseguáicha; ha Che, Tupã, ahechákuri opa mba’e Che ajapova’ekue iporãha.

13 Ha ha’ékuri ka’aru ha pyhareve ára mbohapyhápe.

14 Ha Che Tupã, ha’ékuri: Toiko tesape yvága arapýpe, omboja’o hag̃ua ára pyharégui, ha taha’e umi techaukaha, ha umi arajere, ha arakuéra, ha añokuéra;

15 Ha taha’e ohesapévaramo yvága arapýpe, ohesape hag̃ua pe yvy; ha oiko.

16 Ha Che, Tupã, ajapova’ekue mokõi tesape guasu; tesape tuichavéva oisãmbyhy hag̃ua ára, ha tesape michĩvéva oisãmbyhy hag̃ua pyhare, ha tesape tuichavéva ha’ékuri kuarahy, ha tesape michĩvéva ha’ékuri jasy; ha ojejapókuri avei mbyjakuéra jepe che ñe’ẽ he’iháicha.

17 Ha Che, Tupã, amoĩkuri umíva yvága arapýpe ohesape hag̃ua yvy,

18 Kuarahy oisãmbyhy hag̃ua ára, ha jasy oisãmbyhy hag̃ua pyhare, ha oñemboja’o hag̃ua tesape pytũmbýgui; ha Che, Tupã, ahecha opa mba’e Che ajapova’ekue iporãha;

19 Ha ha’ékuri ka’aruputũ ha pyhareve ára mbohapyhápe.

20 Ha Che, Tupã, ha’ékuri: Tomoheñói ykuéra heta mymba omýiva ha oikovéva, ha guyrakuéra ovevéva yvy ári yvagagua arapy guasúpe.

21 Ha Che, Tupã, ajapókuri umi valléna tuicháva, ha opa tekove oikove ha omýiva, heseguáicha, umi ykuéra heta omoheñóiva, ha opa guyra ipepóva, heseguáicha; ha che, Tupã, ahecha opa mba’e Che ajapova’ekue iporãha.

22 Ha Che, Tupã, ahovasákuri umívape, ha’évo: Penereñói ha peñemboheta, ha pemyenyhẽ yguasugua ykuéra; ha toñemboheta guyrakuéra yvy ári;

23 Ha ha’ékuri ka’aru ha pyhareve ára kíntope.

24 Ha Che, Tupã, ha’ékuri: Tomoheñói yvy umi mymba oikovéva heseguáicha: mymba’atýva ha umi otyryýva, ha umi tymba yvy arigua, heseguáicha, ha oiko;

25 Ha Che, Tupã, ajapókuri umi tymba yvy arigua heseguáicha, ha mymba’aty heseguáicha, ha opa otyryrýva yvy ári, heseguáicha; ha Che, Tupã, ahecha opa ko’ã mba’e iporãha.

26 Ha Che, Tupã, ha’ékuri che Unihénitope, pe oikova’ekue chendive iñepyrũmby guive: Jajapo yvypórape ñane ra’angáicha, ñandeichagua; ha oiko. Ha Che Tupã, ha’ékuri: Taipu’aka umi pira yguasupeguáre, guyrakuéra yvytuguáre, mymba’atýre, opa yvy ári ha opa mymba yvy ári otyryrývare.

27 Ha Che, Tupã, ajapókuri yvypórape che ra’angáicha, che Unihénito ra’angáicha ajapókuri chupe; kuimba’e ha kuña Che ajapo chupekuéra.

28 Ha Che, Tupã, ahovasa umíva ha ha’e chupekuéra: Penereñói ha peñemboheta, ha pemyenyhẽ yvy ha pemoĩ pende poguýpe; ha pende pu’aka pirakuéra ypeguáre, guyrakuéra yvytuguáre, ha opa mba’e oikovéva omýiva yvy árire.

29 Ha Che, Tupã, ha’ékuri yvypórape: Péina ápe, Che ame’ẽkuri ndéve opa ñana ome’ẽva yvara’ỹi, oĩva opa yvy ape ári, ha opa yvyramáta oĩtahápe upe yva ome’ẽva yvara’ỹi; ha’éta tembi’u ndéve g̃uarã.

30 Ha opa ñumegua mymbakuérape, ha opa guyra yvytureguápe, ha opa mymba otyryrrývape yvy ári, umi Che ame’ẽvape tekove, oñeme’ẽta opa ñana ipotĩva tembi’urã; ha oiko Che amanda haguéicha jepeve.

31 Ha Che, Tupã, ahechákuri opa mba’e Che ajapova’ekue, ha péina ápe, opa mba’e Che ajapova’ekue iporãitereíkuri; ha ha’ékuri ka’arupytũ ha pyhareve ára sexto-pe.