Moisés Kuatiañe’ẽguigua
poravopyrekuéra

1 Umi Tupã ñe’ẽ, ha’e he’iva’ekue Moisés-pe, peteĩ ára Moisés ojehupírõguare peteĩ yvyty ijyvatetévape,

2 Ha ha’e ohechákuri Tupãme ojováre, ha ha’e oñe’ẽ hendive, ha Tupã glória ojaho’i Moisés-pe; upévare Moisés ikatúkuri ogueropu’aka iñeime.

3 Ha Tupã oñe’ẽ Moisés-pe, he’ívo: Péina ápe, Che ha’e Tupã Ñandejára Ipu’akapáva, ha Opa’ỹva ha’e che réra; Che ha’égui umi ára oñepyrũ’ỹva ha ary opa’ỹva; ha ndaha’éipa kóva opa’ỹva?

4 Ha, péina ápe, nde ha’e che ra’y; upévare ema’ẽ, ha Che ahechaukáta ndéve umi che po apopyre; ha katu ndaopavavéi, che rembiapokuéra opa’ỹgui, ha avei che ñe’ẽnguéra, araka’eve ndopáigui.

5 Upévare, avave ndaikatúi ohecha opa che rembiapokuéra ohecha’ỹre opa che glória; ha avave ndaikatúi ohechapa che glória ha upéi opyta hetépe ko yvy ári.

6 Ha che aguereko peteĩ tembiapo ndéve g̃uarã, Moisés, che ra’y; ha nde che Unihénito joguaha; ha Che Unihénito ha’e ha ha’éta pe Salvador, henyhẽgui grásia ha añeteguágui; ha katu ndaipóri Tupã ndaha’éiramo che, ha opa mba’e oĩ che renondépe, Che aikuaágui opa umíva.

7 Ha ko’ág̃a, péina ápe, kóvante ahechaukáta ndéve, Moisés, che ra’y, nde reimégui múndope, ha ko’ág̃a Che ahechauka ndéve.

8 Ha ojehu Moisés omaña, ha ohecha múndo ha’e ojejapohague ári; ha Moisés ohecha múndo ha umi opaha, ha opa yvypóra ra’ykuéra ha’éva ha ojejapova’ekue; tuicha ohecharamóva ha ohechapyrãva.

9 Ha ojei Moisés-gui Tupã ñeime, ha noĩvéima iglória Moisés ári; ha Moisés opyta ha’eño; ha opytávo ha’eño, ho’a yvýpe.

10 Ha ojehu heta aravo pukukue aja Moisés ndaikatúi ohupytyjey imbarete rekoite kuimba’éicha, ha he’i ijupe: Kóva rupi, ko’ág̃a aikuaa yvypóra mba’eveha, mba’e che araka’eve aimo’ãvakuri.

11 Ha katu ko’ág̃a che resa tee ohechákuri Tupãme; ha katu ndaha’éi che resa rekoitépe, ha katu che resa espiritual; che resa rekoite ndaikatumo’ãiguikuri ohecha; chepirupátagui ha amanótaguikuri hovake; ha katu iglória cheaho’íkuri; ha ahecha hova, añemoambuégui henondépe.

12 Ha ojehu Moisés he’ívo ko’ã ñe’ẽ, péina ápe, ou Satana oipy’ara’ã hag̃ua chupe, he’ívo: Moisés, kuimba’e ra’y, chetupãitũ.

13 Ha ojehu Moisés oma’ẽ Satanáre ha he’i chupe: Mávapa nde? Péina ápe, che ha’égui peteĩ Tupã ra’y, Iñunihénito joguaha; ha moõpa oime nde glória, rotupãitũ hag̃ua?

14 Péina ápe, ndaikatumo’ãikuri ahecha Tupãme, ndaha’éiramo cheaho’íra’e iglória ha añemoambue henondépe. Ha katu che ningo ikatu rohecha yvypóra rekóicha. Na’añetéipa kóva?

15 Ojehovasapyre che Tupã réra, ndojeipáigui chehegui Ijespíritu, térã upeicha’ỹ katu, moõ oime nde glória, pytũmbýgui chéve g̃uarã? Ha ahechakuaa nde ha Tupã apytégui; Tupã he’ígui chéve: Etupãitũ Tupãme, chupe añónte reservítagui.

16 Tereho ko’águi Satana; ani chembotavy; Tupã he’ígui chéve: Nde ha’e che Unihénito joguaha.

17 Ha ha’e avei ome’ẽva’ekue chéve tembiapoukapykuéra, cherenoirõguare jukeri hendývagui, he’ívo: Ehenói Tupãme che Unihénito rérape ha chetupãitũ.

18 Ha he’ive Moisés: Nambopahamo’ãi Tupãme ñehenói; aguereko ambue mba’e aporandu hag̃ua chupea: iglória oĩgui che ári, upévare che ikatu ahechakuaa nde ha ha’e apytégui. Tereho ko’águi, Satana.

19 Ha ko’ág̃a, Moisés he’ívo ko’ã ñe’ẽ, Satana hatã osapukái ha okororõ yvy ári, ha omanda he’ívo: Che upe Unihénito, chetupãitũ.

20 Ha ojehu Moisés oñepyrũ okyhyjeterei; ha oñepyrũvo okyhyje, ohecha pe añaretã vy’a’ỹ. Upevére, ohenóivo Tupãme, ohupyty mbarete, ha omanda he’ívo: Chereja, Satana, ko Tupã peteĩete añómente che atupãitútagui, ha’éva upe glória rehegua Tupã.

