1 Ha ojehu, Che Tupã Ñandejára, amosẽ rire chupekuéra, Adán oñepyrũ oñemitỹ ha ipu’aka opa tymba ñumeguáre, ha ho’u imbujape isyva ry’áire, Che, Ñandejára amanda haguéicha chupe. Ha Eva, hembireko, omba’apo avei hendive.

2 Ha Adán oiko hembireko Eva ndive, ha chugui heñói chupe g̃uarã ta’ýra ha tajyrakuéra, ha oñepyrũ oñemboheta ha omyenyhẽ yvy.

3 Ha upe ára guive, Adán ra’y ha rajykuéra oñepyrũ oñemboja’o mokõi mokõi yvy ári, ha oñemitỹ, ha oñangareko ovecha’atýre ha omoheñói avei hikuái ta’ýra ha tajyrakuéra.

4 Ha Adán ha hembireko, Eva, ohenói Ñandejára réra, ha ohendu hikuái Ñandejára ñe’ẽpu, oñe’ẽva chupekuéra Jardín de Edén guive, ha ha’ekuéra ndohechái chupe; ojepe’águi hikuái henondégui.

5 Ha ha’e ome’ẽ chupekuéra tembiapoukapykuéra otupãitũva’erãha Ñandejára Itupãme, ha oikuave’ẽva’erãha umi ijovecha’aty ypykue, peteĩ ñeme’ẽmbýramo Ñandejárape. Ha Adán iñe’ẽrendu Ñandejára rembiapoukapykuérare.

6 Ha heta ára rire, peteĩ Ñandejára ánhel ojehechauka Adán-pe he’ívo: Mba’ére reikuave’ẽ temikuave’ẽ Ñandejárape? Ha Adán ombohovái chupe: Ndaikuaái, ha katu Ñandejára omanda chéve.

7 Upérõ oñe’ẽ upe ánhel he’ívo: Kóva ha’e Túva Unihénito jehasa’asy joguaha, henyhẽva grásia ha añeteguágui.

8 Upévare, rejapóta opa mba’e rejapóva pe Ta’ýra rérape, ha reñearrepentíta ha rehenóita Tupãme pe Ta’ýra rérape akoiete g̃uarã.

9 Ha upe árape oguejy Adán ári Espíritu Santo, ome’ẽva testimónio Túva ha Ta’ýragui, he’ívo: Che ha’e pe Túva Unihénito iñepyrũmby guive, ko’ág̃a guive ha akoiete g̃uarã, pe re’a haguéicha ikatu hag̃ua reñerredimi, ha avei opa yvypóra, jepe opa umi oipotáva.

10 Ha Adán ohovasa Tupãme upe ára ha henyhẽte, ha oñepyrũ oprofetisa opa yvy arigua rogayguáre, he’ívo: Ojehovasapyre Tupã réra, che jejapyhara rupive ajehesape’a, ha aguerekóta vy’apavẽ ko tekovépe, ha che retépe ahechajeýta Tupãme.

11 Ha Eva, hembireko, ohendu opa ko’ã mba’e ha ovy’a, he’ívo: Ndahahéi rire ore jejapyhara rupi, araka’eve ndoroguerekoiva’eramo’ã ñemoñare, ni araka’eve ndoroikuaamo’ãikuri iporãva ha ivaíva, ni ore rredensiõ vy’apavẽ, ni pe tekove ijapyra’ỹva Tupã ome’ẽva opa umi iñe’ẽrendúvape.

12 Ha Adán ha Eva ohovasa Tupã réra, ha oikuaauka opa mba’e ita’ýra ha itajyrakuérape.

13 Ha Satana ou ijapytepekuéra he’ívo: Che avei ha’e Tupã ra’y; ha ha’e omanda chupekuéra, he’ívo: Ani peguerovia; ha ndogueroviái hikuái, ha ohayhuve hikuái Satanáme Tupãgui. Ha upe ára guive yvyporakuéra oñepyrũ oñeme’ẽ hete oipotávape, ho’o oipotávape ha añaguiguávape.

14 Ha Tupã Ñandejára ohenói tekovekuérape opárupi, Espíritu Santo rupive, ha omanda chupekuéra toñearrepenti;

15 Ha opavave ogueroviáva Ta’ýrape ha oñearrepentíva iñangaipakuéragui, ojesalváta; ha opavave ndogueroviáiva ni noñearrepentíriva, oñekondenáta; ha umi ñe’ẽ osẽkuri Tupã jurúgui tembiapoukáramo; upévare, oñekumplíta.

16 Ha Adán ha Eva, hembireko, nombopahái hikuái Tupãme ñehenói. Ha Adán oiko Eva, hembirekóndi, ha ha’e hyeguasu ha imemby Caín ha he’i: Oñeme’ẽ chéve Ñandejáragui peteĩ kuimba’e; upévare, ikatu ha’e nombotovéi iñe’ẽnguéra. Ha katu péina ápe, Caín nohendúi he’ívo: Mávapa Ñandejára, aikuaa hag̃ua che chupe?

17 Ha ha’e hyeguasu jey ha imemby Abel, ityvýra. Ha Abel ohendu Ñandejára ñe’ẽ. Ha Abel ha’e ovecha rerekua, ha katu Caín oñemitỹ yvy.

18 Ha Caín ohayhuve Satanáme Tupãgui. Ha Satana omanda chupe, he’ívo: Ejapo peteĩ ñeme’ẽmby Ñandejárape.

19 Ha ára ohasávo, ojehu Caín ogueru yvy ñemitỹnguégui peteĩ ñeme’ẽmby Ñandejárape.

20 Ha Abel avei ogueru ijovecha ra’ykuéra ypykuégui, ha ikyrakuégui. Ha Ñandejára oguerohory Abel ha iñeme’ẽmby;

21 Ha katu Caín ha iñeme’ẽmby, ha’e ndoguerohorýi. Ág̃a katu, Satana oikuaákuri kóva, ha ovy’a. Ha Caín ipochyeterei, ha hova puku.

22 Ha Ñandejára he’i Caín-pe: Mba’éreiko ndepochy? Mba’ére nde rova puku?

23 Rejapóramo oĩporãva, rejeguerohorýta; ha nderejapóiramo oĩporãva, okẽmema oĩ angaipa, ha Satana ndeipota; ha ndaha’éirõ rejapysaka che rembiapoukapykuérare, Che rome’ẽta chupe, ha oikóta nderehe ha’e oipotaháicha. Ha nde reisãmbyhýta chupe;

24 Ko’ág̃a guive tenondeve gotyo nde ha’étagui umi hi’añetegua’ỹ moñepyrũhare; reñehenóita Ñehundi; nde avei reiméguikuri múndo mboyve.

25 Ha oje’éta ára oúvape—Ko’ã tembiapoky’a ouhague Caín-gui; ha’e ombotovégui ñemoñe’ẽ tuichavéva Tupãgui oúva; ha kóva ha’e peteĩ ñe’ẽngái Che amoĩtava nde ári, reñearrepenti’ỹramo.

26 Ha Caín ipochyetereíkuri, ha nohenduvéima Ñandejára ñe’ẽpu, ni Abel-pe, ityvýra, oikóva marangatúpe Ñandejára renondépe.

27 Ha Adán ha hembireko ojahe’o Ñandejára renondépe, Caín ha ijoyke’ykuéra rupi.

28 Ha ojehu Caín ojapyhy hembirekorã peteĩ ijoyke’ykuéra rajy, ha ohayhuve hikuái Satanáme Tupãgui.

29 Ha Satana he’i Caín-pe: Eñe’ẽme’ẽ chéve nde ahy’óre, ha remombe’úramo remanóta; ha emoñe’ẽme’ẽ nde joyke’ykuérape iñakãre ha Tupã oikovévare, ani hag̃ua omombe’u hikuái, oikuaaukáramo, añetehápe omanóta hikuái; ha kóva ani hag̃ua oikuaa nde ru; ha ko ára che amoĩta nde ryvy Abel nde pópe.