21 Ha upérõ Satana oñepyrũ oryrýi, ha osusũ yvy; ha Moisés ohupyty mbarete, ha ohenói Tupãme, he’ívo: Pe Unihénito rérape, tereho ko’águi Satana.

22 Ha ojehu Satana osapukái hatã, tasẽ ha jahe’ópe ha tãi pururũ reheve; ha ojei upégui, héẽ, Moisés oĩhágui, ha ndohechavéima ha’e chupe.

23 Ha ko’ág̃a Moisés otestifika ko mba’égui; ha katu ndaipóriva yvypóra ra’ykuéra apytépe tekoñaña rupi.

24 Ha ojehu Satana osẽvo Moisés oĩhágui, Moisés ojesarupi yvágape, henyhẽvo Espíritu Sántogui, otestifikáva Túva ha Ta’ýragui:

25 Ha ohenóivo Tupã réra, ha’e ohechajey iglória, ojaho’ígui chupe; ha ohendu peteĩ ñe’ẽpu he’íva: Ejehovasapyre, Moisés, Che, pe Ipu’akapáva, roiporavógui, ha nembaretevéta heta ýgui, ko’ãva iñe’ẽrendútagui nde remandávare, nde ha’erõguáicha Tupã.

26 Ha péina ápe, Che aime nendive, umi nde ára paha peve; remosãsótagui che tavayguakuérape ñeñapytĩmbýgui, Israel-pe jepeve, che aiporavopyréva.

27 Ha ojehu, oñe’ẽ aja gueteri upe ñe’ẽpu, Moisés oma’ẽkuri ha ohecha pe yvy, héẽ, ohechapaite; ha ndaipóri mba’e pehẽngue’i ohecha’ỹva, ohechakuaávo umíva Tupã Espíritu rupive.

28 Ha ha’e ohecha avei umi upépe oikóva, ha ndaipóri ni peteĩ ánga ohecha’ỹva; ha ohechakuaákuri umíva Tupã Espíritu rupive; ha hetákuri ipapapy, jepe ojeipapakuaa’ỹva umi yvyku’i yguasu rembe’ypeguáicha.

29 Ha ohecha heta tetã; ha opaitéva oñembohéra yvy, ha oĩkuri oikóva ijape ári.

30 Ha ojehu Moisés ohenói Tupãme, he’ívo: Ajerure ndéve eremi chéve, mba’érepa ko’ã mba’e kóicha, ha mba’e rupive rejapóra’e?

31 Ha péina ápe, Ñandejára glória ojaho’i Moisés-pe, ha Moisés oĩkuri Tupã oĩháme ha oñe’ẽ hendive ojováre. Ha Tupã Ñandejára he’i Moisés-pe: Che proposito-rãite Che ajapova’ekue ko’ã mba’e. Kóina ápe oĩ arandu ha opyta chepype.

32 Ha che ñe’ẽ pokatu rupive, Che ajapova’ekue umíva, ha’éva che Ra’y Unihénito, grásia ha añeteguágui henyhẽva.

33 Ha ojeipapakuaa’ỹva múndo Che ajapova’ekue; ha avei ajapova’ekue che propósito-rãite; ha Ta’ýra rupive Che ajapova’ekue umíva, ha’éva che Ra’y Unihénito.

34 Ha peteĩha kuimba’e opa kuimba’égui Che ahenoiva’ekue Adán, ha’éva heta.

35 Ha katu ame’ẽnte ndéve peteĩ ñemombe’u ko yvy ha ipype oikóvagui. Ha péina ápe, oĩgui heta múndo opava’ekue che pokatu ñe’ẽ rupi. Ha heta oĩva ko’ág̃a, ha ojepapakuaa’ỹ umíva yvypórape g̃uarã; ha katu opa mba’e ojeipapa chéve g̃uarã, chemba’égui ha Che aikuaa umíva.

36 Ha ojehúkuri Moisés oñe’ẽ Ñandejárape, he’ívo: Ndeporiahuverekóke ne rembiguáindi, O Tupã, ha emombe’u chéve ko yvy rehegua ha ipype oikóvare, ha avei yvagakuéragui; ha upéicharõ ne rembiguái ovy’áta.

37 Ha Tupã Ñandejára oñe’ẽ Moisés-pe, he’ívo: Yvagakuéra heta, ha yvypóra ndaikatúi oipapa; ha katu ojeipapa chéve g̃uarã, chemba’égui umíva.

38 Ha opataháicha peteĩ yvy ijyvagakuéra reheve, upéicha ambuéva iñapysẽta; ha ndopái che rembiapokuéra, ni umi che ñe’ẽ.

39 Péina ápe, kóva ha’égui che rembiapo ha che glória—toiko yvypóra ñemanokuaa’ỹ ha tekove ijapyra’ỹva.

40 Ha ko’ág̃a, Moisés, che ra’y, Che añe’ẽta ndéve ko yvy rehe, reimeha ári; ha rehaíta umi mba’e Che añe’ẽtava.

41 Ha ára yvypóra ra’ykuéra nomomba’éi vove umi che ñe’ẽ ha oipe’a heta umíva upe kuatiañe’ẽ nde rehaívagui, péina ápe, Che amopu’ãta ambue ndeichagua; ha oĩ jeýta umíva yvypóra ra’ykuéra apytépe—opa ogueroviáva apytépe.

42 (Ko’ã ñe’ẽ oje’ékuri Moisés-pe yvyty ári, upe téra ojeikuaa’ỹtava yvypóra ra’ykuéra apytépe. Ha ko’ág̃a oje’e ndéve umíva. Ani rehechauka avavépe, ndaha’éirõ umi ogueroviávape. Taupéicha. Amén.)