30 Ha Satana oñe’ẽme’ẽ Caín-pe ojapotaha ha’e omandaháicha. Ha opa ko’ã mba’e ojejapókuri ñemiháme.

31 Ha Caín he’i: Añetehápe che ha’e Mahán, ko mba’eñemi guasu jára, ikatu hag̃ua aporojuka ha ahupyty mba’erepy. Upévare, Caín oñehenói Jára Mahán, ha ha’e oñembotuicha hekoñañáme.

32 Ha Caín osẽ ñúre, ha oñe’ẽ Abel, ityvýrandi. Ha ojehu oĩ aja hikuái ñúme, Caín oñemoĩ Abel, ityvýra rehe, ha ojuka chupe.

33 Ha oñembotuicha Caín hembiapokuére, he’ívo: Chesãsóma; katuete oiméne ho’áta che pópe umi che ryvy ovecha’aty.

34 Ha Ñandejára he’i Caín-pe: Moõ oime Abel, nde ryvy? Ha ha’e ombohovái: Ndaikuaái. Chéiko che ryvy rerekua mba’e?

35 Ha Ñandejára he’i chupe: Mba’e rejapóra’e? Nde ryvy ruguy ñe’ẽpu osapukai’asy chéve yvy guive.

36 Ha ko’ág̃a reñemoñe’ẽngáita yvýgui ojejurupe’ava’ekue omog̃uahẽ hag̃ua nde pógui nde ryvy ruguy.

37 Reñemitỹ vove nome’ẽmo’ãi ndéve imbaretégui ko ára guive tenondeve gotyo. Kañyháme oikóva ha hoga’ỹva ramo nde ha’éta yvy ári.

38 Ha Caín he’i Ñandejárape: Satana chepy’ara’ã umi che ryvy ovecha’aty rupi. Ha che chepochýkuri avei, ñeme’ẽmby reguerohorýgui ha che mba’éva nahániri; che jehavira tuichave ikatúvagui agueropu’aka.

39 Péina ápe, che mosẽ ko árape Ñandejára rova renondégui, ha nde rova renondégui añemokañýta; ha kañyháme aikóta ha hoga’ỹva ramo ko yvy ári; ha ojehúta oimeraẽva chejuhúva chejukáta, che rembiapovaikuéra rupi, ko’ã mba’e noñeñomi haguére Ñandejáragui.

40 Ha Che, Ñandejára, ha’e chupe: Oimeraẽva ndejukáva, siéte jeyve oñemoĩta hese vengánsa. Ha Che, Ñandejára, amoĩkuri Caín-re peteĩ márka, ani hag̃ua oimeraẽva ojuhúva ojuka chupe.

41 Ha Caín ojepe’a Ñandejára renondégui, ha hembireko ha heta ijoyke’ykuérandi oiko Nod retãme, Edén kuarahyresẽ gotyo.

42 Ha Caín oiko hembirekóndi, ha ha’e hyeguasu ha imemby Enoc, ha ha’e avei omoheñói heta ta’ýra ha tajýra. Ha ha’e omopu’ã peteĩ táva ha ombohéra upe táva ita’ýra rérape, Enoc.

43 Ha Enoc-pe heñói Irad ha ambue ta’ýra ha tajyrakuéra. Ha Irad omoheñói Mehujael ha ambue ta’ýra ha tajyrakuérape. Ha Mehujael omoheñói Metusael ha ambue ta’ýra ha tajyrakuérape. Ha Metusael omoheñói Lamec-pe.

44 Ha Lamec ojapyhy ijupe g̃uarã mokõi tembireko; peteĩ héra Ada, ha ambue héra Zila.

45 Ha Ada imemby Jabal; ha’évakuri umi oga’aópe oiko ypyva’ekue ru; ha ko’ãva umi omongakuaáva mymba’aty; ha ityvýra réra Jubal, ha’éva opa umi ombopu ypyva’ekue árpa ha mimbyguasu ru.

46 Ha Zila imemby Tubal Caín, peteĩ oporohekombo’éva opáichagua tembiapo bronce ha hierro-guiguáva. Ha Tubal Caín reindy hérakuri Naama.

47 Ha Lamec he’i hembirekokuéra Ada ha Zila-pe: Pehendu che ñe’ẽpu, Lamec rembirekokuéra, pejapysaka che ha’évare; che ajukágui peteĩ kuimba’e che mba’evairã, ha peteĩ mitãrusúpe che mba’evairã.

48 Caín-pe oñevengátarõ siéte jeyve, añetehápe Lamec-pe setenta y siete jeyvéta;

49 Lamec ojapóguikuri peteĩ konvénio Satanándi, Caín ojapoháicha, oikóguikuri chugui Jára Mahán, mba’eñemi guasu Satana ome’ẽva’ekue Caín-pe jára; ha Irad, Enoc ra’y, oikuaávo imba’eñeminguéra, oñepyrũ oikuaauka Adán ra’ykuéra apytépe;

50 Upévare Lamec, ipochyetereígui, ojuka chupe; ndaha’éi Caín ojuka haguéicha ityvýra Abel-pe, ohupyty hag̃ua mba’erepy, ha katu ojuka chupe ñe’ẽme’ẽmby rupi.

51 Caín ára guive oĩguikuri peteĩ tembiapo ñemi, ha hembiapokuéra oikókuri pytũmbýpe, ha ha’ekuéra oikuaákuri peteĩteĩ ijoyke’ýpe.

52 Upévare, Ñandejára omoñe’ẽngái Lamec ha hógape, ha opa umi ojapova’ekuépe konvénio Satanándi, noñongatúigui hikuái Tupã rembiapoukapykuéra, ha kóva ndoguerohorýi Tupã, ha ha’e noministrái chupekuéra; ha hembiapokuéra tembiapoky’ákuri ha oñepyrũ oñemosarambi opa yvypóra ra’ykuéra apytépe. Ha oĩkuri yvypóra ra’ykuéra apytépe.

53 Ha yvypóra rajykuéra apytépe noñeñe’ẽikuri ko’ã mba’ére, Lamec omombe’úguikuri upe mba’eñemi hembirekokuérape; ha ha’ekuéra oñemoĩ hese, ha omomarandu ko’ã mba’e opárupi, ha ndoguerokói hikuái poriahuvereko;

54 Upévare Lamec-pe ndojehayhúi ha oñemosẽkuri, ha ndohói yvypóra ra’ykuéra apytépe, okyhyjégui omanotaha.

55 Ha péicha oñepyrũ isarambi tembiapo pytũmbygua yvypóra ra’ykuéra apytépe.

56 Ha Tupã omoñe’ẽngái yvy ñe’ẽngái vaiete reheve; ha ipochyetékuri umi iñañávandi, opa yvypóra ra’ykuérandi, ha’e ojapova’ekue;

57 Nohenduséigui hikuái iñe’ẽpu, ni ndogueroviaséi Ita’ýra Unihénitope, jepeve upe ha’e omomaranduva’ekue outaha ára asaje mbytépe, oñembosako’iva’ekue múndo ojejapo mboyve.

58 Ha upéicha oñeñepyrũ oñembo’e pe Evanhélio, iñepyrũmby guive, oñemomarandúvo umi ánhel marangatúre, oñemboúva Tupã oĩhágui, ha iñe’ẽpu tee rupive, ha Espíritu Santo don rupive.

59 Ha upéicha oñekonfirma opa mba’e Adán-pe, peteĩ ordenánsa marangatu rupive, ha oñembo’e evanhélio, ha oñemomarandu peteĩ apoukapy, oĩtaha múndope ipahaite peve; ha upéichakuri. Amén